မိတ္ထီလာ CAMP အတွင်းရှိ ချမ်းအေးသာယာ ရပ်ကွက်တွင် နေထိုင်ခဲ့သှူ အကြမ်းဖက်ခံရသူများအား မြေနေရာပြန်ပေးမည်

ဒီဇင်ဘာ ၃၊ ၂၀၁၃
M-Media
သုတ

မိတ္ထီလာ ။         ။            ၂၀၁၃-ခု မတ်လအတွင်း ဖြစ်ပွားခဲ့သော မိတ္ထီလာမြို့ အကြမ်းဖက်မှုများကြောင့် ဒုက္ခသည်အဖြစ် ရောက်ရှိနေသူများ အနက် ချမ်းအေးသာယာရပ်ကွက်မှ အကြမ်းဖက်ခံရသည့် သူများအား မြေနေရာများ ပြန်လည် ပေးမည်ဟု မိတ္ထီလာမြို့တွင် နိုဝင်ဘာ ၃၀-ရက်နေ့က ပြုလုပ်ခဲ့သော အစည်းအဝေးမှဆုံးဖြတ်လိုက်ကြောင်း သိရသည်။

၂၀၁၃-ခု မတ်လအကြမ်းဖက်မှုကြောင့် မိတ္ထီလာမြို့တွင် ဒုက္ခသည်စခန်း(၅)ခု ဖွင့်လှစ်ထားရှိခဲ့ရာ အဆိုပါ အကြမ်းဖက်ခံ ဒုက္ခသည်များအား မြေနေရာများ ပြန်လည်ချထားပေးရေးအတွက် မန္တလေးတိုင်းဒေသကြီး စီမံစီးပွားဝန်ကြီး ဦးအောင်ဇံအပါအ၀င်၊ မိတ္ထီလာခရိုင် အုပ်ချုပ်ရေးမှူး၊ မြို့နယ် မြေစာရင်းဦးစီးမှူး၊ ဌာနဆိုင်ရာများ၊ အကြမ်းဖက်ခံများ၏ ကိုယ်စားလှယ်များပါဝင် တက်ရောက်ဆွေးနွေးခဲ့ကြသည်။

မိတ္ထီလာမြို့ ချမ်းအေးသာယာရပ်ကွက်သည် မွတ်စလင်မ်အများစုနေထိုင်သည့် ရပ်ကွက်ဖြစ်ပြီး ယခုအခါ ပြန်ပေးမည့် မြေနေရာမှာ ယခင်က ပေ ၅၀ – ပေ ၃၀ ပတ်လည် တစ်ကွက် ပိုင်ဆိုင်ခဲ့ကြသူများအား ပေ ၄၀ – ပေ ၃၀ မြေကွက်များ ပြန်လည်ပေးအပ်မည်ဖြစ်ပြီး၊ မြေတစ်ကွက်အတွင်း အိမ်ထောင်စု ၂-စု ၃-စု နေထိုင်ခဲ့ကြသူများအတွက်ကိုမူ အမည်နာမည်ပေါက်ရှိသူများအား မြေကွက် ပြန်လည်ပေးမည်ဖြစ်ပြီး အမည်နာမည်ပေါက်မရှိသူများအား တိုက်ခန်းများ ဆောက်လုပ်ပြီး မြေညီထပ်၌ ထားရှိမည်ဖြစ်ပြီးကြောင်း၊ အဆိုပါ တိုက်ခန်းများတွင် ချမ်းအေးသာယာရပ်ကွက်မှ မဟုတ်သူများနှင့် ချမ်းအေးသာယာရပ်ကွက်အတွင်း ကျူးကျော်နေထိုင်ခဲ့သူများကိုလည်း တိုက်ခန်း အပေါ်လွှာများတွင် ထားရှိမည်ဖြစ်ကြောင်း ဆွေးနွေးခဲ့ကြသည်။

အဆိုပါ ဆွေးနွေးမှုများအား ကိုယ်စားလှယ်များမှ ရေအရင်းအမြစ်နှင့် ပို့ဆက်ဝင်း CAMP အတွင်းရှိ ချမ်းအေးသာယာရပ်ကွက်မှ အကြမ်းဖက်ခံများနှင့် ပြန်လည်ဆွေးနွေးရာ အကြမ်းဖက်ခံများမှလည်း လက်ခံသဘောတူကြောင်း၊ ချမ်းအေးသာယာရပ်ကွက်မှ မဟုတ်သူများနှင့်မူ တာဝန်ရှိသူများမှ ဆွေးနွေးခြင်း မရှိသေးဟု သိရသည်။

၎င်းကိစ္စနှင့်ပတ်သက်၍ ရေအရင်းအမြစ်နှင့် ပို့ဆက်ရှိ CAMP များသို့ ဆက်သွယ်မေးမြန်းရာ “ကျွန်တော်တို့ ပို့ဆက်မှာက ချမ်းအေးသာယာက အိမ်ထောင်စု ၂၃၀-ကျော်ရှိပါတယ်။ အမည်ပေါက်မဟုတ်သူတွေလည်းရှိနေတော့ အိမ်ထောင်စု စုစုပေါင်းက ၃၁၉-စု ရှိနေပါတယ်။ ရေအရင်းအမြစ်မှာက ၁၈၅-စု ရှိနေပါတယ်။ အစည်းအဝေးမှာ ဆွေးနွေးကြတော့ မူလ မြေကွက်က ပေ ၅၀၊ ပေ ၃၀ ပတ်လည်ပါ။ ဒါပေမယ့် အခုက ပေ ၄၀ x ၃၀ ပတ်လည်ပဲ ပြန်ပေးမယ်ဆိုတော့ အစက လက်မခံချင်ဘူး။ ဒါပေမယ့် သူတို့ကပြောတယ်။ ရပ်ကွက်အင်္ဂါနဲ့ညီအောင် မီးသတ်ရေကန်တွေလုပ်မယ်၊ ဘောလုံးကွင်းတွေလုပ်မယ် စနစ်တကျလုပ်မယ်ဆိုတော့ ပေ ၄၀ x ၃၀ ပတ်လည် ပြန်ပေးမှာကို ကျွန်တော်တို့ လက်ခံလိုက်ပါတယ်။ ဒါပေမယ့် အစည်းအဝေးက ပြန်လာပြီးတော့ CAMP အတွင်းက အကြမ်းဖက်ခံတွေနဲ့ ကျွန်တော်တို့တွေ ပြန်ဆွေးနွေးလိုက်တော့ အကြမ်းဖက်ခံတွေကလည်း သဘောတူလိုက်ပါတယ်။ မဟုတ်ရင် CAMP ထဲမှာ နေရတာ ကြာလာတော့ လူမှုရေးပြဿနာတွေလည်း ရှိလာနေတယ်။ ဒါတွေကို အမြန်ဆုံး ဖြေရှင်းနိုင်ဖို့က ကိုယ့်အိမ်ယာတွေကို ပြန်ရောက်နိုင်မှဖြစ်မယ်။ ဒါကြောင့် ကျွန်တော်တို့ ပေ ၄၀ x ၃၀ ဆိုတာကို လက်ခံ သဘောတူလိုက်ပါတယ်။  ချမ်းအေးသာယာမှာက အများစုက မွတ်စ်လင်မ်တွေ နေကြတာပါ။ အခု မြေယာပြန်ပေးပြီး ဆောက်လုပ်မှာတို့ကို အစိုးရက ပြန်လည် လုပ်ဆောင်ပေးမှာမဟုတ်ပါဘူး။ ကျွန်တော်တို့ကို ကူညီနေတဲ့ သူတွေက ပြန်လည်ထူထောင်ရေး လုပ်ပေးကြမှာပါ။”လို့ ဒုက္ခသည်စခန်းအတွင်းရှိ အကြမ်းဖက်ခံတချို့မှ M-Media ကို ပြောပါသည်။

ဓါတ်ပုံ-အညွှန်း မတ်လအတွင်းကဖြစ်ပွားခဲ့သော မိထ္ထီလာမြို့မှ အကြမ်းဖက်မှုများကြောင့် မွတ်စလင်မ်အများစုနေထိုင်ရာ မီးလောင်ပြင် ရပ်ကွက်