၁၃၅-မျိုး စာရင်းတွင် မပါသေးသည့် တိုင်းရင်းသားများ အရေး အမျိုးသားညီညွတ်ရေး ကွန်ဂရက်မှ သမ္မတကြီးထံ ပေးစာပို့

စက်တင်ဘာ ၂၇၊ ၂၀၁၃

M-Media
သုတ

ရန်ကုန် ။ ။ ၁၆.၉.၂၀၁၃ နေ့တွင် ပြည်ထောင်စုဝန်ကြီး ဦခင်ရီက တိုင်းရင်းသား ၁၃၅-မျိုးစာရင်းတွင် မပါဝင်သော လူမျိုးများမှာ တိုင်းရင်းသားမဟုတ်ကြောင်း ပြောကြားခဲ့သည့်အတွက် စာရင်းတွင် ထည့်သွင်းရန် ကျန်နေသေးသည့် တိုင်းရင်းသားလူမျိုးများအရေးအား အမျိုးသားညီညွတ်ရေး ကွန်ဂရက်ဌာနချုပ် (UNC)မှ နိုင်ငံတော်သမ္မတ ဦးသိန်းစိန် ပေးစာတစ်စောင်ကို စက်တင်ဘာ ၂၅-ရက်နေ့က ပေးပို့လိုက်ကြောင်း သိရသည်။

၂၀၁၄-ခု ပြည်လုံးကျွတ် သန်းခေါင်စာရင်းကောက်ယူရာတွင် တိုင်းရင်းသား လူမျိုး(၁၃၅)မျိုးစာရင်းတွင် မပါဝင်သော လူမျိုးများမှာ တိုင်းရင်းသား မဟုတ်ကြောင်း လူဝင်မှု ကြီးကြပ်ရေးနှင့် ပြည်သူ့အင်အား ၀န်ကြီးဌာန၊ ပြည်ထောင်စုဝန်ကြီး ဦးခင်ရီက ပြောကြားခဲ့သည့်အတွက် ၁၉၇၂-ခုနှစ် ပြည်ထဲရေးနှင့် သာသနာရေးဝန်ကြီးဌာနမှ ထုတ်ပြန်ထားသည့် တိုင်းရင်းသား လူမျိုးစာရင်းတွင် (၁၄၄)မျိုးပါဝင်ပြီး ၁၉၈၃-ခုနှစ် စာရင်းထုတ်ပြန်ရာတွင် ၉-မျိုး လျော့နည်း ပျောက်ကွယ်နေပြီး (၁၃၅)မျိုးသာ ရှိတော့ပြီး ၁၉၈၃-ခုနောက်ပိုင်းတွင် တိုင်းရင်းသားလူမျိုးများ စာရင်း ပြန်လည် စိစစ်ထုတ်ပြန်ခြင်း မရှိခဲ့ပါပဲ ယခုကဲ့သို့ ပြောကြားမှုအပေါ် နိုင်ငံတော် သမ္မတမှ ထည့်သွင်းစဉ်းစား လမ်းညွှန်ရန် ပေးပို့ခြင်းဖြစ်ကြောင်းသိရသည်။

ဤကဲ့သို့ လူမျိုး ၁၃၅-မျိုးပြောကြားလိုက်သည်မှာ ရှေးယခင် လွန်ခဲ့သော ၁၀၀၀-ကျော်က စတင်ကာ လုပ်မြေ၊ နေမြေနှင့် အတည်တကျနေထိုင်လာပြီး သမိုင်းအထောက်အထား ခိုင်မာသည့် တိုင်းရင်းသားလူမျိုးအချို့မှာ ၎င်း(၁၃၅)မျိုးတွင် မပါဝင်ပဲ ကျန်ရှိနေသည့်အတွက် ၁၃၅-မျိုးဟုသာ သတ်မှတ်ပြီး တိုင်းရင်းသား အခွင့်အရေးဆုံးရှုံးရမည်ဆိုပါက မှန်ကန်မှု၊ တရားမျှတမှုရှိမည် မဟုတ်ပဲ အမှန်တည်ရှိနေသည့် တိုင်းရင်းသားလူမျိုးများကို မျက်ကွယ်ပြုကာ ၂၀၁၄-ခု သန်းခေါင်စာရင်းကောက်ယူမည်ဆိုပါက အခက်အခဲများစွာ ရှိလာနိုင်ပြီး တိုင်းရင်းသားဖြစ်ပါလျက် တိုင်းရင်းသားမဟုတ်ဟူသော စာရင်းတွင် ထည့်သွင်းခံရမည့် တိုင်းရင်းသားလူမျိုးများမှလည်း ကျေနပ်လက်ခံနိုင်မည် မဟုတ်သည့်အတွက် ပြန်လည်ထည့်သွင်း စဉ်းစားရန် လိုအပ်ကြောင်း တင်ပြထားသည်ဟု သိရပါသည်။

အဆိုပါ ကိစ္စနှင့်ပတ်သက်၍ “ဒီ ၁၃၅-မျိုးနဲ့ ရပ်ထားလို့ မရဘူး။ ဒီ ၁၃၅ မျိုးမှာ ခြွင်းချန်ပြီး ကျန်ရစ်ခဲ့တဲ့ လူမျိုးစုတွေရှိတယ်ဆိုတာ ဆက်ပြီး ပြောရမယ်”လို့ စက်တင်ဘာ ၉-ရက်နေ့က ပြုလုပ်ခဲ့တဲ့ အမျိုးသားညီညွတ်ရေးကွန်ဂရက်ပါတီမှာ ဦးခင်မောင်ချို(တရားလွှတ်တော်ရှေ့နေ)က ပြောကြားခဲ့ပါသည်။

“၁၉၇၂-ခု စာရင်းက ၁၄၄-မျိုး၊ ၁၉၈၃-ကျတော့ ၁၃၅-မျိုး ဖြစ်သွားပြန်တယ်။ ဒါပေမယ့် တကယ့်တကယ်တမ်းမှာ တိုင်းရင်းသားတွေမှာ မျိုးနွယ်စုလေးတွေ အများကြီး ထပ်ကွဲနေတဲ့အတွက် ၁၄၄-မျိုးထက်မကရှိနေပါတယ်။ ၁၃၅-မျိုး တောင် မကပါဘူး။ ဒါကြောင့် အခုပြောတဲ့ တိုင်းရင်းသား ၁၃၅-မျိုးမှာ မပါဝင်သေးတဲ့ တိုင်းရင်းသားတွေအတွက် စဉ်းစားပါလို့ တိုက်တွန်းချင်ပါတယ်”လို့ ၎င်း ဦးခင်မောင်ချိုမှပင် ယနေ့မှာ M-Media ကို ပြောပြခဲ့ပါသည်။

၎င်း ပြည်ထောင်စုဝန်ကြီး ဦးခင်ရီ ပြောကြားလိုက်သည့်အပေါ် တိုင်းရင်းသားများခေါင်းဆောင်များက ၁၉၈၃-ခုနှစ်က ထုတ်ပြန်ခဲ့တဲ့ တိုင်းရင်းသား ၁၃၅-မျိုးကို ပြန်လည် စိစစ်ရန် လိုအပ်ကြောင်းပြောကြားခဲ့ကြတာကို စက်တင်ဘာ (၂)ရက်နေ့က Unity ဂျာနယ်တွင် ဖော်ပြပါရှိခဲ့သလို စက်တင်ဘာ (၁၀)ရက်နေ့က M-Media တွင်လည်း ဖော်ပြခဲ့ပြီးဖြစ်ပါသည်။