အမျိုးသားညီညွတ်ရေးကွန်ဂရက် သင်္ဃန်းကျွန်းမြို့နယ် ရုံးခန်းဖွင့်

အောက်တိုဘာ ၁၃၊ ၂၀၁၃
M-Media
အမ်တူးအေ

ရန်ကုန်   ။       ။        ရန်ကုန်တိုင်းဒေသကြီး၊ သင်္ဃန်းကျွန်းမြို့နယ်၌ အမျိုးသားညီညွတ်ရေးကွန်ဂရက် (UNC) ပါတီရုံးခန်းကို ယနေ့ မနက်ပိုင်းက ဖွင့်လှစ်ခဲ့ပြီး သင်္ဃန်းကျွန်း မြို့နယ်အတွင်းရှိ နိုင်ငံရေးပါတီများမှ တာဝန်ရှိသူများလည်း တက်ရောက်ခဲ့ကြပြီး စုစုပေါင်း လူ ၈၀-၀န်းကျင်ခန့် တက်ရောက်ခဲ့ပါတယ်။

အဆိုပါ ရုံးခန်းဖွင့်ပွဲသို့ ပါတီဌာနချုပ်မှ ဥက္ကဌအပါအ၀င် အမှုဆောင်များလည်း တက်ရောက်ပြီး အမှာစကားပြော၍ သမိုင်းကြောင်းဆိုင်ရာ အချက်အလက်များကို ရှင်းလင်းတင်ပြခဲ့ပြီး တက်ရောက်လာသော တစ်ခြားသော နိုင်ငံရေးပါတီများမှ ကိုယ်စားလှယ်များမှလည်း အသီးသီး မိတ်ဆက်စကားများပြောကြားခဲ့ကြပါတယ်။

တိုင်းပြည်ဖွံဖြိုးတိုးတက်ရန်မှာ တိုင်းပြည်မှာ ဆူပူအကြမ်းဖက်မှုကင်းရှင်းပြီး တည်ငြိမ်အေးချမ်းမှုရှိဖို့ လိုပါတယ်။ ဒါကြောင့် အားလုံးမှာ ပြည်ထောင်စု မြန်မာနိုင်ငံသား ဆိုတဲ့ ပြည်ထောင်စု စိတ်ဓါတ်ရှိရမည်ဖြစ်ကြောင်း၊ မည်သည့်လူမျိုးမည်သည့်ဘာသာပင်ဖြစ်ပါစေ ပြည်ထောင်စု မြန်မာနိုင်ငံတစ်ဦး ဒုက္ခရောက်ပါက အားလုံးဒုက္ခ ရောက်သလို ခံစားရကြောင်း၊ ပြည်မမှာ လမ်းပန်းဆက်သွယ်ရေးကောင်းသလို ပြည်နယ်တွေမှာလည်း ကောင်းစေရန်လိုကြောင်း၊ ပြည်သူလူထု လိုလားသည့် ပြည်သူ့ဆန္ဒကို နိုင်ငံရေးပါတီများမှလည်း ဖြည့်ဆည်းပေးရန်လည်း လိုပါကြောင်း၊ ဌာနချုပ်ဥက္ကဌမိန့်ခွန်းတွင် ပြောခဲ့ပါတယ်။

“တိုင်းရင်းသားအခွင့်အရေး တန်းတူရရှိရေးဆိုတဲ့ပန်းတိုင်ကို ရောက်အောင် ချီတက်ရာမှာ အရင်ကဆိုရင် အချင်းချင်းစည်းလုံး ညီညွတ်မှု မရှိတဲ့အတွက် နှစ်ပေါင်း ၅၀-ကျော် ပန်းတိုင်နဲ့ ဝေးခဲ့ကြတယ်။ ဒီကနေ့ကာလ ပြောဆိုခွင့်၊ ပါတီတွေ လုပ်ဆောင်ခွင့် ရလာချိန်မှာ အရင်ကအကြောင်းအရာတွေကို သင်ခန်းစာယူ၍ စည်းလုံး ညီညွတ်စွာ နဲ့ လုပ်ဆောင်ကြဖို့လိုပါတယ်။ ကျွန်တော်တို့ သွားရမယ့်လမ်းဟာ ပန်းခင်းတဲ့လမ်းမဟုတ်ပဲ ဆူးငြောင့်ခလုတ်တွေ ခင်းထားတဲ့လမ်းဖြစ်တာကြောင့် စည်းလုံး ညီညွတ်ဖို့ လိုပါတယ်။ ကျွန်တော်တို့ အမျိုးသားခေါင်းဆောင်တွေ မျှော်မှန်းခဲ့တဲ့ ပန်းတိုင်ကို ရောက်ဖို့အတွက် အမျိုးသားညီညွတ်ရေးကွန်ဂရက်ရဲ့ အောင်လံတော်ကို ၀င့်ဝင့်ကြွားကြွား စွင့်စွင့်ညားညား လွင့်ထူပြီး တက်ညီလက်ညီ စုပေါင်း ချီတက်ကြပါစို့”လို့ ၎င်းမိန့်ခွန်းမှာပင် ပြောကြားခဲ့ပါတယ်။

ဌာနချုပ်ဗဟိုစည်းရုံးမှူး ဦးသန်းလွင်မှ အမျိုးသားညီညွတ်ရေးကွန်ဂရက် ရည်ရွယ်ချက်၊ မူဝါဒ၊ လုပ်ငန်းများကို တဆင့်ပြီးတဆင့် အကောင်အထည်ဖော် ဆောင်ရွက် လျက်ရှိကြောင်း၊ စစ်မှန်သော ဒီမိုကရေစီ ဖက်ဒရယ် ပြည်ထောင်စု နိုင်ငံပေါ်ပေါက်ရေးတို့ ဖော်ဆောင်ရန်၊ ဒီမိုကရေစီ လူ့အခွင့်အရေးနှင့် နိုင်ငံသား ရပိုင်ခွင့်၊ လူနည်းစု တိုင်းရင်းသား တန်းတူအခွင့်အရေးများကို အာမခံရန်နှင့် ဖော်ဆောင်ပေးရန်၊ အကာအကွယ်ပြုရန်၊ စီးပွားရေးနှင့် လူမှုဖူလုံရေးဆိုင်ရာ ရပိုင်ခွင့်နှင့် အခွင့်အလမ်းများ ဖော်ထုတ်မြှင့်တင်သွားရန်ဖြစ်ပြီး UNC သည် လွတ်လပ်မှုကို ဖြည့်စွမ်းရန်၊ အချုပ်အခြာပိုင် နိုင်ငံတော်တွင် တာဝန်ရှိပြီး တန်းတူညီမျှသော တရားဥပဒေစနစ်က တည်ငြိမ်အေးချမ်းရေးနှင့် အာမခံ ကာကွယ်ပေးရမည်ဖြစ်ပြီး တရားမျှတမှုကို မတူကွဲပြားသော အတန်းအစား လူမျိုးအုပ်စု အမျိုးမျိုး၏ တန်းတူညီမျှမှု ရရှိရေးအပေါ် အခြေခံ၍ ဖော်ဆောင်ပေးသွားမှာ ဖြစ်ကြောင်း ပြောကြားခဲ့ပါတယ်။

အမျိုးသားဒီမိုကရေစီပါတီသစ်မှလည်း “UNC ပါတီအား တွေ့ရတာ ၀မ်းသာပါကြောင်း၊ တိမ်မြုတ်သွားတဲ့ လူမျိုးစုကို ဖော်ထုတ်ရာမှာ UNC က ဦးဆောင် ဖော်ထုတ် သွားမည်ကိုလည်း ဂုဏ်ယူပါကြောင်း၊ လက်တွဲလုပ်ဆောင်ကြရန်လိုကြောင်း၊ လွှတ်တော်အသီးသီးမှာ ကိုယ်စားလှယ်တွေ ပါဝင်သွားစေဖို့က ကျွန်တော်တို့ရဲ့ ခံယူချက်ပဲဖြစ်တယ်”ဟု ပြောကြားသွားပါတယ်။

အမျိုးသားဒီမိုကရေစီအဖွဲ့ချုပ်မှလည်း “ပန်းတိုင်သွားရာလမ်းမှာ အခက်အခဲများစွာကို ကျော်ဖြတ်သွားရမှာဖြစ်ပါတယ်။ ပါတီတိုင်းမှာ ရည်မှန်းချက်တွေ ရှိပါတယ်။ ပါတီတိုင်းမှာ မူဝါဒတွေရှိပါတယ်။ UNC မှာလည်း ခုနက ဥက္ကဋ္ဌပြောသွားပါတဲ့ ပြည်သူတွေအတွက် မူဝါဒတွေကို အကောင်အထည်ဖော်ရာမှာ စနစ်ကောင်းရှိဖို့ လိုပါတယ်။ ဒီမိုကရေစီ စံနဲ့ စနစ်တွေလိုပါတယ်။ ၂၀၀၈ ဥပဒေက ဒီမိုကရေစီစံနဲ့ မကိုက်ညီတဲ့အတွက် ပါတီအများစုကလည်း ပြည်သူ့ဆန္ဒခံယူပြီး လုပ်ရှားနေကြပါ တယ်။ အသစ်ရေးများ ပြင်မလားဆိုတာကို နိုင်ငံရေးခေါင်းဆောင်တွေမှ ပြည်သူတွေကို ချပြဖုိ့ လုပ်ဆောင်နေကြတယ်။ ပြီးတော့ အခြေခံဥပဒေဆိုတာ ဘာလဲဆိုတာ ပြည်သူအားလုံး သိဖို့လိုပါတယ်။”လို့ ပြောခဲ့ပါတယ်။

တိုင်းရင်းသားစည်းလုံးညီညွတ်ရေးပါတီမှလည်း “ဒီနေ့ ဒီလိုအဖွဲ့ပေါ်လာတာ ကောင်းတဲ့ လက္ခဏာရပ်ပါ။ ဘယ်နေရာမဆို တစ်ဦးတစ်ယောက်တည်း လုပ်ဆောင်တာ ထက် အဖွဲ့အစည်းနဲ့လုပ်တာ ပိုအောင်မြင်ပါတယ်။ နိုင်ငံရေးစကားပြောရရင် အမျိုးသားနိုင်ငံရေးနဲ့ ပါတီနိုင်ငံရေးဆိုတာ ရှိပါတယ်။ မိမိကိုယ်တိုင်အကျိုးစီးပွားအတွက် လုပ်ဆောင်တာဟာ အမျိုးသားနိုင်ငံရေးပါ။ ကလေးတွေကျောင်းမှာ စာသင်တာဟာလည်း နိုင်ငံရေး၊ ကျောင်းသားတွေ ကျောင်းသွားတာဟာလည်း နိုင်ငံရေးပါပဲ။ မျိုးဆက်တွေ မွေးထုတ်ပြီး ကြိုးစားလုပ်ဆောင်နေပါတယ်။

ပါတီနိုင်ငံရေးဆိုတာမှာ စည်းတွေ၊ စနစ်တွေ၊ သက်ဆိုင်ရာဘာသာရပ် ကျွမ်းကျင်မှုတွေလိုတယ်။ တစ်ဦးတစ်ယောက်တည်း မဖြစ်နိုင်ဘူး။ နိုင်ငံရေးဆိုတာ လက်ဝှေ့ပွဲ မဟုတ်ပါဘူး။ ခြင်းလုံးပွဲနဲ့တူပါတယ်။ သူ့ဘက်ရောက်လာရင် သူ့ဘက်က ခြေမကျအောင်ခတ်ရပါမယ်၊ ကိုယ့်အလှည့်ရောက်ရင် ကိုယ်တာဝန်ကျေအောင် ခတ်ရမယ်။ အဓိကကတော့ ပြည်သူလူထု စားဝတ်နေရေး ကောင်းအောင် ဘယ်လိုဆောင်ရွက်မလဲဆိုတာပဲ။ ပြည်သူလူထုနဲ့ ပါတီအကျိုးယှဉ်လာရင် ပြည်သူလူထုအကျိုးကို ဦးစားပေး လုပ်ဆောင်ရမှာဟာ ကျွန်တော်တို့ တိုင်းရင်းသားစည်းလုံးညီညွတ်ရေးပါတီရဲ့ သြ၀ါဒပါပဲ”လို့ မိတ်ဆက်စကားပြောခဲ့ပါတယ်။