အောက်တိုဘာ ၁၅၊ ၂၀၁၃
M-Media
ဇာဏီ
![သံတွဲထောင်အတွင်း ရိုက်နှက်ခံရမှုကြောင့် ခေါင်းကွဲသွားပြီး ၆-ချက် ချုပ်ထားရသူ ဇော်မင်းထွန်း ခေါ် လိုင်စင် အား ရုံးထုတ်လာစဉ် ရိုက်ကူးထားခြင်း ဖြစ်ပါသည်။](http://www.m-mediagroup.com/wp-content/uploads/2013/10/1396058_1423106534578707_1426565160_n1-189x300.jpg)
သံတွဲထောင်အတွင်း ရိုက်နှက်ခံရမှုကြောင့် ခေါင်းကွဲသွားပြီး ၆-ချက် ချုပ်ထားရသူ ဇော်မင်းထွန်း ခေါ် လိုင်စင်အား ရုံးထုတ်လာစဉ် ရိုက်ကူးထားခြင်း ဖြစ်ပါသည်။
သံတွဲ ။ ။ စက်တင်ဘာ ၂၉-ရက်နေ့က စတင်ဖြစ်ပွားခဲ့သော သံတွဲအကြမ်းဖက်မှုပြီးနောက် အကြမ်းဖက်ခံခဲ့ရသည့် ကမန်တိုင်းရင်းသားများထဲများလည်း ဖမ်းဆီးခြင်းခံခဲ့ရကာ ၎င်းဖမ်းဆီးထားသူများအား သံတွဲအကျဉ်းထောင်အတွင်းတွင် မတရားသဖြင့် ညှဉ်းပန်းနှိပ်စက်မှုများ ပြုလုပ်နေကြောင်း သိရပါတယ်။
ဖမ်းဆီးခံထားရသူများအား သံတွဲတွင် မနေ့က တရားရုံးထုတ်လာစဉ် ထောင်အတွင်း၌ အကြမ်းဖက်ရိုက်နှက်ခံရသည့် ဒဏ်ရာများဖြင့် တွေ့ရကြောင်း၊ လင်းသီရွာမှ ကမန်တိုင်းရင်းသား ဇော်မင်းထွန်း ခေါ် လိုင်စင်မှာ ဦးခေါင်းတွင် ရိုက်နှက်ခံရထားသည့် ဒဏ်ရာဖြင့် ၆-ချက် ချုပ်ထားရကြောင်း၊ ၎င်းလင်းသီရွာမှပင် ရွာလူကြီး ကိုခင်မောင်သန်းမှာလည်း ရိုက်နှက်ခံရသည့်အတွက် သွား ၃-ချောင်း ကျွတ်ထွက်သွားကြောင်း၊ သဗြုချိုင်ရွာမှ နေလင်းကျော်မှာမူ ရိုက်နှက် ညှဉ်းပန်းနှိပ်စက်ခံရမှု ကြောင့် မျက်လုံးမှ သွေးများယိုစီးကျသည်အထိ ဖြစ်ခဲ့ကြောင်းကို တရားရုံးထုတ်စဉ် သွားတွေ့ကြသူများမှ သိရှိခဲ့ကြပါတယ်။
အဆိုပါ ညှဉ်းပန်းနှိပ်စက်မှုများအား စေခိုင်းသူမှာ သံတွဲထောင်မှ ဒု-ထောင်မှူးနေ၀င်း၊ ကိုယ်ပိုင်အမှတ် က/၄၀၃၄ ဖြစ်ပြီး တန်းစီးများမှ ညှဉ်းပန်းနှိပ်စက် ရိုက်နှက်ခြင်း ဖြစ်ကြောင်းလည်း သိရသည်။
အကြမ်းဖက်မှုဖြစ်စေရန် ဦးဆောင် လှုံ့ဆော်သူများထဲမှ ဖမ်းဆီးထားသူများအနက် ကျောက်ဖြူထောင်မှ ၀င်းကိုလေး၊ ကိုငယ်၊ ဋ္ဌေးအောင်နှင့် သံတွဲထောင်မှ စိုးစိုး၊ ကြည်လှိုင်တို့ (၅)ဦးကိုလည်း ကျူးလွန်မှု သက်သေမရှိဟုဆိုကာ ပြန်လွှတ်လိုက်သည့်အတွက် သံတွဲမြို့မှ ကမန်တိုင်းရင်းသားများအနေနှင့်လည်း စိုးရိမ်နေကြကြောင်း ပြောပါတယ်။
“အကြမ်းဖက်မှုလှုံ့ဆော်တဲ့ ဒီလူတွေက အရင်ကတည်းက လှုံ့ဆော်နေတဲ့သူတွေ။ အဲဒါကိုမှ သက်သေအထောက်အထား မရှိလို့ဆိုပြီး လွှတ်တာဟာ အခြေအမြစ် မရှိပါဘူး။ သံတွဲမှာ သူတို့တွေကို ဖမ်းထားတဲ့အချိန်က တော်တော်လေး ငြိမ်သွားတယ်။ အခု ပြန်လွှတ်ပေးလိုက်တာဟာ ပြဿနာတွေကို မီးစပြန်မွှေး ပေးလိုက်သလိုပါ ပဲ။ မနေ့ကညကလည်း မွတ်စလင်မ်ပိုင် လယ်တဲ ၃-တဲကို မီးရှို့ပြန်တယ်။ အဲဒီအချိန်က ဗိုလ်ချုပ်လှမြင့်ကိုယ်တိုင် အဏ္ဏ၀ါမှာ ထိုင်နေတယ်။ အခု ဖြစ်သွားတဲ့ အကြမ်းဖက်မှု တွေရဲ့ ခေါင်းဆောင်တွေကို ပြန်လွှတ်ပေးတာဟာ သံတွဲမြို့ကို မီးရှို့ဖို့ ထပ်လုပ်သလိုပါပဲ”ဟု သံတွဲမြို့ခံက ပြောပါတယ်။
“အခုက ဖမ်းဆီးခံရတဲ့ ကမန်တိုင်းရင်းသားတွေကို ထောင်ထဲမှာ မတရားသဖြင့် ညှဉ်းပန်းနှိပ်စက်နေတယ်။ ဒါကြောင့် ကျွန်တော်တို့ထဲက တချို့ ICRC ကို ဒီနေ့ သွားတွေ့ ပါမယ်။ အဲ့ဒီ ဓါတ်ပုံတွေ အကုန်လုံးယူသွားမယ်။ ဖြစ်နေတဲ့ ဖြစ်စဉ် အကျိုးအကြောင်းတွေကို ကျွန်တော်တို့ ပြောပြပါမယ်။ ကျွန်တော်တို့ တိုင်ပါမယ်။”လို့ ကမန်တိုင်းရင်းသား တစ်ဦးက ဆိုပါတယ်။
Comments