ကန်တို့၏ အကြမ်းဖက်စောင့်ကြည့်ရေး စာရင်းတွင် မင်ဒဲလားပါဝင်ခဲ့

M-Media

ဒီဇင်ဘာ ၇ ၊ ၂၀၁၃

နိုင်ငံတကာမှ နိုင်ငံရေးသမားများ၏ လူ့အခွင့်အရေးစံပြ သရုပ်အဖြစ်သတ်မှတ်ခြင်းခံထားရသူ နယ်လ်ဆင်မင်ဒဲလားမှာ အမေရိကန်တို့၏ အကြမ်းဖက် စောင့်ကြည့်ရေးစာရင်းတွင် ၂၀၀၈ ခုနှစ်အထိ ပါဝင်နေခဲ့ကြောင်း သတင်းများကဆိုသည်။

ကန်တို့ကမူ လူမည်းခေါင်းဆောင် မင်ဒဲလားအား အကောင်းမွန် ဆုံးဟန်ပြဆက်ဆံရေးဖြင့် ဆက်ဆံခဲ့သော်လည်း မင်ဒဲလားမှာ ၄င်းတို့၏အကြမ်းဖက် သမားစောင့်ကြည့်ရေးစာရင်းဝင်အဖြစ် လျို့ဝှက်စွာ အကျုံးဝင်နေခဲ့ရခြင်းဖြစ်သည်။ ၂၀၀၈ ခုနှစ်နောက်ပိုင်းတွင်မူ သမ္မတဂျော့ဘုရှ်၏ လက်မှတ်ဖြင့် မင်ဒဲလားအား ထိုစာရင်းမှ ပယ်ဖျက်ပေးခဲ့သည်။

တောင်အာဖရိကနိုင်ငံ၏ လူတန်းစားခွဲခြားရေး လူဖြူအစိုးရက မင်ဒဲလားခေါင်းဆောင်သည့် African National Congress (ANC) ကို အကြမ်းဖက် အဖွဲ့ အစည်းအဖြစ် စာရင်းသွင်းထားခဲ့ပြီး ANC ၏ အစိုးရကိုဆန့်ကျင်ဆောင်ရွက်ရသည့် လူဖြူလူမည်းခွဲခြားဆက်ဆံရေးတိုက်ဖျက်မှုများမှာ ၁၉၄၈ မှ ၁၉၉၄ ထိ ကြာမြင့်ခဲ့သည်။

အင်္ဂလန်နိုင်ငံ၏ ၀န်ကြီးချုပ်ဟောင်း မာဂရက်သက်ချာကလည်း မင်ဒဲလား၏ ANC အား အကြမ်းဖက်အဖွဲ့ဟု ၁၉၈၇ တွင် ခေါ်ဝေါ်သမုတ်ခဲ့ဖူးသည်။ မာဂရက်သက်ချာက ကန်သမ္မတ ရော်နယ်ရေဂင် လုပ်ခဲ့သည့်အတိုင်း တောင်အာဖရိက လူဖြူအစိုးရအား ပိတ်ဆို့အရေးယူဖို့ အဆိုအား ပယ်ချခဲ့သည်။

ANC အား အသိအမှတ်ပြုဖို့ရာအတွက် ၁၉၈၆တွင်  အမေရိကန်တို့၏ လွှတ်တော်၌ မဲခွဲခဲ့ရာ ယခင် သမ္မတ ဘုရ်ှလက်ထက်၊ ဒုတိယသမ္မတ အဖြစ် ဆောင်ရွက်ခဲ့သည့် ဒစ်ချေနီက အခြားသော ကွန်ဂရက်အမတ် ၁၇၉ ဦးနှင့်အတူ ဆန့်ကျင်သည့်ဘက်မှ ရပ်တည်ခဲ့ဖူးသည်။ ထိုမဲခွဲမှုမှာ နယ်လ်ဆင်မင်ဒဲ လားအား ထောင်မှ လွှတ်ပေးဖို့ တောင်းဆိုရန်ကိစ္စလည်း ပါဝင်ခဲ့သည်။

ကန်တို့၏ ဆောင်ရွက်ချက်များမှာ အငြင်းပွားဖွယ်များအဖြစ် တည်ရှိနေပြီး ပါလစ္စတိုင်းရှိ လွတ်လပ်ရေးကြိုးပမ်းသူ ဟားမားစ်အဖွဲ့ကိုလည်း အကြမ်းဖက် အဖြစ် အစဉ်အဆက် သမုတ်လာခဲ့သည်မှာ နှစ်များစွာ ကြာမြင့်ခဲ့ပြီဖြစ်သည်။