ယနေ့မွတ်စလင်မ်ထု၏ လိုအပ်ချက် ကွက်လပ်များကို ဖြည့်ပေးလာနိုင်သော သောကြာနေ့ တရားများ

ရန်ကုန်တိုင်းဒေသကြီး၊ မြောက်ဥက္ကလာပမြို့နယ် ဘုန်းကြီးလမ်းမှတ်တိုင်အနီးရှိ ဗလီကြီးမှာ မြောက်ဥက္ကလာနှင့် မြောက်ဒဂုံမြို့တခြမ်းရှိ မွတ်စလင်မ်အများ လာရောက် ဆွလာဟ်ဝတ်ပြုကြရာ အဓိကနေရာဖြစ်သည်။ ယနေ့မတ်လ (၃၀)ရက်နေ့ ဂျုမုအဟ်နေ့၊ နေ့လည် ၁၂း၁၅တွင် ဗလီ၏ ရှေ့ဆောင်အီမာမ်ဆရာ မုဖ်သီဂျမီးလ်က တရားစဟောပါသည်။ တရား၏ အဓိကအနှစ်ချုပ်မှာ အသေးအမွှားလေးတွေပဲ ဆိုပြီးလျစ်လျူမရှုသင့်ကြောင်း၊ တမန်တော်မြတ်(ဆွ)သည် ထိုအသေးအမွှားလေးများမှ စပြီး ဂရုစိုက်ကြောင်း၊ ထို့ကြောင့် အစ္စလာမ်တွင် အသေးအမွှားလေးဖြစ်စေကာမူ တရားတော်က သွန်သင်ထားသည့် အတိုင်းလိုက်နာကျင့်သုံးသင့်ကြောင်း၊ ထိုသို့လိုက်နာခြင်းဖြင့် အလ္လာ့ဟ်ထံတော်ပါးမှလည်း ဆဝဗ်ရမည်ဖြစ်ကြောင်းတို့ဖြစ်ပါသည်။

ထို့နောက်ဆက်လက်ပြီး မုဖ်သီကြီးက ဆက်လက် ဟောကြားသည်မှာ ဒီနေ့ မတ်လ (၃၀)ရက်နေ့သည် ပါလက်စတိုင်းနေ့ဟူ၍ သမိုင်းမှာ အခိုင်အမာရှိကြောင်း၊ ပါလက်စတိုင်းမှ မွတ်စလင်မ်များသည် ကျူးကျော်စော်ကားမှုကို အကြီးအကျယ်ခံစားနေရကြောင်း၊ ဗိုင်သုလ်မုကဒတ်စ် အလ္လာဟ့်အိမ်တော်ကြီးမှာလည်း ဆွဲယူသိမ်းပိုက်ခံထားရကြောင်း၊ ကမ္ဘာ့အရေးနှင့်ပတ်သက်၍ အနည်းငယ် တီးခေါက်မိသူများ ထိုကျူးကျော်စော်ကားမှုကို သိနိုင်ကြောင်း၊ မိမိကိုယ်တိုင်ပင် သတင်းများမှတဆင့် ပါလက်စတိုင်းပြည်သူတို့၏ ဝမ်းနည်းဖွယ်ဖြစ်ရပ်များကို ကြည့်ဖူးကြောင်း၊ ထိုဖြစ်ရပ်မှာ ပါလက်စတိုင်းတို့၏ အိမ်များကို ဘူဒိုဇာမြေထိုးစက်ကြီးများဖြင့် ထိုးဖျက်နေသည်ကို ပါလက်စတိုင်း သမီးငယ်လေးတစ်ဦးမှာ ဝမ်းနည်းစွာရပ်ကြည့်နေသည့် ဖြစ်ရပ်ဖြစ်ကြောင်း၊ မိမိအနေဖြင့် ရင်ထဲတွင် လွန်စွာမှ မကောင်းကြောင်း၊ နှလုံးရောဂါရှိသည့်လူများကြည့်မိလျှင် ရောဂါတိုးမည်ဟုပင် မိမိထင်မှတ်ကြောင်း၊ မိမိတို့အနေဖြင့် ယနေ့အချိန်တွင် ဒိုအာလုပ်ရုံမှတပါး မတတ်နိုင်ကြောင်း၊ သို့ဖြစ်၍ ပါလက်စတိုင်းမွတ်စလင်မ်တို့ဘဝ ငြိမ်းချမ်းသာယာရန်နှင့် ဗိုင်သုလ်မုကဒတ်စ် အလ္လာဟ့်အိမ်တော်ကြီး မွတ်စလင်မ်အမျိုးသားတို့လက်သို့ ပြန်လည်ရောက်ရှိလာရန် တစ်ဦးချင်းအနေဖြင့်လည်းကောင်း ဂျမအသ်အနေဖြင့်လည်းကောင်း ဒိုအာလုပ်ကြစေလိုကြောင်း ဆုံးမတိုက်တွန်းသွားပါသည်။

ဝန်ခံချက်။ ။ မြောက်ဥက္ကလာဗလီ ဂျမအသ်သားတစ်ဦး၏ မျှဝေချက်မှ