အီဂျစ်အား ပေးအပ်နေသည့် စစ်ရေးအထောက်အပံ့များအား အမေရိကန်ရပ်ဆိုင်း

အောက်တိုဘာ ၁၀၊ ၂၀၁၃
M-Media

မွတ်စလင်မ်ဘရားသားဟုဒ် အဖွဲ့ကို ထောက်ခံသူများနှင့် အဏာသိမ်းစစ်အစိုးရအား ထောက်ခံသူအများအကြား အကြမ်းဖက်တိုက်ခိုက်မှုများဖြစ်ပွားခဲ့ပြီးနောက် အမေရိကန်က အီဂျစ်စစ်တပ်အား ပေးအပ်နေသည့် အဓိကစစ်လက်နက်ပစ္စည်းများနှင့် ငွေကြေးများ ထောက်ပံ့မှုကို ရပ်ဆိုင်းလိုက်ကြောင်းသိရသည်။

အီဂျစ်စစ်တပ်အား နှစ်စဉ်ပေးအပ်နေသည့် ထောက်ပံ့ငွေ ကန်ဒေါ်လာသန်း ၂၆၀ အပါအ၀င် အဆင်မြင့်စစ်လက်နက်ပစ္စည်းထောက်ပံ့နေမှုအား ရပ်ဆိုင်းလိုက်ခြင်း ဖြစ်ပြီး ထိုကဲ့သို့ ရပ်ဆိုင်းမှုမှာ စစ်တပ်ကအာဏာသိမ်း၍ အုပ်ချုပ်နေသည့် အီဂျစ်နိုင်ငံအတွင်း သီတင်းပတ်ပေါင်းများစွာ ဖြစ်ပွားနေသည့် သွေးမြေကျမှုများနှင့် ပတ်သက်ပြီး စိုးရိမ်ကြောင်း အချက်ပြ လိုက်ခြင်းဖြစ်သည်ဟု ၀ါရှင်တန်က ယမန်နေ့တွင် ပြောကြားလိုက်သည်။

ထိုရပ်ဆိုင်းမှုမှာ အမြဲတမ်းမဟုတ်သော်လည်း မျှတ၍ လွတ်လပ်ပြီး ဒီမိုကရေစီနည်းကျ ရွေးကောက်တင်မြှောက်ထားသော အရပ်သားအစိုးရ ထွက်ပေါ်လာ၍ ယုံကြည် စိတ်ချရသော တိုးတက်မှုများကို တွေ့မြင်ရသည့်အချိန်အထိ စောင့်ကြည့်နေမည်ဟု အစိုးရ ပြောရေးဆိုခွင့်ရ အမျိုးသမီး ဂျန် ပီဆာကီက ထုတ်ပြန်သော အစီရင်ခံစာ တွင်ဖော်ပြထားသည်။

အီဂျစ်နိုင်ငံမှာ အစ္စရေးပြီးလျှင် အမေရိကန်ထံမှ စစ်ရေးအထောက်အပံ့ အများဆုံးရသော နိုင်ငံဖြစ်ပြီး အပါချီ ရဟတ်ယာဉ်များ၊ F 16 တိုက်လေယာဉ်များ၊ M1A1 တင့်ကား အစိတ်အပိုင်းများ၊ ဟာပွန်ဒုံကျည်များ အစရှိသဖြင့် အဆင့်မြင့် စစ်လက်နက်များ ပါဝင်သည်ဟု တာဝန်ရှိသူများက သတင်းထောက်များအား ပြောကြားခဲ့သည်။
Ref : channelnewsasia