သောက်စားမူးယစ်ပြီး လူအများ အပေါ် အနှောင့်အယှက်ဖြစ်စေခြင်းကို ချုပ်ကိုင်တော့မည့် စင်ကာပူ အစိုးရ၏ ပေါ်လစီ

ဒီဇင်ဘာ ၄ ၊ ၂၀၁၃
M-Media

(HDB)အိုးအိမ်ဖွံ့ဖြိုးရေးဌာနပိုင် တိုက်ခန်းများတွင် နေထိုင်သူတို့ကြုံတွေ့ခံစားခဲ့ရသော မူးယစ် သောက်စားသူတို့၏ အနှောင့်အယှက် အသံဆိုးအသံကြောင်များကို ထိန်းချုပ်တော့မည့် နည်းလမ်းကို ရှာကြံပေးခြင်းဖြင့် လူအများကောင်းမွန်စွာ အိပ်စက်နိုင်ကြပါတော့မည်။

အစိုးရသည် အများပြည်သူနှင့် သက်ဆိုင်သောနေရာ အများကို အရက်သေစာမရှိရဇုံ(နယ်မြေ)များ အဖြစ် သတ်မှတ်ရန်နှင့် အရက်ရောင်းချသော အချိန်ကို လျှော့ချ သတ်မှတ်ခြင်းဖြင့် အရက်သေစာ သောက်စားမှုကို ချုပ်ကိုင်ရန်နည်းလမ်းရှာဖွေနေပါသည်။ ပြည်ထဲရေး ၀န်ကြီးဌာန(MHA)မှ ပြည်သူလူထု၏ သဘောထားတုံ့ပြန်ချက် ရယူရန် ပြည်သူ့စစ်တမ်းကောက်ယူရေးဌာနမှ အချိန်ကာလ (၅)ပတ်ခန့် အချိန်ယူပြီး ပြည်သူ့သဘောထားများနှင့် အစိုးရ၏ မူဝါဒပေါင်းစပ်ပြီး မူဝါဒချမှတ်ရန် ဆောင်ရွက်နေပါသည်။

ပထမစဉ်းစားမည့်အချက်မှာ အများပြည်သူနေရာများဖြစ်သောအစိုးရတိုက်ခန်းများ၏ အောက်ဆုံး အထပ်များ(Void Decks)၊ MRTရထားဘူတာ အနီး ပတ်ဝန်းကျင်နေရာများနှင့် အားကစားကွင်း များတွင် အရက်သေစာလုံးဝမရှိရ နယ်မြေများအဖြစ် သတ်မှတ်ရန်ဖြစ်ပြီး စင်ကာပူမြစ်ကို ဖြတ်ကျော် တည်ဆောက်ထားသော တံတားများ၏ အနီးအနားနေရာများ၌ လူငယ်များ အများအားဖြင့် စုစည်းပြီး အရက်သေစာသောက်စားလေ့ရှိပြီး ယာယီ အရက်သေစာမရှိရ နယ်မြေအဖြစ် သတ်မှတ်မည်ဖြစ်ပါသည်။ ဤသို့ပြုလုပ်ခြင်းကြောင့် တာပန်ရှိ အရာရှိများက အရက်သေစာသောက်စားသူများကို ဖယ်ရှားရှင်းလင်း နိုင်ခွင့် အာဏာရရှိလာမည်ဖြစ်သည်။ အကယ်၍အဆိုပါနေရာများတွင် အခြေအနေကောင်းမွန်လာပါက တားမြစ်ချက်များကို ပြန်လည် ရုပ်သိမ်းနိုင်ပါမည်။

(MAH)၏ နောက်ထပ် အဆိုပြုချက်တစ်ရပ်မှာ လက်လီဆိုင်ငယ်များတွင် အရက်ရောင်းချချိန်ကို လျှော့ချပါက ထိုနေရာများတွင် ဈေးပေါသောအရက်များကို ၀ယ်ယူသောက်သုံးသူများလျှော့ချနိုင်မည်ဟု ဆိုပါသည်။ (နောက်နေ့Facebook တွင် သဘောတား တင်သူအချို့က ကြိုတင် ၀ယ်ယူထားပြီး သောက်သုံး နိုင်ကြောင်း တင်ပြထားကြပါသည်။)

အရက်ရောင်းချသောအချိန်ကို ကန့်သတ်လျှော့ချခြင်းကို စူပါမားကက်မှ စတင်၍ လမ်းဘေး လက်လီဆိုင်များအထိ သတ်မှတ်ကန့်သတ်ပြဿနာဖြစ်သည့်နေရာများတွင် ချမှတ်ပါမည်၊ လူထုအနေဖြင့် အချိန် ကန့်သတ်ချက်ကို နိုင်ငံအ၀ှမ်း(သို့မဟုတ်) သတ်မှတ်နေရာများတွင် ချမှတ်သင့်ကြောင်းနှင့် မည်သို့ သတ်မှတ်သင့်ကြောင်း တင်ပြကြရန် ဖော်ပြထားပါသည်။

လက်ရှိအနေဖြင့် အန်မိုကိုနှင့် အော်ခတ်ကဲ့သို့သောဒေသများနှင့် ဈေးဝယ်သူများနှင့်ပြည့်နှက် နေသည့်နေရာများတွင် အချိန်ပြည့် အရက်ရောင်းချရန် လိုင်စင်လျှောက်ထား ခွင့်ရှိနေပါသည်။ တန်ဂျွန်ပါဂါ ကဲ့သို့လူနေအိမ်နှင့် စီးပွားရေး အဆောက်အဦးများရောပြွန်းနေသောနေရာများတွင် နံနက်(၆)နာရီမှ နံနက် (၃)နာရီအထိ ရုံးဖွင့်ရက်များတွင်လည်းကောင်း နံနက်(၆)နာရီမှ နောက်နေ့နံနက်(၄)နာရီအထိ ရုံးပိတ်ရက် များတွင် ရောင်းချခွင့်ပြုနိုင်ပါသည်။

(MAH)အနေဖြင့် ဤသဘောထားပြောင်းလဲတင်ပြချက်ကို လွှတ်တော် ကိုယ်စားလှယ်များနှင့် ရပ်ကွက် အတွင်းနေထိုင်သူတို့၏ ထုတ်ပြန်ချက်(Feedback)များပေါ်တွင် မူတည် စဉ်းစားခဲ့ကြောင်း (MAH) ၏ ယမန်နေ့က ထုတ်ပြန်ခဲ့သော သတင်း ထုတ်ပြန်ချက်ပေါ်တွင် ဖော်ပြထားခဲ့ပါသည်။ ရော်ဘင်ဆင်မြစ်ဆိပ် တံတားနှင့် လစ်တဲလ်အိန္ဒိယ နယ်မြေ အနီးအနားတွင် နေထိုင်သောပြည်သူအများက ဈေးပေါသောအရက် များကို လွယ်ကူစွာ ၀ယ်ယူရရှိမှုသည် လုံခြုံရေးဆိုင်ရာနှင့် လူအများ၏ ငြိမ်းချမ်းစွာနေထိုင်လိုမှုကို ညဖက် သောက်စားမူးယစ်သူတို့က ဖျက်လိုဖျက်ဆီးလုပ်နေကြောင်းတင်ပြခဲ့ကြပါသည်။

(MAH)၏ သတင်းဖော်ပြချက်တွင် ဆက်လက်ဖော်ပြရာတွင် အရက်အလွန်အကျွံ သောက်သုံးမှုသည် သရုပ်ပျက်အမူအရာ၊ ရန်ဖြစ်ခြင်း၊ ဆူညံခြင်းနှင့် အမှိုက်သရိုက်များ စည်းကမ်းမဲ့စွာ စွန့်ပစ်ခြင်းကို ဖြစ်ပေါ်စေကြောင်း၊ သို့ဖြစ်၍အရက်သောက်စားမှုကြောင့် အကျိုးမဲ့စေသောဖြစ်ရပ်များက လူအများအပေါ် မထိခိုက်ရန်စည်းကမ်းများသတ်မှတ်ရန်လိုအပ်ကြောင်း ဖော်ပြထားသည်။

ဆီလီဂျီအိမ်ယာအတွင်းနေထိုင်သူ ရှုဖန်ဟွေ(၂၃)နှစ်က ပြောကြားရာတွင် ရဲများကို မကြာခဏ ခေါ်ယူကာ အကူအညီတောင်းခံနေရကြောင်း၊ အရက်ရောင်းချသည့် အချိန်လျှော့ချခြင်းကို ထိခိုက်မည် မဟုတ်ကြောင်း၊ ကြိုတင်ဝယ်ယူထားနိုင်ကြောင်း မိမိလေ့လာထားသည်ဟု ဆိုပါသည်။ လစ်တဲလ်အိန္ဒိယ တွင် နေထိုင်သူမဒမ်လော လူကမူ ရုံးပိတ်ရက်များတွင် အစိုးရအိမ်ယာ အနီးအနားရှိ မြက်ခင်းပြင်များတွင် အရက်မူးလွန်ပြီး ပိုးလိုးပက်လက်ဖြစ်နေသောနိုင်ငံခြားသား အလုပ်သမားများကို အများအပြားတွေ့ရ ကြောင်း၊ တစ်ခါတစ်ရံ ခိုက်ရန်ဖြစ်ပွားပြီး ဆူညံစွာအော်ဟစ်နေကြောင်း သူမအတွေ့အကြုံကို ပြောကြားခဲ့ ပါသည်။

ကုန်ပစ္စည်းမျိုးစုံရောင်းချနေသူဆိုင်ရှင်တစ်ဦးကမူ သူ့အနေဖြင့် ညသန်းခေါင်ချိန် အထိ အရက် ရောင်းချကြောင်း၊ ၀ယ်သူများသည် ည(၁၀)နာရီ အထိသာ ရောင်းချရမည်ဟု ကန့်သတ် ပါက ရောင်းချရမှု ကို ထိခိုက်စေနိုင်ကြောင်း ပြောကြားပါသည်။ အင်္ဂလန်နှင့် အမေရိကန်နိုင်ငံတို့တွင် အရက်မရှိရနယ်မြေများ မရှိပါ။ သြစတေးလျနိုင်ငံ၏ အချို့ပြည်နယ်များတွင် အရက်များကို ည(၁၀)နာရီထိသာ ရောင်းချခွင့်ပြုထား ပါသည်။

စင်ကာပူနိုင်ငံသည် (Secular)ဟုခေါ်ဆိုသည့် ဘာသာရေးနှင့် နိုင်ငံရေးခွဲခြားထားသည့်သေးငယ် သော်လည်း ကမ္ဘာတွင် အဆင့်မျိုးစုံတွင် တန်းဝင်နေသောနိုင်ငံဖြ စ်ပါသည်။ အစိုးရ၏ အုပ်ချုပ်မှုအောက် တွင် လူထု၏ တုံ့ပြန်ချက်(Feedback)ကို အလေးထားသကဲ့သို့ နိုင်ငံအတွက် အကျိုးရှိမည့်ကိစ္စဟူသမျှ အနက် ကျွန်တော်တို့က အသေးအဖွဲဟု ယူဆထားသည်ကို သူတို့က အလေးအနက်ထားဆောင်ရွက်နေ ကြသည်ကို သတိထားမိပါသည်။ မြန်မာ့လူ့အဖွဲ့အစည်းသည် ဘာသာရေး ကိစ္စကို အလေးထားကြသူ အများစုဖြစ်ကြပါသည်။ အရက်သေစာသည် ရှောင်ကြဉ်ရမည့်ကံကြီး(၅)ပါးတွင် အရေးပါဆုံးနှင့် အခြေခံ အကျဆုံးဟု လက်ခံထားကြပါသည်။ လက်တွေ့တွင်မူ အရက်ဆိုင်၊ ဘီယာဆိုင်များမှိုလိုပေါက်နေသလို စာသင်ကျောင်းများအနီးတွင် အရက်သေစာနှင့် လောင်းကစားကိစ္စများရှိနေပါသည်။ အထူးသဖြင့်မြို့ပြင် တက္ကသိုလ်ကျောင်းတော်ကြီးများပတ်ဝန်းကျင်တွင် ပိုမိုဆိုးရွားနေပါသည်။

အထက်ပါဆောင်းပါးကို တိုက်ဆိုင်၍ ဖတ်မိကြမည့်လွှတ်တော်ကိုယ်စားလှယ်များနှင့် ပြည်သူ အများက သက်ဆိုင်ရာဝန်ကြီးဌာနသို့ သဘောထား မှတ်ချက်များပေးပို့ခြင်းဖြင့် မိမိတို့ အာဆီယံအဖွဲ့ဝင် နိုင်ငံလေး၏ ဒီမိုကရေစီကျင့်စဉ်တစ်ခုကို အတုယူပြီး လိုက်နာကြည့်သင့်ပါသည်။

Ref: MyPaper

ဦးသံကြိုး(ခေတ္တ-စင်ကာပူ)