မြို့ပတ် ‘ဇ’ အထူးရထား နိုဝင်ဘာ ၁-ရက်နေ့တွင် ရန်ကုန်ဘူတာကြီးမှ စတင်ပြေးဆွဲမည်

အောက်တိုဘာ ၂၉၊ ၂၀၁၃
M-Media
ဆူးထက်

ရန်ကုန်   ။         ။          မြို့ပတ် ‘ဇ’- အထူးရထားတွဲကြီးကို နိုဝင်ဘာ ၁-ရက်နေ့တွင် ခရီးစဉ် တစ်ခုအတွက် တစ်ဦးလျှင် ငွေကျပ်-၃၀၀၊ နိုင်ငံခြားသား တစ်ဦးလျှင် တစ်ဒေါ်လာဖြင့် စတင်ပြေးဆွဲတော့မည် ဖြစ်ကြောင်း ကုန်းလမ်းပို့ဆောင်ရေး ဦးစီးဌာန၏ မြန်မာ့မီးရထား အထွေထွေ မန်နေဂျာ ဦးထွန်းအောင်သင်း (အောက်မြန်မာပြည်) က ယနေ့ပြုလုပ်သည့် သတင်းစာရှင်းလင်းပွဲတွင် ပြောကြားလိုက်သည်။

“ဒီကနေ့မှာတော့ အဆင့်မြင့် တွဲဆိုင်း အသစ်ကို မြို့ပတ် ဇ- တွဲဆိုင်း ပြေးဆွဲတဲ့ နေရာမှာ အစားထိုးပြီး အဆင့်မြင့် တွဲဆိုင်း အသစ်အနေနဲ့ ပြေးဆွဲခြင်း ဖြစ်ပါတယ်။ ဘူတာ အားလုံးကို ရပ်ပါမယ်။ မူလအတိုင်းပဲ ခရီစဉ် ကိုးခေါက်မှာ အင်းစိန်ကနေ မနက် ၅နာရီ ထွက်ပြီးတော့ ရန်ကုန်ကို လာပါမယ်။ တခါ ရန်ကုန်ကနေ အင်းစိန်၊ အင်းစိန်ကနေ လှော်ကားကို တက်ပါမယ်။ အလားတူပဲ ရန်ကုန် မြို့ပတ်ကို ပတ်တဲ့အခါမှာ အားလုံး ၄-ပတ် ပတ်သွားပါမယ်” ဟု ၎င်းက မီဒီယာများသို့ ပြောကြားခဲ့သည်။

မြန်မာ့မီးရထားအနေဖြင့် ရထားပို့ဆောင်ရေး ၀န်ကြီးဌာန ပြည်ထောင်စု ၀န်ကြီး၏ လမ်းညွှန်ချက်နှင့် အညီ ရန်ကုန်တိုင်း ဒေသကြီး အတွင်းမှာ ပြေးဆွဲနေသည့် မြို့ပတ် ရထား အားလုံး ၂၂-ဆိုင်းရှိပြီ ဖြစ်ကြောင်း၊ ယခုလို အဆင့်မြင့် တွဲဆိုင်းပြေးဆွဲခြင်း အားဖြင့် ခရီးသွား လုပ်သား ပြည်သူတွေအတွက် အဆင့်မြင့် ဆောင်ရွက်ခြင်း ဖြစ်ကြောင်း၊ နောင်တွင်လည်း ယခုလို အဆင့်မြင့်တွဲဆိုင်းကြီးများကို ဖြည့်စွက်ပြီး ပြေးဆွဲသွားမည် ဖြစ်ကြောင်း ၎င်းက ပြောသည်။

“ငွေကျပ်-၃၀၀လို့ သတ်မှတ်ရခြင်းက ဒီတွဲဟာ ကျန်တဲ့ တွဲတွေနဲ့ မတူပါဘူး။ သီးသီးသန့်သန့်လည်း ဖြစ်တယ်။ ဒါက အထူးသဖြင့် အဆင့်မြင့် စီစဉ်ခြင်း ဖြစ်ပါတယ်။ မြို့ထဲသွားသည့် ကားစီးနှုန်းခပေါ် မူတည်ပြီး ချိန်ဆပြီး ခရီးသည်တွေရဲ့ ဆန္ဒကို ယူပြီး ဈေးနှုန်းသတ်မှတ်ခဲ့ခြင်း ဖြစ်ပါတယ်။ အနည်းစု စီးနှင်းနိုင်အောင်လည်း ၁၀၀-တန် မြို့ပတ်ရထား ထားပေး ထားပါတယ် ” ဟု M-Media သို့ပြောသည်။

အဆိုပါ ရထားတွဲလိုင်းများမှာ ယခုကြိမ်နှင့်ဆိုလျှင် သုံးကြိမ်ရှိပြီ ဖြစ်ကြောင်း ကျိုက်ထီးရိုး ကျိုက်ထိုရထား ၁၊ ၂ ဆိုပြီး ပြေးဆွဲခဲ့ကြောင်း၊ ဒုတိယ အကြိမ် အဲကွန်း အထူးရထား ပြေးဆွဲခဲ့ကြောင်း၊ တတိယအကြိမ်အဖြစ် ‘ဇ’ အဆင့်မြင့် တွဲဆိုင်း ပြေးဆွဲသည့် အခမ်းအနားကို နိုဝင်ဘာ ၁ရက်နေ့ မနက် ၆-နာရီ ၅၇-မိနစ်တွင် စတင် ပြေးဆွဲမည် ဖြစ်ကြောင်း သိရသည်။ မျက်နှာချင်းဆိုင် ဖိုင်ဗာခုံများ ဖြစ်သည့်အတွက် တစ်တွဲလျှင် လူဦးရေ ၇၀၊ ၈၀ခန့်ထိုင်စီးနိုင်ကြောင်း၊ တန်းလက်ကိုင် ထားရှိ သော်ကြောင့် ခရီးသည် များပြားပါက မတ်တပ်ရပ် အပါ လူဦးရေ ၁၀၀-ခန့် စီးနိုင်ကြောင်း၊ စုစုပေါင်း တွဲ ၆-တွဲ ပါရှိကြောင်း သိရသည်။ လက်မှတ်မဲ့ စီးနှင်းသူအား ဒဏ်ငွေ ၃၀၀၀-ကျပ် ဒဏ်ရိုက်မည် ဖြစ်ကြောင်း သိရသည်။