နိုဝင်ဘာ ၃ အားကစားသတင်းများ

နိုဝင်ဘာ-၃ ၂၀၁၃
M-Media

ဖက်ဒါရာအား အနိုင်ယူကာ Paris Masters ဗိုလ်လုပွဲသို့ ဂျိုကိုဗစ်တက်ရောက်

ပြင်သစ်နိုင်ငံတွင်ကျင်းပပြုလုပ်နေသည့် Paris Masters ပြိုင်ပွဲ ဆီမီးဖိုင်နယ်ပွဲစဉ်တွင် ဆားဘီးယားတင်းနစ်သမား ဂျိုကိုဗစ်မှာ ဆွဇ်ဇလန်တင်းနစ်အကျော်အမော် ဖက်ဒါရာအား အနိုင်ယူကာ နောက်ဆုံးဗိုလ်လုပွဲသို့တက်ရောက်သွားခဲ့သည်ဟု သိရသည်။

၎င်းတို့နှစ်ဦးမှာ အကြိမ် ၃၀ မြောက်တွေ့ဆုံခဲ့ခြင်းဖြစ်ပြီး ဂျိုကိုဗစ်မှာ ပထမပွဲငယ်တွင် ရှုံးနိမ့်ခဲ့သော်လည်း ဒုတိယနှင့် တတိယပွဲငယ်တို့တွင် အနိုင်ရရှိအောင် ကစားနိုင်ခဲ့သောကြောင့် ပွဲအပြီးတွင် ၄-၆၊ ၆-၃၊ ၆-၂ ဖြင့် အနိုင်ရရှိခဲ့သည်။

ယခုပွဲအနိုင်ရရှိမှုမှာ ဂရန်းစလမ်ဖလား ၆ ကြိမ်ရရျိခဲ့သည့် ဂျိုကိုဗစ်၏ ၁၆ ပွဲဆက်တိုက် အနိုင်ရရှိခဲ့ခြင်းဖြစ်သည်။

အခြားဆီးမီးဖိုင်နယ်ပွဲစဉ်တစ်ခုတွင်လည်း စပိန်ကစားသမား ဒေးဗစ်ဖာရာမှာ တစ်နိုင်ငံတည်းသား ရာဖေးနာဒဲလ်အား အနိုင်ရရှိခဲ့သည်။ ကမ္ဘာ့အဆင့် ၃ ရ ဖာရာမှာ ကမ္ဘာ့ဆင့် ၁ နာဒဲလ်အား ၆-၃၊ ၇-၅ ဖြင့်အနိုင်ရရှိခဲ့ပြီး ဗိုလ်လုပွဲတွင် ဂျိုကိုဗစ်နှင့် ယှဉ်ပြိုင်ရမည်ဖြစ်သည်။
Ref: .skysports.

……………………………………….
အာဆင်နယ်အသင်းမှာ ယုံကြည်မှုပိုလာပြီဟု ၀င်းဂါးဆို

ယမန်နေ့ညက လီဗာပူးလ်အသင်းအား ၂ ဂိုး ဂိုးမရှိဖြင့် အနိုင်ရရှိခဲ့ပြီးနောက် အာဆင်နယ်အသင်းမှာ ယုံကြည်မှုပိုမိုတိုးပွားလာသည်ဟု အသင်းနည်းပြ အာဆင်ဝင်းဂါးကာ ပြောဆိုလိုက်သည်။

ဝင်းဂါးကိုင်တွယ်ခဲ့သည့် အာဆင်နယ်အသင်းမှာ ၂၀၀၃-၀၄ ရာသီက ပရီးမီးယားလိဂ်တွင် ရှုံးပွဲမရှိဗိုလ်စွဲခဲ့သော်လည်း ယခုနှစ်ရာသီ အာဆင်နယ်အသင်း၏ စွမ်းဆောင်ရည်က ပိုမိုကောင်းမွန်သည်ဟု ၀င်းဂါးက ထပ်လောင်းပြောကြားခဲ့သည်။

“(ထိပ်ဆုံးက ငါးမှတ်ဖြတ်ထားတာဟာ) ကျေနပ်စရာပါ။ ဒါပေမယ့် အခုအချိန်ဟာ ရာသီအစပဲရှိပါသေးတယ်။ အခုလို့ထိပ်ဆုံးရောက်နေခြင်းဟာ အသင်းအတွက် ယုံကြည်မှုနဲ့ ရည်ရွယ်ချက်ကို ပိုမိုကောင်းမွန်စေပါတယ်” ဟု ၀င်းဂါးက Sky Sports သို့ပြောကြားခဲ့သည်။

……………………………………………..
နယူးကာဆယ်နှင့်ပွဲတွင် အမှား ၁၁ ခုပြုလုပ်ခဲ့သည်ဟု မော်ရင်ဟိုဆို

စိန့်ဂျိမ်းပါခ့်တွင် နယူးကာဆယ်အသင်းအား ၂ ဂိုး ဂိုးမရှိဖြင့် ရှုံးနိမ့်ခဲ့သောပွဲတွင် မိမိအနေဖြင့် အမှား ၁၁ ခုပြုလုပ်ခဲ့သည့်ဟု ချယ်ဆီးအသင်း၏ နည်းပြဖြစ်သူ မော်ရင်ဟိုက ပြောကြားခဲ့သည်။

“အသင်းရဲ့လူစာရင်းနဲ့ပက်သက်ပြီး ကျွန်တော် အမှား ၁၁ ခုပြုလုပ်ခဲ့ပါတယ်။ ဒါဟာ အသင်းရဲ့ကစားပုံဆိုးရွားမှုကိုမြင်ပြီးနောက်ပိုင်း ကျွန်တော်ခံစားခဲ့ရတာပါပဲ။ ကျွန်တော်တို့အရှုံးနဲ့ထိုက်တန်ပါတယ်။ ဘာ့ကြောင့်လဲဆိုတော့ ပထမပိုင်း ၄၅ မိနစ်မှာ ကျွန်တော်တို့အသင်းဟာ ခြေစမ်းပွဲကစားနေသလိုဖြစ်ပြီး ဒုတိယပိုင်းမှာတော့ အသင်းတစ်သင်းပျောက်သွားသလိုပါပဲ” ဟု မော်ရင်ဟိုက ပွဲအပြီးတွင် ပြောကြားခဲ့သည်။

ထို့ပြင် နယူးကာဆယ်နည်းပြ အလန်ပက်ဒရူးကိုလည်း မော်ရင်ဟိုက ချီးကျုးခဲ့သည်။ ချယ်ဆီးအသင်းမှာ ယခုနှစ်ပရီးမီးယားလိဂ် အိမ်ကွင်း ၅ ပွဲကစားပြီးချိန်တွင် ရာနှုန်းပြည့်အနိုင်ရရှိထားသော်လည်း အဝေးကွင်းကစားခဲ့ရသည့် ၅ ပွဲတွင် ၁ ပွဲသာအနိုင်ရရှိထားသည်။

……………………………………………