Malaysia: ချင်းလူမျိုး ၂၀၀ ခန့် မလေးရှားတွင် ထိန်းသိမ်းခံရ

စက်တင်ဘာ ၇ ရက်၊ ၂၀၁၃ ခုနှစ်
M-Media
Ref: Chinland Guardian

မလေးရှား ရောက် ချင်းဒုက္ခသည်များ ( (Photo: ACR))

မလေးရှား နိုင်ငံအ၀ှမ်း တရားမ၀င်နေထိုင်သူများကို ဖမ်းဆီးနေသည့် လတ်တစ်လော စီမံချက်အတွင်း ချင်းလူမျိုး ၂၀၀ နီးပါး အဖမ်းခံရပြီး ထိန်းသိမ်းရေး စခန်း၌ရောက်ရှိနေသည်ဟု ချင်းတိုင်းရင်းသား ဒုက္ခသည်များဆိုင်ရာအဖွဲ့က ပြောဆိုလိုက်သည်။ ထိန်းသိမ်းခံဦးရေအတိအကျကိုမူ အတည်မပြုနိုင်သေးကြောင်း အဖွဲ့၏ခေါင်းဆောင် တစ်ဦးမှ Chinland Guardian သို့ပြောပြခဲ့သည်။

“ ဒီခန့်မှန်းဦးရေစာရင်းထဲမှာ UN မှတ်ပုံတင်ကဒ် ကိုင်ဆောင်သူ နဲ့ အထောက်အထားမရှိသူ နှစ်မျိုးလုံး ပါဝင်နေကြောင်းလည်း သိရပါတယ် ” ဟု အမည်မဖော်လိုသူ ချင်း တိုင်းရင်းသားခေါင်းဆောင် တစ်ဦးက ဆိုသည်။

ပြီးခဲ့သည့် တနင်္ဂနွေ နှင့် တနင်္လာနေ့မှ စတင်လိုက်သော စီမံချက်အတွင်း မလေးရှားအာဏာပိုင်များမှ ဖမ်းဆီးခဲ့သူပေါင်း ၂၀၀၀ ကျော်သွားပြီဖြစ်ပြီး ၄င်းတို့အနက် မြန်မာနိုင်ငံသား ၅၅၅ ဦး ပါဝင်နေသည်။

အဖမ်းဆီးခံရသည့် ရွှေ့ပြောင်းလုပ်သားတို့နှင့်စပ်လျဉ်း၍ မလေးရှား အာဏာပိုင်တို့နှင့် ဆွေးနွေးဆောင်ရွက်ရန် မြန်မာအစိုးရမှ ကိုယ်စားလှယ်များကို စေလွှတ်သွားမည်ဖြစ်ကြောင်း သိရသည်။

သမ္မတရုံး၏ပြောဆိုခွင့်ရသူ ဦးရဲထွဋ်က မြန်မာနိုင်ငံသားအဖြစ် ဖော်ပြခြင်းခံရသူများကို ပြန်လည်ခေါ်ယူမည်ဖြစ်ကြောင်း ဧရာဝတီသို့ ပြောဆိုခဲ့သည်။