ဒီဇင်ဘာ ၁၂ အားကစားသတင်းများ

ဒီဇင်ဘာ ၁၂၊ ၂၀၁၃
M-Media

– ယမန်နေ့ညက အေစီမီလန်အသင်းနှင့် ချန်ပီယံလိဂ်ပွဲစဉ်မတိုင်မီ အေဂျက်အသင်း ပရိတ်သတ်သုံးဦးမှာ ဓားထိုးခံခဲ့ရပြီး တစ်ဦးမှာ စိုးရိမ်ရသော အခြေအနေတွင်ရှိနေသည်ဟု အီတလီရဲတပ်ဖွဲ့က သတင်းထုတ်ပြန်ခဲ့သည်။ မီလန်သို့ရောက်ရှိနေသည့် အေဂျက်ပရိတ်သတ်များမှာ မီလန်ပရိတ်သတ်များ၊ အီတလီအစိုးရအား ဆန့်ကျင် ဆန္ဒပြသူများနှင့် ခိုက်ရန်ဖြစ်ပွားခဲ့ပြီး ထိုကဲ့သို့ ဓားဖြင့် အထိုးခံခဲ့ရခြင်းဖြစ်သည်။

…………………………..
– ယခင်က လက်တွဲဖူးသည့် တိုက်စစ်မှူးဟောင်း ဒီဒီယာဒရော့ဘာအား စတမ်းဖို့ဘရစ်ခ်ျသို့ ပြန်လာစေချင်သည့်တွက် ချန်ပီယံလိဂ် ရှုံးထွက်အဆင့်တွင် ဂါလာတာစာရေးနှင့် တွေ့ဆုံချင်သည်ဟု ချယ်ဆီးနည်းပြ မော်ရင်ဟိုကပြောဆိုလိုက်သည်။ ဂါလာတာစာရေးမှာ ယမန်နေ့ညက ကစားခဲ့သည့် အုပ်စုနောက်ဆုံးပွဲစဉ်တွင် ဂျူဗင်တပ်စ်အသင်းအား အနိုင်ကစားနိုင်ခဲ့ပြီးနောက် အုပ်စုဒုတိယနေရာဖြင့် နောက်တစ်ဆင့်သို့ တက်ရောက်နိုင်ခဲ့ပြီး ချယ်ဆီးအသင်းမှာလည်း အုပ်စု ပထမဖြင့် နောက်တစ်ဆင့်သို့ တက်ရောက်နိုင်ခဲ့သောကြောင့် ၎င်းတို့နှစ်သင်းမှာ နောက်တစ်ဆင့်တွင် တွေ့ဆုံနိုင်သည့် အခွင့်အရေးရှိနေသည်။

……………………………….
– မက်ဆီ၏နေရာတွင် ကစားခဲ့သည့် တိုက်စစ်မှူး နေးမာမှာ မိမိအား အံအားသင့်စေခဲ့သည့်ဟု ဘာစီလိုနာအသင်း၏ နည်းပြဖြစ်သူ မာတီနိုကပြောကြားခဲ့သည်။ ယခုနှစ်ဘောလုံးရာသီကမှ ဘာစီလိုနာသို့ ရောက်ရှိလာသည့် နေးမာမှ ရာသီအစတွင် အသင်း၌ပါဝင်ရန် ရုန်းကန်ခဲ့ရသော်လည်း နောက်ပိုင်းတွင်ခြေစွမ်းပြလာနိုင်ခဲ့ကာ ယနေ့နံနက်က ကစားခဲ့သည့် ဆဲလ်တစ်အသင်းအား ၆ ဂိုး ၁ ဂိုးဖြင့် အနိုင်ရရှိခဲ့သည့်ပွဲတွင် ၁၄ မိနစ်အတွင်း အသင်းအတွက် ပထမဆုံး ဟက်ထရစ် သွင်းယူနိုင်ခဲ့သည်။ ထို့ကြောင့် နေးမာမှာ တောင်အမေရိက ချန်ပီယံလိဂ် Copa Libertadoes နှင့် ဥရောပ ချန်ပီယံလိဂ် ပြိုင်ပွဲနှစ်ခုတွင် ဟက်ထရစ်သွင်းယူနိုင်ခဲ့သည့် ပထမဆုံး ကစားသမားဖြစ်လာခဲ့သည်။

………………………………
– ယနေ့နံနက်က ကစားခဲ့သည့် ချန်ပီယံလိဂ်ပွဲစဉ်တွင် ပြသခဲ့သည့် အသင်းသားများ၏ စွမ်းဆောင်ရည်အား အေဂျက်အသင်းနည်းပြဖြစ်သူ ဖရန့်ဒီဘိုအားက ချီးကျူးခဲ့သော်လည်း အေစီမီလန်အသင်းမှာ ဘောလုံးကစားနည်းအား ဆန့်ကျင်၍ ကစားခဲ့သည်ဟု  ပြောကြားခဲ့သည်။ ထိုပွဲတွင် မီလန်အသင်းမှာ အချိန်အလွန်အကျွံဆွဲကာ ကစားခဲ့မှုကို ရည်ညွှန်းပြောကြားခဲ့ခြင်းဖြစ်သည်။ ပွဲချိန် ၂၂ မိနစ် မွန်တိုလီဗိုအထုတ်ခံခဲ့ရပြီးနောက် မီလန်အသင်းမှာ ဂိုးမပေးရရေးကိုသာ အဓိကထားကစားသွားခဲ့ပြီးနောက် ဂိုးမရှိသရေကျသွားသည့်အတွက် အေစီမီလန်အနေဖြင့် နောက်တစ်ဆင့်သို့ တက်ရောက်သွားနိုင်ခဲ့သည်။

………………………
– အသင်းအနေဖြင့် ထိပ်ဆုံး ၄ သင်း စာရင်းဝင်နိုင်ရန်နှင့်ပက်သက်၍ ယခုအချိန်တွင် ပြောရန်စောနေသေးပြီး ဒီဇင်ဘာလအတွင်းဖြစ်လာမည့် အသင်း၏ပုံစံကသာ ချန်ပီယံလိဂ်ဝင်ရောက်ခွင့် ရနိုင်မည်လားဆိုသည်ကို ဆုံးဖြတ်လိမ့်မည်ဖြစ်ကြောင်း နယူကာဆယ်အသင်း၏ အလယ်တန်းကစားသမား ကာဘာယီက ပြောကြားခဲ့သည်။ နယူးကာဆယ်အသင်းမှာ နောက်ဆုံးကစားခဲ့သည် ၆ ပွဲတွင် ချယ်ဆီးနှင့် မန်ယူတို့ အပါအ၀င် ၅ ပွဲအနိုင်ကစားထားပြီး ကာဘာယီမှာလည်း အသင်းအတွက် ဂိုးများသွင်ယူပေးနိုင်ခဲ့သည်။
………………………

အာဆင်နယ်၊ အေစီမီလန်၊ ဒေါ့မွန်နှင့် ဂါလာတာစာရေးတို့ နောက်တစ်ဆင့် တက်ရောက်သွားခဲ့ကြသည့် ချန်ပီယံလိဂ် အုပ်စုနောက်ဆုံး ပွဲစဉ်များ

ယမန်နေ့က ဆီးနှင်းထူထပ်စွာကျမှုကြောင့် ရပ်ဆိုင်းခဲ့ရသည့် ဂါလာတာစာရေးနှင့် ဂျူဗင်တပ်စ်တို့ ပွဲစဉ်အပါအ၀င် ချန်ပီယံလိဂ် လက်ကျန်အုပ်စုများ၏ အုပ်စုနောက်ဆုံးပွဲစဉ်များကို ယနေ့နံနက်က ယှဉ်ပြိုင်ကစားခဲ့ကြသည်။

ဂါလာတာစာရေး ၁-၀ ဂျူဗင်တပ်စ်

ယမန်နေ့က ဆီးနှင်းထူထပ်စွာကျမှုကြောင့် ရပ်ဆိုင်းခဲ့ရပြီး ယနေ့နံနက်တွင် ပြန်လည်ကစားခဲ့သည့် ထိုပွဲတွင် မန်စီးတီးနည်းပြဟောင်း မန်စီနီကိုင်တွယ်သည့် ဂါလာတာစာရေးအသင်းမှာ အိမ်ကွင်းတွင် စနိုက်ဒါ၏ နောက်ကျသွင်းဂိုးဖြင့် အနိုင်ရရှိခဲ့ကာ ၁၆ သင်းအဆင့်သို့ တက်ရောက်နိုင်ခဲ့ပြီဖြစ်ပြီး၊ ဂျူဗင်တပ်စ်အသင်းမှာ အုပ်စု တတိယနေရာသာ ရရှိခဲ့ကာ ယူရိုပါလိဂ်တွင် ပါဝင်ယှဉ်ပြိုင်ရတော့မည်ဖြစ်သည်။

အုပ်စု E

ချယ်ဆီး ၁-၀ စတူအာဘူခါရက်
ရှော်လ်ကာ ၂-၀ ဘေဆယ်

ပြီးခဲ့သည့် အုပ်စုပွဲစဉ်က ဘေဆယ်အသင်းအား ရှုံးနိမ့်ခဲ့သော်လည်း စတမ်းဖို့ဘရစ်ခ်ျတွင် ကစားခဲ့သည့် ယခုပွဲတွင် ချယ်ဆီးအသင်းမှာ တိုက်စစ်မှူး ဒမ်ဘာဘား၏ ပထမပိုင်း ၁၀ မိနစ်သွင်းဂိုးဖြင့် အနိုင်ရရှိခဲ့ကာ အုပ်စုဗိုလ်ဖြင့်နောက်တစ်ဆင့်သို့ တက်ရောက်သွားပြီဖြစ်သည်။ ရိုမေးနီးယားကလပ် စတူအာဘူခါရက်မှာမူ ချက်ပီယံလိဂ်တွင် ၂၃ ပွဲဆက်တိုက် အနိုင်မရရှိခဲ့ဘဲ ချန်ပီယံလိဂ်သမိုင်းတစ်လျှောက် အရှည်ကြာဆုံး နိုင်ပွဲမရသည့်အသင်းအဖြစ် စံချိန်ဝင်သွားခဲ့ပြီဖြစ်သည်။

ဘေဆယ်အသင်းမှာ အနိမ့်ဆုံး သရေရလျှင်ပင် နောက်တစ်ဆင့်သို့ တက်ရောက်နိုင်သည့် အခွင့်အရေးရှိနေသော်လည်း ၃၁ မိနစ်တွင် အိုင်ဗန် အိုင်ဗန်နော့ဗ် အထုတ်ခံခဲ့ရခြင်းနှင့်အတူ အိမ်ရှင်ရှော်လ်ကာအား အရှုံးပေးခဲ့ရသည်။ ရှော်လ်ကာအသင်းအတွက် နောက်တစ်ဆင့်တက်ရောက်စေမည့် ဂိုးများကို ၅၁ မိနစ်တွင် ဂျူလီယံ ဒရက်စလာနှင့် ၅၇ မိနစ်တွင် ဂျိုးလ်မာတစ်တို့က အသီးသီး သွင်းယူပေးခဲ့ခြင်းဖြစ်သည်။
…………………………….
အုပ်စု F

နာပိုလီ ၂-၀ အာဆင်နယ်
မာဆေးလ် ၁-၂ ဒေါ့မွန်

ဘင်နီတက်ဇ်၏ နာပိုလီအသင်းမှာ ယခုပွဲတွင် အနိုင်ရရှိအောင် ကစားနိုင်သော်လည်း ဂိုးကွာခြားချက်ကြောင့် နောက်တစ်ဆင့်သို့ တက်ရောက်နိုင်ခဲ့ခြင်းမရှိခဲ့ဘဲ ယူရိုပါလိဂ်ဝင်ခွင့်ဖြင့်သာ ကျေနပ်ခဲ့ရသည်။ ၃ ဂိုးပြတ်ဖြင့်အနိုင်ရရှိရန် လိုအပ်နေသည့် နာပိုလီအသင်းမှာ မိနစ် ၇၀ အထိ ဂိုးသွင်းယူနိုင်ခြင်းမရှိခဲ့ဘဲ ၇၃ မိနစ်တွင်မှ ဟီဂူအင်က ဂိုးသွင်းယူနိုင်ခဲ့ပြီ ဒုတိယပိုင်း နာကျင်အချိန်ပိုတွင် ကလ်လီဂျွန်းက ဒုတိယဂိုး သွင်းယူပေးခဲ့သည်။ အဆင်နယ်အသင်းမှာ ယခုပွဲရှုံးနိမ့်ခဲ့သော်လည်း အုပ်စုဒုတိယနေရာဖြင့် နောက်တစ်ဆင့်သို့တက်ရောက်သွားခဲ့ပြီး ၁၄ ရာသီဆက်တိုက် ချန်ပီယံလိဂ် ရှုံးထွက်အဆင့်သို့ တက်ရောက်နိုင်ခဲ့ခြင်းလည်းဖြစ်သည်။

အဝေးကွင်းတွင်ကစားရသော်လည်း ဒေါ့မွန်မှာ ကီဗင် ကရော့ဇ်ရက်ဇ်၏ ၈၇ မိနစ်သွင်းဂိုးဖြင့် နောက်တစ်သို့ တက်ရောက်နိုင်ခဲ့သည်။ ဦးဆောင်ဂိုးကို ဒေ့ါမွန်တို့က ပွဲအစ ၄ မိနစ်မှာပင် လီဝန်ဒေါ့စကီး၏သွင်ဂိုးဖြင့်ရရှိခဲ့သော်လည်း ၁၄ မိနစ်တွင် ဒီယာဝါရာက အိမ်ရှင်အတွက် ပြန်လည်ချေပခဲ့သည်။ ဒုတိယပိုင်းတွင် ဒေါ့မွန်အသင်းမှာ အခွင့်အရေးကောင်းများကို ရရှိခဲ့ပြီး အသုံးချနိုင်ခြင်းမရှိခဲ့ဘဲ ၈၇ မိနစ်တွင်မှ အနိုင်ဂိုးရရှိခဲ့ခြင်းဖြစ်သည်။ မာဆေးလ်အသင်းမှာ အုပ်စု ၆ ပွဲစလုံးတွင် တစ်ပွဲမှအနိုင်မရရှိခဲ့ပေ။
…………………………………
အုပ်စု G

အက်သလက်တီကို ၂-၀ ပေါ်တို
သြစတြီးယားဝီအန် ၄-၁ ဇင်းနစ်

နောက်ဆင့်သို့တက်ရောက်သွားခဲ့ပြီဖြစ်သော်လည်း အက်သလက်တီကိုမှာ အိမ်ကွင်းတွင် အနိုင်ကစားခဲ့ပြီး ချန်ပီယံလိဂ် ရှုံးပွဲမရှိမှတ်တမ်းကို ဆက်လက်ဆုပ်ကိုင်ထားနိုင်ခဲ့သည်။ ပေါ်တိုအသင်းမှာ ဂျိုဆူး၏ ၂၈ မိနစ်ပင်နယ်တီလွဲချော်မှုနှင့်အတူ ချန်ပီယံလိဂ် နောက်တစ်ဆင့်တက်ရေး အိပ်မက်မှာလည်း ပျက်ပြယ်သွားပြီဖြစ်သည်။ အိမ်ရှင်အတွက် ဂိုးများကို ၁၄ မိနစ်တွင် ရာအူးလ်ဂါစီယာကလည်းကောင်း၊ ၃၇ မိနစ်တွင် ဒီယေဂိုကော်စတာက လည်းကောင်း အသီးသီးသွင်းယူပေးခဲ့သည်။

ပြီးခဲ့သည့် အုပ်စုပွဲစဉ် ၅ ပွဲစလုံးတွင် တစ်ပွဲမှ အနိုင်မရရှိခဲ့သည့် ၀ီအန်အသင်းမှာ ယခုပွဲတွင် ဇင်းနစ်အား ဂိုးပြတ်ဖြင့်အနိုင်ရခဲ့သည်။ ဇင်းနစ်အသင်းမှာ ယခုပွဲရှုံးနိမ့်ခဲ့သော်လည်း ပေါ်တိုအသင်းမှာ အက်သလက်တီကိုကို ရှုံးနိမ့်သွားခဲ့သောကြောင့် အုပ်စုဒုတိယဖြင့် နောက်တစ်ဆင့်သို့ တက်ရောက်နိုင်ခဲ့သည်။ ဦးဆောင်ဂိုးကို ဇင်းနစ်က ၃၅ မိနစ်တွင် ကာဇာကော့ဗ်၏သွင်းဂိုးဖြင့်ရရှိခဲ့သော်လည်း ၀ီအန်က ပထမပိုင်းတွင် ၂ ဂိုး၊ ဒုတိယပိုင်းတွင် ၂ ဂိုး စုစုပေါင်း လေးဂိုး ပြန်လည်သွင်းယူနိုင်ခဲ့သည်။
………………………………….
အုပ်စု H

ဘာစီလိုနာ ၆-၁ ဆဲလ်တစ်
အေစီမီလန် ၀-၀ အေဂျက်

ပွဲစဉ် ၅ တွင် အေဂျက်အသင်းအား ရှုံးနိမ့်ခဲ့ပြီး ချန်ပီယံလိဂ် ပထမဆုံး ရှုံးပွဲတွေ့ခဲ့သည့် ဘာစီလိုနာအသင်းမှာ ယခုပွဲတွင် အိမ်ကွင်း နျူးကမ့်၌ မက်ဆီမပါဝင်နိုင်သော်လည်း ဘရာဇီးတိုက်စစ်မှူး နေးမာ၏ ဟက်ထရစ်သွင်းဂိုးအပါအ၀င် ဆဲလ်တစ်အသင်းအား ဂိုးပြတ်ခြေပြတ်ဖြင့်အနိုင်ရရှိခဲ့သည်။ ဂျရက်ပီကေးက ၇ မိနစ်တွင်အဖွင့်ဂိုးသွင်းယူပေးခဲ့ပြီး၊ ၃၉ မိနစ်တွင် ပက်ဒရိုက ဒုတိယဂိုးထပ်မံသွင်းယူခဲ့သည်။ ထို့နောက် ၄၄၊ ၄၈ နှင့် ၅၈ မိနစ်တို့တွင် နေးမာက ဟက်ထရစ်သွင်းယူနိုင်ခဲ့ပြီး ၇၂ မိနစ်တွင် တဲလ်လိုက ဆဌမမြောက်ဂိုးကို သွင်းယူခဲ့သည်။ ဆဲလ်တစ်အသင်းအတွက် နှစ်သိမ့်ဂိုးကို ၈၈ မိနစ်တွင်ရရှိခဲ့ပြီး ဆာမာရက်စ်က သွင်းယူပေးခဲ့သည်။

ပြီးခဲ့သည့်ပွဲစဉ်က ဘာစီလိုနာအသင်းအား အနိုင်ရရှိခဲ့သော အေဂျက်အသင်းမှာ ယခုပွဲအနိုင်ရလျှင် နောက်တစ်ဆင့်သို့တက်ရောက်နိုင်မည်ဖြစ်ပြီး၊ ပွဲချိန်အတော်တော်များများအား တစ်ယောက်အသာဖြင့် ကစားခဲ့ရသော်လည်း အနိုင်ကစားနိုင်ခြင်းမရှိဘဲ သရေတစ်မှတ်သာ ရရှိခဲ့သောကြောင့် ယူရိုပါလိဂ်ဝင်ခွင့်ဖြင့်သာ ကျေနပ်ခဲ့ရသည်။ ၂၂ မိနစ်တွင် မီလန်ကစားသမား မွန်တိုလီဗိုအထုတ်ခံခဲ့ရပြီးနောက် တစ်ပွဲလုံးကို အေဂျက်အသင်းကသာ စိုးမိုးထားနိုင်သော်လည်း အိမ်ရှင်အေစီမီလန်အသင်းမှာ ဂိုးမပေးရအောင် ထိန်းထားနိုင်ခဲ့သောကြောင့် အုပ်စုဒုတိယနေရာဖြင့် နောက်တစ်ဆင့်သို့ တက်ရောက်သွားခဲ့ပြီဖြစ်သည်။