တရုတ်သိပ္ပံပညာရှင်များအား အာကာသ ညီလာခံ တက်ရောက်ခွင့် ပိတ်ပင်ထားခြင်းကို နာဆာ(NASA) ပြန်ရုတ်သိမ်း

အောက်တိုဘာ- ၂၁
M-Media

တရုတ်သိပ္ပံပညာရှင်တွေကို အာကာသဆိုင်ရာ ညီလာခံတက်ရောက်ခွင့် ပိတ်ပင်တဲ့အပေါ် မနှစ်သက်တဲ့အတွက် ဒီညီလာခံကို ဝိုင်းကြဉ်ဖို့ အမေရိကန် အာကာသယာဉ်မှုးတွေရဲ့ ဆန္ဒ ထုတ်ဖော်တောင်းဆို လိုက်တဲ့နောက်မှာ နာဆာက ဒီဆုံးဖြတ်ချက်ကို ပြန်ရုတ်သိမ်းလိုက်ပါတယ်။အမေရိကန် အာကာသယဉ်မှုးတွေဟာ ပညာရပ်ပိုင်းဆိုင်ရာ လွတ်လပ်ခွင့်အတွက် ခုလိုပြုလုပ်ခဲ့ကြတာပါ။

ဒီညီလာခံကို နိုဝင်ဘာလ အစောပိုင်း ကယ်လီဖိုးနီးယားမှာ ကျင်းပဖို့ဖြစ်ပြီး နေအဖွဲ့အစည်းအပြင်ဖက်က ဂြိုဟ်တွေ အကြောင်း အဓိက ဆွေးနွေးကြဖို့ဖြစ်ပါတယ်။

တရုတ်သိပ္ပံပညာရှင်တွေကို ပိတ်ပင်ရတဲ့အကြောင်းအရင်းက သူတို့ရဲ့ တရုတ်နိုင်ငံသားဖြစ်မှုနဲ့ လုံခြုံရေးဆိုင်ရာ အကြောင်းပြချက်တွေ အတွက် ဖြစ်တယ်လို့ဆိုပါတယ်။ ဒါပေမယ့် ဒီအကြောင်းကြောင့် ထင်ရှားတဲ့ အမေရိကန် အာကာသ ယာဉ်မှူးများကြားမှာ ဒေါသလှိုင်းတွေ ပြင်းထန်ခဲ့ကြပါတယ်။

” ဒီညီလာခံ အစည်းအဝေးက ကမ္ဘာနဲ့ သန်းပေါင်းများစွာ ကွာဝေးတဲ့ ဂြိုဟ်တွေအကြောင်းပါ၊ ဘယ်လို အမျိုးသားလုံခြုံရေးနဲ့မှ မပတ်သတ်ပါဘူး” လို့ ဘာကလေ မှာရှိတဲ့ ကယ်လီဖိုးနီးယား တက္ကသိုလ် အာကာသဆိုင်ရာ ပါမောက္ခ ဖြစ်သူ ဂျော့ဖ် မာဆီ က အစည်းအဝေးစီစဉ်သူတွေထံပေးပို့တဲ့ အီးမေးလ် မှာ ထောက်ပြထားပါတယ်။

တရုတ်နိုင်ငံခြားရေးဝန်ကြီးကလည်း နာဆာရဲ့ ငြင်းပယ်မှုကို ခွဲခြားနှိမ့်ချမှုအဖြစ် ရှုံ့ချထားပြီး နိုင်ငံရေးဟာ ပညာရေးဆိုင်ရာ ညီလာခံဆွေးနွေးမှုတွေမှာ နေရာ မရှိသင့်ဘူးလို့ ဝေဖန်ထားပါတယ်။

ရက်အတန်ငယ်ကြာတဲ့အခါမှာ နာဆာက တရုတ်သိပ္ပံပညာရှင်ခြောက်ဦးထံကို ဥပဒေကြောင်း အရပြန်သုံးသပ်တဲ့အခါ ဘယ်လိုမှ အတားအဆီး မရှိတာကြောင့် တက်ရောက်ခွင့်ပေးမယ့် အကြောင်းစာပြန်ခဲ့ပါတယ်။

” ကိုးကားထုတ်ပြန်တဲ့ ဥပဒေတွေကို ပြန်လည်ရှင်းလင်းပြီးဖြစ်တာကြောင့် ဆုံးဖြတ်ချက်ကို ပြန်ရုတ်သိမ်းပြီးဖြစ်ပါတယ် ” ဒီအကြောင်းကြားစာကို ကိုးကားလို့ ဆင်ဟွာ သတင်းဌာနက တနင်္လာနေ့ကထုတ်ပြန်ခဲ့ပါတယ်။

သို့ပေမယ့် လိုအပ်တဲ့ စီစစ်မှုတွေများစွာပြုလုပ်ဖို့ လိုအပ်နေပြီး သက်ဆိုင်ရာရုံးတွေဟာ အမေရိကန် အစိုးရရုံးတွေ ယာယီရပ်နားထားမှုနဲ့တိုက်ဆိုင်နေတာကြောင့် ဒီထုတ်ပြန်ချက်က အချိန်မီပါ့မလား မသေချာပါဘူး။

နာဆာ အကြီးအကဲတစ်ဦးဖြစ်သူ ချားလ်စ် ဘိုးဒန်း ကတော့ ဒီလအစောပိုင်းမှာ ကော်မတီရဲ့ ဆုံးဖြတ်ချက်ကို ပြန်သုံးသပ်ဖို့ တောင်းဆိုခဲ့ပြီး ညီလာခံကို စီစဉ်တဲ့ အမေရိကန် အမျိုးသားလေကြောင်းနဲ့ အာကာသ လေ့လာရေးစင်တာ ( Ames Research Centre ) က အလယ်တန်းမန်နေဂျာတွေကို အပြစ်တင်ခဲ့ပါတယ်။

ဒီလ အမေရိကန် အစိုးရရုံးတွေ တစ်စိတ်တပိုင်းရပ်နားမှုကြောင့် ကွန်ဂရက်က လုံလောက်တဲ့ ဘတ်ဂျက် အချိန်မီထုတ်မပေးနိုင်တာကြောင့် နာဆာဝန်ထမ်းတွေရဲ့ ၉၇ ရာခိုင်းနှုန်းခန့်ဟာ လစာမရဘဲ အိမ်ပြန်နားခဲ့ကြရပါတယ်။

Source AFP