အိမ်ထောင်ရှိလျှက် ဖောက်ပြန်လိုသူများ အတွက် ရည်ရွယ်ထားသော Dating ဆိုက်တစ်ခုကို စင်ကာပူပိတ်ပင်

အောက်တိုဘာ ၂၉၊ ၂၀၁၃
M-Media

အိမ်ထောင်ရေးတွင် သစ္စာမဲ့သူများ အသုံးပြုကြသည့် ကမ္ဘာ့လူကြိုက်အများဆုံး Dating ၀ဘ်ဆိုက်တစ်ခုကို စင်ကာပူအာဏာပိုင်များက ပိတ်ပင်လိုက်သည်ဟု သိရသည်။

အဆိုပါ ၀ဘ်ဆိုက်မှာ နိုင်ငံပေါင်း ၃၀ နီးပါးတွင် အိမ်ထောင်ရှိလျက် ဖောက်ပြန်လိုသောသူများအား တွဲဖက်ပေးသော ဆိုက်တစ်ခုဖြစ်ပြီး ဂျပန်နှင့် ဟောင်ကောင်နိုင်ငံမှ စတင်ကာ ယခုနှစ်အတွင်း အာရှဒေသတွင် လူကြိုက်များသော ဆိုက်တစ်ခုဖြစ်လာနေသည်။ စင်ကာပူနိုင်ငံတွင် ထိုဝဘ်ဆိုက်အား လာမည့်နှစ်တွင် လွှင့်တင်ရန်ရှိနေပြီး ထိုအစီအစဉ်နှင့်ပက်သက်၍ အစိုးရအနေဖြင့် မူလက မည်သည့် ကြားဝင်မှုမျိုးမှ ပြုလုပ်ခြင်းမရှိခဲ့ပေ။

သို့သော်လည်း စင်ကာပူ လူမှုဆက်ဆံရေးဝန်ကြီး ချန်ချွမ်ဆင်းက ထိုကဲ့သို့သော ၀ဘ်ဆိုက်သည် အပြာဇာတ်ကားများနှင့် မဂ္ဂဇင်းများကို ပိတ်ပင်ထားသည့် စင်ကာပူနိုင်ငံအတွင်း ကိုယ်ကျင့်တရားများကို ပျက်ပြားစေလိမ့်မည်ဟု ပြောကြားခဲ့သည်။

စင်ကာပူနိုင်ငံသားများကလည်း ၀န်ကြီး၏ပြောကြားချက်ကို လက်ခံခဲ့ကြပြီး  အဆိုပါ ၀ဘ်ဆိုက်ကို ပိတ်ပင်ရန်အတွက် ပြုလုပ်သော အွန်လိုင်း လှုပ်ရှားမှုတွင် လူပေါင်း ၂၅၀၀၀-ကျော်က ပါဝင်ခဲ့ကြသည်။ ထို့ကြောင့် တာဝန်ရှိသူများက နိုင်ငံ၏ ရုပ်သံလွှင့်ခွင့် ဥပဒေအရ ထိုဝဘ်ဆိုက်အား ပိတ်ပင်ရန် အမိန့်ပေးခဲ့သည်။

ထိုဝဘ်ဆိုက်အား ဂျပန်နိုင်ငံတွင် လွှင်တင်ခဲ့စဉ်က ပထမလေးရက်တွင်ပင် လူပေါင်း ၂၃၀၀၀၀ ၀င်ရောက်ကြည့်ရှုခဲ့ကြပြီး ၇၀၀၀၀ ကျော်မှာ အဖွဲ့ဝင်ခဲ့ကြသည်။ ဟောင်ကောင်တွင်လည်း ထိုဝဘ်ဆိုက်မှာ လူအများအပြား ၀င်ရောက်ကြည့်ရှုခြင်းကိုခံခဲ့ရသည်။

Ref : foreignpolicy

—————————————-
** M-Media ၏ မူပိုင် သတင်း/ဆောင်းပါးများကို အွန်လိုင်းမီဒီယာများတွင် မည်သူမဆို လွတ်လပ်စွာကူးယူဖော်ပြနိုင်ပါသည်။ ကူးယူဖော်ပြသူများအနေဖြင့် M-Media မူရင်းလင့်ခ်ကို ထည့်ပေးဖို့ မေတ္တာရပ်ခံအပ်ပါသည်။
စီးပွားဖြစ် ထုတ်ဝေသော Print Media များတွင် အသုံးပြုလိုသူများ M-Media သို့ ခွင့်ပြုချက်တောင်းရန် လိုအပ်ပါမည်။
ဆက်သွယ်ရန် [email protected]