ဖဲကြိုးဖြူနေ့ (သို့)ကမ္ဘာ့အမျိုးသမီးများ အကြမ်းဖက်ခံရမှု ရပ်တန့်ရေးနေ့ တောင်ကြီးတွင် ကျင်းပါမည်။

နိုဝင်ဘာ-၂၄ ၂၀၁၃
M-Media
မင်းထွဋ်ကောင်း

ရှမ်းပြည်နယ် တောင်ကြီးမြို့မှာလည်း ၂၅.၁၁.၂၀၁၃၊ တနလာင်္နေ့၊ စိန့်ဂျိုးဇက်အောက်မေ့ဘွယ်ဓမ္မာရုံမှာ နံနက် ၉ နာရီမှ ညနေ ၃ နာရီအထိ ဖဲကြိုးဖြူနေ့ သို့မဟုတ် ကမ္ဘာ့အမျိုးသမီးများ အကြမ်းဖက်ခံရမှု ရပ်တန့်ရေးနေ့ အခမ်းအနားကို ကျင်းပဆောင်ရွက်သွားမှာဖြစ်ကြောင်း၊ ဘာသာပေါင်းစုံမှ ကိုယ်စားလှယ်များမှလည်း ဖဲကြိုးဖြူနေ့နဲ့ စပ်လျဉ်းပြီး သက်ဆိုင်ရာ ဘာသာတရား ရှုထောင့်က ဟောပြောမှု အပါအ၀င် စိတ်ဝင်စားစရာ အစီအစဉ်များလည်း ပါဝင်ကြောင်း သတင်းရရှိပါတယ်။

ဖဲကြိုးဖြူနေ့ (သို့)ကမ္ဘာ့အမျိုးသမီးများ အကြမ်းဖက်ခံရမှု ရပ်တန့်ရေးနေ့ ဖြစ်ပေါ်လာပုံ အကျဉ်း

၁၉၈၉ ခုနှစ်၊ ကနေဒါနိုင်ငံ မွန်ထရီမြို့မှာ အင်ဂျင်နီယာကျောင်းသူ ၁၄ ဦးကို Marc Lepine ဆိုသူက သေနတ်နဲ့ပစ်သတ်ခဲ့ပါတယ်။ ဒီလိုအစုလိုက်အပြုံလိုက်သတ်ဖြတ်လိုက်တာဟာ အမျိုးသမီးများအပေါ် အကြမ်းဖက်မှုဖြစ်တတာကြောင့် သေဆုံးသွားတဲ့အမျိုးသမီးတွေအတွက် အချည်းနှီးမဖြစ်စေရဘူး ဆိုပြီး အမျိုးသမီးအရေးလှုပ်ရှားသူ Judy Rebick က “ ငါတို့ရဲ့ ပူဆွေးဝမ်းနည်းမှုတွေဟာ နောင်တစ်ချိန်မှာ အမျိုးသားများက အမျိုးသမီးများအပေါ် အကြမ်းဖက်မှုရပ်တန့်စေတဲ့အဖြစ်ကို ပြောင်းလဲစေရမယ် ” လို့လည်း သံဓိဌာန်ချခဲ့ပါတယ်။ ၁၉၉၁ ခုနှစ်ကစပြီး အောက်မေ့ဘွယ်နေ့နဲ့ အမျိုးသမီးများအပေါ် အကြမ်းဖက်မှုကိုအရေးယူဆောင်ရွက်တဲ့နေ့အဖြစ် ကျင်းပလာခဲ့ကြတယ်။

၁၉၉၉ ခုနှစ်မှာကျင်းပတဲ့ ၅၄ ကြိမ်မြောက် ကမ္ဘာ့ကုလသမဂ္ဂအထွေထွေညီလာခံ ဆုံးဖြတ်ချက်အမှတ် ၅၄/၁၄၃ အရ နိုဝင်ဘာလ ၂၅ ရက်နေ့ကို “အမျိုးသမီးများအပေါ် အကြမ်းဖက်မှုရပ်တန့်ရေးနေ့” အဖြစ် သတ်မှတ်ခဲ့ကြတယ်။

အဲ့ဒီနေ့မှာ အမျိုးသမီးတွေကို အကြမ်းမဖက်တော့ပါဘူး၊ အကြမ်းဖက်မှုတွေကိုလည်း ဖြစ်နိုင်သမျှ ကာကွယ်တားဆီးပေးပါမယ်၊ ရေငုံနှုတ်ပိတ်မနေပါဘူး ဆိုတဲ့ ခံဝန်ကတိတွေနဲ့အတူ ဖဲကြိုးဖြူလေးတွေကို တပ်ဆင်လာကြတဲ့အတွက် “ဖဲကြိုးဖြူနေ့” လို့လည်း ခေါ်တွင်ပါတယ်။ ကမ္ဘာ့ဒေသအနှံ့မှာ နှစ်စဉ်ကျင်းပကြပါတယ်။