အောက်တိုဘာ ၅၊ ပြည်တွင်းနှင့် နိုင်ငံတကာ သတင်းတို

အောက်တိုဘာ ၅၊ ၂၀၁၃
M-Media

မိကျောင်းကန် သပိတ်စခန်း ပိတ်သိမ်း

ရန်ကုန်မြို့ ဗဟာဗန္ဓုပန်းခြံရှေ့တွင် သပိတ်စခန်း ဖွင့်လှစ်ထားသော မိကျောင်းကန် မြေရာပြန်လည်ရရှိရေးအတွက် ဆန္ဒထုတ်ဖော်နေမှုအား လွှတ်တော်ကိုယ်စားလှယ် ဦးအောင်သိန်းလင်းနဲ့ ဦးခိုင်မောင်ရီတို့နဲ့ ဆန္ဒပြသူမျး တွေ့ဆုံဆွေးနွေးပြီးနောက် ယနေ့ နေ့လည်ပိုင်းက သပိတ်စခန်းပိတ်လိုက်ပြီ ဖြစ်ပါတယ်။
_______________________

ဝအရာရှိများ အစိုးရနှင့် ဆွေးနွေးနေသည့် သန်းခေါင်စာရင်းကိစ္စ

မြန်မာ အစိုးရကိုယ်စားလှယ်အဖွဲ့ဟာ မနေ့က နေ့လည်ပိုင်းမှာ UWSA ၀တပ်ဖွဲ့ ၀ိန်းကောင်းခရိုင် အတွင်းရေးမှူး ဦးစောလွင်နဲ့ တွေ့ဆုံပြီး သန်းခေါင်စာရင်းကိစ္စအပြင် ၀ဒေသအတွင်း ဖွံ့ဖြိုးရေးလုပ်ငန်းတွေမှာ ပြည်မက အလုပ်လက်မဲ့ဖြစ်နေသူတွေကို လာရောက်လုပ်ကိုင်ခွင့် ပေးရေး ကိစ္စကိုလည်း ဆွေးနွေးခဲ့တယ်လို့ RFA သတင်းမှာ ဖော်ပြထားပါတယ်။
______________________

ရခိုင်ပါတီ ၂-ခုပေါင်းပြီး ပါတီသစ်တစ်ခုဖွဲ့မည်

ရခိုင်တိုင်းရင်းသားများ ဖွံ့ဖြိုးတိုးတက်ရေးပါတီ RNDP နှင့် ရခိုင်အမျိုးသား ဒီမိုကရေစီအဖွဲ့ချုပ် ALD တို့ ပူးပေါင်းပြီး ရခိုင်အမျိုးသားပါတီ ALP ဆိုသည့် ပါတီသစ်တစ်ခုကို ဖွဲ့စည်းရန် မှတ်ပုံတင်မည်ဟု ဒီနေ့ ဆွေးနွေးပွဲမှာ ကိုကျော်ကျော်သိန်းက VOA ကို ပြောခဲ့ပါတယ်။
______________________

သံတွဲ အကြမ်းဖက်မှု အစိုးရကြေညာချက်အား ၉၆၉ ဘုန်းကြီးများ လက်မခံ

မကြာခင်ရက်ပိုင်းက ရခိုင်ပြည်နယ် သံတွဲမြို့မှာ ဖြစ်ပွားခဲ့တဲ့ အကြမ်းဖက်မှုနဲ့ပတ်သက်ပြီး မြန်မာ့အသံမှ ကြေညာသွားသည့် သာသနာ့အလံထောင်ပြီး အကြမ်းဖက်မှုတွေ လုပ်တယ်ဆိုတာဟာ မဟုတ်မမှန်တဲ့အတွက် အစိုးရ၏ အဆိုပါကြေညာချက်အား ကန့်ကွက်ကြောင်း သဘောထားထုတ်တယ်ဟု ဦးကောသလ္လက RFA ကို ပြောကြားခဲ့ပါတယ်။

_________________________

ငယ်စဉ်ဘ၀က နယူးယောက်တွင် ဓားဖြင့်ထောက်ကာ အဓ္ဓမပြုကျင့်ခြင်းခံခဲ့ရသည်ဟု မက်ဒေါနားထုတ်ဖော်

ကမ္ဘာကျော်အဆိုတော် မက်ဒေါနားက ၎င်း၏ငယ်ဘ၀ နယူးယောက်တွင် ဖြတ်သန်းသည့်ကာလအတွင်း ဓားဖြင့်ထောက်ကာ အဓ္ဓမပြုကျင့်ခြင်း ခံခဲ့ရသည်ဟု အမေရိကန် နာမည်ကြီးဖက်ရှင်မဂ္ဂဇင်းတစ်ခုဖြစ်သည့် Harper’s Bazaar မဂ္ဂဇင်း နိုဝင်ဘာလထုတ်တွင်ပါဝင်သည့် Daring Issue ဆောင်းပါးတွင် ထုတ်ဖော် ရေးသားထားသည်။

“နယူးယောက်မြို့ဆိုတာ ကျွန်ထင်သလိုမျိုးမဟုတ်ပါဘူး။ နယူးယောက်မြို့က ကျွန်မကို ကောင်းမွန်စွာ မကြိုဆိုခဲ့ပါဘူး။ ပထမနှစ်မှာပဲ သေနတ်နဲ့ ထောက်ပြီး ခြိမ်းခြောက်ခံရတယ်။ အဆောက်အဦးပေါ်မှာ အဓ္ဓမပြုကျင့်ခံရတယ်။ ပြီးတော့ ဓားနဲ့ကျောကိုထောက်ပြီး ကျွန်မကို ဒရွတ်တိုက်ဆွဲခေါ်သွားတာကိုလည်း ခံခဲ့ရပါတယ်။ ပြီးတော့ ကျွန်မရဲ့အခန်းကိုလည်း သုံးကြိမ်လောက်ဖျက်ဆီးခံခဲ့ရပါတယ်။ ကျွန်မမှာရှိတဲ့ ရေဒီယိုလေး အလုခံရပြီးနောက်ပိုင်းမှာ တန်ဖိုးရှိတဲ့ပစ္စည်းဆိုလို့ ကျွန်မမှာ
ဘာမှမရှိတော့ပါဘူး” ဟု မက်ဒေါနားက ရေးသားထားသည်။

Daring Issue တွင် မက်ဒေါ်နားက သူရဲ့ဘ၀အကြောင်းကို အကျဉ်ချုပ်ရေးသားထားခြင်းဖြစ်ပြီး မက်ဒေါနားဘ၀၏ ရဲတင်းသော ဆုံးဖြတ်ချက်ဟု ဆိုနိုင်သည်။ ထိုအထဲတွင် မီချီဂန်မှ နယူးယောက်မြို့သို့ ရောက်ရှိလာပုံ၊ နိုင်ငံရပ်ခြားသို့သွားရောက်ပုံ၊ နိုင်ငံခြားမှ ကလေးငယ်များအား မွေးစားခဲ့ပုံ စသဖြင့် သူမ၏ ဘ၀ တစ်စိတ်တစ်ပိုင်းကို ထည့်သွင်းရေးသားထားသည်။
Ref : latimes

_________________________

နယ်စပ်တွင်ဖြစ်ပွားခဲ့သည့် ဗုံးဖောက်ခွဲမှုအတွက် စုံးစမ်းစစ်ဆေးမှုများကို ယူကရိန်းပြုလုပ်

ယူကရိန်းနိုင်ငံအနောက်မြောက်ဘက် ရုရှားနယ်စပ်အနီးတွင်ဖြစ်ပွားခဲ့သည့် ဗုံးဖောက်ခွဲမှုအတွက် ရဲတပ်ဖွဲ့ဝင်များက စုံစမ်းစစ်ဆေးမှုများ စတင်ပြုလုပ်နေသည်ဟု သိရသည်။ ကြာသာပတေးနေ့ည သန်းခေါင်ယံအချိန်တွင် ဖြစ်ပွားခဲ့သည့် အဆိုပါ ပေါက်ကွဲမှုကြောင့် ယူကရိန်း ရဲတဖွဲ့ဝင်နှစ်ဦး ဒဏ်ရာရရှိခဲ့သည်။

နယ်စပ်ရှိ Bachevsk စစ်ဆေးရေးဂိတ်တွင် နယ်စပ်လုံခြုံရေးတပ်ဖွဲ့ဝင်များက ရုရှားနိုင်ငံကူးလက်မှတ်အတုကိုင်ဆောင်ထားသည့် ယာဉ်မောင်းနှင့် အခြားလူလေးဦး လိုက်ပါစီးနင်းလာသော မီနီဘတ်စ်အားစစ်ဆေးခဲ့ပြီး ယာဉ်မောင်းအား ခိုင်လုံသည့်အထောက်အထား ထပ်မံတောင်းခံခဲ့ရာ ယာဉ်မောင်းက ၎င်းကိုယ်ပေါ်တွင်ရှိနေသည့် စနက်တံကို ဖြုတ်ခဲ့ရာမှ ပေါက်ကွဲခဲ့ခြင်းဖြစ်သည်ဟုသိရသည်။

ထိုဒေသရှိရဲတပ်ဖွဲ့က သတင်းစာရှင်းလင်းပွဲတစ်ခုကို ယမန်နေ့က ပြုလုပ်ခဲ့ပြီး လူသတ်မှု၊ မှောင်ခိုကုန်သွယ်မှုနှင့် တရားမ၀င်နယ်စပ်ဖြတ်ကျော်မှုတို့ဖြင့် ပုဒ်မတပ်ကာ ထိုဖောက်ခွဲမှုအား စုံစမ်းစစ်ဆေးနေသည်ဟု ပြောကြားခဲ့သည်။
Ref : presstv

_________________________

ဆားစ်ရောဂါကဲ့သို့ ဗိုင်းရပ်စ်ပိုးရှိနေသူ ခြောက်ဦး ဆော်ဒီတွင်တွေ့ရှိ

ကိုရိုနာဗိုင်းရပ်စ်ကြောင့်ဖြစ်သော အသက်ရှုလမ်းကြောင်းဆိုင်ရာ ရောဂါ (MERS-CoV) ဖြစ်ပွားနေသည့် လက္ခဏာရှိသူ ၆ ဦးကို ဆော်ဒီအာရေဗျနိုင်ငံတွင် တွေ့ရှိရသည်ဟု ကမ္ဘာ့ကျန်းမာရေးအဖွဲ့ WHO က ထုတ်ပြန်ကြေညာခဲ့သည်။ ထို့ကြောင့် ကမ္ဘာ့တစ်ဝှမ်းတွင် ထိုကဲ့သို့ရောဂါလက္ခဏာရှိသူ ၁၃၆ ဦးအထိ ရှိလာပြီ ဖြစ်သည်။

စက်တင်ဘာ ၁၅ ရက်နေ့မှ ၂၆ ရက်နေ့အတွင်း တွေ့ရှိခဲ့ရသည့် အဆိုပါလူနာ ၆ ဦးတွင် ၁ ဦး၏ ရောဂါလက္ခဏာမှာ မပြင်းထန်ဘဲ ကျန် ၅ ဦးကို ဆေးရုံသို့ တင်ပို့ခဲ့ရသည်ဟု WHO ၏ အစီရင်ခံစာတွင် ဖော်ပြထားပြီး ဆေးရုံတင်ပို့ထားသည့် ငါးဦးတွင် ၂-ဦးမှာ (MERS-CoV) ရောဂါရှိနေသည်ဟု အတည်ပြုနိုင်ပြီး ကျန်သုံးဦး၏ အခြေအနေအား ဆက်လက်စစ်ဆေးနေကြောင်းကိုလည်း ထည့်သွင်းဖော်ပြထားသည်။
Ref : presstv

_________________________

ပြည်နယ်သစ်ကိစ္စနှင့်ပက်သက်ပြီး အိန္ဒိယ ၀န်ကြီးနှစ်ဦးထပ်မံနှုတ်ထွက်ပြန်

အိန္ဒိယတောင်ပိုင်း ပြည်နယ်တစ်ခုဖြစ်သည့် Andhra Pradesh ပြည်နယ်မှ Telangana ဒေသအား ခွဲထုတ်ကာ ပြည်နယ်သစ်အဖြစ်သတ်မှတ်ခဲ့ခြင်းကို မကျေနပ်သောကြောင့် အိန္ဒိယ၀န်ကြီးနှစ်ဦး ရာထူးမှ ထပ်မံနှုတ်ထွက်သွားခဲ့သည်ဟု သိရပြီး၊ ထိုကိစ္စကြောင့် နှုတ်ထွက်သွားသည့် ၀န်ကြီးဦးရေမှာ သုံးဦးအထိ ရှိလာပြီဖြစ်သည်။

ထိုကဲ့သို့ ပြည်နယ်အသစ်သတ်မှတ်မှုကိုမကျေနပ်သည့်အတွက်ကြောင့် အိန္ဒိယ ခရီးသွားလာရေးဝန်ကြီးဌာန၀န်ကြီး K. Chiranjeevi မှာ ကြာသာပတေးနေ့ ညနေပိုင်းက ၀န်ကြီးချုပ် မန်မိုဟန်ဆင်းထံ နှုတ်ထွက်စာကို ဖက်စ်ဖြင့်ပေးပို့ခဲ့သည်။ ထို့နောက် လူ့စွမ်းအားအရင်းအမြစ် ၀န်ကြီးဌာန၀န်ကြီး Pallam Raju နှင့် ရထားပို့ဆောင်ရေးဝန်ကြီးဌာန၀န်ကြီး KSP Reddy တို့မှာလည်း ယမန်နေ့က ၎င်းတို့၏ရာထူးမှ အသီးသီးနှုတ်ထွက်သွားကြသည်။

ထိုဝန်ကြီးသုံးဦးစလုံးမှာ Andhra Pradesh ပြည်နယ်မှဖြစ်ပြီး Telangana ဒေသအား ပြည်နယ်အဖြစ်သတ်မှတ်ရန် ဆုံးဖြတ်ခဲ့သည့် ကက်ဘိနတ်၏ ဆုံးဖြတ်ချက်အား ကန့်ကွက်ခဲ့ကြသူများလည်းဖြစ်သည်။ သို့ရာတွင် ၀န်ကြီးချုပ် မန်မိုဟန်ဆင်းက ၎င်းတို့သုံးဦး၏ နှုတ်ထွက်စာကို လက်ခံခြင်းမရှိသေးပေ။
Ref : xinhua

_________________________

ဂွာတီမာလာ ဘိန်းဘုရင်တစ်ဦးအား မက္ကဆီကို ရဲတပ်ဖွဲ့ဖမ်းဆီး

ဇူလိုင်လအတွင်းက ရဲတပ်ဖွဲ့ဝင် ၈ ဦး သတ်ဖြတ်ခဲ့မှုအား ကြိုးကိုင်ခဲ့သည်ဟု သံသယရှိသူဖြစ်ပြီး ဂွာတီမာလာနိုင်ငံတွင် အလိုချင်ဆုံး ရာဇ၀တ်သားများထဲမှ တစ်ဦးဖြစ်သူ ဘိန်းဘုရင် အက်ဒူရာဒို ဗီလာတိုရို ကာနိုအား မက္ကဆီကိုရဲတပ်ဖွဲ့က ဖမ်းဆီးလိုက်သည်ဟုသိရသည်။

အက်ဒူရာဒိုအား မက္ကဆီကိုနိုင်ငံတောင်ဘက် ချီယာပက်စ်ပြည်နယ်တွင်ထိန်းသိမ်းထားပြီး နောက်ပိုင်းတွင် ဂွာတီမာလာနိုင်ငံသို့  လွှဲပြောင်းပေးခဲ့သည်။  အက်ဒူရာဒိုနှင့်အတူ အခြားအဖွဲ့ဝင် ၃၆ ဦးမှာ ဂွာတီမာလာ အနောက်ဘက်ပြည်နယ်ရှိ ရဲစခန်းတစ်ခုအား တိုက်ခိုက်ခဲ့မှုတွင် ပါဝင်သည်ဟု စွပ်စွဲခံထားရသည်။ ဂွာတီမာလာသမ္မတ အော့တို ပီရက်ဇ် မိုလီနာက အက်ဒူရာဒို၏ အဖွဲ့အား ချေမှုန်းပြီးဖြစ်သည်ဟု ပြောကြားခဲ့သည်။
Ref : bbc

_________________________

ဗီယက်နမ် ဗိုလ်ချုပ်ကြီးဟောင်းတစ်ဦး ကွယ်လွန်

ဗီယက်နမ်စစ်ပွဲအတွင်း အမေရိကန်နှင့် ပြင်သစ်တပ်များအား ဗီယက်နမ် တော်လှန်ရေးတပ်က ပြောင်မြောက်စွာအနိုင်ရခဲ့သည့်  တိုက်ပွဲများ၏ဗိသုကာဖြစ်ခဲ့သူ ဗိုလ်ချုပ်ကြီးဟောင်း Vo Nguyen Giap မှာ ယမန်နေ့က ကွယ်လွန်သွားပြီဟု မိသားစုဝင်များနှင့် ဗီယက်နမ်အာဏာပိုင်များက အတည်ပြုပြောကြားလိုက်သည်။

လေးနှစ်နီးပါး နာတာရှည်ရောဂါကို ခံစားခဲ့ရပြီးနောက် အသက် ၁၀၂-နှစ်အရွယ်ရှိ အဆိုပါ ဗိုလ်ချုပ်ကြီးမှာ မြို့တော်ဟနွိုင်းရှိ စစ်ဆေးရုံတွင် ယမန်နေ့ညနေပိုင်းက ကွယ်လွန်ခဲ့ခြင်းဖြစ်သည်။ တောင်သူလယ်သမား မိသားစုက မွေးဖွားခဲ့သည့် Vo Nguyen Giap မှာ ၁၉၅၄ ခုနှစ် Dien Bien Phu ဒေသတွင် ပြင်သစ်စစ်တပ်အား ချေမှုန်းနိုင်ခဲ့သောတိုက်ပွဲနှင့်၊ နှစ်ပေါင်း ၂၀-အကြာတွင် အမေရိကန် ကျောထောက်နောက်ခံပြုထားသည့် တောင်ဗီယက်နမ်စစ်တပ်အား ကွန်မြူနစ်တို့က အောင်နိုင်ခဲ့သည့်တိုက်ပွဲတို့တွင် အဓိက စီစဉ်ညွှန်ကြားခဲ့သူဖြစ်သည်။

၂၀၀၄-ခုနှစ်က အင်တာဗျူးတစ်ခုတွင် Vo Nguyen Giapက ငြိမ်းချမ်းရေးအကြောင်းကို ပြောကြားခဲ့ပြီး ဗီယက်နမ် လွတ်လပ်ရေးအောင်ပွဲမှာ ကမ္ဘာပေါ်ရှိ ကိုလိုနီပြုခံ နိုင်ငံများအားလုံး၏ အောင်ပွဲပင်ဖြစ်ခဲ့သည်ဟု ဖြေကြားခဲ့သည်။

Vo Nguyen Giap ကို ၁၉၁၁ ခုနှစ် သြဂုတ်လ ၂၅ ရက်နေ့တွင် ဗီယက်နမ်နိုင်ငံအလယ်ပိုင်းဒေသတွင် မွေးဖွားခဲ့ပြီး သမ္မတဟောင်း ဟိုချီမင်းနှင့် ရင်းနှီးသောသူငယ်ချင်းဖြစ်ကာ ၀န်ကြီးချုပ်ဟောင်း Pham Van Dong နှင့်အတူ နိုင်ငံ၏ အမြင့်ဆုံးဘွဲ့တံဆိပ်ကိုလည်း အပ်နှင်းခြင်းခံခဲ့ရသည်။
Ref : aljazeera

_________________________

ဝါရှင်တန်တွင် အမျိုးသားတစ်ဦး ကိုယ့်ကိုကိုယ် မီးရှို့ပြန်

အစိုးရ၏ ဘဏ္ဍာရေးအကြပ်အတည်းကြောင့် ပိတ်ထားရသည့် ၀ါရှင်တန် ပြည်ထောင်စုပြတိုက်အနီးရှိ National Mall ပန်းခြံအလယ်တွင် အမျိုးသားတစ်ဦး မိမိကိုယ်ကို မီးရှို့မှုတစ်ခု ယမန်နေ့က ဖြစ်ပွားခဲ့သည်ဟု သိရသည်။

မည်သူမည်ဝါမှန်းမသိရှိရသေးသည့်အဆိုပါအမျိုးသားအား အခင်းဖြစ်ပွားပြီးလျှင်ပြီးချင်း ဆေးရုံသို့ ရဟတ်ယာဉ်ဖြင့်ခေါ်ဆောင်သွားခဲ့ပြီး အသက်အန္တရာယ်နှင့် ရင်ဆိုင်နေရကြောင်း ၀ါရှင်တန် မီးသတ်တပ်ဖွဲ့ ပြောရေးဆိုခွင့်ရှိသူ တင်မ် ၀ီလ်ဆန် က ပြောကြားခဲ့သည်။

ထိုအဖြစ်အပျက်ကို မျက်မြင်တွေ့ခဲ့သည့် အမေရိကန်တရားရေးဌာနမှ အကျိုးဆောင်ရှေ့နေ ကတ်တီ ရှက်ဖလန်က သူမမှာ National Mall တ၀ိုက်တွင် လမ်းလျှောက်နေစဉ် သူမ၏အနီးအနားရှိ လူတစ်ဦးမှာ ဓာတ်ဆီပုံးကိုယူ၍ ဦးခေါင်းပေါ်မှလောင်းချကာ မိမိကိုယ်ကို မီးပြန်ရှို့ခဲ့ခြင်းဖြစ်သည်ဟု ပြောကြားခဲ့သည်။

ကြာသာပတေးနေ့ကလည်း ကွန်နက်တီကတ်ပြည်နယ်မှ အမျိုးသမီးတစ်ဦးမှာ ၀ါရှင်တန်ရှိ အိမ်ဖြူတော်နှင့် လွှတ်တော်အဆောက်အဦးနားရှိ အတားအဆီးများကို အတင်းကျော်ဖြတ်ကာ ကားမောင်း၍ ၀င်ရောက်ခဲ့သောကြောင့် ရဲတပ်ဖွဲ့က ပစ်ခတ်ဖမ်းဆီးခဲ့ရာ သေဆုံးသွားခဲ့သည့် ဖြစ်ရပ်တစ်ခုလည်း ဖြစ်ပွားခဲ့သေးသည်။
Ref : presstv

_________________________