အစ္စလာမ့် လမ်းစဉ်ဖြင့် လူ့ဘ၀ တည်ဆောက်မှုဆိုင်ရာ အခြေခံဥပဒေ (သို့မဟုတ်) ယှရီအဟ်

အောက်တိုဘာ-၂၈ ၊ ၂၀၁၃
ရေးသား ပေးပို့သူ- ဂျူလိုင်ရဲရင့်

အစ္စလာမ့် လမ်းစဉ်ဖြင့် လူ့ဘ၀ တည်ဆောက်မှုဆိုင်ရာ အခြေခံဥပဒေ (သို့မဟုတ်) ယှရီအဟ်

 အစ္စလာမ့်ဥပဒေ နှင့် အစ္စလာမ့်လူ့အဖွဲ့အစည်း

 အစ္စလာမ်သည် ဖန်ဆင်းရှင်၏အလိုတော်သို့ လွှဲအပ်နာခံအပ်နှင်းခြင်းအပေါ် တည်ဆောက်ထား သော ဘဝလမ်းစဉ်ဖြစ်သည်။ အရဗီလို ယှရီအဟ် ဟုခေါ်သည့် အစ္စလာမ့်ဥပဒေလမ်းကြောင်းက ” ဖန်ဆင်းရှင်၏ အလိုတော်ဟူသည် အသို့နည်း ” ဆိုသောမေးခွန်းကို အဖြေပေးထားပါသည်။ ကျမ်းမြတ်ကုရ်အာန်၌ ဥပဒေပြဋ္ဌာန်းချက် များကို ရှင်းလင်းစွာဖော်ပြထားသော ပါဒတော်များစွာပါဝင်နေ၏။ ၄င်းပြင် ထိုပါဒတော်များသည် အစ္စလာမ့်ဥပဒေအား ထုတ်နှုတ်ရယူသည့် အဓိကအရင်းအမြစ်များ ဖြစ်ပေသည်။  ဤကဏ္ဍသည် အစ္စလာမ့်ဥပဒေကိုလိုက်နာပါသည်ဟု ကြွေးကြော်ထားကြကုန်သည့် မုစ်လင်မ်နိုင်ငံတစ်ခုခု၏ဥပဒေ (ဝါ) ကျင့်ထုံးကို ဖော်ပြခြင်းမဟုတ်ဘဲ အစ္စလာမ့်ယှရီအဟ်သဘောတရားကို တင်ပြခြင်းသာဖြစ်သည်။ ယှရီအဟ်၏အဓိပ္ပါယ်/ဆိုလိုချက်၊ ဥပဒေကို ပညာရှင်များမှ မည်သို့ထုတ်ယူကြပုံ၊ အစ္စလာမ့်ဥပဒေတွင် နေ့တစ်ဓူဝအရေးအရာများ ပါဝင်နေပုံ၊ အစ္စလာမ့်လူ့အဖွဲ့အစည်းအတွင်းရှိ အငြင်းပွားဖွယ်  ပြစ်မှုဆိုင်ရာဥပဒေများ နှင့် ၄င်းတို့၏ရည်ရွယ်ချက်များအကြောင်းတို့ကို အဆင့်လိုက်တင်ပြသွားပါမည်။

ယှရီအဟ် ဟူသည်

ယနေ့ခေတ်ရှိမုစ်လင်မ်အများအပြားတို့သည် ယှရီအဟ်ဟူသည့် အသုံးအနှုန်းကို ပြစ်မှုဆိုင်ရာ အစ္စလာမ့်ဥပဒေအဖြစ်သာ သီးသန့်သုံးစွဲနေ သကဲ့သို့ ဖြစ်နေ၏။ ပြစ်မှုဆိုင်ရာ ဥပဒေသည် ယှရီအဟ်၏သေးငယ်သော အစိတ်အပိုင်းတစ်ရပ်မျှသာ ဖြစ်ပါသည်။ စင်စစ်၌ ယှရီအဟ် ဟူသည် လူတစ်ဦးချင်းဖြစ်စေ လူ့အဖွဲ့အစည်း တစ်ရပ်လုံးဖြစ်စေ ဘဝ၏အရေးအရာ အပေါင်းနှင့်စပ်ဆိုင်သော နာမ်ပိုင်းဆိုင်ရာ ကိုယ်ကျင့်တရားပိုင်းဆိုင်ရာ လမ်းကြောင်းအား ကျယ်ဝန်းစွာ ဖော်ထုတ်ထားချက်ပင် ဖြစ်သည်။  ယှရီအဟ် ဟူသောဝေါဟာရမှ အစ္စလာမ့်ဥပဒေ၏ အခြေခံဒဿန နှင့် ရည်ရွယ်ချက်ကို သိရှိနိုင်၏။ ယှရီအဟ်၏ ရင်းမြစ်ဝေါဟာရမှာ ယှရာ ဖြစ်ပြီး အောက်ဖော်ပြပါ အဓိပ္ပာယ်ခြောက်မျိုးထွက်ရှိသည်။ ပထမလေးမျိုးမှာ အစ္စလာမ့်ဥပဒေဆိုသည်ထက် အစ္စလာမ့်ဥပဒေအတိုင်း ဘဝတည်ဆောက်မှု လမ်းကြောင်းကို ညွှန်းထားသည်။

၁။  စတင်ခြင်း 

အစ္စလာမ့်ဥပဒေသည် မုစ်လင်မ့်လူ့အဖွဲ့အစည်းအတွင်း နေထိုင်ရှင်သန်ရေးစည်းမျဉ်းများကို အခြေခံမှအစ စတင်ချမှတ်ထားသည်။

၂။  ရွက်လှေ

ရွက်လှေသည် လူတို့အား ခရီးဆက်စေပြီး မျှော်မှန်းရာပန်းတိုင်သို့ အဆင့်ဆင့်သယ်ဆောင်ပေး၏။ လူ့အသိုက်အမြုံ၏ ဥာဏ်ရည်၊ ကျင့်ဝတ်၊ ကိုယ်ကျင့်တရား၊ စိတ်ဓါတ်များ ဖွံ့ဖြိုးတိုးတက်ရေးအတွက် ယှရီအဟ်က ရွက်လှေတစ်စင်းကဲ့သို့အလား ဆောင်ကြဉ်းပေးသည်။

၃။  အမိုးအကာတဲ(အကာအကွယ်)  

ယှရီအဟ်သည် အမိုးအကာရှိတဲတစ်လုံးကဲ့သို့ လူတို့အား ရုပ်၊ နာမ်၊ စိတ်ဓါတ် မပျက်စီးအောင် ကာကွယ်စောင့်ရှောက်ပေးသည်။

၎။  ဥပဒေပြဋ္ဌာန်းခြင်း  

အုပ်ချုပ်ရေးရည်ရွယ်ချက်အတွက် အစ္စလာမ့်ဥပဒေများအားသတ်မှတ်ရာတွင် စီရင်ခြင်း၏လုပ်ထုံးလုပ်နည်း အဆင့်ဆင့်ကို ဖော်ပြသည့်စကားလုံးဖြစ်သည်။ အလားတူစွာ နိုင်ငံသားတစ်ဦးချင်းစီ၏ တာဝန်နှင့်အခွင့်အရေးအပေါ် အခြေပြုသော လူမှုဆက်ဆံရေးကိုလည်း ယှရီအဟ်မှ ပြဋ္ဌာန်းထားသည်။

၅။  ရေရှိရာသို့သွားရာလမ်းကြောင်း 

အာရေဗျသဲကန္တာရများတွင် ရေသည် အသက်ရှင်သန်ရေးအတွက် ပင်မအကြောင်းအချက်ဖြစ်သည်။  ဤသဘောတရားအရ ယှရီအဟ်က အစ္စလာမ့်လူ့အသိုင်းအဝိုင်း တစ်ရပ်ကို ရုပ်၊ နာမ်၊ ကိုယ်ကျင့်တရားပိုင်းနှင့်သက်ဆိုင် သော ဘဝနေထိုင်မှုအား ဖြစ်ပေါ်လာစေသည်။ လမ်းကြောင်းဟု ရည်ညွှန်းခြင်းမှာ ယင်းလမ်း၏အဆုံးသတ်သည် ဖန်ဆင်းရှင်၏အလိုတော်သို့ အကြွင်းမဲ့နာခံအပ်နှင်းလိုက်ခြင်း ဖြစ်သည်။ အစ္စလာမ့်ဥပဒေက စာရိတ္တဆိုးကို လျော့ပါး စေ၍ စာရိတ္တကောင်းကိုတိုးပွားစေသော ပတ်ဝန်းကျင်တစ်ခုအား ဖန်တီးပေးသည်။

၆။  မခန်းခြောက်သည့်စမ်းပေါက်  

ဤစကားသည် ရင်းမြစ်အဓိပ္ပာယ်သာ မဟုတ်၊ ယှရီအဟ် ဟူသောဝေါဟာရ၏ကိုယ်စားပြုချက်ပင် ဖြစ်နေသည်။ အဆက်မပြတ်ရေထွက်ရှိနေခြင်း ဟုသည့်ဆိုလိုချက်က ယှရီအဟ်သည် ” လူ့ခပ်သိမ်းအတွက် အဆုံးမရှိ အကျိုးဖြစ်ထွန်းစေရာ  လောကတစ်ဝှန်းနှင့်သက်ဆိုင်သောပညာ ” ဟူ၍ အစ္စလာမ့်ဒဿနကို ညွှန်ပြနေပေသည်။  သို့ဖြစ်ရာ ဤဥပဒေသည် လူမျိုးတစ်စု၊ နိုင်ငံတစ်ခု၊ ခေတ်ကာလတစ်ရပ်တည်းအတွက်သာမဟုတ် – အစ္စလာမ့် ယုံကြည်ချက်ကိုလက်ခံသူတိုင်းနှင့် သက်ဆိုင်နေပါသည်။

 

ဗျာဒိတ်ဥပဒေအား ထုတ်နှုတ်ခြင်း နှင့် ဖွင့်ဆိုခြင်း

 ယှရီအဟ် ဟုအမည်တွင်သည့် ဥပဒေများသည် လမ်းကြောင်းများစွာမှဆင်းသက်လာသည် (လာမည့်အခန်း၌ အသေးစိတ်တင်ပြပါမည်)။ ၄င်းလမ်းကြောင်းမှ ထုတ်နှုတ်သည့် ဥပဒေများမှာ နက်နဲသည့်အတတ်ပညာမှတဆင့် စံနစ်တကျဖြစ်အောင် စီမံထားခြင်းဖြစ်သည်။ ယင်းအတတ်ပညာကို ဖိက်ဟ် (ကျွန်ုပ်တို့ထံတွင် ဖိကဟ်ဟု အသံထွက်၏) ဟု ခေါ်၏။ ဥပဒေပြုပညာ ဖြစ်သည်။ ဤပညာက ဖန်ဆင်းရှင်၏အလိုတော်အား နားလည်စေသည်။     ဥပဒေပြုရေး လမ်းကြောင်းမှ ပညာရှင်များကို ဖုကဟာ (ဧကဝုစ်နာမ် – ဖကီးဟ်)ဟု သိရှိကြသည်။ ဤပညာ ရှင်များသည် အစိုးရအာဏာပိုင် လက်အောက်ခံများအဖြစ် လုပ်ကိုင်လေ့ မရှိကြချေ။ ၄င်းတို့ထံ၌ အခြားဖုကဟာတို့၏ ထောက်ခံခွင့်ပြုချက် (အိဂျာဇဟ်)ဖြင့် တရားဝင်အယူအဆတစ်ရပ်ကို ထုတ်ပြန်နိုင်သည့်အခွင့်အာဏာ ရှိကြသည်။  ဤပညာရပ်ကို သိတတ်ရန်မှာ  ဘဝတစ်ခုလုံးမြုပ်နှံထားရပါသည်။ မြောက်များလှစွာသော ဆရာမြတ် ဆရာကောင်းများ (စစ်မှန်သည့်ပညာရှင်များ)က ၄င်းတို့သည် နှစ်ပေါင်း ၂ဝ ကျော်အထိ လေ့လာသော်ငြား ဤအတတ်ပညာ၏ လက်သင်များသာဖြစ်သေးကြောင်း ဆိုတတ်ကြ၏။ ဤအတတ်ပညာ၏ ရှုပ်ထွေးနက်နဲမှုကြောင့် ဖုကဟာများ၏ ဘဝနှင့်ရင်း၍ ကြိုးပမ်းပုံဖော်ချက်များကို ယခုတင်ပြသည့် ကဏ္ဍတစ်ခုတည်းဖြင့်ပြည့်စုံ လုံလောက်သည်ဟု ဆိုမရနိုင်ပါ။

အများစုဖြစ်သော စွန္နီတို့၏ အစဉ်အလာအရ အစ္စလာမ်သာသနာ၌ သာသနာပိုင်လူတန်းစား ဟူ၍ မရှိ။ ဖန်ဆင်းရှင်နှင့် ဆက်သွယ်မှုရှိနေပြီး ဖန်ဆင်းရှင်၏ဆန္ဒကို လူထုထံချပြသော ဂိုဏ်းအုပ်ဂိုဏ်းချုပ်ဟူ၍လည်း မရှိပါ။ ဖန်ဆင်းရှင်နှင့်တိုက်ရိုက်ဆက်သွယ်ပေးလျက်ရှိသော (ပုပ်ရဟန်းမင်းကဲ့သို့) ကြားခံပုဂ္ဂိုလ် မရှိပါ။ လူသား၏ အသိတရား နှင့် နာမ်ပိုင်းဆိုင်ရာအပေါ် အပြင်းအထန်အားထုတ်မှုဖြင့် ဖန်ဆင်းရှင်၏အလိုတော်အား သိမြင်နားလည်မည်ဟုသာ အယုံအကြည်ထားကြပေသည်။  အစ္စလာမ့် လမ်းစဉ်တွင် ဗျာဒိတ်တော်လာ လမ်းညွှန်ချက်အား သိမြင်နားလည်မှု နှင့် လက်တွေ့အသုံးချမှုကို ဥပဒေပြုခြင်း အတတ်ပညာအားဖြင့် လူသားတို့ထံ ရောက်ရှိပေသည်။ ၄င်းအထူးလေးမြတ်ဖွယ်ရာ ဥပဒေ ပါရဂူများမှာလည်း ဥပဒေအသိုင်းအဝိုင်းမှ ပညာရှင်များ၏ဆန်းစစ်မှုကို ခံယူရလေ့ရှိသည်။ အကြောင်းမှာ ဖန်ဆင်းရှင်၏ ဗျာဒိတ်တော်အား တိုက်ရိုက်လက်ခံရယူသူဟူ၍ မရှိတော့ခြင်းကြောင့်ဖြစ်သည်။ ဤဆန်းစစ်မှု နှင့် ညှိနှိုင်းသုံးသပ်မှု နည်းစဉ်၌ အယူအဆကွဲလွဲခွင့် နှင့် အချေအတင်ဆွေးနွေးခွင့် (အိခ်သိလာ့ဖ်)သော်လည်းကောင်း၊ တညီတညွတ်တည်း လက်ခံခြင်း (အိသိဖာ့က်)သော် လည်းကောင်း ဖြစ်လာပေသည်။  ဥပဒေရေးရာအယူအဆကို ဖဝါဟ် (ဗဟုဝုစ်နာမ် – ဖသ်ဝါ) ဟုခေါ်ဆို၏။ အသေအချာလေ့ကျင့် သင်ကြားထားသောသူများသာလျှင် ဖသ်ဝါ ပေးပိုင်ခွင့်ရှိ၏။ သို့သော် မိမိ၏ကိုယ်ပိုင်အယူအဆ မပါဝင်မထည့်သွင်း ရချေ။ အကယ်၍ ဥပဒေပြုအတတ်ပညာသိပ္ပံဘာသာရပ်၌ ကျွမ်းကျင်စွာ လေ့ကျင့်သင်ကြားဖူးခြင်း၊ နက်နက်နဲနဲ လေ့လာဖူးခြင်း မရှိသုများမှ ထုတ်ပြန်သော ဖသ်ဝါများကို အစ္စလာမ့်အယူအဆအရ ခိုင်မာခြင်း၊ တရားဝင်ခြင်း မရှိ ဟု  သတ်မှတ်ကြပေသည်။

အခြေခံစည်းမျဉ်းများ နှင့် စည်းကမ်းချက်များကို ရှာဖွေရယူခြင်း

  ယှရီအဟ် အဖြစ်သတ်မှတ်ရန်  အစ္စလာမ့်ဥပဒေပြုပါရဂူများသည် အရင်းအမြစ်ကြီးလေးရပ်ကို အသုံးပြု၍ ထုတ်နှုတ်ရယူကြရ၏။

(က)။ ကုရ်အာန် ကျမ်းတော်မြတ်

(ခ)။ တမန်တော်မြတ် မုဟမ္မဒ်(ဆွ)၏ဓလေ့တော် (စွန္နဟ်)

(ဂ)။ ပညာရှင်များ၏ သဘောတူအဆိုညီမှု (အိဂ်ျမာအ်)

(ဃ)။ သဏ္ဍာန်တူဥပဒေဆိုင်ရာ နှိုင်းယှဉ်ဆန်းစစ်သုတေသနပြုချက်များ (ကိယာ့စ်)

(က) ကျမ်းမြတ်ကုရ်အာန်၌ …

ဤသည်ကား လူခပ်သိမ်းတို့ထံ ရှင်းလင်းဖော်ပြချက်၊ လမ်းညွှန်တရား နှင့် (အရှင့်နှစ်မြို့မှုအလို့ငှါ ဒုစရိုက်မှ ကြဉ်ရှောင်ကြကုန်သော) မုသ်သကီများအဖို့ ဆုံးမသြဝါဒ ဖြစ်၏။                       ကုရ်အာန်  ( ၃း ၁၃၈ )

 

ကုရ်အာန်က အထက်ပါကဲ့သို့ဆိုထား၏။ ဤပါဒတော်က ကျမ်းဂန်ကုရ်အာန်၏ ဥပဒေများမှာ တိကျ ရှင်းလင်းစွာ ဖော်ပြထားခြင်းကြောင့် မည်သည့်သံသယမျှဖြစ်စရာ မလိုကြောင်း တင်ပြထားသည်။ သို့သော် ဗျာဒိတ် ထုတ်ပြန်ခြင်း လမ်းကြောင်းပေါ်မူတည်ပြီး အချို့ဥပဒေများမှာ အဆင့်ဆင့်ပြဌာန်း၍ အချို့မှာ သစ်လွင်ခြင်းခံရသည် (ဆိုလိုသည်မှာ – အချို့ဥပဒေများသည် ထပ်ဆင့်ရှင်းပြချက် သို့မဟုတ် အခြားပါဒတော်များအပေါ် ကန့်သတ်ချက်များ ဖြင့် သတ်မှတ်ထားခြင်း ဖြစ်သည်)။  ကျမ်းမြတ်ကုရ်အာန်သည် တစ်ကြိမ်တည်းနှင့် တစ်လုံးတစ်ဝတည်း ထုတ်ပြန်ကျရောက်လာခြင်း မဟုတ်။ အဆင့်လိုက် ကျရောက်လာခဲ့ခြင်းဖြစ်သည်။ သို့ဖြစ်ရာ အစ္စလာမ့်ဥပဒေများသည်လည်း မုစ်လင်မ်လူ့အဖွဲ့အစည်း၏ လူမှုရေး၊ ကိုယ်ကျင့်စာဂဖြစ်စဉ်နှင့် တစ်ကွ ဖွံ့ဖြိုးတိုးတက်လာခဲ့၏။ ဥပမာ – အစ္စလာမ်မတိုင်မီ အာရေဗျယဉ်ကျေးမှု၌ အစဉ်အလာ အလေ့အထဖြစ်နေသည့် မူးယစ်ဆေးဝါး နှင့် လောင်းကစားကို တားမြစ်ရာတွင် ကုရ်အာန်က ပထမအဆင့်အနေဖြင့် မူးယစ်သေစာသည် သန့်စင်သော ရိက္ခာမဖြစ်၍ အားမပေးကြောင်း ဖော်ပြသည် (၁၆း၆၇)။ ဒုတိယအဆင့်၌ မူးယစ်သေစာနှင့်လောင်းကစားသည် မဆိုစလောက်ကောင်းကျိုးရှိနေလင့် ကစား မကောင်းကျိုး များပြားသည့်ပြစ်မှု တစ်ရပ်အဖြစ် ဖော်ပြတားမြစ်သည် (၂း၂၁၉)။ တတိယအဆင့်၌ မူးယစ်သေစာ မှီဝဲထားသော အခြေအနေတွင် ဆွလာသ်ဝတ်ပြုခွင့် မရှိကြောင်း တစ်ဆင့်တက်ကာ တားမြစ်၏ (၄း၄၃)။ မုစ်လင်မ်တို့သည် တစ်နေ့လျှင် ငါးကြိမ်တိုင်တိုင် ဝတ်ပြုရသဖြင့် မုစ်လင်မ်လူ့အဖွဲ့အစည်းမှ နောက်ဆုံးအဆင့်အဖြစ် ကြိုတင်ပြင်ဆင်နိုင်ရန် ဤဥပဒေဖြင့် ကန့်သတ်အချက်ပေးလိုက်ခြင်းဖြစ်သည်။ နောက်ဆုံး စတုတ္ထအဆင့်တွင်ကား မူးယစ်သေစာသုံးစွဲခြင်း နှင့်လောင်းကစားကို ယတိပြတ် ပိတ်ပင်တားမြစ်လိုက်ပါသည် (၅း၉ဝ-၉၁)။  ကုရ်အာန်သည် တိကျသောဥပဒေပြဋ္ဌာန်းချက်များကို အနည်းငယ်မျှသာ ချပြထား၏။ သို့သော် အစ္စလာမ့်ဥပဒေ၌ အခြေခံစည်းမျဉ်းအဖြစ် ဖွဲ့တည်နိုင်မည့် ကိုယ်ကျင့်တရားဆိုင်ရာ လမ်းညွှန်ချက်များကိုမူ ကျယ်ကျယ် ပြန့်ပြန့်ပြန့် ချမှတ်ထားပေသည်။

ဖုကဟာများသည် ရံဖန်ရံခါ ပါဒတော်တစ်ခုတည်းမှပင် စည်းမျဉ်းများစွာကို ထုတ်ယူ ဖော်ဆောင်တတ်ကြ၏။ အခြေအနေအသစ်၊ အနေအထားအသစ်များ ထွက်ပေါ်လာလျှင် ထပ်တိုးပြဋ္ဌာန်းရမည့် အခြေခံ ဥပဒေစည်းမျဉ်းများကို ပြဋ္ဌာန်းထားပြီးသောဥပဒေ၏ နောက်ကွယ်ရှိ အကြောင်းရင်းခံ (အိလ္လဟ်)မှ ရှာဖွေရယူကြ၏။  ကုရ်အာန်ရှိ ဥပဒေအများစုသည် လူထုကောင်းကျိုးဖြစ်ထွန်းရေး အတွေးအခေါ်မှ မြစ်ဖျားခံလာခြင်း ဖြစ်သည်။ ၄င်း၌ လူတစ်ဦးချင်းသာမက လူ့အဖွဲ့အစည်းတစ်ရပ်လုံး၏ ရုပ်၊ နာမ်၊ ကိုယ်ကျင့်တရား၊ အသိဥာဏ် မြင့်ခြင်းတရားများ ပါဝင်နေ၏။ လူထုကောင်းကျိုးးဖြစ်ထွန်းစေရေး ဟူသောအယူအဆသည် အစ္စလာမ့်ဥပဒေ၏ အခြေခံစည်းမျဉ်းအဖြစ် ဆန့်ထွက်လာပြီးနောက် အသစ်အသစ်သော ယဉ်ကျေးမှုများ၊ ခေတ်အလျောက် အခြေအနေများအတွက် အသုံးချနိုင်ပေသည်။ ဥပမာ လက်ရှိခေတ်ကာလတွင် ယာဉ်မောင်းဥပဒေသည် ယှရီအဟ်၏အစိတ်အပိုင်း တစ်ရပ်ဖြစ်လာသည်။ ၄င်းဥပဒေကို ချိုးဖောက်ပါက အပြစ်ရှိသည်ဟု သတ်မှတ်ကြသည်။ ဤဥပဒေများမှာ လူတို့၏ ရုပ်ပိုင်းဆိုင်ရာ ထိခိုက်နစ်နာမှုများကို ကာကွယ်ရန် ဆောင်ရွက်ထားသဖြင့် အစ္စလာမ့်ဥပဒေ၏ ရည်ရွယ်ချက်၌ အကျုံးဝင်နေ၍ ဖြစ်ပါသည်။  ကုရ်အာန်ဆိုင်ရာ အခြေခံစည်းမျဉ်း၏ အခြားဥပမာတစ်ရပ်မှာ လွယ်ကူမှုရှိစေခြင်း ဖြစ်၏။ ၄င်းမှာ

” အလ္လာဟ်အရှင်မြတ်သည် အသင်တို့အဖို့ လွယ်ကူသက်သာချောင်ချိမှုကို အလိုရှိတော်မူပေသည်။ အသင်တို့အဖို့ ခက်ခဲမှုကိုကား (အလျဉ်း) လိုလားတော်မူသည် မဟုတ်ချေ ” ဟူသောအဆိုမှ ဆင်းသက်လာသည် (၂း၁၈၅)။ တာဝန်အဖြစ် သတ်မှတ်မထားသော ခက်ခဲခြင်းမှ သာသနာ့ ကိုင်းရှိုင်းမှုသည် ထွက်ရှိမလာပါ (ဥပမာ – မိမိကိုယ်ကိုနာကြင်စေခြင်း)။ ဖန်ဆင်းရှင်၏ ဥပဒေနောက့်သို့ ရိုးသားဖြူစင်စွာ လိုက်နာခြင်းဟူသော လွယ်ကူမှုမှသာ ထွက်လာသည်ဟု ဥပဒေပါရဂူများက ကောက်ချက်ချကြသည်။ ဤစည်းမျဉ်းကို အစ္စလာမ့်ဥပဒေက အလယ်အလတ်လမ်းစဉ်အဖြစ် ညွှန်ပြသည်။ ဖသ်ဝါ ထုတ်သည့်အခါ၌ ဖြစ်စေ၊ လူတို့အား အစ္စလာမ်သို့ ဖိတ်ခေါ်သတင်းပေးသည့်အခါ၌ဖြစ်စေ လူတို့အတွက် လွယ်ကူသက်သာမှုရှိစေရန် တိုက်တွန်းထားပါသည်။ ဤလမ်းစဉ်က အစ္စလာမ်၏ အခြေခံအချက်များ၌ ခိုင်မာမြဲမြံရန် နှင့် အစ္စလာမ့်ဦးတည်ချက်များ ခိုင်မာအားကောင်းလာစေရန် တိုက်တွန်းထားသလို၊ အရာရာတိုင်း၌ လွယ်ကူချောင်ချိစေရန် နှင့် ကုရ်အာန့်ဦးတည်ချက်ပြည့်မြောက်ရေး၌ လှုပ်သာလှည့်သာသောနည်းလမ်းများအား အသုံးပြုရန်ကိုလည်း တိုက်တွန်းအားပေးထားပေသည်။  ကုရ်အာန်ရှိ ဥပဒေအပေါင်းကို ကျယ်ပြန့်သော စည်းမျဉ်းအမျိုးအစားခြောက်မျိုးဖြင့် အဓိကအုပ်စုများအဖြစ် ခွဲခြားနိုင်ပေသည်။

၁။  သာသနာကို ထိန်းသိမ်းစောင့်ရှောက်ခြင်း

လူ့အဖွဲ့အစည်း၌ တစ်ဆူရှင်ဝါဒ နှင့် အစ္စလာမ့်ကျင့်ရပ်များကို ဤဥပဒေများက တည်ဆောက် ကျင့်ကြံစေသည်။ ဤစည်းမျဉ်းက လူ့အဖွဲ့အစည်းအတွင်းရှိ သာသနာအပေါင်း၏လွတ်လပ်စွာကိုးကွယ်ခွင့်ကိုလည်း အကာအကွယ်ပေးထားပါသည်။

၂။  အသက်ဘဝကို ထိန်းသိမ်းစောင့်ရှောက်ခြင်း

ဤဥပဒေများက လူသားတို့၏အသက်ဘဝကို တန်ဖိုးထား၍ ကာကွယ်စောင့်ရှောက်ရေးဥပဒေများကို ဖြစ်လာစေသည်။

၃။  မျိုးနွယ်ကို ထိန်းသိမ်းစောင့်ရှောက်ခြင်း

ကြံ့ခိုင်သော အစ္စလာမ့်လူ့အဖွဲ့အစည်း၏အုတ်မြစ်ဖြစ်သည့် မိသားစုနှောင်ကြိုးများကို ဤဥပဒေများက စောင့်ရှောက်၊ အားကောင်းစေသည်။ တရားမဝင် ကာမဆက်ဆံမှု နှင့် လိင်ဖောက်ပြန်မှုကိုလည်း အပြစ်ပေးစေ၏။

၎။  ဥစ္စာပိုင်ဆိုင်မှုကို ထိန်းသိမ်းစောင့်ရှောက်ခြင်း

ဤဥပဒေများက နိုင်ငံသားတို့၏ ပစ္စည်းဥစ္စာပိုင်ဆိုင်ခွင့် နှင့် ရှာဖွေစုဆောင်းခွင့်ကို ထိန်းသိမ်းပေးသည်။ ခိုးဝှက်ခြင်းအပါအဝင် မတရားမှုများထံမှ အကာအကွယ်ပေးထားသည်။

၅။  ဂုဏ်သိက္ခာကို ထိန်းသိမ်းစောင့်ရှောက်ခြင်း

ဂုဏ်သိက္ခာသည် လူ့အခွင့်အရေးများ နှင့် အစ္စလာမ့်လမ်းစဉ်၏အခြေခံပင်ဖြစ်ပြီး ဤဥပဒေများက  နိုင်ငံသားတို့၏ ဂုဏ်သိက္ခာကို ကာကွယ်ပေးသည်။

၆။  အသိဥာဏ်တရားကို ထိန်းသိမ်းစောင့်ရှောက်ခြင်း

အသိဥာဏ် နှင့် ဆင်ခြင်တုံတရားသည် ထွဋ်မြတ်ကြောင်း အစ္စလာမ့်လမ်းစဉ်က သတ်မှတ်ထား၏။ ထို့ကြောင့် ယှရီအဟ်က ရုပ်ပိုင်းဆိုင်ရာနှင့်စိတ်ပိုင်းဆိုင်ရာအန္တရာယ်များမှ အသိဥာဏ်ကို အကာအကွယ်ပေးစေ၏။ အသိဥာဏ်နှင့်ဆုံးဖြတ်မှုကို တစ်သီးတစ်ခြားစီဖြစ်သွားစေသော အရက်ကဲ့သို့ မူးယစ်သေစာများကို ဥပဒေက တားမြစ် ထားသည်။  ကုရ်အာန်ကပြဆိုထားသော အစ္စလာမ့်ဥပဒေ၏ဤစည်းမျဉ်းများအပေါ် မုစ်လင်မ်တို့က မိမိတို့၏  ယုံကြည်ချက်နှင့်လုပ်ရပ်များကို အခြေတည်ထားခြင်း ဖြစ်ပေသည်။

သာသနာ့ကျင့်စဉ်ကျင့်ရပ်များ

ဘဝ၏အချိန်တိုင်းသည် အဖိုးထိုက်တန်၏ ဟု အစ္စလာမ့်လမ်းစဉ်က သတ်မှတ်သည်။ ဗျာဒိတ်လမ်းညွှန်အောက်မှ နေထိုင်ဆောင်ရွက်ပါက ဘဝ၏မည်သည့်လုပ်ရပ်မဆို သာသနာ့ကျင့်ရပ်များအဖြစ် စာရင်းဝင်သွားမည်ဖြစ်သည်။  အစ္စလာမ့်ဥပဒေက မဏ္ဍိုင်ငါးရပ်ကို အဓိကသာသနာ့ကျင့်ရပ်များအဖြစ် တည်ဆောက်စေသည်။

၁။ ယုံကြည်ချက်ကို ဖွင့်ဟကြေငြာခြင်း – ယှဟာဒဟ်

၂။ တစ်နေ့လျှင် ငါးကြိမ် ဝတ်ပြုခြင်း – ဆွလာသ် (၂း၃)

၃။ ရမဿွာန်လမြတ်တွင် အရုဏ်ချိန်မှနေဝင်ချိန်အထိ ဥပုသ်သီလဆောက်တည်ခြင်း – ဆွောင်မ် (၂း၁၈၃-၁၈၅)

၎။ သန့်စင်ဒါန ပေးဆောင်ခြင်း – ဇကာ့သ် (၉း၆ဝ)

၅။ ငွေကြေးအင်အားနှင့်အတူ ခန္ဓာအင်အားရှိနေပါက မက္ကဟ်ရှိ အလ္လာဟ့်အိမ်တော်သို့ သွားရောက်ခြင်း –    ဟဂ်ျ (၂း၁၉၆-၂ဝဝ)။

လူမှုဆက်ဆံရေး

ဤဥပဒေသည် မုစ်လင်မ်အချင်းချင်းတို့၏ အခွင့်အရေး၊ တာဝန်ဝတ္တရားများနှင့်သက်ဆိုင်သည်။ ၄င်း၌ အပြန်အလှန်ဆက်ဆံရေး၊ ငြိမ်းချမ်းစွာအတူ ယှဉ်တွဲနေထိုင်ရေး၊ စီးပွားရေးကျင့်ဝတ်များ ပါဝင်သည်။ လူမှုဆက်ဆံရေးဆိုင်ရာဥပဒေ၌ လူသတ်မှု၊ ခိုးဝှက်မှု စသည့် ပြစ်မှုကြီးများအတွက်လည်း ပြစ်ဒဏ်ချမှတ်ခြင်း ရှိသည်။

မိသားစုဆိုင်ရာဥပဒေ

ကုရ်အာန်ရှိ မိသားစုဆိုင်ရာဥပဒေများမှာ မိသားစုဝင်အချင်းချင်းဆက်ဆံရေး၊ လက်ထပ်ထိမ်းမြားခြင်း၊ လိင်မှုရေးရာကိစ္စ၊ ကွာရှင်းပြတ်စဲခြင်း၊ အမွေခံခြင်းတို့နှင့် သက်ဆိုင်ပါသည်။ အမျိုးသမီးအခွင့်အရေးနှင့် တာဝန်ကိစ္စသည်လည်း မိသာစုဆိုင်ရာဥပဒေ၌ အရေးကြီးအခန်းကဏ္ဍမှ ပါဝင်၏။

အစားအသောက်ဥပဒေ

အစားအသောက်ဆိုင်ရာဥပဒေသည် အခန်းကဏ္ဍ မကြီးမားသော်လည်း အစ္စလာမ့်ဥပဒေ၌ အရေးပါ သောအကြောင်းတစ်ရပ်ဖြစ်သည်။ ခန္ဓာကိုယ်တွင်းသို့ တိုက်ရိုက်ဝင်ရောက်သောအရာသည် အလ္လာဟ့်သိစိတ်ကို အကျိုး သက်ရောက်စေ၏။ ထို့ကြောင့် ယှရီအဟ်၌ မရှိမဖြစ် ထည့်သွင်းထားခြင်း ဖြစ်သည်။

စစ်မက်ဥပဒေ

စစ်မက်ရေးရာနှင့်ပတ်သက်၍ ကုရ်အာန်မှ တိကျသောစည်းကမ်းချက်များ ချမှတ်ထားသည်။ စစ်မက် ကာလအတွင်း စောင့်ထိန်းရမည့် အခြေခံကျင့်ဝတ်များ သာမက စစ်နိုင်ပစ္စည်းခွဲဝေဖြန့်ချိမှုလည်း ပါဝင်သည်။

  (ခ)  စွန္နဟ်၌ …

အလ္လာဟ်အရှင်မြတ်နှင့် နောက်ဆုံးနေ့တော်အား သက်ဝင်ယုံကြည်သည့်အပြင် အလ္လာဟ်အရှင်မြတ်အား များမြောင်စွာ အောက်မေ့တသသူအဖို့ အလ္လာဟ်အရှင်မြတ်၏ ရစူလ်တမန်တော်မြတ်ထံ၌ မွန်မြတ်လှစွာသော စံနမူနာသည် အသင်တို့အတွက် ဧကန်ရှိပေသည်။          ကုရ်အာန်  ( ၃၃း ၂၁ )

တမန်တော် မုဟမ္မဒ်(ဆွ)အပေါ် အထက်ပါ ကုရ်အာန့်ညွှန်းချက်သာမက သာသနာ့ရေးရာနှင့်စပ်လျဉ်း၍ မုဟမ္မဒ်(ဆွ)သည် ဒုတိယအရင်းအမြစ်ကြီးဖြစ်ကြောင်း အထက်ပါကဲ့သို့ ပြတ်သားစွာ ဖော်ပြထားသည်ကို တွေ့ရပေမည်။

အို – သက်ဝင်ယုံကြည်သူအပေါင်းတို့။ အသင်တို့သည် အလ္လာဟ်အရှင်မြတ်အား လိုက်နာနာခံကြလေကုန်။ ထို့နည်းတူ ရစူလ်တမန်တော်မြတ်အား လိုက်နာနာခံကြလေကုန်။ ထို့နည်းတူ အသင်တို့အနက်မှ (အစ္စလာမ့် ကျင့်ဝတ်နှင့်အညီရှိကြသော) အာဏာပိုင်များ/ခေါင်းဆောင်များကို လိုက်နာနာခံကြလေကုန်။ တဖန် အကယ်၍ အသင်တို့သည် တစ်စုံတစ်ရာနှင့်စပ်လျဉ်း၍ အငြင်းပွားကြသော် အသင်တို့သည် အလ္လာဟ်အရှင်မြတ်နှင့်ရစူလ်တမန်တော်မြတ်ထံသို့ ရည်ညွှန်းကိုးကားမှုပြုကြကုန်။

ကုရ်အာန် ( ၄း ၅၉ )

စွန္နဟ်ဟုသိကြသော တမန်တော်မြတ် မုဟမ္မဒ်(ဆွ)၏ဘဝစံနမူနာသည် အစ္စလာမ့်ဥပဒေ၏ ဒုတိယမြောက် အရင်းအမြစ်ဖြစ်သည်။ စွန္နဟ်သည် တမန်တော့်ဖြစ်စဉ် အသေးစိတ်ကို သြဝါဒတော်များနှင့် တစ်ကွ သူ၏ သာဝကတော်တို့မှ ဆင့်ပြန်ချက်များဖြစ်ကြ၏။ ၄င်း၌ လုပ်ရပ်များ၊ မိန့်ကြားမှုများ၊ တမန်တော်မှ ဆိတ်ငြိမ်စွာဖြင့် ခွင့်ပြုချက်(သဘောတူချက်)များ၊ တမန်တော့်ရှေ့မှောက်ရှိ လုပ်ရပ်တစ်ခုခုကို ကိုယ်တော်မြတ်မှ တိုက်တွန်းအားပေးချက် သို့မဟုတ် တားမြစ်ချက်များ ပါဝင်ကြ၏။ စွန္နဟ်အား သမိုင်းအဆက်ဆက် ထိန်းသိမ်းလာသောမှတ်တမ်းကို ဟဒီးဆ် ဟု ခေါ်ဆိုသည်။  စွန္နဟ်က ကုရ်အာန်၏သွန်သင်မှုများကို ရှင်းပြသည်၊ ဖွင့်ဆိုပြသည်။ ဘဝရေးရာ၌ ကုရ်အာန့် စည်းမျဉ်းအတိုင်း မည်သို့နေထိုင်ရမည်ကို ပြသထားသည်။ ဥပမာ ကုရ်အာန်၌ မုစ်လင်မ်တို့ကို ဘဝတစ်လျှောက်လုံး ဆွလာသ်ငါးကြိမ် ဝတ်ပြုရန် ဖိတ်ခေါ်ထားသော်လည်း ဝတ်ပြုနည်းအဆင့်ဆင့်ကိုမူ တိကျစွာ ချပြမထားချေ။ ဆွလာသ် ဝတ်ပြုပုံအသေးစိတ်နှင့် တစ်ကွ ကျင့်သုံးနည်းဥပဒေကို စွန္နဟ်မှသာ ရရှိခြင်းဖြစ်သည်။  အလားတူစွာ ကုရ်အာန်က မုစ်လင်မ်တို့အား ဇကာ့သ်ပေးလှူရန် ညွှန်ကြားထားသော်လည်း ပမာဏကိုမူ ဆိုမထားပါ။ နှစ်စဉ်မည်မျှပေးဆောင် ရမည်ကို ဟဒီးဆ်၌သာ ရှာဖွေသိရှိကြရပေသည်။  ဖန်ဆင်းရှင်၏အလိုတော်အား သိအောင်ကြိုးစားသော မုစ်လင်မ်သည် ပထမဦးစွာ ကုရ်အာန်၊ ၄င်းနောက် ဟဒီးဆ်ကို မိမိတို့၏ အခြေခံရင်းမြစ်နှစ်ရပ်အဖြစ် လက်ကိုင်ပြုရပါသည်။ တမန်တော် မုဟမ္မဒ်(ဆွ)၏ ဘဝစံနမူနာသည် အစ္စလာမ့် ဥပဒေပြုခြင်း၌ အရေးအကြီးဆုံးအခန်း ကဏ္ဍ၌ ပါဝင်နေပေသည်။  ဟဒီးဆ်၌ အပိုင်းနှစ်ရပ်ပါဝင်၏။ ဆင့်ပြန်သူတို့၏အစဉ်အဆက်ကွင်းဆက် (အိစ်နဒ်) နှင့် အကြောင်းအရာစာသားများ (မသ်န်) ဖြစ်၏။ ဟဒီးဆ်တော်တစ်ပုဒ်၏ယေဘူယျပုံစံကို အောက်ပါအတိုင်း တွေ့ကြရ ပေမည်။  “ အဗူ ဟုရိုင်ရဟ်ထံမှ အလ်အအ်ရာ့ဂ်ျ၊ ၄င်းထံမှ မုဟမ္မဒ် ဗင်န် ယဟ်ယာ ဗင်န် ဟဗ်ဗာန်း နှင့် အဗူလ် ဇင်နဒ်၊ ၄င်းတို့ထံမှ မာလစ်က် ဗင်န် အနတ်စ်က ဆင့်ပြန်ခဲ့သည်။ ရစူလုလ္လာဟ်(ဆွ)မှ မိန့်တော်မူသည်မှာ –  မိမိ၏ညီနောင်မှ ကမ်းလှမ်းထားပြီးသော အမျိုးသမီးကို အသင်တို့အနက် မည်သူမျှ ထိမ်းမြားရေးအတွက် သူမကို မကမ်းလှမ်းကြလေနှင့်”

ဟဒီးဆ်စုဆောင်းသူတို့သည် မုစ်လင်မ်လောကတစ်လွှား၌ အချိန်နှင့်အမျှ ဟဒီးဆ်ကို ရှာဖွေစုဆောင်းခဲ့ကြ၏။ အစ္စလာမ့်အစဉ်အလာ၌ ဟဒီးဆ်စုဆောင်းကျမ်း ၆ စောင်ကို ယေဘူယျအားဖြင့် အခိုင်မာဆုံးအဖြစ် သတ်မှတ်ထားကြသည်။ ၄င်းတို့မှာ  – အစ္စမာအီလ် အလ်ဗုခါရီ၊ မုစ်လင်မ် အိဗ်နု အလ်ဟဂ်ျဂျာ့ဂ်ျ၊ အဗူ ဒါဝူးဒ်၊ အန် နိစာအီ၊ အသ် သိရ် မိဇီ၊ အိဗ်နုမာဂျာဟ် တို့ဖြစ်ကြ၏။ ၄င်းတို့အနက် အလ်ဗုခါရီ နှင့် မုစ်လင်မ် ဟဒီးဆ်ကျမ်းနှစ်စောင်သည် သြဇာအကြီးမားဆုံး ဖြစ်ကြသည်။  ဟဒီးဆ်စုဆောင်းဆဲကာလတွင် မတိကျစွာ ဆင့်ပြန်ထားသောဟဒီးဆ်များ၊ ဟဒီးဆ်အတုများနှင့် စပ်လျဉ်းသောပြဿနာများ မြောက်များစွာ ဖြစ်ပေါ်ခဲ့၏။ ယင်းစိန်ခေါ်ချက်ကြောင့် မခိုင်မာသည့် ဟဒီးဆ်များမှ  ခိုင်မာမှန်ကန်သည့်ဟဒီးဆ်တော်များအား ရွေးထုတ်စိစစ်ရန် ဟဒီးဆ်ဆန်းစစ်ခြင်းပညာရပ် ထွန်းပေါ်လာခဲ့သည်။ အိစ်နဒ် နှင့် မသ်န် နှစ်မျိုးလုံးကို ဆန်းစစ်သည့်အတတ်ပညာဖြင့် ဟဒီးဆ်များကို စုဆောင်းခဲ့ကြခြင်း ဖြစ်ပေသည်။

အိစ်နဒ် (ဆင့်ပြန်မှုကွင်းဆက်များ)ကိုဆန်းစစ်ခြင်း

ခိုင်မာသည့်ဟဒီးဆ်တစ်ပုဒ်အဖြစ်သတ်မှတ်ရန်အတွက် ဟဒီးဆ်၌ပါဝင်သော တမန်တော်မြတ်(ဆွ)မှ ပြောဆို/ဆောင်ရွက်စဉ် ကိုယ်တိုင်ကိုယ်ကျ တွေ့မြင်ကြား သိခဲ့သူတစ်ဦးဦးအထိ ခြေရာကောက်ကြရသည်။ ၄င်းထံမှ အဆင့်ဆင့် ဆင့်ပြန်လာသူတိုင်း၏ ဘဝ၊ ကိုယ်ကျင့်တရား နှင့် မှတ်ဥာဏ်စွမ်းရည်အသီးသီးကိုလည်း ဂဃနဏ ဆန်းစစ်ရသည်။ ယင်းသို့ စေ့စပ်စွာ ဆန်းစစ်ပြီးမှသာ ဖန်ဆင်းရှင်၏အလိုတော်ကို တမန်တော်မြတ်(ဆွ)၏ စကား နှင့် လုပ်ရပ်အဖြစ် ကိုယ်စားပြုထားသော ဟဒီးဆ်ဟု လက်ခံအတည်ပြုကြပေသည်။  သက်ဆိုင်ရာဟဒီးဆ်ကို အစဉ်အဆက်ဆင့်ပြန်လာသူ တစ်ဦးချင်းစီ၏စကားများ အတိအကျ နီးပါးတူညီမှသာ  ” အခိုင်မာဆုံးဟဒီးဆ် ” အဖြစ် သတ်မှတ်သည်။ သို့သော် ရံဖန်ရံခါတွင် ဟဒီးဆ်တစ်ပုဒ်၏ဆင့်ပြန်ချက် သုံးလေးမျိုး၌ အဓိပ္ပာယ်တစ်မျိုးတည်းထွက်နေသော်လည်း စကားလုံးများမှာ အနည်းငယ်ကွဲပြားမှုများ ရှိကြ၏။ ယင်းသို့သော ဟဒီးဆ်တော်ကို ” အခိုင်မာဆုံးမှ တစ်ဆင့်နိမ့် (ဟစံန်)” (သင့်လျော်ပြီးလက်နိုင်ခံဖွယ်)အဖြစ် သတ်မှတ်ကြ၏။

မသ်န် (ဟဒီးဆ်၏အကြောင်းအရာများ)ကို ဆန်းစစ်ခြင်း

ပညာရှင်တို့သည် ဆင့်ပြန်သူအစဉ်အဆက်နှင့်တစ်ကွ ဟဒီးဆ်တော်လာ အကြောင်းအရာများကိုလည်း ဆန်းစစ်ရ၏။ အကြောင်းအရာများမှာ ကုရ်အာန်၏ သွန်သင်မှု၊ အနှစ်သာရများနှင့် ကိုက်ညီမှုရှိနေရပါမည်။ အကြောင်းမှာ မုဟမ္မဒ်(ဆွ)၏ အဓိကပင်မတာဝန်သည် ကျမ်းဂန်၏အဆုံးအမတရားကို ဖြန့်ချိခြင်းသာ ဖြစ်သောကြောင့်ပင်။ ဟဒီးဆ်တစ်ပုဒ်သည် ကုရ်အာန်နှင့်ဆန့်ကျင်နေပါက မခိုင်မာဟု သတ်မှတ်လေ့ရှိသည်။ အလားတူစွာပင် ခိုင်မာမှန်ကန်သည်ဟု အဆိုညီညွတ်ပြီးသောဟဒီးဆ် တစ်ရပ်ရပ်နှင့် ဆန့်ကျင်နေပါကလည်း လက်မခံတတ်ကြချေ။  သို့သော်လည်း ကျမ်းမြတ်ကုရ်အာန်ကဲ့သို့ မုဟမ္မဒ်(ဆွ)၏ သွန်သင်ချက်များသည် လူ့အဖွဲ့အစည်း တိုးတက်မှု အဆင့်ဆင့်ဖြစ်စဉ်အပေါ် မူတည်သောကြောင့် အကြောင်းအရာတစ်ခုတည်းအတွက်ပင် မတူညီသည့် လုပ်ဆောင်ချက်နှစ်မျိုးထွက်ပေါ်ရသော ဟဒီးဆ်နှစ်ပုဒ်အဖြစ်လည်း တွေ့ရတတ်ပေသည်။ ၄င်းဟဒီးဆ်များမှာ ဆန့်ကျင် ဖက်များ မဟုတ်ကြ။ တစ်မျိုးထက်ပိုသော နည်းလမ်းများကို ပြသထားခြင်း သို့မဟုတ် မုစ်လင်မ်လူ့အဖွဲ့အစည်း ဖွံ့ဖြိုးပြီးနောက်မှာမှ တိုးမြှင့်သတ်မှတ်သည့်ဥပဒေများ ဖြစ်နိုင်ပေသည်။ ယင်းသို့သောကိစ္စမျိုးတွင်  နောက်ပိုင်းကာလ မှတ်တမ်းတင်မှုက ကနဦးကာလမှတ်တမ်းအား လွှမ်းမိုးထား၏ (နောက်ပိုင်းကာလဟဒီးဆ်ကို ရှေးဦးကာလဟဒီးဆ် ထက် ဦးစားပေးကြရ၏)။  ဟဒီးဆ်တစ်ပုဒ်၏အကြောင်းအရာသည် ကုရ်အာန့်ဆိုလိုချက်များနှင့်ကိုက်ညီနေသရွေ့ ခိုင်မာမှန်ကန်မှုရှိကြောင်း သတ်မှတ်လက်ခံကြပေသည်။

ခိုင်မာမှန်ကန်မှု အဆင့်အတန်းများ

ဆန်းစစ်ပြီးသည့်ဟဒီးဆ်တော်တစ်ပုဒ်၏ ခိုင်မာမှန်ကန်မှုအဆင့်အတန်းကို အောက်ပါကဲ့သို့ (အကြမ်းအားဖြင့်) ခွဲခြားထားသည်။

၁။  အကောင်းဆုံးနှင့်အခိုင်မာဆုံးဟဒီးဆ် – ဆွဟီးဟ်  

ခိုင်မာမှန်ကန်မှု၌ အဆင့်အမြင့်ဆုံးဖြစ်သည်။ ၄င်း၏ ဆင့်ပြန်သူကွင်းဆက်နှင့်စာသားအကြောင်းအရာမှာ အပြစ်အနာအဆာကင်းစင်သည်။ အစ္စလာမ့်ဥပဒေပြုရေးအတွက် အခိုင်မာအမှန်ကန်ဆုံး အမျိုးအစား ဖြစ်လာသည်။

၂။  လက်ခံနိုင်ဖွယ် – ဟစံန်    

ဆင့်ပြန်သူကွင်းဆက်၌ သံသယအနည်းငယ်ပါရှိသော ဟဒီးဆ်ကို ဤသတ်မှတ်ချက်တွင် ထည့်သွင်း ကြသည်။ ဥပမာ ဆင့်ပြန်သူတစ်ဦးဦးသည် မှတ်ဥာဏ်အားနည်းခြင်း သို့မဟုတ် ချို့ယွင်းချက်တစ်စုံတစ်ရာရှိနေခြင်း စသည်မျိုး ဖြစ်၏။ သို့သော် အခြားဆင့်ပြန်သူများမှာ ခိုင်မာမှန်ကန်စိတ်ချရသူများ ဖြစ်နေသည်ဆိုလျှင် ဤဟဒီးဆ် အမျိုးအစားကိုလည်း အစ္စလာမ့်ဥပဒေပြုရာ၌ သုံးသည်။ သို့ရာတွင် ဆွဟီးဟ် ဟဒီးဆ်များကို ပိုမိုဦးစားပေးရသည်။

၃။  အားနည်းသောဟဒီးဆ် – ဿွအီးဖ် 

ဤဟဒီးဆ်များသည် ဆင့်ပြန်သူကွင်းဆက်ပြတ်တောက်နေခြင်း သို့မဟုတ် အကြောင်းအရာများမှာ လက်ခံနိုင်စရာ မရှိခြင်း/ကြောင်းကျိုးလျော်ညီမှုမရှိခြင်းတို့ကြောင့် မခိုင်မာဟု သတ်မှတ်ကြသည်။  သို့ရာတွင် ကုရ်အာန် သို့မဟုတ် ဆွဟီးဟ် ဟဒီးဆ်နှင့် ဆန့်ကျင်ဖက်မဖြစ်သော ဟဒီးဆ်များကိုမူ အသုံးပြုတတ်ကြ၏။ ဥပမာ – ” တရုတ်ပြည်၌ပင်ဖြစ်စေ ပညာကို (သွားရောက်)ရှာဖွေကြကုန် ” ဟူသောဟဒီးဆ်မှာ အလွန်ကျော်ကြား၏။ စင်စစ်၌ ဆင့်ပြန်မှုကွင်းဆက်ပြတ်တောက်နေမှုကြောင့် ဿွအီးဖ် အဆင့်ဝင်နေသော်လည်း ” ပညာရှာဖွေခြင်းသည် မုစ်လင်မ်အမျိုးသားအမျိုးသမီးတိုင်းအတွက် မပြုမနေရတာဝန် ဖြစ်၏ ” ဟူသော ဆွဟီးဟ် ဟဒီးဆ်၏အနှစ်သာရနှင့်ထပ်တူပင်ဖြစ်နေသည်။ ယင်းသို့ဟဒီးဆ်မျိုးကို မုစ်လင်မ်များမှ ခိုင်မာမှန်ကန်သည်ဟု ယူဆ၍ အသုံးပြုလေ့ရှိပေသည်။

(ဂ)  ပညာရှင်များ၏ သဘောတူအဆိုညီမှု – အိဂ်ျမာအ်၌ …

”  ငါ၏နောက်လိုက်များမှ (အစစ်အမှန်) ပညာရှင်တို့သည် မည်သည့်အခါမျှ မှားယွင်းမှု၌ ရပ်တည် ကြလိမ့်မည်မဟုတ်  ” ဟု တမန်တော် မုဟမ္မဒ်(ဆွ)မှ မိန့်တော်မူခဲ့၏။ သို့ဖြစ်ရာ အစ္စလာမ့်ဥပဒေဖွံ့ဖြိုးတိုးတက်မှုတွင်  အိဂ်ျမာအ် ဟုခေါ်သော ပညာရှင်များ၏ သဘောတူအဆိုညီမှုမှာ တတိယအရင်းအမြစ်ဖြစ်လာခဲ့သည်။ အိဂ်ျမာအ် ၏အယူအဆကား – ခေတ်တစ်ခေတ်/မျိုးဆက်တစ်ဆက်ရှိ ပညာရှင်တို့မှ သာသနာ့ရေးရာကိစ္စတစ်ရပ်ရပ်အပေါ် အကွဲအလွဲမရှိ သဘောတူအဆိုညီကြလျှင် ၄င်းစည်းမျဉ်းကို ဥပဒေအဖြစ် ပြဋ္ဌာန်းခြင်းဖြစ်သည်။  ကုရ်အာန်၌သော်လည်းကောင်း၊ စွန္နဟ်၌သော်လည်းကောင်း သက်ဆိုင်ရာကိစ္စတစ်ခုခုနှင့်စပ်လျဉ်းပြီး ရှင်းလင်းပြတ်သားသောလမ်းညွှန်ကို မတွေ့ရသည့်အခါမှသာ ပညာရှင်များမှ အိဂ်ျမာအ် ပြုခွင့်ရှိပေသည်။ (မရှာဖွေ မစိစစ်မသုံးသပ်ဘဲ စဉ်းစားအဖြေထုတ်ပိုင်ခွင့် မရှိချေ)။ ယင်းသို့သောစည်းမျဉ်းများကို အစ္စလာမ့်အသိပညာကြွယ်ဝလှသည့်ပညာရှင်များမှ ထုတ်ဖော်ကြရ၏။ ၄င်းတို့အနေနှင့် မိမိတို့၏ကိုယ်ပိုင်အယူအဆကို အသုံးပြုခွင့်မရှိဘဲ ကုရ်အာန်နှင့်စွန္နဟ်တို့မှ အကြောင်းရင်းခံ နှင့် အနှစ်သာရများ၌သာ အခြေခံတွေးခေါ်ရပေသည်။  ဥပမာ အစ္စလာမ့်နယ်ပယ်သည် အာရေဗျနယ်နမိတ်ကိုကျော်လွန်သွားသောအခါဝယ် မုစ်လင်မ် လူ့အဖွဲ့အစည်းအဖို့ မိမိတို့ကိုဆန့်ကျင်သည့် မုစ်လင်မ်မဟုတ်သော အခြားနိုင်ငံများနှင့် ပဋိညာဉ်စာချုပ်များ ပြုနိုင် မပြုနိုင်ကိစ္စကို ရင်ဆိုင်ကြုံတွေ့ခဲ့ရ၏။ ဤအကြောင်းနှင့်စပ်လျဉ်း၍ ကုရ်အာန်နှင့်စွန္နဟ်၌ ရှင်းရှင်းလင်းလင်းဖော်ပြချက် မရှိ။ ထို့ကြောင့် ပညာရှင်များသည် ” ၄င်းပြင် အကယ်၍ ထိုသူတို့သည် ငြိမ်းချမ်းရေးသို့ ယိမ်းညွှတ်ကြပါလျှင် အသင်တို့သည်လည်း ငြိမ်းချမ်းရေးဖက်သို့ တိမ်းညွှတ်ပါလေ  (၈း၆၁) ” ဟူသော ကုရ်အာန့်ဆိုလိုချက်ကိုမှီး၍ မုစ်လင်မ့်လူ့အဖွဲ့အစည်းအား မလိုမုန်းထားရှိစေကာမူ ဒုက္ခအန္တရာယ်ပေးခြင်းမပြုသမျှ ၄င်းတို့နှင့် ပဋိညာဉ် ပြုနိုင်သည်ဟု သဘောတူအဆိုညီခဲ့ကြပါသည်။

(ဃ)  သဏ္ဍာန်တူဥပဒေဆိုင်ရာ နှိုင်းယှဉ်ဆန်းစစ်သုတေသနပြုချက်များ (ကိယာ့စ်)၌ ...

အစ္စလာမ်လောကမှ ဥပဒေပါရဂူများသည် ဖန်ဆင်းရှင်၏အလိုတော်အားသိနိုင်ရန် ဆင်ခြင်တုံတရားဖြင့် အပြင်းအထန်အားထုတ်မှု – အိဂ်ျသိဟာ့ဒ် နည်းလမ်းကို အသုံးပြုလာခဲ့ကြသည်။ အသစ်ထွန်းပေါ်လာသည့် ယဉ်ကျေးမှု နှင့် ခေတ်ကာလ၌ (ဗျာဒိတ်နှင့်ညီညွတ်သော) တရားဝင်စည်းမျဉ်းများ ရရှိရေးအတွက်ဖြစ်သည်။ ကနဦးပိုင်းက ပညာရှင်တို့သည် ကျိုးသင့်ကြောင်းသင့်အတွေးအမြင် (ရိုင်ယ်)အားဖြင့် အစ္စလာမ့်အစဉ်အလာအပေါ်အခြေပြု၍ ဥာဏ်စွမ်းထုတ်ကြိုးပမ်းခဲ့ကြကုန်၏။ သို့သော်လည်း ကာလကြာရှည်လာသည်နှင့်အမျှ ဤနည်းစဉ်မှာ လျော့တိလျော့ရဲဖြစ်လွန်းသည်ဟု ပညာရှင်များမှ အမြင်ဖြစ်လာကာ အခြေအမြစ်မဲ့ မခိုင်မာသည့်အတွေးအမြင်များထွက်ရှိလာမည်ကို စိုးရိမ်ခဲ့ကြကုန်၏။  ထင်ရှားကျော်ကြား၍ သြဇာကြီးမားသော ဥပဒေပါရဂူ (အိမာမ်) ရှာဖိအီ၏ဦးဆောင်မှုဖြင့် အစ္စလာမ့် ဥပဒေပညာရှင်တို့က ဥပဒေဆိုင်ရာနှိုင်းယှဉ်ဆန်းစစ်သုတေသနပြုချက်တစ်ရပ်ကို ဖော်ထုတ်အသုံးပြုခဲ့ကြသည်။  ၄င်းကို ကိယာ့စ် ဟုခေါ်ဆိုသည်။ ကုရ်အာန်၊ စွန္နဟ်၊ အိဂ်ျမာအ်၌ ထင်ရှားသည့်စည်းမျဉ်းမတွေ့ရပါက သက်ဆိုင်ရာ အကြောင်းကိစ္စအတွက် ယင်းအရင်းအမြစ်သုံးရပ်ရှိ သဏ္ဍာန်တူ/ဆင်တူယိုးမှားကိစ္စ/အနေအထားများအပေါ် အခြေခံ လျက် နှိုင်းယှဉ်သုံးသပ်ကာ အဖြေထုတ်လေ့ရှိပေသည်။

ဗျာဒိတ်ဥပဒေ၏ အဆင့်သတ်မှတ်ချက် ၅ ရပ်

  ၁။ မပြုမနေရ – ဖရဿွ်

ဤဥပဒေများကို ကုရ်အာန် နှင့် စွန္နဟ်၌ ထင်ရှားစွာ အမိန့်ပေးဖော်ပြထား၏။ ယင်းဖော်ပြချက်၏ အကြောင်းတရား၊ အမြော်အမြင်မှ လူတစ်ဦးချင်းနှင့်လူ့အဖွဲ့အစည်းအကျိုးအတွက် ဥပဒေများကို ထုတ်ယူခြင်း ဖြစ်သည်။ ဤမပြုမနေရတာဝန်ကို ထမ်းဆောင်ခြင်းသည် ဖန်ဆင်းရှင်ထံတော်မှ အမြင့်မားဆုံးသောကုသိုလ်အကျိုး ရရှိစေသည်။  ဤတာဝန်များကို ရှောင်ဖယ်သော် သို့မဟုတ် အလေးကရုမပြုသော် အပြစ်ထိုက်၍ နောင်တမလွန်တွင် ဖန်ဆင်းရှင်၏ပြစ်ဒဏ်ခတ်ခြင်းကို ခံရသည်။ အချို့ကိစ္စများ၌ ဤလောကီတွင်လည်း ပြစ်ဒဏ်သက်ရောက်၏။  လူတစ်ဦးချင်းစီနှင့်ပတ်သက်နေသော ဤအရာများကို သိရှိခြင်း၊ ဘဝတစ်လျှောက်ကျင့်ကြံခြင်းသည် မုစ်လင်မ်တိုင်းအတွက် မုစ်လင်မ်ဖြစ်ခြင်း၏တာဝန်ပင်ဖြစ်ပါသည်။ ဤတာဝန်များ၌ အစ္စလာမ့်မဏ္ဍိုင်ငါးရပ်လည်း အပါအဝင်ဖြစ်၏။  အများနှင့်သက်ဆိုင်သည့် မပြုမနေရတာဝန်များမှာမူ လူ့အဖွဲ့အစည်းတစ်ရပ်လုံးအပေါ် တာဝန်ရှိသော်လည်း လူတစ်ဦးချင်းစီအတွက် မလိုအပ်ပါ။ လူတစ်စုမှ ဆောင်ရွက်ပေးခြင်းဖြင့် တာဝန်ကျေပွန်ရာရောက်၏။ လူ့အဖွဲ့အစည်းကိုကာကွယ်ရန် လူတိုင်းကိုယ်စီတာဝန်ရှိ၏။ သို့သော် နိုင်ငံကိုကာကွယ်ရန်မှာ အများဆိုင်ရာတာဝန် ဖြစ်၏။

၂။ တိုက်တွန်းမှု/တွန်းအားပေးမှု – မန်ဒူးဗ်

ဤဥပဒေများသည် မပြုမနေရဥပဒေတို့ကို အထောက်အကူဖြစ်စေသည်။ ဤလုပ်ရပ်များကို လုပ်ဆောင်ပါက ကုသိုလ်ရရှိပြီး ၊ လျစ်လျူရှုမိလျှင်လည်း အပြစ်မဖြစ်ချေ။  ဥပမာ – တစ်နေ့ဆွလာသ်ငါးကြိမ်ဝတ်ပြုခြင်းသည် မပြုမနေရတာဝန်ဖြစ်၏။ သို့သော် ဤဝတ်ပြုမှု ငါးကြိမ်ရှိ အပိုဖြည့်စွက်ဝတ်ပြုမှုများမှာ ဖန်ဆင်းရှင်နှင့်ပိုမိုနီးကပ်စေသည်ဟု တိုက်တွန်းထားသည်။ (ကျွန်ုပ်တို့ထံ၌ နဝါဖိလ် ဟု ခြုံငုံခေါ်ဆိုကြသည်)။

၃။ ခွင့်ပြုချက် – မုဗာဟ်

ဤလုပ်ရပ်များသည် ခွင့်ပြဗုချက်ရှိ၏။ ကောင်းသည်ဆိုး၏ တိကျစွာ သတ်မှတ်မထားချေ။ ဥပမာ တစ်ဆူရှင်ဝါဒ (သောင်ဟီးဒ်)အပေါ်မှာသာ ရပ်တည်ကုန်ကြသော ရှေးကျမ်းရသူတို့၏သားငါးများကို စားသုံးခွင့်ရှိသလို ၄င်းတို့အနက်မှ အမျိုးသမီးများကိုလည်း ထိမ်းမြားခွင့်ရှိသည်ဟု ကုရ်အာန်၌ ဖော်ပြ၏ (၅း၅)။ ဤအပြုအမူနှစ်မျိုးမှာ စာရိတ္တကောင်းခြင်း ဆိုးခြင်းနှင့်မသက်ဆိုင်၊ ကုသိုလ်လည်းမရ ပြစ်ဒဏ်လည်းမသင့်ချေ။ (ယနေ့ခေတ်တွင် အဟ်လိကိသာ့ဗ် ခေါ် ရှေးကျမ်းရသူများအနက် ဗျာဒိတ်အမိန့်အမှန်အတိုင်း ရပ်တည်သူ မရှိသလောက် နည်းပါးလွန်း၏)  လုပ်ရပ်တစ်စုံတစ်ရာနှင့်စပ်လျဉ်း၍ ကုရ်အာန်နှင့်စွန္နဟ်၌ တစ်စုံတစ်ရာသတ်မှတ်ချက်ရှိပါလျှင် ခွင့်ပြုချက်ပေးထားသည်ဟု နားလည်နိုင်ပါသည်။ တိကျစွာတားမြစ်ချက် သို့မဟုတ် အစ္စလာမ့်အဆုံးအမနှင့် မဆန့်ကျင်သောအရာဟူသမျှ ပြုခွင့်ရှိကြောင်းကို ဆိုလိုပေသည်။ ဤသည်မှာ အစ္စလာမ့်ကျင့်ဝတ်၌ နေ့စဉ်ဘဝဆိုင်ရာ အခြေခံအကျဆုံးစည်းမျဉ်းပင်ဖြစ်၏။

၎။ မနှစ်မြို့ဖွယ် – မကရူးဟ်

ဤလုပ်ရပ်များကို တားမြစ်မထား၊ သို့သော် မနှစ်မြို့ဖွယ် သို့မဟုတ် ကဲ့ရဲ့ရှုတ်ချစရာကိစ္စမျိုးဖြစ်၏။ ၄င်းတို့ကိုပြုလုပ်မိခြင်းဖြင့် အပြစ်မဖြစ်၊ သို့ရာတွင် ရှောင်ကြဉ်ခြင်းက ကုသိုလ်အကျိုးကို ရရှိစေသည်။ အကောင်းဆုံး ဥပမာပေးရလျှင် ကွာရှင်းပြတ်စဲခြင်းကိစ္စမျိုးဖြစ်သည်။ လင်မယားကွာရှင်းမှုကို ” ဖန်ဆင်းရှင်ထံတော်ပါး၌ ပြုပိုင်ခွင့် ရှိသောအရာများအနက် မနှစ်မြို့ဖွယ်အဖြစ်ဆုံးကိစ္စ ” ဟု သတ်မှတ်ထားပါသည်။

၅။ ယတိပြတ်တားမြစ်ပိတ်ပင်ချက် – ဟရာမ်

ဤလုပ်ရပ်များမှာ လုံးဝပိတ်ပင်တားမြစ်ခြင်းခံရ၏။ ယင်းအရာများသည် လူတစ်ဦးချင်းရော လူ့အဖွဲ့အစည်းကိုပါ အန္တရာယ်ဖြစ်စေသောကြောင့် တားမြစ်ထားခြင်းဖြစ်သည်။ ဤလုပ်ရပ်များကိုပြုလုပ်လျှင် အပြစ်ရှိသည်ဟု သတ်မှတ်ထားပြီးအချို့မှာ အရေးယူပြစ်ဒဏ်ပေးစေသည်။ တားမြစ်ချက်တို့အား ရှောင်ကြဉ်ခြင်းမှာ ဖန်ဆင်းရှင်ထံတော်မှ ဆုလာဘ် (အကျိုးကုသိုလ်) ရရှိစေ၏။ ဟရာမ်၏ဥပမာများမှာ လူသတ်မှု၊ ခိုးဝှက်မှု၊ လိင်ဖောက်ပြန်မှု၊ အရက်သေစာသောက်စားခြင်း၊ လောင်းကစား စသည်တို့ဖြစ်သည်။ ယေဘူယျအားဖြင့် တားမြစ်မှုဖက်ရှေ့ရှုသော လုပ်ရပ်များကို ဟရာမ်ဟု သတ်မှတ်ထားပေသည်။  ဟရာမ်လုပ်ရပ်များတွင်လည်း နှစ်မျိုးနှစ်စားရှိ၏။ တစ်မျိုးမှာ ၄င်းကိုယ်၌ကပင် အန္တရာယ်ဖြစ်စေသောအပြုအမူများ ဖြစ်သည်။ နောက်တစ်မျိုးမှာ ခွင့်ပြုချက်လုပ်ရပ်များဖြစ်သော်လည်း  အချို့အခြေအနေကြောင့် ဟရာမ်ဖြစ်ရ၏။ ဥပမာ – အလှူဒါနပေးကမ်းခြင်းသည် ကောင်းမြတ်သော အပြုအမူ တစ်ရပ်ဖြစ်သည့်တိုင် (ခိုးဝှက်ခြင်း သို့မဟုတ် သမ္မာအာဇီဝ မဟုတ်သည့်/မသမာသည့်စီးပွားရေးမှရရှိလာသော) ဓနဥစ္စာများမှ လှူဒါန်းခြင်းကိုမူ တားမြစ်ပိတ်ပင်ထားပါသည်။  အခြေအနေ/အနေအထားပေါ်မူတည်၍ ကျင့်ဝတ်လုပ်ရပ်များ၏အမျိုးအစားသည်လည်း အပြောင်းအလဲဖြစ်တတ်၏။ ဥပမာပေးရပါလျှင် ဆေးလိပ်သောက်ခြင်းပေါ်ထွန်းလာကာစ၌ အစ္စလာမ့်ပညာရှင်အများအပြားက ၄င်းကို မနှစ်မြို့မှု (မကရူးဟ်) ဟု အမျိုးအစားသတ်မှတ်ခဲ့ကြသည်။ အနံ့အသက်ဆိုးဝါးသောကြောင့်ဖြစ်သည်။ တဖန် ဆေးလိပ်သောက်ခြင်းသည် ကင်ဆာ နှင့် အခြားရောဂါများဖြစ်အောင် ခန္ဓာကိုယ်အား အန္တရာယ်ပြုနိုင်ကြောင်း ဆေးပညာဆိုင်ရာဖော်ထုတ်ချက်များထွက်လာသည့်အခါ ပညာရှင်များစွာက ဟရာမ်၏အမျိုးအစား၌ ထည့်သွင်းလိုကြသည်။ ယှရီအဟ်မှ အကာအကွယ်ပြုထားသည့် ‘ အသက်နှင့်ဘဝကို ထိန်းသိမ်းစောင့်ရှောက်ခြင်း ‘ အပေါ် အန္တရာယ် ဖြစ်လာစေသောကြောင့်ပင်။ သို့ရာတွင်လည်း အချို့ဥပဒေဆိုင်ရာသတ်မှတ်ယူဆချက် (ဖသ်ဝါ)မှာကား လူတစ်ဦးချင်းစီအဖို့ ကျန်းမာရေးကို ထိခိုက်စေနိုင်သည့်အခြေအနေအပေါ် မူတည်ကြောင်း ဖော်ပြထားပေသည်။

    ရာဇဝတ်ပြစ်မှုဆိုင်ရာ အစ္စလာမ့်ဥပဒေများအကြောင်း

 ရာဇဝတ်ပြစ်မှုဆိုင်ရာ အစ္စလာမ့်ဥပဒေများသည် မကောင်းမှုများအား ဟန့်တားရန်အတွက်ဖြစ်၏။ အလွန်ဆိုးသွမ်းသည့်ဒုစရိုက်လုပ်ရပ်များအပေါ် တင်းကြပ်စွာစီစဉ်ထားခြင်းက လူတို့အဖို့ မပြုအပ်သောအရာကို မပြုလုပ်မီ ဆယ်ကြိမ်မက(ကြိမ်ဖန်များစွာ) စဉ်းစားသွားစေပါသည်။  အစ္စလာမ့်သွန်သင်ချက်အတိုင်း အမှန်တကယ်ကျင့်သုံးကြကုန်သော အစ္စလာမ့်တရားခုံရုံးများ၏ ရာဇဝတ်ပြစ်မှုဆိုင်ရာတရားဥပဒေများ၌ ပြစ်ဒဏ်ချမှတ်ရန် အလွန်ပင် အလေးထားစိစစ်ကြ၏။ တရားသူကြီးတို့သည် အကြောင်းအရာတစ်ခုချင်းအလိုက်သုံးသပ်ပြီး သက်သေအထာက်အထားခိုင်လုံမှသာ ရုံးတော်မှအမိန့်ချမှတ်ခြင်း ပြုကြပေသည်။  သို့ရာတွင် ခြွင်းချက်အချို့တော့ရှိ၏။ ဥပမာ အကောင်းနှင့်အဆိုးကို မခွဲခြားနိုင်သော စိတ်ဝေဒနာရှင် သို့မဟုတ် အရွယ်မရောက်သေးသူများကိုမူ ပြစ်ဒဏ်ချမှတ်ခြင်း မပြုနိုင်ပါ။  တဖန် ဥပဒေတစ်ရပ်ရပ်အား လိုက်နာကျင့်သုံးရန် အလွန်ပင်ခက်ခဲသော သို့တည်းမဟုတ် စာနာထောက်ထားအပ်သည့် အခြေအနေ/အနေအထားမျိုး ဖြစ်နေပါက ယင်းဥပဒေများကို တရားရုံးမှ ယာယီရွှေ့ဆိုင်းခွင့် ရှိသည်။ ဥပမာ ခလီဖဟ် အုမရ် (ရဿွိ) လက်ထက်က အစ္စလာမ့်အုပ်ချုပ်မှုအောက်ရှိဒေသတစ်ခု၌ အငတ်ဘေး ဆိုက်ခဲ့သည်။ လူတို့သည် ပြင်းထန်သောအကျဉ်းအကြပ်ကာလ၏အခြေခံလိုအပ်ချက်များကြောင့် အသက်ရှင်သန်ရေးအတွက် ခိုးဝှက်မှုများရှိလာခဲ့ရာ အုမရ် (ရဿွိ)က ယင်းအခြေအနေ၌ ခိုးဝှက်မှုဆိုင်ရာပြစ်ဒဏ်ပေးရေးကို ယာယီဆိုင်းငံ့ရန် အမိန့်ထုတ်ခဲ့သည်။  ရာဇဝတ်မှုဆိုင်ရာဥပဒေများသည် ဥပဒေစိုးမိုးရေးအပေါ် တည်ဆောက်ထားခြင်းဖြစ်သည်။ သို့ဖြစ်၍ အစ္စလာမ်ရေးရာအာဏာပိုင်တစ်ရပ်မရှိဘဲနှင့် ထိုဥပဒေများကို အသုံးမချနိုင်ပါ။ ထို့ကြောင့် အစ္စလာမ်တိုင်းပြည်နှင့် အစ္စလာမ့်ခုံရုံးများ၌သာလျှင် အစ္စလာမ့်ဥပဒေ နှင့် လုပ်ထုံးလုပ်နည်းတို့ကို လက်တွေ့အကောင် အထည်ဖော်နိုင်မည်ဖြစ်သည်။  ရာဇဝတ်မှုဆိုင်ရာပြစ်ဒဏ်ပေးဥပဒေများနောက်ကွယ်ရှိ (ကုရ်အာန်မှပြဆိုထားသော) အကြောင်းတရားအချို့ကို စတိသဘောမျှ ဆက်လက်ဖော်ပြသွားပါအံ့။

 လူသတ်မှု

သူတစ်ပါး၏အသက်ကို မတရားသတ်ဖြတ်ခြင်း၏ပြစ်ဒဏ်မှာ သေဒဏ်ဟု ကုရ်အာန်ကဆိုထား၏ (၂း၁၇၈)။ ဤဥပဒေသည် လူမှုစီးပွားအဆင့်အတန်းမရွေး လူအားလုံးအပေါ် အကျုံးဝင်ပါသည်။  သို့သော် သေစားသေစေပြစ်ဒဏ်အစား ကိဆွာ့ဆွ် မည်သော အသက်လျော်ကြေးပေးမှုဥပဒေ တစ်ရပ်ကိုလည်း ရွေးချယ် ခွင့်ပေးထားသည်။ အကယ်၍ အသတ်ခံရသူမိသားစုမှ ဆန္ဒရှိပါက လျောက်ပတ်သည့် လျော်ကြေးဖြင့် လူသတ်တရားခံအား ခွင့်လွှတ်ကျေအေးနိုင်သည်။ လျော်ကြေးပုံစံမှာ အစ္စလာမ့်ခုံရုံး နှင့် အသတ်ခံရသူ မိသားစုတို့မှ ဆုံးဖြတ်လေ့ရှိ၏။(ပြင်ပလူများ စွက်ဖက်ခွင့် မရှိ)။ ကျမ်းမြတ်ကုရ်အာန် (၂း၁၇၈)၌ ဤဒုတိယနည်းလမ်းကို ” ဤသည်ကား အသင်တို့၏ဖန်ဆင်းရှင်ထံတော်မှ သေဒဏ်မှသက်သာစေခြင်း နှင့် ကရုဏာတော်သက်ရောက်စေခြင်း ” ဟုညွှန်း၍ အထူးအားပေးတိုက်တွန်းထားပေသည်။ အစ္စလာမ့်ရှေးထုံးဥပဒေများ၌ သေစားသေစေပြစ်ဒဏ်ချမှတ်ရန် သက်သေလေးဦး မုချရှိရမည်။ မရှိပါက အခြားပြစ်ဒဏ်များကဲ့သို့ ထောင်သွင်းအကျဉ်းချခြင်းပြစ်ဒဏ်ကိုသာ စီရင်နိုင်ပါသည်။ သို့ရာတွင် အစုလိုက်အပြုံလိုက်သတ်ဖြတ်ခြင်း နှင့် လူသတ်မှုများဆက်တိုက် ကျူးလွန်ခြင်းအတွက်မူ  လျော်ကြေးဥပဒေကို အသုံးမပြုပါ။ ကိဆွာ့ဆ်ွအား တစ်ဦးကိုတစ်ဦး သတ်ဖြတ်ခြင်းအတွက်သာ အသုံးပြုပါသည်။

ဤဥပဒေကို ကျမ်းမြတ်ကုရ်အာန်က ဤသို့လှပစွာ ရှင်းပြထားသည်။

 အို – ဆင်ခြင်တုံတရားပြည့်ဝသူအပေါင်းတို့။ ယင်းတရားသဖြင့် ပြစ်ဒဏ်ပေးဥပဒေ၌ အသင်တို့အဖို့ အသက်ရှင်ခြင်း ရှိနေ၏။ သို့မှသာ အသင်တို့သည် ကြဉ်ရှောင်သူများ ဖြစ်တန်ရာ၏သတည်း။              ကုရ်အာန် ( ၂း ၁၇၉ )

ကုရ်အာန်က တရားမျှတစွာ ပြစ်ဒဏ်ပေးဥပဒေကို လူ့အဖွဲ့အစည်း၏ အသက်ဘဝအပေါ် ကာကွယ်သည့်နည်းလမ်းအဖြစ် သုံးသပ်ပြထား၏။ သွေးချောင်းစီးခြင်းအစား ခန္တီပါရမီကောင်းလာအောင် တွန်းအားပေးထားသည်။ လူ့အသက်ကိုတန်ဖိုးမထားတတ်သည့် ဒုစရိုက်သားအား လူ့အဖွဲ့အစည်းမှ ဖယ်ထုတ်လိုက်စေခြင်းဖြစ်သည်။

 ပျက်လိုဖျက်ဆီးဆူပူသောင်းကျန်းမှုများ

ဤရာဇဝတ်မှုဥပဒေကို အရဗီလို ဟိရာဗဟ် ဟုခေါ်သည်။ အနောက်တိုင်းအစ္စလာမ့်ပညာရှင်များက ဤစကားလုံးကို လမ်းဓါးပြ သို့မဟုတ် တောပုန်းဓါးပြသောင်းကျန်းသူများဟု ပြန်ဆိုလေ့ရှိသည်။ စင်စစ်အားဖြင့် ယင်းပြန်ဆိုမှုသည် ဟိရာဗဟ်၏အစိတ်အပိုင်းတစ်ရပ်မျှသာဖြစ်နေ၏။ လူ့အဖွဲ့အစည်းအတွင်း၌ အကြောက်တရားနှင့်  စိုးရိမ်မှုများဖြစ်ပေါ်စေခြင်း၊ အကြမ်းဖက်ခြင်း စသဖြင့် မတည်ငြိမ်မှုများဖြစ်လာအောင် ကြိုးပမ်းပြုလုပ်ချက်များကို တားဆီးကာကွယ်သည်အထိပင် ဥပဒေက ကျယ်ပြန့်ပါသည်။ အစ္စလာမ့်လောက၌ ဟိရာဗဟ်အား အကြမ်းဖက်လုယက်မှုကဲ့သို့သာ အဓိပ္ပါယ်ဖွင့်ဆိုထားသည်မဟုတ်ကြောင်း တွေ့ရပါမည်။ ဥပမာ ကျော်ကြားလှသည့် စပိန်မှဥပဒေပါရဂူ အိဗ်နု အဗ်ဒုလ်ဗားရ်က ဟိရာဗဟ်အား ဤသို့အဓိပ္ပာယ်ဖွင့်ဆိုထားပါသည်။

” အကြင်မည်သူမဆို လူသွားလမ်းမများ၌ လွတ်လပ်စွာသွားလာမှုကို အနှောင့်အယှက်ပေးလျှင်၊ ခရီးသွားလာရေး၌ လူတို့၏လုံခြုံမှုကိုထိပါးလျှင်၊ ငွေကြေး ဥစ္စာလုယက်ခြင်း – လူသတ်ခြင်း – ဖန်ဆင်းရှင်မှပိတ်ပင်တားမြစ်ထားသော အဓမ္မနည်းလမ်းကိုသုံး၍ အကြမ်းဖက်ခြင်းအားဖြင့် တိုင်းပြည်ဒေသအတွင်း ပျက်လိုဖျက်ဆီးကိစ္စ  များဖြစ်ပေါ်အောင်ကြိုးပမ်းမှု၊ မတည်ငြိမ်စေမှု စသည်တို့မှာ ဟိရာဗဟ်ပြစ်မှု၌ အကျုံးဝင်ပါသည်။ ထိုသူသည် မုစ်လင်မ်ဟုတ်သည် ဖြစ်စေ မဟုတ်သည်ဖြစ်စေ၊ လွတ်လပ်သူဖြစ်စေ ကျွန်ဖြစ်စေ၊ သူ့ရည်ရွယ်ချက်အမှန်က ငွေလုသတ်ဖြတ်ခြင်းဟုတ်သည် ဖြစ်စေ မဟုတ်သည်ဖြစ်စေ ”

ဟိရာဗဟ်၏ပြစ်ဒဏ်မှာ ကြီးလေးပြင်းထန်လှ၏။ ဤပြစ်မှုကျူးလွန်ကြောင်း ထင်ရှားလျှင် ကွပ်မျက်ခြင်းသော်လည်းကောင်း၊ ယာလက်ဘယ်ခြေ သို့မဟုတ် ဘယ်လက်ယာခြေအား ဖြတ်တောက်ပစ်ခြင်းသော်လည်းကောင်း၊ နယ်နှင်ခြင်းသော်လည်းကောင်း ပြစ်ဒဏ်ခံရမည်ဖြစ်၏။ သို့ရာတွင် နှိမ်နှင်းမှုမခံရမီ နောင်တသံဝေဂဖြင့် ဝန်ခံတောင်းပန်သူများမှာမူ ထိုပြစ်ဒဏ်မှလွတ်ကင်းစေသည်။  ဤပြစ်မှုဥပဒေ၌ ကျူးလွန်ခြင်း၏ပြင်းထန်မှု များပြားခြင်း နည်းပါးခြင်းအပေါ်မူတည်၍  ဖော်ပြပါပြစ်ဒဏ်လေးမျိုးအနက်တစ်မျိုးကို ခုံသမာဓိများမှ စီရင်ချက်ချနိုင်သည်။ မည်သည့်ပြစ်ဒဏ်က မည်သို့သောအဆင့်အထိဟူသည်ကိုမူ ကွဲပြားကြ၏။  ပျက်လိုဖျက်ဆီးဖြစ်စေရန် လှုံ့ဆော်ကြိုးပမ်းသည့်အမှုအပေါ် ပြင်းထန်ကြီးမားသည့်ပြစ်ဒဏ် ချမှတ်ခြင်းမှာ ယင်းအမှုသည် လူ့အဖွဲ့အစည်းတစ်ရပ်လုံး၏တည်ငြိမ်မှုကို ပျက်ပြားစေပြီး လူ့တိုးတက်မှုဖြစ်စဉ်ကိုလည်း  ဟန့်တားထိခိုက်စေသောကြောင့်ဖြစ်သည်။ အမြစ်လှန်ဖျက်ဆီးမှုများကို ကာကွယ်ရန်မှာ  ယှရီအဟ်၏ရည်ရွယ်ချက်များအနက် အပါအဝင်ဖြစ်၏။ အစ္စလာမ့်ဥပဒေသည် လူ့အဖွဲ့အစည်း လူ့အသိုက်အမြုံအား ကောင်းကျိုးဖြစ်ထွန်းမှုကိုသာ ဦးတည်ထားသဖြင့် လူ့အဖွဲ့အစည်းအသိုင်းအ၀ိုင်းအား အကြီးအကျယ်အန္တရာယ်ဖြစ်စေသော ယင်းသို့အမှုများကို ကြပ်တည်းစွာ နှိမ်နှင်းရပေသည်။

 နိုင်ငံတော်သစ္စာဖောက်မှု

အစ္စလာမ့်ဥပဒေပါရဂူများက နိုင်ငံတော်သစ္စာဖောက်မှုကို ဤ ဟိရာဗဟ် အမျိုးအစား၌ ထည့်သွင်းသတ်မှတ်ကြ၏။ ဤဥပဒေမှာ အစ္စလာမ်ကို ဘက်ကန်၍ အစ္စလာမ်နိုင်ငံအား ဖျက်ဆီးမည့်ရန်သူတို့နှင့် ပူးပေါင်းသူ (သူလျှို)များအပေါ်၌လည်း သက်ရောက်မှုရှိသည်။  သစ္စာဖောက်မှုပြစ်ဒဏ်၌ အမျိုးမျိုးရှိ၏။ အမြင့်ဆုံးမှာ သေဒဏ်ဖြစ်သည်။ မုစ်လင်မ်မဟုတ်သည့် တိုင်းနိုင်ငံအများစုမှာလည်း နိုင်ငံတော်လုံခြုံရေးကိုထိခိုက်စေသည့်ကိစ္စများ၊ သူလျှိုမှုများအပေါ် အလားတူဥပဒေများ ချမှတ်ထားကြောင်း သိနိုင်ပေသည်။

 

 ခိုးဝှက်ခြင်း

 ခိုးသူသည် ယောက်ျားဖြစ်စေ မိန်းမဖြစ်စေ ၄င်းတို့၏လက်များကို ဖြတ်တောက်ကြလေကုန်။ ဤသည်မှာ ၄င်းတို့နှင့်ထိုက်တန်သောပြစ်ဒဏ်ဖြစ်၏။ အလ္လာဟ်အရှင်မြတ်ထံတော်မှ (အခြားသူများအဖို့) သတိသံဝေဂ ရစေရန် စံပြပြစ်ဒဏ်ဖြစ်၏။ အမှန်သော်ကား အလ္လာဟ်အရှင်မြတ်သည် ဘုန်းတန်ခိုးအာနုဘော်ကြီးမားတော်မူသော  ဥာဏ်အမြော်မြင်ပြည့်ဝလွန်းတော်မူသော အရှင်သခင်ဖြစ်တော်မူ၏။ တဖန် ၄င်းသူ (သူခိုး)သည်  ပြစ်မှုကျူးလွန်ပြီးနောက် (နောင်တသံဝေဂရ၍) တောင်းပန်ပြီးနောက် (မိမိကိုယ်ကို) ပြုပြင်ခဲ့ပါက မလွဲဧကန် အလ္လာဟ်အရှင်မြတ်သည် ထိုသူဖက်သို့ ကရုဏာတော်ဖြင့် ပြန်လှည့်တော်မူအံ့ (ပြစ်ဒဏ်လျှော့ပေါ့ခြင်းရှိတော်မူအံ့)။ စင်စစ်ဧကန် အလ္လာဟ် အရှင်မြတ်သည် အဖန်တလဲ ခွင့်လွှတ်ချမ်းသာခွင့်ပေးသနားတော်မူသော အလွန်တရာညှာတာထောက်ထားတော်မူသော အရှင်မြတ်တည်း။             ကုရ်အာန် (၅း ၃၈ – ၃၉ )

စွန္နဟ်၏နည်းလမ်း၌ ဖြတ်တောက်ရမည့်လက်မှာ နှစ်ဖက်လုံးမဟုတ်။ လက်ျာလက်တစ်ဖက်တည်း ဖြစ်၏ဟု ဥပဒေပါရဂူအများစုက ဆိုကြသည်။ ဤဥပဒေမှ ချမှတ်မည့်ပြစ်ဒဏ်များအတွက် ခိုးဝှက်ခြင်းအခြေအနေအကြောင်းရင်းသုံးရပ်ကို စေ့ငုစွာ သုံးသပ်ရ၏။

(က) ထိန်းသိမ်းမှုမရှိသည့်ပစ္စည်းဥစ္စာများ

တစ်စုံတစ်ဦးသည် ထိန်းသိမ်းမှုမဲ့/ပိုင်ရှင်မဲ့ပစ္စည်းကိုခိုးယူလျှင် လက်ကိုဖြတ်တောက်သောပြစ်ဒဏ်ဖြင့် အစ္စလာမ့်ခုံရုံးများမှ အမြဲတစေ စီရင်လေ့မရှိပါ။ တရားသူကြီးသည် ၄င်းထက်လျှော့ပေါ့သည့်ပြစ်ဒဏ်ကို ဆုံးဖြတ်ပေးနိုင်သည်။

(ခ) ခိုးယူသည့်ပစ္စည်းပမာဏ

ခိုးယူသည့်ပစ္စည်းပမာဏအတိုင်းအတာမည်မျှရှိလျှင် လက်ဖြတ်ရမည်ကို ဥပဒေပါရဂူများအကြား ကွဲလွဲမှုရှိကြ၏။ များသောအားဖြင့် ပမာဏသည် မဆိုစလောက်မျှသာဖြစ်ပြီး ပထမဆုံးအကြိမ်ခိုးယူသူဖြစ်သော် ဤပြစ်ဒဏ်မှ ကင်းလွတ်ခွင့်ပေးလေ့ရှိကြ၏။

(ဂ) ဒုက္ခ၏တွန်းအားကြောင့်ခိုးယူခြင်း

အသက်နှင့်ဘဝ ရှင်သန်ရပ်တည်ရန် ဆိုးဆိုးဝါးဝါးလိုအပ်နေသူများ၏ခိုးယူခြင်းအပေါ် ဤပြစ်ဒဏ်ကို မချမှတ်ကြပါ။ ဤဥပဒေ၌ အစာရေစာခိုးယူခြင်း၊ အအေးဒဏ်ပြင်းထန်၍ အိမ်ယာမဲ့သူများမှ အနွေးထည်/အဝတ်အစားခိုးယူခြင်း စသည်များအပေါ် သက်ရောက်မှု မရှိပါ။ အဘယ်ကြောင့်ဆိုသော် အစ္စလာမ်အစိုးရသည် နိုင်ငံသားတိုင်း၏ ရှင်သန်ရေးအခြေခံလိုအပ်ချက်ဖြစ်သော စားဝတ်နေရေးကို မဖြစ်မနေဆောင်ရွက်ပေးရမည့်တာဝန်  ရှိနေသောကြောင့် ဖြစ်၏။  အစ္စလာမ့်ဥပဒေက ပိုင်ဆိုင်မှုအပေါ်တန်ဖိုးထားသည့်အတွက် နစ်နာအောင်ခိုးယူသူတို့ကို ပြင်းထန်စွာ ကန့်ကွက်ပြီးတားမြစ်ထားရပေသည်။ လူ့အဖွဲ့အစည်း၏အခွင့်အရေးများကို ကာကွယ်ရန် ဥပဒေချိုးဖောက်သူအား ကြီးလေးသည့်ပြစ်ဒဏ် ပေးကြရစမြဲသာတည်း။

တရားမဝင်ကာမမှုများ

အိမ်ထောင်မဲ့ တရားမဝင်ကာမမှုကျူးလွန်သူ အမျိုးသားနှင့်အမျိုးသမီးကို အပြစ်ရှိကြောင်းထင်ရှားပါက ကြိမ်ဒဏ်တစ်ရာစီပေးရန် ကုရ်အာန် (၂၄း၂)၌ ဆိုထားသည်။ စွန္နဟ်အရ ကြိမ်ဒဏ်တစ်ရာကိုလည်းကောင်း ၊ ခဲပေါက်သေဒဏ်သော်လည်းကောင်း ပေးနိုင်၏။  သို့ရာတွင်လည်း အလိုတူ လိင်ဆက်ဆံမှုဖြစ်စေ၊ (အိမ်ထောင်ရှိသူတို့၏) လိင်ဖောက်ပြန်မှုဖြစ်စေ သက်သေသာဓကများ တင်ပြရန် တင်းကြပ်သည့် စည်းကမ်းချက်များ ရှိနေပါသည်။ အမျိုးသား သို့မဟုတ် အမျိုးသမီးတစ်ဦးကို တရားမဝင်ကာမမှုနှင့် စပ်လျဉ်း၍ ပြစ်ဒဏ်ပေးရန် အတွက် အခြေခံအားဖြင့် စိတ်ချယုံကြည်ရသော အမျိုးသားလေးဦး၏ သက်သေခံမှုမှာ မရှိမဖြစ်လိုအပ်သည် (၂၄း၎)။ အစ္စလာမ့်ခုံရုံးအနေနှင့် ယင်းအမှုကို သက်သေများမှ အမှန်တကယ်တွေ့မြင်မှသာ ဖြေရှင်းစီရင်ရသည်။ သံသယသက်သက်မျှဖြင့် ပြုလုပ်ဆောင်ရွက်ခွင့် မရှိချေ။  ကျမ်းမြတ်ကုရ်အာန်၌ သူတစ်ပါး၏အတွင်းရေးအား စုံစမ်းစပ်စုခြင်းကိုလည်း ပြင်းထန်စွာ တားမြစ်ထား၏ (၄၉း၁၂)။ သို့ဖြစ်ရာ သူတစ်ပါး၏အိမ်တွင်းရေး အပေါ်စွက်ဖက်သူ သို့မဟုတ် ချောင်းမြောင်းကြည့်ရှုသူ၏ သက်သေခံချက်အား လက်ခံစရာ အကြောင်းမရှိချေ။ ထို့ကြောင့် အလိုတူဆက်ဆံမှုဖြစ်စေ၊ ဖောက်ပြန်မှုဖြစ်စေ အမျိုးသားနှင့် အမျိုးသမီးတို့သည် လူပုံအလယ် အရှက်တရားကင်းမဲ့စွာ ဆက်ဆံကြခြင်း မဟုတ်ပါဘဲလျက် သက်သေ အထောက်အထားတင်ပြခြင်း ဟူသည် ဖြစ်နိုင်ချေမရှိကြောင်း ထင်ရှားနေပါသည်။  ဤဥပဒေသည် အမျိုးသမီးများအတွက်သာ အကျုံးဝင်သက်ရောက်သည်ဟု များလှစွာသောလူတို့မှ အတွေးချော်မှု ရှိနေ၏။ စင်စစ်၌ အမျိုးသား နှင့် အမျိုးသမီးဟု ကုရ်အာန်က တိတိကျကျ ဖော်ပြထား၏ (၂၄း၂)။

နိုက်ဂျီးရီးယားကဲ့သို့ နိုင်ငံအချို့၏တရားရုံးတွင် အမျိုးသမီးများကို ထိမ်းမြားမှုမရှိဘဲသန္ဓေရှိလာခြင်းအပေါ် တရားမဝင် ကာမမှု ဟူ၍ စွဲချက်တင်လေ့ရှိကြ၏။ ပဋိသန္ဓေရှိယုံဖြင့် ပြစ်မှု၏အထောက်အထားအဖြစ် မသတ်မှတ်နိုင်ပါ။ ဤသည်မှာ  ကုရ်အာန် နှင့် စွန္နဟ်အား တလွဲအသုံးချခြင်းပင်ဖြစ်သည်။  အောက်ဖော်ပြပါအခြေအနေ၌ ဤဥပဒေအတွက် သက်သေ မလိုအပ်ပါ။

၁။ လင်ယောက်ျားဖြစ်သူကိုယ်တိုင်က ဇနီးဖြစ်သူအား လိင်ဖောက်ပြန်ကြောင်း သက်သေခံခြင်း  လင်ယောက်ျားဖြစ်သူက မိမိ၏မိန်းမသည် အခြားအမျိုးသားနှင့် ဖောက်ပြန်ကြောင်း သက်သေခံထွက်ဆိုပါက အခြား မည်သည့်သက်သေမျှ မလိုအပ်တော့ပါ။ လင်ယောကျာ်းသည် တရားခုံရုံးရှေ့မှောက်ဝယ် မိမိသည် အမှန်ကိုပြောဆိုကြောင်း ဖန်ဆင်းရှင်အား တိုင်တည်၍ လေးကြိမ်တိုင်တိုင် ကျိန်ဆိုရ၏။ ငါးကြိမ်မြောက်ကျိန်ဆိုမှုတွင် ” မိမိသည် မုသားဆိုပါက ဖန်ဆင်းရှင်၏ ကျိန်စာသည် မိမိအပေါ် ပြင်းထန်စွာ ကျရောက်စေသား ” ဟုထည့်သွင်း  ပြောဆိုရ၏ (၂၄း၆-၇)။ ၄င်းနောက် ဇနီးဖြစ်သူလည်း မိမိသည် မလိမ်ညာပါကြောင်း လေးကြိမ်တိုင်တိုင် ဖန်ဆင်းရှင်အားတိုင်တည်၍ ကျိန်ဆိုရ၏။ ပဉ္စမအကြိမ်တွင် သူမ၏ခင်ပွန်းသည်သည် မှန်ရာကိုဆိုခြင်းဖြစ်သော် ဖန်ဆင်းရှင်၏ အမျက်တော်သည် သူမအပေါ် သက်ရောက်ပါစေကြောင်း ထည့်သွင်းပြောဆိုရ၏ (၂၄း၈-၉)။  ယင်းသို့ကျိန်ဆိုပြီးဆုံးလျှင် (မုသားဆိုသူမှ ကျိန်စာသင့်မည်ဖြစ်၍) အမျိုးသားအပေါ်၌လည်းကောင်း၊ အမျိုးသမီးအပေါ်၌လည်းကောင်း ပြစ်ဒဏ်တစ်စုံတစ်ရာချမှတ်ခြင်း မပြုပါ။ သို့သော် ထိုအနေအထားအထိရောက်သွားပြီဆိုလျှင်  ၄င်းတို့၏ထိမ်းမြားထားခြင်းမှာ အလိုလိုပျက်ပြယ်ပြီး ဖြစ်ပေသည်။

 မုဒိန်းမှု

ဗလက္ကာရပြုကျင့်ခံရသည့်အမျိုးသမီး၏သက်သေခံချက်ကပင်လျှင် မုဒိန်းကျင့်သူအား အရေးယူရန် လုံလောက်ကြောင်း စွန္နဟ်၌ ဖော်ပြသည်။ ဥပဒေ၏နည်းစဉ်အတိုင်း စစ်ဆေးပြီး အကယ်၍ ပြစ်မှုထင်ရှားပါက မုဒိန်းကောင်အား ခဲပေါက်သေဒဏ်ပေးပါသည်။ မတရားခံရသည့်အမျိုးသမီးအဖို့ မည်သည့်အပြစ်မျှ မရှိချေ။

၂။ ကိုယ်တိုင် ထုတ်ဖော်ဝန်ခံလာခြင်း  အကယ်၍ လူတစ်ဦးသည် တရားခုံရုံးသို့ကိုယ်တိုင် လာရောက်၍ မိမိသည် တရားမဝင် ကာမမှု သို့မဟုတ် လိင်ဖောက်ပြန်မှု ကျူးလွန်ခဲ့ပါ၏ဟု ထွက်ဆိုပါလျှင် သက်သေခံသူများ မလိုအပ်ပါ။ သို့သော် ဖန်ဆင်းရှင်က မိမိအတွက်  ဖုံးဖိကာကွယ်ပေးထားတော်မူသော အရာကို ဖွင့်ချဖော်ထုတ်ခြင်းကိုမူ အစ္စလာမ့်ဥပဒေက အားပေးထားသည် မဟုတ်ပါ။  အလားတူပင် စွန္နဟ်အရ လူတစ်ဦးသည် တရားသူကြီးထံလာရောက်၍ ယင်းပြစ်မှုကို ဝန်ခံသည့်တိုင်အောင် တရားသူကြီးမှ မိမိကိုယ်ကိုစွဲချက်တင်ခြင်း မပြုရန် သုံးကြိမ်တိုင်တိုင် သတိပေးပယ်ချရပါမည်။ ၄င်းမှ ရှေ့ဆက်လာပါမှ ထုတ်ဖော်ဝန်ခံသည့်အတိုင်း ပြစ်ဒဏ်စီရင်ပေးရပေသည်။  ဤသည်၌ မိမိ၏ကာမဖောက်ပြန်မှုကို မိမိကိုယ်တိုင်ထုတ်ဖော်ဝန်ခံခြင်းမှာ မိုက်မဲလှလေခြင်း ဟု တွေးထင်မိကြပေမည်။ အမှန်ကား သာသနာကိုအမှန်ကိုင်းရှိုင်းသည့်မုစ်လင်မ်တို့သည် ဤလောကီတွင် ပြစ်ဒဏ်ခံလိုက်ရခြင်းက  နောင်တမလွန်ဝယ် ပြစ်ဒဏ်ပေးခံရတော့မည် မဟုတ်ကြောင်း ယုံကြည်ထား၍ဖြစ်၏။  ယှရီအဟ်က မျိုးနွယ်နှင့်မိသားစုအား ထိန်းသိမ်းတည်တံ့စေသည်။ မိသားစုတစ်ခု၏ဓလေ့သည် လူ့အဖွဲ့အစည်းတစ်ရပ်လုံး၏ စာရိတ္တ နှင့် ကျင့်ဝတ်ဆိုင်ရာ အုတ်မြစ်ဖြစ်ပါသည်။ သို့ဖြစ်ရာ ထိမ်းမြားခြင်းဓလေ့ အပေါ် အန္တရာယ်ဖြစ်စေခြင်း/ မကောင်းကျိုးသက်ရောက်လာစေခြင်းသည် ပြစ်မှုကြီးတစ်ရပ်ဖြစ်သဖြင့် ယှရီအဟ်က  အမြစ်လှန်ရပ်တန့်စေလိုခြင်းပင်။

တရားမဝင်ကာမမှုဆိုင်ရာမုသားသက်သေထွက်ဆိုခြင်း

၎င်းပြင် အပြစ်ကင်းစင်သော အမျိုးသမီး (သို့မဟုတ် အမျိုးသား)များအား (ကာမေသုမိစ္ဆာစာရကံ ကျူးလွန်သည်ဟု) စွပ်စွဲပြီးနောက် သက်သေလေးဦး မတင်ပြနိုင်သူတို့အား ကြိမ်ဒဏ်အချက်ပေါင်း ၈ဝ ရိုက်ကြလေကုန်။ ၄င်းနောက်ဝယ် အသင်တို့သည် ၄င်းတို့၏သက်သေခံချက်များကို မည်သည့်အခါမျှ လက်မခံကြကုန်လင့်။ စင်စစ်သော်ကား ထိုသူတို့သာလျှင် ကျင့်ဝတ်ဖောက်ဖျက်သူ လူယုတ်မာများတည်း။                         ကုရ်အာန် (၂၄း ၄ )

 

ယှရီအဟ်၌ မုသားသက်သေထွက်ဆိုခြင်းသည် အကြီးလေးဆုံးပြစ်မှုတစ်ရပ်ဟု သတ်မှတ်ထားသည်။ အထက်ပါအာယသ်တော်က – စွပ်စွဲပြီးနောက် သက်သေလေးဦး မတင်ပြနိုင်ကြသူများ၊ အဆင့်ဆင့်စစ်ဆေးချက်များအရ လုပ်ကြံသက်သေထွက်ဆိုသူ နှင့် စွပ်စွဲသူအဖြစ် ပေါ်လွင်လာသူများကို တိတိကျကျရည်ညွှန်းနေပါသည်။

လူသိများသည့် ဥပဒေလမ်းကြောင်း လေးသွယ်

 ကျမ်းမြတ်ကုရ်အာန် နှင့် စွန္နဟ်ရှိ အလ္လာဟ့်အလိုတော်အား အဓိပ္ပာယ်ဖွင့်ဆိုရှင်းလင်းရန် ဥပဒေများ ထုတ်ယူရာတွင် ကာလကြာရှည်သည်နှင့်အမျှ လမ်းကြောင်းများ အဆင့်ဆင့်ပေါ်ပေါက်ခဲ့၏။ ၄င်းတို့အနက် လမ်းကြောင်းလေးသွယ်မှာ အထင်ရှားဆုံးဖြစ်၏။ ယင်းလမ်းကြောင်း၏ခေါင်းဆောင်(အိမာမ်)များထံ၌ အစ္စလာမ့်အခြေခံ အရင်းအမြစ်များအပေါ် တစ်စုံတစ်ရာကွဲလွဲမှုဟူ၍ မရှိကြချေ။ သို့ရာတွင် ဥပဒေပြုရေးအတွက် ထုတ်ယူသည့်စည်းမျဉ်းများကတော့ အချို့နေရာ၌ ခြားနားချက် ကြီးမားသည်။ မုစ်လင်မ်အများစုသည် ဤဥပဒေအတွေးအခေါ်လမ်းကြောင်းများအနက် တစ်ရပ်ရပ်နောက်သို့ တစ်နည်းနည်းဖြင့် နောက်လိုက်ပြုလျက် ရှိကြပါသည်။  ယင်းအတွေးအခေါ်လမ်းကြောင်းအား အရဗီလို မဇ်ဟဗ် ဟုခေါ်၏။

၁။  ဟနဖီ ဥပဒေလမ်းကြောင်း

အန် နုအ်မာန်း အိဗ်နု ဆာဘိသ် အဗူ ဟနီဖဟ် (၇ဝဝ-၇၆၇)၏အမည်ကို အစွဲပြု၍ ဟနဖီ ဥပဒေလမ်းကြောင်းဟု လူသိများလာခဲ့သည်။ သူသည် ရှေးဟောင်း အာဖဂန်နစ္စတန်ဇာတိမှ သူကောင်းပြုခံရသည့် ကျွန်တစ်ဦး၏ မြေးဖြစ်သည်။ သူသည် စည်းမျဉ်းကောက်မှုပုံစံကို လက်ဦးပထမ ကြိုးပမ်းဆောင်ရွက်နိုင်ခဲ့ပြီး ယင်းအားဖြင့် ပညာရှင်များမှာ ကျမ်းမြတ်ကုရ်အာန်မှ အစ္စလာမ့်ဥပဒေများကို အလွယ်တကူ ကောက်နှုတ်နိုင်ခဲ့ကြသည်။  အဗူဟနီဖဟ်က ဥပဒေဆိုင်ရာသဏ္ဍာန်တူ နှိုင်းယှဉ်သုံးသပ်ချက် (ကိယာ့စ်)အပေါ် အလွန်ပင် အလေးအနက်ထားခဲ့၏။ အတွေးအမြင် အယူအဆများ ပြေပြစ်ချောမွေ့လာစေရန်အလို့ငှါ ဖြစ်သည်။ ၄င်းပြင် ဥပဒေပညာရှင်အနေနှင့် နည်းလမ်းနှစ်ရပ်အနက် ပိုမိုကောင်းမြတ်ခြင်းကိုရွေးချယ်နိုင်သည့် အသားပေးစံနစ် (အရဗီလို အိစ်သိဟ်စာန်)ကိုလည်း အထူးအားထားခဲ့၏။ သို့ဖြစ်၍ ဟနဖီဥပဒေသည် ဥပဒေရေးရာ၌ သက်ညှာမှုအရှိဆုံး နှင့် အံဝင်ပြေပြစ်မှုအဖြစ်ဆုံးဟု ယနေ့ခေတ်အထိ သတ်မှတ်ခံရပေသည်။  ထို့ကြောင့်လည်း ဟနဖီဥပဒေလမ်းကြောင်းနောက်လိုက်သူများမှာ အလွန်များပြားကြခြင်းဖြစ်၏။ မုစ်လင်မ်လူဦးရေအများဆုံးဖြစ်သည့် ဗဟိုအာရှ နှင့် တောင်အာရှဒေသများ၌ ဤဥပဒေလမ်းကြောင်းက လွှမ်းမိုးထားသည်။ ၄င်းပြင် အမေရိကန်နိုင်ငံ(နှင့် အနောက်နိုင်ငံများ)ရှိ တောင်အာရှအနွယ်ဝင် မုစ်လင်မ်လူ့အဖွဲ့အစည်းအားလုံးမှာ ဟနဖီဥပဒေလမ်းကြောင်း၏နောက်လိုက်များ ဖြစ်ကြကုန်၏။

၂။  မာလိကီ ဥပဒေလမ်းကြောင်း

မာလစ်က် အိဗ်နု အနတ်စ် (၇၁၆-၇၉၅)သည် အစ္စလာမ့်ဥပဒေရေးရာကျမ်းကို ပထမဦးဆုံး ပြုစုခဲ့သူဖြစ်ပြီး ထိုကျမ်းဂန်မှာ ‘ မုဝသ်ွသွာ ‘ ဟု အမည်တွင်သည်။ ဤလမ်းကြောင်း (မဇ်ဟဗ်)၌ အစ္စလာမ့်ဥပဒေ၏ အရင်းအမြစ်အဖြစ် မဒီနဟ်မြို့နေ သာဝကတော်တို့၏ဆင့်ပြန်ချက်များကိုသာ အသုံးပြုထားသည်။ ထိုသာဝကတော် တို့မှာ လက်ဦးပထမ မုစ်လင်မ့်လူ့အဖွဲ့အစည်းကို တည်ထောင်ခဲ့သောမျိုးဆက်ဖြစ်သည့်အတွက် ၄င်းတို့သည် တမန်တော့်လမ်းညွှန်နှင့် ကွဲလွဲသည့်ဥပဒေ သို့မဟုတ် အလေ့အထကို ဖန်တီးခဲ့မည်မဟုတ်ဟု (အိမာမ်) မာလစ်က်မှ ယုံကြည်ခဲ့၏။  အိမာမ် မာလစ်က်သည်လည်း ဒေသဆိုင်ရာထုံးတမ်း ဓလေ့ (အုရ်ဖ်)မှာ အစ္စလာမ့်ဥပဒေ၏အနှစ်သာရနှင့် ဆန့်ကျင်မှု မဖြစ်သမျှ အစ္စလာမ့်ဥပဒေ၌ ခြွင်းချက်များအဖြစ် ထောက်ခံအတည်ပြုထားသည်။ ၄င်းပြင် ခေတ်ကာလ အရေးအရာများနှင့် ပတ်သက်၍ ဥပဒေနှင့်စည်းမျဉ်းသတ်မှတ်မှုတို့သည် လူထုကောင်းကျိုးနှင့်အထွေထွေတိုးတက်မှု (အိစ်သိစ်လာဟ်)အတွက် ဦးတည်ရမည်ဟုလည်း ဆိုခဲ့၏။ ထိုသို့သောအရေးအရာမျိုးတွင် ဥပဒေသဘောတရား/အနှစ်သာရက ရေးသားထားသည့်ဥပဒေစာသားအား ဖုံးလွှမ်းသွားလေ့ရှိသည်။  မာလိကီလမ်းကြောင်းလိုက်သူများသည် အနောက်အာဖရိက နှင့် မြောက်အာဖရိက၌ အများဆုံး ဖြစ်၏။ အီဂျစ်၊ ဆူဒန်၊ ဘာရိန်း နှင့် ကူဝိတ်နိုင်ငံများ၌လည်း များစွာတွေ့ရ၏။ သြဇာကြီးမားသည့်ပညာရှင်အချို့က ဤလမ်းကြောင်းမှာ အမေရိကန်မုစ်လင်မ်များနှင့်ကိုက်ညီကြောင်း ထောက်ခံအားပေးသဖြင့် အမေရိကန်ပြည်ထောင်စု အတွင်း၌လည်း စတင်ရေပန်းစားနေပြီဖြစ်သည်။

၃။  ရှာဖိအီ ဥပဒေလမ်းကြောင်း

မုဟမ္မဒ် အိဗ်နု အိဒ်ရီးစ် အရ်ှရှာဖိအီ (၇၆၇-၈၂ဝ)အား အစ္စလာမ့်သမိုင်း၌ အထက်မြက်ဆုံး ဥပဒေပါရဂူများအနက် အပါအဝင်တစ်ဦးအဖြစ် သတ်မှတ်ကြသည်။ သူသည် အစ္စလာမ့်ဥပဒေ၏ရင်းမြစ်များကို ကုရ်အာန်၊ စွန္နဟ်၊ အိဂ်ျမာအ် နှင့် ကိယာ့စ်တို့အတွင်းမှသာ ထုတ်နှုတ်ပြဋ္ဌာန်းမှုပြုခဲ့သည်။ (အိမာမ်) ရှာဖိအီသည် ဟနဖီလမ်းကြောင်းမှ အိစ်သိဟ်စာန် (လွယ်ကူသည့်ဖက်ဦးစားပေးသည့်စံနစ်)ကို လက်မခံခဲ့။ သို့သာမက မဒီနဟ် လူ့အဖွဲ့အစည်းတစ်ခုတည်းကိုသာမူတည်၍ အစ္စလာမ့်အရင်းအမြစ်အဖြစ် အသုံးပြုထားသော မာလိကီ၏နည်းလမ်းကိုလည်း လက်မခံခဲ့ချေ။  ဤဥပဒေလမ်းကြောင်းက အီဂျစ်ပြည်တောင်ပိုင်း နှင့် အာရေဗျတောင်ပိုင်း၌ သြဇာကြီးမားသည်။ အရှေ့အာဖရိက၊ မလေးရှား၊ အင်ဒိုနီးရှား၊ ဗဟိုအာရှဒေသအချို့ နှင့် အမေရိကန်မုစ်လင်မ်များအကြား၌လည်း ဤလမ်းကြောင်း၏နောက်လိုက်များစွာ ရှိကြ၏။

၎။  ဟမ်ဗလီ ဥပဒဒေလမ်းကြောင်း

အဟ်မဒ် အိဗ်နု ဟမ်ဗလ် (၇၈ဝ-၈၅၅)၏အမည်ကို အစွဲပြုခေါ်ဝေါ်ထားပြီး ဥပဒေလမ်းကြောင်း လေးရပ်၌ ရှေးရိုးစွဲအကြီးဆုံး (ဝါ) အတင်းကြပ်ဆုံးဖြစ်၏။ အိဗ်နု ဟမ်ဗလ်သည် အစ္စလာမ့်ဥပဒေပြုရာ၌ ကိယာ့စ်ကို လုံးလုံးလျားလျား စိတ်မဝင်စားခဲ့ချေ။ သို့သော်လည်း ခွင့်ပြုနိုင်သော/ခွင့်ပြုအပ်သော အယူအဆ (အိဗာဟဟ်)ကို ထုတ်ဖော်ခဲ့သည်။ ၄င်းမှာ ကုရ်အာန်၊ စွန္နဟ်နှင့်မဆန့်ကျင်သည့်လုပ်ရပ်မှန်သမျှ တရားဝင်သည်ဟု ယူဆခြင်းဖြစ်သည်။ ဟမ်ဗလီ၏ မဇ်ဟဗ်သည် ဤအယူအဆကြောင့်သာ အသက်ရှုချောင်သွားခဲ့ရသည်။  စအူဒီအာရေဗျ၊ အိုမန်၊ ကာတာနိုင်ငံရှိ မုစ်လင်မ်အများစုက ဤလမ်းကြောင်းနောက်လိုက်ကြ၏။ အမေရိကန်နိုင်ငံ၌လည်း အစ္စလာမ်ကိုလက်ခံလာသူတို့အကြား ဤလမ်ကြောင်းကိုလက်ခံသူ တိုးပွားလျက်ရှိ၏။

နိဂုံး

 အစ္စလာမ်သာသနာ့အဆုံးအမ၌ အရှိအတိုင်း သွန်သင်ဆုံးမခိုင်းထား၏။ အခြေခံကျကျ တိကျမှုဖြစ်အောင် လမ်းကြောင်းညွှန်ပြထား၏။ ဥပဒေများ၊ အဆုံးအဖြတ်များကို မိမိဆန္ဒ၊ အစွဲ၊ အတွေးအမြင်ပေါ် အခြေပြုပြီး ထုတ်ယူကျင့်သုံးသတ်မှတ်ခွင့် မရှိပါ။  ကမ္ဘာ့ဘာသာတရားများအနက် လူ့ဘောင်လောက၏အရေးအရာအ၀၀အတွက် စံနစ်တကျ ပုံစံချစည်းမျဉ်းများ၊ နည်းလမ်းများ ပေးအပ်ထားသည်မှာ အစ္စလာမ်သာသနာ တစ်ခုတည်းသာ ရှိနေပါ၏။ ယနေ့ ကမ္ဘာ့ကုလသမဂ္ဂသည်လည်းကောင်း၊ အနောက်တိုင်းမှ အတိုးတက်ဆုံးဒီမိုကရေစီနိုင်ငံများသည်လည်းကောင်း၊ လူ့အခွင့်အရေးဆိုင်ရာ ဦးဆောင်အဖွဲ့အစည်းကြီးများသည်လည်းကောင်း မိမိတို့၏အခြေခံမူစံနစ်များ၊ ဖွဲ့စည်းပုံစည်းမျဉ်းဥပဒေများတွင် အစ္စလာမ့်ယှရီအဟ်၏ အုတ်မြစ်နှင့် အနှစ်သာရတို့ကို အမည်မဖော်ဝံ့ဘဲ ယူငင်သုံးစွဲကျင့်ဆောင်လျက်ရှိသည်ကို တွေ့ရပါ၏။  အဆုံးသတ်အားဖြင့်ဆိုရပါလျှင် လူတို့သည် နေရာ၊ အာဏာ၊ အတ္တစွဲ၊ ဆန္ဒ၊ ထင်ပေါ်ကျော်ကြားမှု စသည်များနောက် အာသာငမ်းငမ်းလိုက်နေကြသဖြင့် ယနေ့ကမ္ဘာတစ်ဝှန်းကိုကြည့်လိုက်သော် ငြိမ်းချမ်းရေးယှရီအဟ်ကို တိတိကျကျလိုက်နာကျင့်သုံးနေသည့် အစ္စလာမ်နိုင်ငံတစ်နိုင်ငံ အစ္စလာမ့်လူ့အဖွဲ့အစည်းတစ်ခုမျှ မရှိပါ။ ဂေါတမဗုဒ္ဓ၏ မေတ္တာထားတရားဓမ္မအပေါ် တိတိကျကျလိုက်နာ ကျင့်သုံးနေသည့် ဗုဒ္ဓဘာသာနိုင်ငံတစ်နိုင်ငံ ဗုဒ္ဓဘာသာဝင်လူ့အဖွဲ့အစည်းတစ်ခုမျှ မရှိပါ။ ယေရှုသခင်၏ ခွင့်လွှတ်ခြင်း သွန်သင်ဆုံးမချက်များအပေါ် တိတိကျကျလိုက်နာ ကျင့်သုံးနေသည့် ခရစ်ယာန်နိုင်ငံတစ်နိုင်ငံ ခရစ်ယာန်လူ့အဖွဲ့အစည်းတစ်ခုမျှ မရှိပါ။ ဟိန္ဒူ နှင့် ဂျူးများထံတွင်လည်း ထိုနည်းလည်းကောင်းသာ ဖြစ်ပါ၏။ ဘာသာတရား နှင့် ဘာသာဝင် မကွဲပြားကြ။ လူတစ်ဦး သို့မဟုတ် လူတစ်စု၏ အတွေးအမြင်၊ စိတ်ဓာတ်၊ လုပ်ရပ်များမှာ သက်ဆိုင်ရာဘာသာတရားကို အခါခပ်သိမ်း ကိုယ်စားပြုနေသည်မဟုတ်။ ၄င်းတို့ကိုကြည့်၍ ဘာသာတရားအား ဆုံးဖြတ်သုံးသပ်မည်ဆိုပါက ကမ္ဘာပေါ်တွင် မည်သည့်ဘာသာ တရားကိုမှ ကောင်းကွက်မြင်နိုင်ကြတော့မည် မဟုတ်။ ဘာသာတရား ယုံကြည်မှု နှင့် လူကိုလူလိုမြင်တတ်မှု ကွဲပြားစေရန်အတွက် ဥပဒေ ဟူ၍ သတ်မှတ်ဖော်ဆောင်ခြင်း ဖြစ်ပေသတည်း။

ဘာသာမဲ့/ဘာသာမရှိသူသည် ဘာသာတရား တစ်ခုခု၏ ခေါင်းစဉ်အောက်သို့ ရောက်နိုင်ချေ ရှိသေး၏။ လူကိုကြည့်၍ ဘာသာတရားကို မုန်းတီးတတ်သူတို့ အဖို့မှာကား မည်သည့် ခေါင်းစဉ်အောက်၌ အခွံစွပ်ထားသူဖြစ်စေကာမူ ၄င်းတို့၏သရုပ်မှန်မှာ အသိဥာဏ်နှင့် နှလုံးသားတံခါး ချိတ်ပိတ်ခံရသည့် မိစ္ဆာတိထ္ထိများ စင်စစ်ဖြစ်သတည်း။

လေ့လာမှုမရှိသော ဝေဖန်မှုသည် အသိမဲ့လမ်းသို့ လျှောက်လှမ်းနေခြင်းသာတည်း။

ဆင်ခြင်တုံတရားဖြင့် လူပီသနိုင်ကြပါစေ။

ဂျူလိုင်ရဲရင့်

** M-Media သို့ ပေးပို့လာသော ဆောင်းပါးဖြစ်ပြီး ဆောင်းပါးရှင်၏ အမြင်နှင့် အာဘော်သာဖြစ်သည်။