စက်တင်ဘာ ၁၂ အားကစားသတင်းများ

စက်တင်ဘာ ၁၂၊ ၂၀၁၃
M-Media

အခြားသူတွေအား ပျော်ရွှင်အောင်လုပ်ရခြင်းကို ကြိုက်သည့် အီဗရာဟီမိုဗစ်
ပဲရစ်စိန့်ဂျာမိန်းအသင်း၏ တိုက်စစ်မှူးဖြစ်သူ ဇလာတန်အီဗာဟီမိုဗစ်က သူ့အား စိတ်ကြီးဝင်သည်ဟု ပြောဆိုနေမှုများကို ငြင်းဆန်လိုက်ပြီး သူ၏အသင်းဖော်များနှင့် ပရိတ်သတ်များအား ပျော်ရွှင်ကျေနပ်အောင် ပြုလုပ်ပေးသူတစ်ဦးဖြစ်သည်ဟု ပြောဆိုလိုက်သည်။

အသက် ၃၁ နှစ်အရွယ်ရှိပြီဖြစ်သည့် အီဗရာဟီမိုဗစ်မှာ သူ၏ ကစားသမား သက်တမ်းတစ်လျှောက် မကြာခဏ နာမည်ဆိုးဖြင့်ကျော်ကြားခဲ့သူဖြစ်ပြီး ဘာစီလိုနာတွင်ရှိစဉ်အခါက နည်းပြ ဂွါဒီယိုလာနှင့် အဆင်မပြေဖြစ်ခဲ့သည့် ဖြစ်ရပ်များစွာလည်းရှိခဲ့သည်။

“လူတွေကတစ်ချိန်လုံး ကျနော့်ကို မာနကြီးတဲ့လူတစ်ယောက်လို့ ထင်နေတယ်ဆိုတာ ကျနော်ဖတ်ရပါတယ်။ သူတို့က ကျနော့်ကို ကိုယ့်ကိုကိုယ် အထင်ကြီးနေတဲ့သူ၊ အကျင့်ဆိုးတဲ့သူလို့ပြောကြပါတယ်။ ကျနော် ငယ်ငယ်ကတည်းကနေ ဒါမျိုးတွေ ကြားရခဲ့တာပါ။ ဒါပေမယ့် သူတို့ကျနော်နဲ့ဆုံတဲ့အခါ ‘မင်းဟာ ပုံရိပ်ဆိုးတွေနဲ့မလိုက်ပါဘူးလို့’ ပြောကြပါတယ်။ ဘယ်အသင်းမှာပဲ ကစားခဲ့ကစားခဲ့ ကျနော်အောင်မြင်ပါတယ်။ ဒါပေမယ့် ကျနော့်ရဲ့အသင်းဖော်တွေ ပရိတ်သတ်တွေနဲ့ လူတိုင်းပျော်ရွှင်မှသာ ကျနော်ကျေနပ်တာပါ။ ကျနော့်မှာ ကြင်နာတဲ့နှလုံးသားရှိပါတယ်” ဟု အီဗရာဟီမိုဗစ်က ဘီဘီစီသို့ ပြောကြားခဲ့သည်။

မာတာမှာ ပရီးမီးယားလိဂ် အကောင်းဆုံးကစားသမားများထဲမှ တစ်ဦးဟု အိုဗန်နိုဗစ်ဆို
ချယ်ဆီးနောက်ခံလူ အိုင်ဗန်နိုဗစ်က အသင်းဖော်တိုက်စစ်မှူး ဂျူအန်မာတာမှာ ပရီးမီးယားလိဂ်အကောင်းဆုံးကစားသမားများထဲမှတစ်ဦးဟုမှတ်ချက်ပေးပြောဆိုလိုက်သည်။ မာတာမှာ ယမန်နှစ်ဘောလုံးရာသီတွင် ယူရိုပါဖလားရရှိခဲ့ပြီး ပရီးမီးယားလိဂ်တတိယနေရာကို ရယူနိုင်ခဲ့သည့် ချယ်ဆီးအသင်းတွင်အထူးခြေစွမ်းပြခဲ့ပြီး ပြိုင်ပွဲအသီးသီးတွင် ၁၉ ဂိုးသွင်းယူကာ ဂိုးသွင်းရန်အတွင် ၃၅ ကြိမ်ဖန်တီးပေးနိုင်ခဲ့သည်။

“လွန်ခဲ့တဲ့ ၂ နှစ်လောက်ကတည်းက သူဟာ အကောင်းဆုံး ကစားသမားတွေထဲက တစ်ယောက်ပါ။ သူဟာကျနော်တို့အားလုံးနဲ့ အသင်းတွက်တကယ့်ကို အရေးကြီးတဲ့ ကစားသမားတစ်ဦးလည်းဖြစ်ပါတယ်။ ကျနော့်အတွက်တော့ မာတာဟာ ပရီးမီးယားလိဂ် အကောင်းဆုံးအရည်အသွေးရှိတဲ့ကစားသမားတစ်ဦးပါလို့ ကျနော်အမြဲတမ်းပြောပါတယ်။ ပြောင်မြောက်တဲ့စွမ်းရည်ရှိပြီး သိပ်တော်တဲ့ကစားသမားတစ်ဦးပါ” ဟု အိုင်ဗန်နိုဗစ်ကသတင်းထောက်များသို့ပြောကြားခဲ့သည်။

ကျွန်တော်ဟာ ကယ်တင်ရှင်မဟုတ်ပါဘူးလို့ ဆိုခဲ့သူ ရီဘာရီ

ဘီလာရုစ်အသင်းနှင့် ကစားခဲ့သည့်ပွဲတွင် အနိုင်ဂိုးသွင်းယူခဲ့သောကြောင့် ပြင်သစ်အသင်း၏ ကယ်တင်ရှင်ဟု သတ်မှတ်မှုများအား ကွင်းလယ်လူ ရီဘာရီက ငြင်းဆိုလိုက်သည်။ အသက် ၃၀ အရွယ်ရှိပြီဖြစ်သည့် ရီဘာရီမှာ ပြင်သစ်အသင်းက ဘီလာရုဇ်အသင်းအား နောက်မှလိုက်ကစားကာ ၄ ဂိုး ၂ ဂိုးဖြင့်အနိုင်ရရှိခဲ့သော ကမ္ဘာ့ဖလားခြေစစ်ပွဲတွင် ၂ ဂိုးသွင်းယူခဲ့သည်။

“ကျွန်တော်ဟာ ကယ်တင်ရှင်မဟုတ်ပါဘူး။ ၂ ဂိုး ၁ ဂိုးနဲ့ အနောက်က လိုက်ကစားရတဲ့အချိန်မှာ မြန်မြန် ချေပဂိုးသွင်းဖို့ ကျနော်တို့ ကံကောင်းခဲ့ပါတယ်” ဟု ရီဘာရီက သတင်းထောက်များကို ပြောကြားခဲ့သည်။

ရီဘာရီ၏ စွမ်းဆောင်ရည်နှင့်ပက်သက်ပြီး ပြင်သစ်နည်းပြ ဒက်စ်ချမ့်က “ကျနော်တို့မှာ ရီဘာရီလိုကစားသမားကောင်းတွေရှိပြီး ဒါကိုလည်း သူက သက်သေပြခဲ့ပါတယ်” ဟု ပြောကြားခဲ့သည်။

တောင်အာရှဖလား ဘောလုံးပြိုင်ပွဲတွင် အာဖဂန်နစ္စတန်ဗိုလ်စွဲ

တောင်အာရှဘောလုံးအဖွဲ့ချုပ် (SAFF) မှကျင်းပသည့် တောင်အာရှဖလားဘောလုံးပြိုင်ပွဲ နောက်ဆုံးဗိုလ်လုပွဲကို နီပေါနိုင်ငံ ကတ်မန်ဒူမြို့တွင်ယှဉ်ပြိုင်ကစားခဲ့ရာ လက်ရှိချန်ပီယံ အိန္ဒိယအသင်းအား  အာဖဂန်နစ္စတန်အသင်းက ၂-ဂိုး ဂိုးမရှိဖြင့် အနိုင်ရရှိ ဗိုလ်စွဲသွားသည်ဟုသိရသည်။

ပရိတ်သတ်ငါးထောင်နီးပါးလာရောက်ကြည့်ရှုခဲ့ကြပြီး အာဖဂန်နစ္စတန်အတွက်ဂိုးများကို ၉ မိနစ်တွင် မွစ်တာဖာ အဇဒ်ဇွီနှင့် ၆၂-မိနစ်တွင် ဆန်ဂျာ အဟ်မဒ်ဒီတို့က သွင်းယူပေးခဲ့ခြင်းဖြစ်သည်။ ယခုပွဲအနိုင်ကြောင့် အာဖဂန်နစ္စတန်အနေဖြင့် ၂၀၁၁-ခုနှစ် ဖိုင်နယ်တွင် အိန္ဒိယအား ရှုံးနိမ့်ခဲ့သည့် `ရှုံးကြွေးအား ပြန်လည်ဆပ်နိုင်ခဲ့ခြင်းဖြစ်သည်။

“ကျနော်တို့နိုင်ငံအတွက်၊ ကျနော်တို့ပြည်သူတွေအတွက် ကျနော်တို့အသင်းအတွင် ပြီးကျနော့်အတွက် ဒီခဏဟာဘယ်လောက်တောင် ကြီးမားသလဲဆို တွေးလို့ကိုမရပါဘူး။ ဒီပွဲဟာ ကျနော်တို့အတွက်အရေးကြီးတဲ့ပွဲဖြစ်ပြီး လက်စားချေလိုချင်တဲ့အတွက်ကြောင့်မဟုတ်ပါဘူး” ဟု အာဖဂန်နစ္စတန်အသင်း၏နည်းပြဖြစ်သူ ယူဆက်ဖ်ကာဂါက ပွဲအပြီးတွင် ပြောကြားခဲ့သည်။

ဂါရက်ဘေးလ် ရီးယဲလ်နှင့် ပထမဦးဆုံး လေ့ကျင့်ခန်းဆင်း

ကမ္ဘာ့စံချိန်တင်ပြောင်းရွှေ့ကြေးဖြင့် ရီးယဲလ်အသင်းသို့ရောက်ရှိလာသော ဂါရက်ဘေးလ်မှာ ပထမဦးဆုံးအကြိမ်အဖြစ် ယမန်နေ့ကအသင်းနှင့် လေ့ကျင့်ခန်းဆင်းခဲ့သည်ဟုသိရသည်။လေ့ကျင့်ခန်းမဆင်းမီ ခရစ္စတီယာနိုရော်နယ်ဒိုနှင့်တွေ့ဆုံခဲ့သည့် ဘေးလ်မှာ အသင်းနည်းပြနှင့် ကြံ့ခိုင်မှုဆိုင်ရာလေ့ကျင့်ခန်းများကို ပြုလုပ်ပြီးနောက် အီကာကာဆီးလက်စ်၊ လူကာမိုဒရစ်၊ ကရင်မ်ဘန်ဇီမာ၊ ဒန်နီယဲလ်ကာဗာဂျယ်၊ အလ်ဗာရို မိုရာတာ၊ နာချိုနှင့် ဂျီဆီတို့နှင့်အတူ အပေါ့စားလေ့ကျင့်ခန်းများပြုလုပ်ခဲ့သည်။ လာမည့် စနေနေ့ ဗီလာရီးယဲလ်အသင်းနှင့်ကစားမည့် လာလီဂါပွဲတွင် ဘေးလ်မှာ ရီးယဲလ်အသင်းနှင့် ပထမဦးဆုံးပွဲထွက်ဖွယ်ရှိနေသည်။