ပြည်သူလူထုအင်အားကို မျှော်လင့်ထားတဲ့ UNC

စက်တင်ဘာ ၁၆၊ ၂၀၁၃
M-Media
သုတ

ရန်ကုန် ။ ။ UNC (အမျိုးသားညီညွတ်ရေးကွန်ဂရက် ပါတီ)၏ ပသီအမျိုးသားရေးရာ ဆောင်ရွက်မှုများနှင့် စပ်လျဉ်း၍ တတိယအကြိမ်မြောက် အကြံပြု ဆွေးနွေးပွဲကို မနေ့က နေ့လည် ၂း၃၀-နာရီက ရန်ကုန်မြို့၊ တာမွေမြို့နယ်ရှိ ပါတီဋ္ဌာနချုပ်မှာ ပြုလုပ်ခဲ့ပြီး လူ ၁၀၀-ခန့် တက်ရောက်ခဲ့ကြသည်။

၎င်းဆွေးနွေးပွဲတွင် သဘာပတိဦးမြင့်ဝေမှပြောကြားရာတွင် တိုင်းရင်းသားညီအစ်ကို မောင်နှမများ အချင်းချင်း စည်းလုံးညီညွတ်မှုရရှိအောင် ဆောင်ရွက်ရန်၊ ဒီမိုကရေစီဖော်ဆောင်ရေး အလွန် အရေးကြီးကြောင်း၊ ပါတီညီလာခံ ခေါ်ယူရန်နှင့် ပသီလူမျိုးမှာ ရှေးပဝေဿနီကပင် ရှိခဲ့ကြောင်းနှင့် ကွယ်ပျောက်နေသော လူမျိုးစုကို ပြန်လည်ဖော်ထုတ်ရန် လိုအပ်ကြောင်းနှင့် ပြည်သူလူထုရဲ့ အင်အားကို UNC အနေနဲ့ အများကြီး မျှော်လင့်ထားကြောင်းကိုလည်း ပြောကြား ခဲ့သည်။ ထို့နောက် အထွေထွေအတွင်းရေးမှူး ဦးမြင့်သိန်းမှ ပါတီမူဝါဒများနှင့် ရှေ့လုပ်ငန်းစဉ်များအား ရှင်းလင်းပြောကြားခဲ့ပြီး၊ ဥပဒေကိစ္စရပ်များ နိုင်ငံသားအခွင့်အရေးများနှင့်ပတ်သက်၍ ဦးခင်မောင်ချို (တရားလွှတ်တော်ရှေ့နေ)မှ ရှင်းလင်းပြောကြားသွားခဲ့သည်။ အမှုဆောင်အဖွဲ့ဝင် ဦးထွန်းဝင်းမှ နိုင်ငံရေးကိစ္စများအား ရှင်းလင်းပြောကြားသွားခဲ့ကြသည်။

ထို့နောက် တက်ရောက်လာကြသူများမှာ သိလိုသည်များကို ၀ိုင်းဝန်းဆွေးနွေးခဲ့ကြသည်။ လူငယ်များမှ သန်းခေါင်စာရင်းကိစ္စနှင့် မှတ်ပုံတင်ကိစ္စများကိုလည်း အဓိက ဆွေးနွေးသွားခဲ့သည်။ တက္ကသိုလ်ဘွဲ့ရ ကျောင်းသားတစ်ဦးမှ မိမိတို့ မြန်မာမွတ်စလင်မ်အများစုမှာ ၃-ခေါက်ချိုး မှတ်ပုံတင်သာ ကိုင်ဆောင် ထားရကြောင်း ကျောင်းပြီးသွားသော်လည်း ဘွဲ့လက်မှတ်မရရှိကြောင်း၊ ကျောင်းကို ပြောသောအခါ ကျောင်းကလည်း နိုင်ငံသားကတ်ရမှသာ ဘွဲ့လက်မှတ် ထုတ်ပေးမည် ဖြစ်ကြောာင်း ထို့ကြောင့် မိမိတို့ သူငယ်ချင်း အယောက်(၂၀)ခန့် ဘွဲ့လက်မှတ် မရရှိကြောင်း တို့ကို မေးမြန်းခဲ့ပြီး UNC အနေနဲ့ အဆိုပါ ကိစ္စရပ်များအတွက် နိုင်ငံတော်မှ တာဝန်ရှိသူများနှင့် ဆက်လက်ဆွေးနွေးလုပ်ဆောင်သွားမည်ဖြစ်ကြောင်း ပြောကြားခဲ့သည်။

ဘာသာတရားပြောင်းလဲလိုက်မှုကြောင့် မိမိအနေဖြင့် လူမျိုးလည်း ပျောက်သွားရသည်ဆိုသူ တက်ရောက်လာသူတစ်ဦးမှ “ကျွန်တော် အရင်က ဗုဒ္ဓဘာသာပါ။ အခုတော့ မွတ်စလင်မ်တစ်ယောက်ပါ။ ကျွန်တော်တို့က အခုအခြေအနေမှာ ပြေဇာပင်ဖြစ်နေရတယ်။ အဓိက မြန်မာနိုင်ငံမှာ တိုင်းရင်းသား စည်းလုံး ညီညွတ်ရေးကို ကိုင်ဆောင်ပြီးလုပ်နေတော့ ကျွန်တော်တို့ကို တိုင်းရင်းသားစာရင်းထဲ မပါဘူးဆိုပြီး ဘေးထုတ်ခံရတယ်။ ကျွန်တော်တို့ ဒီနေ့မှာ ကိုယ့်ကိုယ်ကို အယူသည်းနေမယ်ဆိုရင် မြေဇာပင်ခံရမှာ ကျွန်တော်တို့ရဲ့ သားသမီးမြေးတွေဖြစ်တယ်။ တက်ရောက်လာသူတွေကို ကျွန်တော် ဆွေးနွေးချင်တာက ကျွန်တော် ဒီပါတီကိုယ်စား ပြောတာလည်း မဟုတ်ဘူး။ ဧည့်သည်တစ်ယောက်အနေနဲ့ပြောတာပါ။ ကျွန်တော် ခံစားချက်နဲ့ ဒီစကားကို ပြောပါတယ်။ တချို့ကပြောတယ် ငါတို့က ဟိုဟာ ငါတို့က ဒီဟာဖြစ်လို့ ဒီပါတီကို ဘာလို့ ထောက်ခံရမလဲဆိုတာမျိုး ကျွန်တော့်သူငယ်ချင်းထဲမှာကို ပြောတယ်။ ဒါပေမယ့် ကျွန်တော်မေတ္တာရပ်ခံတာက ဒီပါတီဟာ ကျွန်တော်တို့အမျိုးသားညီညွတ်ရေးအတွက်လုပ်နေတာပါ။ ဒါကြောင့် ဟိုဟာဒီဟာဖြစ်လို့ မထောက်ခံဘူး မဖြစ်စေချင်ပါဘူး။ ကျွန်တော်တို့ လူမျိုးတွေဟာ အများစု education ပိုင်းအားနည်းကြပါတယ်။ အဲဒါကို မြှင့်တင်ဖို့လိုပါတယ်။ ကျွန်တော့်ဇနီးကိုယ်တိုင်က မြန်မာစာ မသင်ခဲ့ရတော့ ဒါမျိုးတွေကို နားမလည်ဘူး။ ကျွန်တော့်ကိုပြောတယ်။ ကျွန်တော်က မြန်မာပဲ ဘာလို့ ပသီဆိုတာကိုပြောတာလဲလို့မေးတယ်။ ကျွန်တော်က အခု မွတ်စလင်မ်ဖြစ်လာတဲ့အတွက် မွတ်စလင်မ်ဆိုတာနဲ့ မှတ်ပုံတင်မှာ မြန်မာမဟုတ်တော့ဘူးလို့ ထည့်ခံရတယ်။ ကျွန်တော်လည်း လူမျိုးပျောက်သွားတယ်။ ကျွန်တော်တို့ နိုင်ငံမှာ ဒီလိုဖြစ်နေတယ်။ တခြားတိုင်းရင်းသားတွေမှာလည်း ဘာသာပေါင်းစုံရှိကြတယ်။ ဥပမာ ကရင်မှာ ဗုဒ္ဓဘာသာရှိသလို၊ ခရစ်ယာန်လည်းရှိတယ်၊ မွတ်စလင်မ်လည်းရှိတယ်။ ဒါကြောင့် ကျွန်တော်တို့တွေ စိတ်ဝမ်းမကွဲပဲနဲ့ တက်ညီလက်ညီ ပန်းတိုင်အရောက် သွားကြဖို့လိုတယ်။ ဒါကြောင့် သန်းခေါင်စာရင်း ကောက်ယူတဲ့အချိန်မှာလည်း မြန်မာမွတ်စလင်မ်တွေအားလုံး တညီတညွတ်တည်း ပသီလို့ ခံယူဖြည့်စေ ချင်တယ်။ ဒါက ကျွန်တော် ကိုယ်တိုင် ခံစားရတဲ့အတွေ့အကြုံအရ ပြောတာပါ။ လက်ခံတာ လက်မခံတာက ကိုယ်တိုင် ဆုံးဖြတ်ရမှာပါ။”လို့ ဆွေးနွေး ပြောကြားသွားခဲ့ပါတယ်။

ဥက္ကဋ္ဌ နိဂုံးချုပ်စကားတွင် သားစဉ်မြေးဆက် မိမိတို့ကြောင့် နာမည်မပျက်ကြရအောင် အမျိုးသားရေးကို သစ္စာရှိရှိနဲ့ လုပ်ဆောင်သွားကြရန် တိုက်တွန်းပြောကြား သွားခဲ့ပါတယ်။