သီတင်းကျွတ်အမီ မန္တလေးမှာ အရောင်းသွက်လာတဲ့ ရောင်စုံတရုတ်မီးပုံးများ

အောက်တိုဘာ ၁၇၊ ၂၀၁၃
M-Media
ပြည့်ပြည့်

photo : google

မန္တလေး   ။          ။ မကြာမီ ကျရောက်တော့မည့် သီတင်းကျွတ်ပွဲတော်အတွက် တရုတ်နိုင်ငံမှ ရောင်စုံမီးပုံးများ ယခင်နှစ်များထက် ပိုမိုဆန်းသစ်သော ဒီဇိုင်းများဖြင့် ရောက်ရှိလာကြောင်း သိရသည်။

မန္တလေးမြို့တွင် ယခင်နှစ်များထက် ပိုမိုထူးခြားစွာ ရောင်စုံတရုတ်မီးပုံးဒီဇိုင်းအဆန်းများ ၀င်ရောက်လာမှုကြောင့် ပြည်တွင်းဖြစ် မီးပုံများ ယခင်နှစ်များကလောက် အရောင်း မသွက်ကြောင်းတော့ကြောင်းကို ပြည်တွင်းဖြစ် မီးပုံးရောင်းသူတစ်ဦးမှ ပြောသည်။

“ကျွန်တော်တို့က ဟိုးအရင် နှစ်စဉ်ကတည်းက ပြည်တွင်းဖြစ် ရောင်စုံ မီးပုံလေးတွေကို ရောင်းလာတာပါ။ ဒါပေမယ့် မနှစ်က စပြီးတော့ တရုတ်က လာတဲ့ မီးပုံလေးတွေကိုလည်းတင်ရောင်းတယ်။ တရုတ်ကမီးပုံးက ၀င်တာတော့ ကြာပါပြီ ကျွန်တော်တို့က မနှစ်ကမှ စတင်ဖြစ်တာပါ။ ဒီနှစ်မှာ သိသာသွားတာက ပြည်တွင်းဖြစ်မီးပုံးက အရောင်း တော်တော်ကျသွားတယ်။ ပြည်တွင်းမီးပုံက လက်နဲ့တစ်ခုချင်း လိုက်လုပ်ရတာ အချိန်ကြာတာကြောင့် အများကြီး ထွက်မလာနိုင်ဘူး။ ပြီးတော့ သုံးတဲ့ စက္ကူအမျိုးအစားကလည်း တရုတ်မီးပုံးတွေလောက် တောက်ပမှု သိပ်မရှိတော့ဘူး။ ဒီတော့ တရုတ်ရောင်စုံ မီးပုံးတွေက အရောင်းပိုသွက်သွားတယ်။”ဟု ပြောသည်။

ယခင်နှစ်များထက် ၀င်ရောက်လာသော ရောင်စုံတရုတ်မီးပုံးများမှာ ဈေးလည်းသင့်တင့်ပြီး ပိုမို စွဲဆောင်မှု ရှိတာကြောင့် အရောင်းသွက်ပြီး ပိုမိုဝင်ရောက်လာကြောင်း သိရသည်။