အခြေခံဥပဒေပြင်ဆင်ဖို့ မြန်မာအစိုးရကို အီးယူနိုင်ငံတွေ အရေးဆိုမယ်

M-Media
ဒီဇင်ဘာ ၁၆ ရက်၊ ၂၀၁၃

အီးယူနိုင်ငံတွေက မြန်မာအတိုက်အခံခေါင်းဆောင် ဒေါ်အောင်ဆန်းစုကြည် သမ္မတ မဖြစ်နိုင်အောင် တားဆီးထားသော ပုဒ်မများပါဝင်သည့်  အခြေခံဥပဒေကို ပြင်ဆင်ဖို့ မြန်မာ အသွင်ပြောင်းအစိုးရ ကို တောင်းဆိုသွားမယ်လို့ နိုင်ငံတကာ သတင်းတွေက ဖော်ပြကြပါတယ်။

အီးယူဥက္ကဌနဲ့အတူတွေ့ရတဲ့ ဒေါ်အောင်ဆန်းစုကြည်

တနင်္လာနေ့ (ယနေ့) ၊ ဘလ်ဂျီယံနိုင်ငံ၊ ဘရက်ဆဲလ်မှာ အီးယူနိုင်ငံခြားရေးဝန်ကြီးတွေ တွေ့ဆုံတဲ့အခါ အဲဒီကိစ္စကို သတိပေးပြောဆိုသွားမှာ ဖြစ်တဲ့အကြောင်း၊ တကယ်လို့သာ လာမယ့် ရွေးကောက်ပွဲက လွတ်လပ်ပြီး တရားမျှတမှု မရှိဘူးဆိုရင်တော့ နိုင်ငံတွင်း မတည်ငြိမ်မှုတွေနဲ့ ဒီမိုကရေစီအသွင်ကူးပြောင်းမှုကိုပါ ပယ်ဖျက်လိုက် သလို ဖြစ်လာနိုင် တဲ့အကြောင်း အီးယူသံတမန်တွေက ဆိုပါတယ်။

မြန်မာ့အခြေခံဥပဒေကြောင့် ဒေါ်အောင်ဆန်းစုကြည်ဟာ သမ္မတဖြစ်ခွင့် မရှိပါဘူး။  မြန်မာအစိုးရရဲ့ အခြေခံဥပဒေ ပြင်ဆင်လိုစိတ် ရှိမရှိကိစ္စကတော့ အနောက်နိုင်ငံတွေ အတွက် စောင့် ကြည့်စရာဖြစ်နေသလို မြန်မာအစိုးရရဲ့ ပြုပြင်ပြောင်းလဲရေး လိုလားမှု စိတ်ဓာတ်အမှန်ကိုလည်း ဆန်းစစ်နိုင်မှာဖြစ်တယ်လို့ နိုင်ငံတကာသတင်းတွေက ဆိုပါတယ်။

ဘရက်ဆဲလ်မှာ ကျင်းပမယ့် တွေ့ဆုံဆွေးနွေးပွဲအတွက် လျာထားတဲ့ အကြောင်းအရာတွေကို Financial Times က တင်ပြရာမှာတော့ “ဒီဆွေးနွေးပွဲက မြန်မာ့အခြေခံ ဥပဒေကို ခေတ်ပေါ် ဒီမိုကရေစီစံနှုန်းတွေနဲ့ ကိုက်ညီမှုရှိလာအောင် ပြုလုပ်မယ့် အခြေခံဥပဒေ လေ့လာသုံးသပ်ရေးလုပ်ငန်းကို တွန်းအားပေးသွားမှာဖြစ်သလို၊ ငြိမ်းချမ်းရေးနဲ့ အမျိုးသားပြန်လည် သင့်မြတ်ရေးတွေ အောင်မြင်ပြီး တာရှည်ခံဖို့ အကူအညီပေးသွားမှာဖြစ်တယ်။” ဆိုတဲ့အချက်တွေ ပါဝင်ကြောင်း သိရပါတယ်။

ယူကေ ၀န်ကြီးချုပ် ဒေးဗစ်ကင်မရွန်းကတော့ လက်ရှိအခြေခံဥပဒေနဲ့ ကျင်းပမယ့် ရွေးကောက်ပွဲက ရယ်စရာပြဇတ်ပဲဖြစ်မှာလို့ အောက်တိုဘာလ အတွင်းက ဆိုခဲ့ဖူးပါတယ်။