ရခိုင်ပြည်နယ် အကြမ်းဖက်မှုများ အဆုံးသတ်ရန် UNICEF ကြေညာချက်ထုတ် တောင်းဆို

အောက်တိုဘာ ၈၊၂၀၁၃
M-Media
KK

ရန်ကုန်    ။         ။       ရခိုင်ပြည်နယ်အတွင်း ဖြစ်ပွားနေသော  ဆူပူအကြမ်းဖက် တိုက်ခိုက်မှုများကို အဆုံးသတ်ရန် ကုလသမဂ္ဂ ကလေးများ ရန်ပုံငွေ အဖွဲ့ (UNICEF) က အောက်တိုဘာ ၇-ရက်နေ့က ကြေညာချက်ထုတ်ပြန်ကာ တောင်းဆိုလိုက်သည်။

စက်တင်ဘာ ၂၉-ရက်နေ့မှ ပြန်လည်စတင်ပြီး ရခိုင်ပြည်နယ် သံတွဲမြို့ ဆူပူအကြမ်းဖက်မှုကြောင့် သဗြုချိုင်၊ ပေါက်တော၊ ရွှေလှေ၊ မီးကျွန်း ကျေးရွာများတွင် သေဆုံးခဲ့သူများနှင့် အိမ်ခြေ ၁၀၀-ခန့် ပျက်စီးခဲ့ပြီး အခြားနေရာများသို့ ရွှေ့ပြောင်းနေထိုင်ခဲ့ရသည်။ ၂၀၁၂-ခု ဇွန်လက ဖြစ်ပွားခဲ့သော ဆူပူအကြမ်းဖက်မှု ဒဏ် ခံစားခဲ့ရသည့် ဒေသခံများသည် ဖြစ်ပေါ်နေဆဲ လုံခြုံရေး အခြေအနေများကြောင့် မိမိတို့ နေရပ်ထံသို့ ပြန်သွားနိုင်ခြင်း မရှိသေးပဲ ထိတ်လန့်ကြောက်ရွံ့မှုများလည်း ကြုံတွေ့နေရသည့်အတွက် ကလေးငယ်များ၏ စိတ်ပိုင်းဆိုင်ရာနဲ့ ရုပ်ပိုင်း ဆိုင်ရာကို ထိခိုက်စေပြီး ဘ၀ကိုလည်း များစွာ ပျက်စီးမှုများ ဖြစ်စေကြောင်း၊ ထိုကိစ္စရပ်များ အတွက် မြန်မာနိုင်ငံတွင် လက်ရှိဆောင်ရွက်နေသော ပြုပြင်ပြောင်းလဲရေးကို ထိခိုက်စေပြီး မြန်မာနိုင်ငံရှိ ကလေးသူငယ်များ အားလုံးအပေါ်လည်း အနှုတ် လက္ခဏာဆောင်သည့် ဂယက်ရိုက်ခတ်မှုကို ဖြစ်ပေါ်စေမည်ဟု ယူနီဆက်(ဖ်)က စိုးရိမ်ကြောင်း ကြေညာချက်မှာ ဖော်ပြထားပါသည်။

“အကြမ်းဖက်မှုများကြောင့် ဒေသခံများသည် ၎င်းတို့နေအိမ်မှ ထွက်ပြေးတဲ့အခါမှာတော့ ရွှေ့ပြောင်းခံ ရတဲ့ ကလေးတွေနဲ့ ပြည်သူ လူထုတွေသာ ဒုက္ခတွေနဲ့ ရင်ဆိုင်ကြုံတွေ့ရတာပါ။ “မိမိဒေသမှ အခြားနေရာများသို့ ရွှေ့ပြောင်းခြင်းဟာ ကလေးတွေအတွက် မိသားစုနဲ့ခွဲခွာရဖို့၊ အိမ်တွင်း အကြမ်းဖက်ခံရဖို့ ကျောင်းမနေနိုင်ဖို့ အပြင် စိတ်ပိုင်းဆိုင်ရာနဲ့ရုပ်ပိုင်းဆိုင်ရာ ထိခိုက်မှု တွေပါ တွေ့ကြုံ ရမယ့် အန္တရာယ် ပိုများစေ ပါတယ်။ ဖျက်ဆီးမှုတွေ၊ ရွှေ့ပြောင်းနေထိုင်မှုတွေက ကလေးသူငယ်တွေ၊ မိသားစုတွေနဲ့ ရပ်ရွာ လူထုတွေ့ရဲ့ ဘဝကို ပျက်စီး စေပါတယ်။ အမုန်း စကားတွေ ဝါဒဖြန့်မှုတွေနဲ့ ပြဿနာဖြစ်ပွားအောင် လှုံ့ဆော်မှုတွေဟာ ဆူပူ အကြမ်းဖက်မှုတွေကို ကျူးလွန်စေပါတယ်။ တကယ်တမ်း ဒုက္ခရောက်တာကတော့ ကလေးသူငယ်တွေပါပဲ။ တကယ်လို့ မြန်မာနိုင်ငံက ကလေးတွေကို သူတို့နဲ့ထိုက်တန်တဲ့ အနာဂတ်ကို ပိုင်ဆိုင်စေဖို့နဲ့ သူတို့ရဲ့ အခွင့်အရေး တွေရရှိစေဖို့ဆိုရင် ငြိမ်းချမ်းရေး တည်ဆောက်မှုနဲ့ ပြန်လည် သင့်မြတ်ရေး လုပ်ငန်းစဉ်တွေကို ဦးစားပေးလုပ်ဆောင် သွားရမှာ ဖြစ်ပါတယ်” ဟု မြန်မာနိုင်ငံဆိုင်ရာ ယူနီဆက်(ဖ်) ဌာနေ ကိုယ်စားလှယ်ဖြစ်သူ မစ္စတာ ဘာထရန် ဘိန်းဗဲလ်ကက ပြောခဲ့သည်။

ယူနီဖက်(ဖ်)က ထုတ်ပြန်မှုကို အသေးစိတ် သိလိုပါက ခရစ်စတန်ရှိုလန်းဒါး၊ ယာယီဌာနမှူး၊ အစီအစဉ် ဆက်သွယ်ရေးနှင့် ပြန်ကြားရေး ဌာန၊ ယူနီဆက် (မြန်မာ)၊ ဖုန်း (ဝ၉၅-၉) ၄၂၁ ၁၇၇ ၂၉၄၊  [email protected] နှင့် ရဲလွင်၊ ပြန်ကြားရေးအရာရှိ၊ အစီအစဉ်ဆက်သွယ်ရေးနှင့် ပြန်ကြားရေးဌာန၊ ယူနီဆက် (မြန်မာ)၊ ဖုန်း (၀၉၅-၉) ၅၁၁ ၃၂၉၅၊ [email protected] တို့ထံ ဆက်သွယ်မေးမြန်းနိုင်ကြောင်း သိရသည်။