ရွေးကောက်ပွဲ အနိုင်ရသော ဂျာမဏီဝန်ကြီးချုပ် Merkel ၏ ပါတီမှ ပထမဆုံး မွတ်စ်လင်မ် လွှတ်တော်အမတ်

စက်တင်ဘာ၊ ၂၄
M-Media

တနင်္လာနေ့က ရွေးကောက်ပွဲရလဒ်ထုတ်ပြန်ချက်တွင် ဓာတုဗေဒပညာရှင် နှင့် ရုပ်ရှင်သရုပ်ဆောင်တို့သည် ဂျာမဏီနိုင်ငံ၏ ပထမဆုံးသော လူမည်းအမျိုးသား သီးခြားလွှတ်တော် အမတ်များဖြစ်လာကြောင်း ဖော်ပြခဲ့သည်။ ၄င်းတို့နှစ်ဦးလုံးမှာ ဆီနီဂေါဇာတိဖွားများ ဖြစ်ကြသည်။ ပြောင်းရွှေ့ဝင်ရောက် အခြေချနေထိုင်လာပြီး လွှတ်တော်အမတ်အဖြစ် ၀င်ရောက်အရွေးခံသူ ၃၄ ဦးအနက် ၂၁ ဦးမှာ နေရာရရှိခဲ့ကြသည်ဟု ဂျာမဏီနိုင်ငံ လူဝင်မှုစစ်တမ်းဆိုင်ရာအဖွဲ့ Migration Media Service မှ ဆိုသည်။

ဂျာမဏီ၏ သန်း ၈၀ လူဦးရေတွင် ငါးပုံတစ်ပုံနီးပါးမှာ ပြောင်းရွှေ့ဝင်ရောက် အခြေချလာသူများ၊ ၄င်းတို့၏သားမြေး မျိုးဆက်များဖြစ်ကြသည်။ ၄င်းတို့အနက် ရွေးကောက်ပွဲ ၀င်နိုင်ခွင့်ရှိသူများမှာ မဆိုစလောက်သာ ရှိနေသည်။ ဂျာမဏီ၌ အာဖရိကန်နွယ်ဖွား ငါးသိန်းကျော်အထိ ရှိနေသော်လည်း ယနေ့တိုင်အောင် ပါလီမန်ထဲတွင် လူမည်းအမျိုးသား လွှတ်တော်အမတ်ဟူ၍ တစ်ဦးတစ်လေမျှ မရှိသေးချေ။

ဆီနီဂေါဇာတိဖွား ဓာတုဗေဒပညာရှင် Karamba Diaby မှ “ ကျွန်တော့်အနေနဲ့ ဂျာမန်ပါလီမန်ထဲ လွှတ်တော်အမတ်အဖြစ် ရွေးချယ်ဝင်ရောက်နိုင်မှုဟာ သမိုင်းတွင်စရာဖြစ်သွားပါတယ် ” ဟု ပြောကြားခဲ့သည်။ သူသည် ပညာသင်စကောလားရှစ်ရရှိပြီးနောက် ယခင်ကွန်မြူနစ်နိုင်ငံဖြစ်သော အရှေ့ဂျာမဏီ Halle မြို့သို့ ၁၉၈၆ ခုနှစ်တွင် သွားရောက်ခဲ့သည်။

အသက် ၅၁ နှစ်အရွယ်ရှိ Karamba Diaby သည် ၂၀၀၁ ခုနှစ်၌ ဂျာမဏီနိုင်ငံသားဖြစ်လာခဲ့သည်။ သူ၏ဦးစားပေးမှုမှာ ပညာရေးဆိုင်ရာတန်းတူညီမျှအခွင့်အလမ်းများဖော်ဆောင်ခြင်းဖြစ်ကြောင်း သိရသည်။
“ ဂျာမဏီမှာရှိတဲ့ ကလေးသူငယ်တိုင်း သူတို့ရဲ့ကျောထောက်နောက်ခံ၊ သူတို့မိဘရဲ့ဝင်ငွေတွေနဲ့ကင်းလွတ်သော ပညာသင်ကျောင်းတက်ခွင့် ခံစားကြရပါမယ် ” ဟု သူက ဆိုသည်။

လွှတ်တော်အမတ်ဖြစ်လာသူ လူမည်းအမျိုးသားနောက်တစ်ဦးမှာ အသက် ၅၆ နှစ်အရွယ်ရှိ Charles M. Huber ဖြစ်သည်။ သူသည် မြူးနစ်မြို့တွင်မွေးဖွားပြီး ဖခင်မှာ ဆီနီဂေါအမျိုးသား၊ မိခင်မှာ ဂျာမန်အမျိုးသမီး ဖြစ်ကြသည်။ Huber သည် Chancellor Angela Merkel’s Christian Democratic Union ၏အဖွဲ့ဝင်တစ်ဦးဖြစ်ကာ မဲအရေအတွက် ၄၁.၅ % ဖြင့် လွှတ်တော်အမတ်ဖြစ်လာသည်။

Merkel ၏ ပါတီမှ မွတ်စ်လင်မ်လွှတ်တော်အမတ်တစ်ဦး Bundestag ၌ ပထမဦးဆုံး ထွက်ပေါ်လာခဲ့သည်။ ၄င်း Cemile Giousouf သည် အနောက်ပိုင်း Hagen မြို့ကို ကိုယ်စားပြုဝင်ရောက်ယှဉ်ပြိုင်ခဲ့သည်။ အသက် ၃၅ နှစ်ရှိပြီး၊ တူရကီလူမျိုးမိဘနှစ်ပါးမှ ဂျာမဏီတွင် မွေးဖွားသူဖြစ်သည်။

ယခင်က တူရကီနွယ်ဖွား ဥပဒေပြုလွှတ်တော်အမတ် များစွာရှိခဲ့ကြသော်လည်း အများအားဖြင့် Social Democratic Party (၀ါ) လက်ဝဲပါတီမှ ဖြစ်ခဲ့ကြသည်။

“ လက်ရှိပါလီမန်လွှတ်တော်အမတ်နေရာ ၆၃၀ ထဲက ၅.၄ % ဟာ ပြောင်းရွှေ့ဝင်ရောက်အခြေချလာတဲ့ မိသားစုအနွယ်များထဲက ဖြစ်တယ်။ သူတို့လူဦးရေဟာ ယခင်ကထက် ၃ ဆမက မြင့်တက်လာပြီး ၁၉ % အထိ ရှိနေပါတယ် ” ဟု Migration Media Service မှ ပြောကြားလိုက်သည်။