ကိုအောင်ထွန်း (မြန်မာနိုင်ငံ ကျောင်းသား လှုပ်ရှားမှု သမိုင်း စာအုပ်ရေးခဲ့သူ)

(ကို) အောင်ထွန်းရဲ့ “၈၈ နှစ်၊ မြန်မာနိုင်ငံ ကျောင်းသား လှုပ်ရှားမှု သမိုင်း” စာအုပ်မှ စာရေးသူ ကျောင်းသားခေါင်းဆောင် မြန်မာမွတ်စလင်မ်”ကိုအောင်ထွန်း” ကိုယ်ရေးအကျဉ်းကို ပြန်လည် ကူးယူ ဖော်ပြလိုက်တာ ဖြစ်ပါတယ်။

၁၉၆၇ ခုနှစ်တွင် မွေးဖွားခဲ့သည်။ ၁၉၈၈ ခုနှစ်တွင် ရန်ကုန် စက်မှု တက္ကသိုလ် ပဉ္စမနှစ် (လျှပ်စစ် – အင်ဂျင်နီယာ) ကျောင်းသား အဖြစ် သင်ကြားနေဆဲ ဖြစ်သည်။ ၁၉၈၇ မဆလ အစိုးရမှ ငွေစက္ကူများ တရားမဝင်ကြောင်း ကြေညာမှုကြောင့် ပေါ်ပေါက်ခဲ့သော ကျောင်းသား လှုပ်ရှားမှုများမှ စတင်ကာ တောက်လျှောက် ပါဝင်ခဲ့သည်။

ရန်ကုန် စက်မှု တက္ကသိုလ် ကျောင်းသားများ သမဂ္ဂမှ ခေါင်းဆောင် တဦး ဖြစ်သည်။ ၁၉၈၈-၈၉ ခုနှစ် တလျှောက်လုံးတွင် ပေါ်ပေါက်ခဲ့သော ကျောင်းသား လှုပ်ရှားမှုများတွင် ပါဝင်ခဲ့သည်။

၁၉၉၀ ဧပြီလ အတွင်း ဗကသများ အဖွဲ့ချုပ် (အောက် ဗမာပြည်) ကို ဖွဲ့စည်းခဲ့ရာတွင် ဗဟို အလုပ် အမှုဆောင် အဖွဲ့ အတွင်းရေးမှူး အဖွဲ့ဝင် အဖြစ် ပါဝင် ဆောင်ရွက်ခဲ့သည်။ ၁၉၉၀ ခုနှစ်၊ မန္တလေးတွင် ကျင်းပခဲ့သော ဗမာနိုင်ငံလုံးဆိုင်ရာ ကျောင်းသား သမဂ္ဂများ အဖွဲ့ချုပ် ညီလာခံ၌ ဗဟို အလုပ် အမှုဆောင် အဖွဲ့ အတွင်းရေးမှူး အဖွဲ့ဝင် အဖြစ် ရွေးချယ် တင်မြှောက်ခြင်း ခံခဲ့ရသည်။ ညီလာခံမှ ချမှတ်ခဲ့သော ရက် ၃၀ အတွင်း လွှတ်တော် ခေါ်ယူနိုင်ရေး အတွက် အမျိုးသား ဒီမို ကရေစီ အဖွဲ့ချုပ်အား ဝိုင်းရံ ကူညီရန် ဟူသော အချက်အား အဓိက အကောင်အထည် ဖော်ခဲ့ကြသူများတွင် ပါဝင်သည်။…

၁၉၉၀ ဂန္ဒီ ညီလာခံ အကြို လူထု လှုပ်ရှားမှုများကို ဗကသမှ ဦးဆောင် လှုပ်ရှားခဲ့ရာတွင် ခေါင်းဆောင် လှုပ်ရှားခဲ့သည်။ ဂန္ဒီ ညီလာခံအပြီး စက်တင်ဘာ ၁ ရက်နေ့၌ ဗကသမှ အခြား ခေါင်းဆောင်များနှင့် အတူ ဖမ်းဆီး ခံခဲ့ရသည်။

၂၈၊ ၁၀၊ ၁၉၉၀ တွင် ထောင်ဒဏ် ၅ နှစ် ချမှတ်ခြင်း ခံခဲ့ရသည်။ ထောင်မှလွတ်ပြီး ကျောင်းပြန်တက်ခွင့် ရသည့် အတွက် ၁၉၉၇ ခုနှစ်တွင် စက်မှု တက္ကသိုလ်မှ ကျောင်းပြီးခဲ့သည်။

၁၉၉၆ ခုနှစ်၊ နှစ်ဆန်းမှ စ၍ “ကျနော် အရေးချင်ဆုံး စာအုပ်” ဟု အမည်ရသော “မြန်မာနိုင်ငံ ကျောင်းသား လှုပ်ရှားမှု သမိုင်း” စာအုပ်ကို စတင် ပြုစုခဲ့သည်။ ၁၉၉၈ ခုနှစ်၊ ဇန်နဝါရီလ အတွင်း ၎င်းစာအုပ် လျှို့ဝှက် ဖြန့်ချိမှုကြောင့် ထောင်ဒဏ် ၁၇ နှစ် ချခံရသည်။ ကိုအောင်ထွန်းဟာပြစ်မှုဆိုင်ရာ ပုဒ်မ ၅(ည), ၁၇/၂၀ အရ ထောင်ဒဏ် ၁၇ နှစ် ဖြင့် သာယာဝတီထောင်တွင် ၁၉၉၈ ဖေဖေါ်ဝါရီလ ၁၇ ရက်နေ့ မှစ၍ ၁၁ နှစ်ခန့် နေခဲ့ရပြီး ၂၀၀၉ စက်တင်ဘာလ ၁၈ ရက်နေ့တွင်ပြန်လွတ်ခဲ့ပါတယ်။

ကိုအောင်ထွန်းကို ကမ္ဘာ့တဝှမ်း နိုင်ငံရေးအရ ဖိနှိပ်ခြင်း ခံနေရသော စာရေးဆရာများအား ပေးအပ်သော ဟယ်မန်၊ ဟန်းမတ်ဂရန့်ဆု (Hellman/Hammett Grant) ကို ၁၉၉၉ ခုနှစ်တွင် ချီးမြှင့်ခဲ့သည်။ ကမ္ဘာ့ စာရေးဆရာများ အသင်း အင်တာနေရှင်နယ် ပန်အဖွဲ့ဝင်များ ဖြစ်သော နော်ဝေ၊ ကင်ဘာရာ၊ ကနေဒါရှိ ပန်စင်တာများက ကိုအောင်ထွန်းအား ၎င်းတို့ အဖွဲ့များ၏ ဂုဏ်ထူးဆောင် အဖွဲ့ဝင် တဦးအဖြစ် ကြေညာ ဂုဏ်ပြုခဲ့သည်။

(source မြန်မာမွတ်စလင်မ်မီဒီယာ)

မြန်မာနိုင်ငံရေးအပြောင်းအလဲအတွက် ကနဦး အစပျိုးရာ ကျောင်းသားလှုပ်ရှားမှုများတွင် မြန်မာမွတ်စလမ်များမှ အစဉ်တစိုက် အမြဲထိပ်ဆုံးမှာ တက်ကြွစွာ ပါဝင်ခဲ့ကြပါတယ်။

မြန်မာနိုင်ငံရဲ့ ကျောင်းသားသမိုင်းနဲ့ မြန်မာမွတ်စ်လင်မ်တွေရဲ့ ထူးခြားတဲ့ဆက်စပ်မှုတွေပါ…

• ရန်ကုန်တက္ကသိုလ်ကျောင်းသားသမဂ္ဂပထမဆုံး ဥက္ကဌက ဦးထွန်းစိန်
• မြန်မာနိုင်ငံလုံးဆိုင်ရာ ကျောင်းသားသမဂ္ဂ ပထမဆုံးဥက္ကဌ ဦးရာရှစ်
• မြန်မာနိုင်ငံကျောင်းသားသမိုင်းစာအုပ်ကို ပြုစုခဲ့သူ ကိုအောင်ထွန်း

မြန်မာနိုင်ငံကျောင်းသားလှုပ်ရှားမှုသမိုင်း စာအုပ်ဖတ်ချင်သူများ အောက်ကလင့်ခ်တွင်ဖတ်ပါရန်။

• မြန်မာနိုင်ငံကျောင်းသားသမိုင်းစာအုပ်