မြန်မာဆီးဂိမ်းလုံခြုံရေးအတွက် နိုင်ငံအချို့ စိုးရိမ်နေကြပြီ

M-Media
အောက်တိုဘာ ၁၈ ရက်၊ ၂၀၁၃

ဝဏ္ဏသိဒ္ဓီ ဘောလုံးကွင်းမှ ပွဲကြည့်စင်

၂၇ ကြိမ်မြောက်ဆီးဂိမ်းမကျင်းပမီ ဗုံးပေါက်ကွဲမှုများကြောင့် မတည်မငြိမ်ဖြစ်နေ၍ စင်ကာပူနှင့် ဖိလစ်ပိုင်အားကစားအဖွဲ့က ဆီးဂိမ်းအိမ် ရှင်မြန်မာနိုင်ငံအပေါ် စိုးရိမ်နေကြကြောင်း သိရသည်။ စင်ကာပူ ကိုယ်စားပြုအားကစားအဖွဲ့ မှ ခေါင်းဆောင်ဖြစ်သူ အန်နာဘဲလ် ပန်နီဖားသားက စင်ကာပူအနေဖြင့် ဘက်စုံထောင့်စုံမှ အကာအကွယ်များ၊ ဆောင်ရွက်ဖွယ်ရှိသည်များကို လုပ်ဆောင်သွားမည့်အကြောင်းနှင့် ၄င်းတို့အားကစားအဖွဲ့မှာ အဖွဲ့ဝင် ၃၀၀ ပါဝင်လာမည့် အကြောင်းတို့ကို ပြောဆိုခဲ့သည်။

“အခုတော့ ကျနော်တို့ တုန်လှုပ်တာတွေ ဘာတွေမရှိသေးဘူး။ အစီအစဉ်လုပ်နေတာတွေကို ပြန်ပြင်ဆင်ရလောက်အောင်တော့ စိုးရိမ်ရတဲ့အဆင့်လို့ (မယူ ဆသေးပါဘူး)။ ဒါပေမယ့် အာဏာပိုင်တွေဆီက ထပ်မံရောက်ရှိလာမယ့် ညွှန်ကြားချက်တွေအပေါ်မှာ (ဆောင်ရွက်သွားမှာဖြစ်ပါတယ်။) ကျနော် တုိ့မြန်မာပြည် က စင်ကာပူသံရုံးနဲ့ အချိတ်အဆက်ရှိပါတယ်။ မြန်မာပြည်ရဲ့ တိုးတက်ပြောင်းလဲမှုဖြစ်စဉ်တွေကိုလည်း အနီးကပ်စောင့်ကြည့်နေပါတယ်။” ဟု အန်နာဘဲလ် CNA ကို ပြောပြသည်။

စင်ကာပူနာမည်ကြီးရေကူးအားကစားသမား အာရန်ကွက်ကမူ သူ့အနေဖြင့် အလွန်အမင်းစိုးရိမ်နေခြင်းမရှိကြောင်း၊ အားကစားသမားများအတွက် လုံခြုံရေး မှာ ကောင်းမွန်သည့်အနေအထားတွင်ရှိမည်ဟု ယုံကြည်ကြောင်း ဆိုသည်။

“ဆီးဂိမ်းက ကြီးကျယ်တယ်၊ (သူတို့တွေ) စနစ်တကျ စီမံထားလိမ့်မယ်လို့ ကျနော်ယုံတယ်။ လုံခြုံရေးဆိုတာကလည်း တဦးချင်းစီရဲ့တာဝန်လည်းဖြစ်တယ်။ ဒီလုံခြုံရေးအကြောင်းနဲ့ ကျနော်အားကစားစွမ်းဆောင်ရည်ကို မထိခိုက်စေရဘူး။ အဲဒီ (မြန်မာပြည်) ကိုရောက်ရင် ကျနော်တို့ တယောက်ကိုတယောက် ဂရုစိုက်စောင့်ကြည့်နေမှာပါ” ဟု အာရန်ကွက်က ပြောသည်။

ဖိလစ်ပိုင်အားကစားအဖွဲ့ခေါင်းဆောင် ဂါဆီယာ

ဖိလစ်ပိုင်နိုင်ငံ အားကစားကော်မရှင်၏ဥက္ကဌဖြစ်သူ ရစ်ချီဂါဆီယာကမူ – “(ဒီဗုံးကွဲတဲ့ကိစ္စတွေကို) ကျနော်တို့ အနီးကပ်စောင့်ကြည့် အကဲခပ်နေပါတယ်။ ကျနော်တို့အားကစားသမားတွေ၊ တာဝန်ခံတွေက သူတို့ကိုယ်သူတို့ အန္တရာယ်ထဲ ထည့်လိုက်သလို မဖြစ်ဘူးလို့ယူဆရင် ကျနော်တို့ ဒီဆီးဂိမ်းမှာ ပါဝင်ယှဉ်ပြိုင် သွားမှာပါ။ ဒါပေမယ့် ကျနော်တို့ အဲဒီ (မြန်မာပြည်) ကိုရောက်ရင်တော့ ကျနော်တို့အတွက် ပြဿနာတစုံတရာမရှိနိုင်အောင်တော့ ကျနော်တို့ သေသေချာချာ လုပ်ဆောင်သွားရပါမယ်။” ဟု အေအက်ဖ်ပီသို့ ပြောသည်။

ဖိလစ်ပိုင်အားကစားအဖွဲ့တွင် အားကစားသမား ၂၂၀ ဦးပါဝင်လာမည်ဖြစ်ပြီး ၄င်းတို့အားလုံး အားကစားရွာတွင် တည်းခိုကြမည့်အကြောင်း သိရသည်။ သို့သော် ကိုယ်စားလှယ်အဖွဲ့မှ တာဝန်ခံများမှာမူ ဟိုတယ်များတွင် တည်းခိုမည်ဖြစ်ရာ မည်သည့်ဟိုတယ်ကို ရွေးချယ်ရမည့်အကြောင်း ခက်ခဲစွာစဉ်းစားနေရသည်ဟု ဖိလစ်ပိုင်သတင်းတစ်ရပ်က ဆိုသည်။

မြန်မာဆီးဂိမ်းကော်မတီတာဝန်ခံနှင့် အားကစားဒုတိယ၀န်ကြီး ဦးဇော်ဝင်းကမူ နေပြည်တော်တ၀ိုက် လုံခြုံရေးတိုးမြှင့်ဆောင်ရွက်ဖို့ ပြည်ထဲရေးဝန်ကြီးဌာနနှင့် ပူးပေါင်းဆောင်ရွက်နေသဖြင့် မိမိအနေဖြင့် ဆီးဂိမ်းလုံခြုံရေးအတွက် ယုံကြည်မှုရှိကြောင်းပြောဆိုခဲ့သည်ဟု CNA သတင်းက တင်ပြသည်။