ဒီဇင်ဘာ ၇၊ အားကစားသတင်းများ

ဒီဇင်ဘာ ၇၊ ၂၀၁၃
M-Media

–  လာမည့် ဇန်န၀ါရီအပြောင်းအရွှေ့တွင် အသင်းအား ပိုမိုတောင့်တင်းအောင် ဆောင်ရွက်သွားမည်ဟု မန်ယူနည်းပြ ဒေးဗစ်မိုယက်စ်က ပြောကြားခဲ့သည်။ မိုယက်စ်မှာ ပြီးခဲ့သည့် နွေရာသီအပြောင်းအရွှေ့က ဘာကာကွင်းလယ်လူ ဖာဘရီဂတ်စ်အား ခေါ်ယူရန် ကြိုးစားခဲ့သော်လည်း ခေါ်ယူနိုင်ခြင်းမရှိခဲ့ဘဲ အဲဗာတန်ကွင်းလယ်လူ ဖယ်လိုင်နီကိုလည်း အပြောင်းအရွှေ့နောက်ဆုံးရက်မှ ခေါ်ယူနိုင်ခဲ့ခြင်းဖြစ်သည်။ မန်ယူအသင်းမှာ ပရီးမီးယားလိဂ်တွင် ရလဒ်များဆိုးဝါးနေပြီး ကစားသမား ဖြည့်တင်းရန် လိုအပ်နေသောကြောင့် မိုယက်စ်က ထိုကဲ့သို့ ပြောကြားလိုက်ခြင်းဖြစ်သည်။

…………………………….

–  နည်းပြ ဒေးဗစ်မိုယက်စ်၏ သမီးဖြစ်သူ လော်ရန်မိုယက်စ်နှင့် ပက်သက်မှုများရှိနေပြီး၊ လော်ရန်နှင့် ချိန်းတွေ့ခဲ့သောကြောင့် မိုယက်စ်က အသင်းတွင် ထည့်သွင်း အသုံးပြုခြင်းမရှိခြင်း ဖြစ်ကြောင်း သတင်းများထွက်ပေါ်လာပြီးနောက် မန်ယူကွင်းလယ်ကစားသမား ၀ီလ်ဖရိဒ်ဇာဟာက ထိုသတင်းမှာ မဟုတ်မှန်ဘဲ လော်ရန်ကို တွေ့ပင်မတွေ့ဖူးကြောင်း၊ မိမိအားပါဝင်ကစားရန် အဆင့်သင့်ဖြစ်သည်ဟု နည်းပြကယူဆသောအချိန်တွင် အသင်းတွင် ပါဝင်ကစားမည်ဖြစ်ကြောင်း ၎င်း၏ Twitter စာမျက်နှာတွင် ရှင်းလင်းရေးသားခဲ့သည်။

အသက် ၂၁ နှစ်အရွယ်ရှိ ဇာဟာအား နည်းပြဟောင်း ဖာဂူဆန်လက်ထက်က ခရစ္စတယ်ပဲလေ့စ်မှ ပေါင် ၁၅ သန်းဖြင့်ခေါ်ယူထားခဲ့သူဖြစ်ပြီး ယခုအချိန်အထိ အသင်းတွင် ပုံမှန်ကစားခွင့်မရသေးပေ။
……………………………….

–   ယခုနှစ်ရာသီတွင် အမှားအနည်းငယ်သာပြုလုပ်ထားသည့် အာဆင်နယ်အသင်းမှာ ဇယားထိပ်တွင်ရောက်ရှိနေမှုမှာ ထိုက်တန်ကြောင်း ချယ်ဆီးအသင်းနည်းပြ မော်ရင်ဟိုက ပြောဆိုခဲ့ပြီး၊ ချန်ပီယံဖြစ်မဖြစ်ကို မေလမှသာ ဆုံးဖြတ်နိုင်မည်ဖြစ်ကာ ဒီဇင်ဘာလတွင် မဟုတ်ကြောင်း သတိပေးခဲ့သည်။ အာဆင်နယ်အသင်းမှာ ယခုအချိန်တွင် ဒုတိယနေရာ၌ ရှိနေသည့် ချယ်ဆီးအသင်းအား ၄ မှတ်ဖြတ်ထားနိုင်သော်လည်း ယခုလအတွင်း ယှဉ်ပြိုင်ရမည့် ပွဲကျပ်များကြောင့် အမှတ်လျော့နိုင်ခြေ လည်းရှိနေသည်။ ထို့ပြင် ဦးဆောင်သူ အာဆင်နယ်နှင့် ၁၂ မှတ်ကွာဟနေသော်လည်း မိုယက်စ်၏ မန်ယူအသင်းမှာ ချန်ပီယံဆုအား ခြိမ်းခြောက်နိုင်စွမ်း ရှိနေသေးသည် ဟု မော်ရင်ဟိုက ထပ်လောင်း ပြောကြားခဲ့သည်။
…………………………..

–  ဒဏ်ရာကြောင့် ၁ လနီးပါး အနားယူနေခဲ့ရသည့် တိုက်စစ်မှူးဗန်ပါစီမှာ ယမန်နေ့ကပြုလုပ်ခဲ့သည့် အသင်း၏ လေ့ကျင့်ခန်းအစီအစဉ်တွင် အပြည့်အ၀ပါဝင်ခဲ့သည်။ ထို့နောက် ယနေ့တွင် အသင်း ဆေးအဖွဲ့၏ တာဝန်ရှိသူများနှင့်တွေ့ဆုံမည်ဖြစ်ပြီး ဒဏ်ရာအခြေအနေအား စစ်ဆေးမည်ဟု သိရသည်။
……………………………………

–  ဗိုလ်စွဲရန် ရေပန်းစားနေသည့် အိမ်ရှင် ဘရာဇီးအသင်းအား ရှုံးထွက်အဆင့်တွင်ရှောင်ရှားနိုင်ရန် ဟော်လန်အနေဖြင့် အုပ်စု ထိပ်ဆုံးရောက်အောင် ကြိုစားရမည်ဟု ဟော်လန်ကွင်းလယ်လူ ရော်ဘင်က ပြောကြားခဲ့သည်။ ဟော်လန်အသင်းမှာ ကမ္ဘာ့ဖလားအုပ်စု B တွင် လက်ရှိချန်ပီယံ စပိန်၊ ချီလီ၊ သြစတေးလျတို့နှင့် တစ်အုပ်စုတည်းကျရောက်နေပြီး နောက်တစ်ဆင့် တက်ရောက်ရေးအတွက် ရုန်းကန်ရမည်ဖြစ်သည်။
………………………………..

–  ၁၉၉၈ ခုနှစ် အမိမြေ၌ ကမ္ဘာ့ဖလားကိုင်မြှောက်ခွင့်ရခဲ့ခြင်းမှာ မိမိ၏ ကစားသမားဘ၀ သက်တမ်းတစ်လျှောက် အလွန်လှပ၍ အရေးပါသော အောင်မြင်မှုဖြစ်သည်ဟု ပြင်သစ်အသင်း၏ ဂန္တ၀င်ကစားသမားဖြစ်သူ ဇီဒိန်းကပြောကြားလိုက်သည်။ ထိုကမ္ဘာ့ဖလားပွဲ အုပ်စုပွဲစဉ်ဖြစ်သည့် ဆော်ဒီအသင်းနှင့် ကစားခဲ့သည့်ပွဲတွင် အသင်းမှာ အုပ်စုမှ ထွက်ရလုနီးပါး ဖြစ်ခဲ့သော်လည်း ဘရာဇီးအသင်းအား ၃ ဂိုး ဂိုးမရှိဖြင့် နိုင်ရရှိခဲ့သော ဗိုလ်လုပွဲတွင် အရေးပါသော ဂိုး ၂ ဂိုးကို ဇီဒိန်းက သွင်းယူပေးခဲ့သည်။ ထို့ပြင် ယခုလက်ရှိ ပြင်သစ်အသင်းမှာ ၉၈ ကမ္ဘာ့ဖလားရရှိခဲ့သည့် ပြင်သစ်အသင်းထက် ပိုမိုသာလွန်ရန် မျှော်လင့်နေသော်လည်း ဘရာဇီး၏ အိမ်ရှင်ဖြစ်မှုက အဆုံးအဖြတ်နိုင်သည်ဟု ပြောကြားခဲ့သည်။
…………………………………

– ကမ္ဘာ့ဘောလုံးအဖွဲ့ချုပ် ဖီဖာက ၂၀၁၇ ခုနှစ်တွင် ကျင်းပပြုလုပ်မည့် အသက် ၁၇ နှစ်အောက် လူငယ်ကမ္ဘာ့ဖလားပြိုင်ပွဲအား အိန္ဒိယတွင် ကျင်းပရန်နှင့်၊ ၂၀၁၆ ခုနှစ် ၁၇ နှစ်အောက် အမျိုးသမီးကမ္ဘာ့ဖလားပြိုင်ပွဲအား ဂျော်ဒန်နိုင်ငံတွင်ကျင်းပရန် ရွေးချယ်ခဲ့သည်ဟု သိရသည်။ ယမန်နေ့ကပြုလုပ်ခဲ့သည့် အဆိုပါရွေးချယ်မှုပြီးနောက် ဖီဖာဥက္ကဌ ဆပ်ဘလတ္တာက ထိုဆုံးဖြတ်မှုမျာ နိုင်ငံရေး၊ ပထ၀ီရေးနှင့်ဆိုင်သော ဆုံးဖြတ်ချက်ဖြစ်သည်ဟု ပြောကြားခဲ့သည်။
……………………………

–  ကမ္ဘာ့ ကားမောင်းအဖွဲ့ချုပ် FIA က ပေးအပ်ချီးမြှင့်သည့် ထူးခြားပြောင်မြောက်သော သတင်းရယူမှုအတွက် အကောင်းဆုံး ရုပ်သံလိုင်းဆု (Best TV Broadcaster Award for Outstanding Coverage) အား Sky Sports F1 ရုပ်သံလိုင်းက ဆွတ်ခူးရရှိသွားခဲ့သည်။ ထိုဆုအား ယမန်နေ့ညက ပဲရစ်တွင်ပြုလုပ်ခဲ့သည့် ၂၀၁၃ ခုနှစ် FIA ၏ ဆုပေးပွဲအခမ်းအနားတွင် ပေးအပ်ခဲ့ခြင်းဖြစ်ပြီး Sky Sports F1 မှာ ယမန်နှစ်ကလည်း ထိုဆုအား ရရှိခဲ့သည်။
……………………………

ကမ္ဘာ့ဖလားပြိုင်ပွဲ မဲခွဲမှုအပေါ် နည်းပြများ၏ မှတ်ချက်များ

၂၀၁၄ ဘရာဇီးလ် ကမ္ဘာ့ဖလားပြိုင်ပွဲအတွက် မဲခွဲမှုကို ယမန်နေ့က ဘရာဇီး နိုင်ငံတွင်ပြုလုပ်ခဲ့ရာ အိမ်ရှင် ဘရာဇီးလ်အသင်းမှာ အုပ်စုချောင်နေပြီး၊ အင်္ဂလန်၊ အီတလီတို့ ပါဝင်သည့် အုပ်စု D နှင့် ဂျာမနီနှင့် ပေါ်တူဂီတို့ ပါဝင်သည့် အုပ်စု G တို့အား မရဏအုပ်စုအဖြစ် သတ်မှတ်ခဲ့ကြသည်။ ယခုနှစ်တွင်မှ ပထမဦးဆုံး အကြိမ် ခြေစစ်ပွဲ အောင်ခဲ့သည့် ဘော့စနီးယား-ဟဇီဂိုဗီနာအသင်းမှာ အာဂျင်တီးနား၊ အီရန်တို့နှင့် တစ်အုပ်စုတည်း ကျရောက် နေသည်။ အုပ်စုမဲခွဲမှုများပြီးဆုံးခဲ့ပြီးနောက် ပါဝင် ယှဉ်ပြိုင်မည့် အသင်းများမှ နည်းပြများ၏ မှတ်ချက်များမှာလည်း ထွက်ပေါ်လာခဲ့သည်။

“အဖွင့်ပွဲစဉ်ကို ကျွန်တော်တို့ ဂရုစိုက်ရပါမယ်။ ပြီးတော့ ပွဲတိုင်းကို နောက်ဆုံး အခွင့်အရေးပဲလို့ သဘောထားပြီး ကစားရပါမယ် ” (စကိုလာရီ – ဘရာဇီး နည်းပြ)

“ဒီမနက်ကပဲ ငါတို့ ဟော်လန်အသင်းနဲ့ ကျလိမ့်မယ်လို့ ကျွန်တော်ပြောခဲ့ပါ သေးတယ်။ အခုတော့ ဒီလို ဖြစ်လာပါပြီ။ အဖွင့်ပွဲမှာကန်ရမှာပါ။ ဟော်လန်ကို ကျွန်တော်တို့ အကောင်းဆုံးပုံစံနဲ့ ကစားရပါလိမ့်မယ်” (ဒဲလ်ဘော့စကေး-စပိန်နည်းပြ)

လက်ရှိချန်ပီယံ စပိန်အသင်း၏မှ အဖွင့်ပွဲစဉ်အဖြစ် ဒုတိယသုံးကြိမ်ရရှိခဲ့သည့် ဟော်လန်အသင်းနှင့် ယှဉ်ပြိုင်ကစားရမည်ဖြစ်သည်။

“အုပ်စုကြပ်ဆိုသာ သံသယဖြစ်စရာမလိုပါဘူး၊ အီတလီနဲ့ ဥရုဂွေးပါနေတဲ့ အတွက် ကျွန်တော်တို့ အုပ်စုမှာ နိုင်ခြေအမြင့်ဆုံးရှိတဲ့ အသင်းနှစ်သင်း ရှိနေသလိုပါပဲ” (ရွိုင် ဟဒ်ဆန်- အင်္ဂလန်နည်းပြ)

“ဒါဟာ မရဏအုပ်စုဖြစ်ပြီး၊ ခက်ခဲတဲ့အုပ်စုတစ်ခုပါ။ ကျွန်တော်တို့ (ဘရာဇီးကို) သွားရမယ့်ခရီးဟာ ဝေးတဲ့အတွက် ပူပန်မိပါတယ်။ အင်္ဂလန်နဲ့ ပွဲကတော့ တကယ့်ကိုအရေးကြီးမှာပါ။” (ပရန်ဒယ်လီ-အီတလီနည်းပြ)

ဂျာမနီအသင်းမှာ အုပ်စုတွင်အမေရိကန်အသင်းနှင့်တွေ့ဆုံရမည်ဖြစ်ပြီး အမေရိကန်အသင်း၏ နည်းပြမှာ ယခင်ဂျာမန်နည်းပြဟောင်း ကလင်းစမန်း ဖြစ်သည်။ ဂျာမနီနည်းပြ ဂျိုအာချင်းလိုမှာ တစ်ချိန်က ကလင်းစမန်း၏ လက်အောက်တွင် လက်ထောက်နည်းပြအဖြစ် တာဝန်ထမ်းဆောင်ခဲ့ဖူးသည်။

“ဒါဟာ ဘောလုံးလောကရဲ့ရူးနှမ်းတဲ့ ဇာတ်လမ်းတွေထဲက တစ်ခုပါပဲ” ဟု ဂျာမနီအသင်းနှင့် ရင်ဆိုင်ရမည်ကိုရည်ညွှန်း၍ ကလင်းစမန်းက ပြောကြား ခဲ့ပြီး ဂျိုအာချင်းလိုကမူ “မိတ်ဆွေဟောင်းတွေပြန်တွေ့ကြမှာပါ” ဟု မှတ်ချက်ပေးခဲ့သည်။

“ကျွန်တော်တို့ မရဏအုပ်စုမှာမပါတဲ့အတွက် ကျေနပ်မိပါတယ်။ ပြီးတော့ ကျွန်တော်တို့ ခရီးဝေးလည်းသွားစရာမလိုပါဘူး” (အဲလက်စ် စဘယ်လာ- အာဂျင်တီးနား နည်းပြ)

အာဂျင်တီးနားအသင်းမျာ ၁၉၇၈နှင့် ၁၉၈၆ ခုနှစ်များတွင် ကမ္ဘာ့ဖလားအား ဆွတ်ခူးရရှိထားပြီး အဖွင့်ပွဲစဉ်တွင် ဘော့စနီးယားအသင်းနှင့် ယှဉ်ပြိုင်ကစားရမည်ဖြစ်သည်။

“ကျွန်တော်တို့အတွက် ကောင်းမွန်တဲ့အုပ်စုပါပဲ။ အာဂျင်တီးနားဟာ ကမ္ဘာ့ အင်အားကြီးအသင်းပါ။ ဒါပေမယ့် အီရန်နဲ့ ဘော့စနီးယားတို့ကိုလည်း အထင် သေးလို့ မရပါဘူး” (ဒန်နီယဲလ် အေမိုကာချီ- နိုက်ဂျီးရီယားလက်ထောက် နည်းပြ)

“မဲခွဲမှုအတွက်ကျေနပ်ပါတယ်။ အခြား အုပ်စုတစ်ချို့မှာ ပိုတောင့်တင်းတဲ့ အသင်းတွေပါဝင်ပါတယ်။ ဘယ်လ်ဂျီယံက လက်ရှိအချိန်မှာ ဥရောပရဲ့ အတောင့်တင်းဆုံးအသင်းတွေထဲက တစ်ခုပါ” (ကာပယ်လို – ရုရှားနည်းပြ)

Ref : Channelnewsasia