စက်တင်ဘာ ၆ အားကစားသတင်းများ

စက်တင်ဘာ ၆ ရက်၊ ၂၀၁၃
M-Media
ကိုလေး စုစည်းတင်ဆက်သည်။

မင်းဆံပင်ကိုညှပ်ပါ။ ဒါမှမဟုတ်ရင် ဘောလုံးဆိုတာမေ့လိုက်တော့။ (ဒဲလ်ဘော့စကေး မှ ဂူတီကို ပြောခဲ့သော စကား)

ရီးယဲလ်မက်ဒရစ်အသင်းနှင့် စပိန်အသင်းတို့၏ အလယ်တန်းကစားသမားဟောင်းဂူတီက ၎င်းငယ်ရွယ်စဉ်အချိန် စပိန်အသင်း၏လက်ရှိနည်းပြ ဒဲလ်ဘော့စကေးမှာ ၎င်း၏ဆံပင်ရှည်လျားမှုအတွင် သတိပေးပြောဆိုခဲ့ဖူးသည်ဟု ထုတ်ဖော်ပြောဆိုလိုက်သည်။ ကစားသမားဘ၀တစ်လျှောက်လုံးနီးပါး ဆံပင်အရှည်ဖြင့်သာ ကစားခဲ့ပြီး ရီးယဲလ်မက်ဒရစ်အသင်းတွင် ဒဲလ်ဘော့စကေးနှင့် လက်တွဲခဲ့သည့် ဂူတီမှာ ယခုအခါဘောလုံးကစားခြင်းမှ အနားယူသွားခဲ့ပြီဖြစ်သည်။ “ကျနော့်အသက် ၁၄ နှစ်လောက်မှာ ဒဲလ်ဘော့စကေးက တကယ်လို့ ကျနော့်ဆံပင်ကိုမညှပ်ဘူးဆိုရင် ကျနော်ဘောလုံးလောကကနေ ဝေးကွာသွားမယ်လို့ သတိပေးပြောဆိုခဲ့ဖူးပါတယ်။ အခုတော့ ကျနော် ညှပ်လိုက်ပါပြီ။ ဘောလုံးလောက က အနားယူပြီးမှပါ ” ဟု Punto Pelota သတင်းဌာနသို့ အရွှန်းဖောက် ပြောကြားခဲ့သည်။ ၎င်းအပြင်ဂူတီက “သူ(ဒဲလ်ဘော့စကေး) ဟာ ကျနော့်အတွက်တော့ နည်းပြကောင်းတစ်ဦးပါ။ ကျနော့်ကိုကြိုးစားဖို့အမြဲပြောခဲ့ပြီး အမြဲတမ်းလည်း ကူညီခဲ့ပါတယ်။” ဟု ဆရာဟောင်းဖြစ်သူအား ချီးကျူးခဲ့သေးသည်။
…………………………………………….
ဟီဂူအင်မှာ ကာဗာနီကဲ့သို့ ဂိုးများသွင်းယူနိုင်မည်ဟု ဘရီတို့စ်ဆို

နာပိုလီအသင်း၏ ဥရုဂွေးနောက်ခံလူဖြစ်သူ မီဂွယ် အိန်ဂျယ် ဘရီတို့စ်က ယခုနှစ်နွေရာသီအပြောင်းအရွှေ့တွင်မှ နာပိုလီသို့ရောက်ရှိလာသည့် ရီးယဲလ်တိုက်စစ်မှူးဟောင်း ဟီဂူအင်၏ စွမ်းဆောင်ရည်များကို ချီးကျူးပြောဆိုလိုက်သည်။ ယူရိုသန်း ၄၀ ဖြင့်ရောက်ရှိလာသည့် ဟီဂူအင်မှာ အကောင်းဆုံးအနေအထားသို့မရောက်သေးသော်လည်းခြေစွမ်းပြ ဂိုးများသွင်းယူနိုင်ခြင်းကြောင့် ဘရီတို့စ်က ယခုကဲ့သို့ပြောကြားလိုက်ခြင်းဖြစ်သည်။ “သူ့ရဲ့အမြင့်ဆုံးခြေစွမ်းကိုမရသေးပေမယ့်လည်း အကောင်းဆုံးတွေကို လုပ်ဆောင်ပြခဲ့ပါတယ်။ ကာဗာနီဂိုးသွင်းယူနိုင်သလောက်ကို ဟီဂူအင်လည်းသွင်းနိုင်မယ်လို့ ကျနော်ယုံကြည်ပါတယ်။ သူဟာ တကယ့်ကို သန်မာပါတယ်” ဟု Radio Kiss Kiss သို့ ဘရီတို့စ်က ပြောကြားခဲ့သည်။ ကာဗာနီမှာ နာပိုလီအသင်းတွင် ဘောလုံးရာသီသုံးရာသီကစားခဲ့ပြီး ဂိုးပေါင်း ၁၀၄ ဂိုးသွင်းယူပေးခဲ့ကာ အသင်းသမိုင်းတစ်လျှောက် တတိယဂိုးအများဆုံးသွင်းထားသူဖြစ်သည်။
…………………………………………….
ပယ်လီဂရီမှာ မန်စီးတီးအတွက် ပရီးမီးယားလိဂ်ဖလားအား ပြန်လည်ရယူပေးမည်ဟု အဂူရိုဆို

မန်ချက်စတာစီးတီးအသင်း၏တိုက်စစ်မှူးဖြစ်သူ ဆာဂျီယို အဂူရိုက မန်စီးတီးအသင်း ပရီးမီးယားလိဂ်ဆုဖလားအား ပြန်လည်ရယူရန်ကြိုးပမ်းမှုတွင် မန်ချက်စတာယူနိုက်တက်အသင်းနှင့် ချယ်ဆီးအသင်းတို့က အဓိကပြိုင်ဘက်များဖြစ်လာမည်ဟု ပြောဆိုလိုက်သည်။ ၎င်းအပြင် ဇွန်လကအသင်းသို့ရောက်ရှိလာပြီး အသင်းတောင့်တင်းအောင်ပြုလုပ်ခဲ့သည့် နည်းပြသစ် မန်နျူရယ် ပယ်လီဂရီနီကိုလည်း ချီးကျူးပြောဆိုခဲ့သည်”နည်းပြသစ်ကိုင်တွယ်နေတဲ့ မန်ယူအသင်းကို ရင်ဆိုင်ဖို့ခက်ပါလိမ့်မယ်။ ပြီးတော့ သူတို့ရဲ့လူစာရင်းက အထင်ကြီးလောက်စရာပါပဲ။ ချယ်ဆီးအသင်းဟာလည်း အန္တရယ်ရှိပါတယ်။ ဟိုဆေးမော်ရင်ဟိုဟာ အကောင်းဆုံးတွေကို ချယ်ဆီးအသင်းဆီ ယူဆောင်လာပါလိမ့်မယ်။ ဒါပေမယ့် ကျနော်တို့ဟာလည်း နည်းပြအသစ်နဲ့ပါ။ ပြီးတော့ ကျနော်တို့အသင်းကို ချန်ပီယံဖြစ်ဖို့အလားအလာရှိတဲ့အသင်းအဖြစ်အခြားအသင်းတွေက က ရှုမြင်ကြမယ်လို့ ကျနော်ထင်ပါတယ်။” ဟု အဂူရိုက ပြောကြားခဲ့သည်။
…………………………………………….
ပြင်သစ်လက်ရွေးစင်အသင်းတွင် အဘီဒယ်လ်ဆက်လက်ကစားလို

ကမ္ဘာ့ဖလားခြေစစ်ပွဲအဖြစ် ဂျော်ဂျီယာအသင်းနှင့် ယနေ့ယှဉ်ပြိုင်ကစားမည့် ပြင်သစ်အသင်းတွင် ရွေးချယ်ခံခဲ့ရသည့် အဘီဒယ်လ်က ၎င်းအနေဖြင့် ဘောလုံးကစားနိုင် သလောက် ပြင်သစ်လက်ရွေးစင်အသင်းတွင် ပါဝင်ကစားချင်သည်ဟုပြောကြားခဲ့သည်။ အဘီဒယ်လ်မှာ ကင်ဆာရောဂါကြောင့် ပြီးခဲ့မတ်လက ကျောပ်ကပ်အစားထိုးကုသခဲ့ရပြီး ဘောလုံးလောကနှင့် ၁၂ လခန့် ကင်းကွာနေခဲ့သည်။ အသက် ၃၃ အရွယ်ရှိ အဘီဒယ်လ်က “သိပ်ကိုခက်ခဲခဲ့ပါတယ်။ ဒါပေမယ့် ကျနော်အန်တုနိုင်ခဲ့ပြီး၊ ကျနော်ရဲ့နေရာကို အခု ကျနော်ပြန်ရောက်ပါပြီ။ တကယ်လို့ ကျနော်ရဲ့ကျန်းမာရေးအခြေအနေက ဘောလုံးဆက်ကစားဖို့ ခွင့်မပြုတော့ဘူးဆိုရင်တော့ ကျနော်အနားယူမှာပါ။ ဒါပေမယ့် ဒီလိုမဖြစ်ခဲ့ပါဘူး။ ကျနော်ရဲ့အတွေ့အကြုံအရ ကျနော်ယုံကြည်မှုသိပ်မရှိပါဘူး။ ဒါပေမယ့် (ပြင်သစ်)နည်းပြက ကျနော့်မှာ ဒီပွဲအတွက် လုံလောက်တဲ့ ပြင်ဆင်မှုတွေရှိနေတယ်လို့ပြောပါတယ်။ အခုကျနော် လက်ရွေးစင်အသင်းမှာပါဝင်နေပြီး ဆက်လက်ပြီးလည်း ကစားချင်ပါတယ်” ဟု လက်ရွေးစင်အသင်းတွင်သူ့အားရွေးချယ်ခဲ့မှုနှင့် ပက်သက်၍ ပြေကြားခဲ့သည်။ အဘီဒယ်လ်မှာ ပြင်သစ်လက်ရွေးစင်အသင်းအတွက် ၆၂ ပွဲကစားပေးထားသည်။
…………………………………………….
မိမိအားဆက်လက်အားပေးနေသည့်အတွက် ဂျူဗင်တပ်စ်အား လော်ရန်တေး ကျေးဇူးတင်

ဂျူဗင်တပ်စ်အသင်းတွင် ရာသီအစ အခက်အခဲများရှိနေသော်လည်း စိတ်မပျက်ဘဲ ၎င်းအား အားပေးခဲ့ကြသည့် ဂျူဗင်တပ်စ်အသင်း ပရိတ်သတ်များအား ကျေးဇူးတင်ကြောင်း တိုက်စစ်မှူးသစ် လော်ရန်တေးက ပြောကြားခဲ့သည်။ လော်ရန်တေးမှာ အက်သလက်တီကိုဘီလ်ဘာအိုအသင်းမှ ဂျူဗင်တပ်စ်အသင်းသို့ အလွတ်ပြောင်းရွှေ့ကြေးဖြင့် ပြောင်းရွှေ့လာခဲ့ခြင်းဖြစ်ပြီး တိုက်စစ်မှူး ကားလို့စ်တီဗက်ဇ်နှင့် မီရန်ကို ဗူချီနစ်တို့၏နောက် တတိယဦးစားပေး တိုက်စစ်မှူးအဖြစ်သာ ရှိနေသည်။ “ကျနော့်ကိုယုံကြည်မှုတွေပေးပြီး ဆက်လက်အားထားနေကြတဲ့ လူတိုင်းကို ကျနော်ကျေးဇူးတင်ပါတယ်။ ခင်ဗျားတို့ရဲ့ယုံကြည်မှုတွေကို ပျော်ရွှင်စရာ အချိန်တွေနဲ့ပြန်လည်ပေးဆပ်ဖို့ နေ့တိုင်း အလုပ်ကိုကြိုးကြိုးစားစားလုပ်နေပါတယ်။” ဟု လော်ရန်တေးက သူ၏ ဖေ့စ်ဘုတ်စာမျက်နှာတွင် ရေးသားခဲ့သည်။
…………………………………………….
အာဆင်နယ်တွင်ပြန်လည်ကစားရခြင်းကို ဖလာမီနီပျော်ရွှင်

အေစီမီလန်အသင်းမှ အလွတ်ပြောင်းရွှေ့ကြေးဖြင့်အဆင်နယ်အသင်းသို့ ပြန်လည်ရောက်ရှိလာသည့် ဖလာမီနီက အာဆင်နယ်အသင်းတွင်ပြန်လည် ကစားရသည်ကို ပျော်ရွှင်မိကြောင်းပြောကြားခဲ့သည်။ ယခင် တစ်ပတ်ကမြို့ခံပြိုင်ဘက် စပါးအသင်းအား ၁ ဂိုး ဂိုးမရှိဖြင့် အနိုင်ရရှိခဲ့သောပွဲတွင် လူစားဝင်ကစားခဲ့သည့် ဖလာမီနီက “ကိုယ့်အိမ်ကို ပြန်ရောက်လာသလို ကျနော် ခံစားမိပါတယ်။ စပါးနဲ့ဒါဘီပွဲဟာ ပွဲကြီးတစ်ပွဲပါ။ ” ဟု ဖလာမီနီ၏ပြောကြားမှုအား အာဆင်နယ်အသင်း၏ ၀ဘ်စာမျက်နှာတွင် ဖော်ပြထားသည်။ ဖလာမီနီမှာ ၂၀၀၄ ခုနှစ်မှ ၂၀၀၈ ခုနှစ်အထိ အာဆင်နယ်အသင်းတွင် ကစားခဲ့ဖူးသည်။
…………………………………………….
ဝါ၀ရင်ကာနှင့် ဂျိုကိုဗစ်တို့ ဆီးမီးဖိုင်နယ်သို့ တက်ရောက်ခဲ့ကြသည့် ယူအက်စ်အိုးပင်းတင်းနစ်ပြိုင်ပွဲ

အမေရိကန်နိုင်ငံ နယူးယောက်မြို့တွင် ကျင်းပြုလုပ်နေသည့် ယူအက်စ်အိုးပင်းတင်းနစ်ပြိုင်ပွဲ အမျိုးသားပွဲစဉ်တွင် လက်ရှိချန်ပီယံ အန်ဒီမာရေးမှာ ကွာတားဖိုင်နယ်တွင် ၀ါဝရင်ကာ အားရှုံးနိမ့်ခဲ့ပြီး၊ ကမ္ဘာ့နံပါတ် ၁ ဂျိုကိုဗစ်မှာ ယူဇနီအား အနိုင်ရရှိခဲ့သည်ဟုသိရသည်။

ဆွစ်ဇလန်တင်းနစ်သမား စတာနစ်လတ် ၀ါဝရင်ကာမှာ အန်ဒီမာရေးအား ၆-၄၊ ၆-၃၊ ၆-၂ ဖြင့် သုံးပွဲပြတ်အနိုင်ရရှိခဲ့ခြင်းဖြစ်သည်။ ၀ါဝရင်ကာမှာ လွန်ခဲ့သည့်သုံးနှစ်ကလည်း အန်ဒီမာရေးအား ယူအက်စ်အိုးပင်းတတိယအဆင့်တွင် ဖြုတ်ချနိုင်ခဲ့သူဖြစ်ပြီး ယခုနိုင်ပွဲကြောင့် ဂရန်းစလမ်းပြိုင်ပွဲကြီးများတွင် ဆီးမီးဖိုင်နယ်သို့ ပထမဦးဆုံးတက်ရောက်နိုင်ခဲ့သည်။

ကမ္ဘာ့နံပါတ် ၁ တစ်နစ်သမား နိုဗက်ဂျိုကိုဗစ်မှာ ရုရှားမှ မစ်က်ဟေးလ် ယူဇနီအား ၆-၃၊ ၆-၂၊ ၃-၆၊ ၆-၀ ဖြင့်အနိုင်ရရှိခဲ့သည်။ ထိုပွဲအနိုင်ကြောင့် ဂျိုကိုဗစ်မှာ ဂရန်းစလမ်းပြိုင်ပွဲကြီးများတွင် ၁၄ ကြိမ်ဆက်တိုက် ဆီမီးဖိုင်နယ်သို့တက်ရောက်နိုင်သူဖြစ်လာသည်။

ယူအက်စ်အိုးပင်းပြိုပွဲ အမျိုးသား ဆီးမီးဖိုင်နယ်ပွဲစဉ်များကို စနေနေ့တွင် ယှဉ်ပြိုင်ကစားမည်ဖြစ်ပြီး ဆီမီးဖိုင်နယ်ပွဲစဉ် ၁ တွင် ရာဖေးလ် နာဒယ်လ်နှင့် ရစ်ချက် ဂတ်စ်ကတ်တို့ တွေ့ဆုံယှဉ်ပြိုင်ရမည်ဖြစ်ကာ၊ ပွဲစဉ် ၂ တွင် ဂျိုကိုဗစ်နှင့် ၀ါဝရင်ကာတို့ ယှဉ်ပြိုင်ကစားရမည်ဖြစ်သည်။ ယူအက်စ်အိုးပင်းနောက်ဆုံးဗိုလ်လုပွဲကို စက်တင်ဘာ ၉ ရက် တနင်္လာနေ့တွင် ကစားမည်ဖြစ်သည်။
skysports
…………………………………………….
ကျမရဲ့အဖေဟာ ကျမအပေါ် ကြီးမားတဲ့ လွှမ်းမိုးမှု ရှိနေတုန်းပါပဲ (ဆရီနာဝီလီယံ)

ယူအက်စ်အိုးပင်းချန်ပီယံဖြစ်ရန် လက်တစ်ကမ်းအကွာသို့ရောက်ရှိနေသည့် အမေရိကန်နာမည်ကြီးတင်းနစ်မယ် ဆရီနာဝီလီယံက သူမ၏ တင်းနစ်ကစားသမား ဘ၀တွင် သူမ၏ အဖေဖြစ်သူက အဓိက အခန်းကဏ္ဍမှ ပါဝင်နေသည်ဟု ပြောဆိုလိုက်သည်။ ယူအက်စ်အိုးပင်း ဆီမီးဖိုင်နယ်တွင် တရုတ်တင်းနစ်မယ်လီနာနှင့် ယှဉ်ပြိုင်ရမည့် ဆရီနာက “အဖေဟာ သိပ်ကိုဆန်းသစ်တီထွင်တတ်ပါတယ်။ အချို့ပွဲတွေမှာ ကျမအကောင်းဆုံးကစားနေနိုင်တဲ့အကြောင်းအရင်းကတော့ အဖေ့ရဲ့စီမံခန့်ခွဲမှုကြောင့်လို့ ကျမထင်ပါတယ်။ ပြီးတော့ အဖေဟာ ကျမအမကိုလည်း စီမံပေးပါသေးတယ်။ အဖေဟာကျမကို အကောင်းဆုံးခြေခံကိုပေးခဲ့ပါတယ်။ ဒီကနေ့အချိန်အထိ အဖေဟာ နည်းပြကောင်း တစ်ဦးပါပဲ။ ဟိုတစ်နေ့က ကျမဆီကို အဖေစာတစ်စောင်ရေးခဲ့တယ်။ အဲဒီစာကိုဖတ်ပြီးတဲ့အခါ ‘ဒါဟာငါတကယ်လုပ်ရမယ်ဟာပဲ’လို့ ကျမသိခဲ့ပါတယ်။ အဲဒီစာထဲမှာပါတဲ့အကြံပြုချက်ဟာ ပွဲကစားချိန်အတွင်းမှာ ကျမကိုကူညီခဲ့ပါတယ်” ဟု ၎င်း၏ကစားသမားဘ၀တွင် ဖခင်၏ အရေးပါမှုအား ဖွင့်ဟခဲ့သည်။