ဒီဇင်ဘာ ၁၆ အားကစားသတင်း

ဒီဇင်ဘာ ၁၆၊ ၂၀၁၃
M-Media

– ကမ္ဘာ့ကလပ်ချန်ပီယံပြိုင်ပွဲဝင်ရန် ပြင်ဆင်နေသည့်အသင်းအနေဖြင့် ဒုတိယအကြိမ်မြောက်အဖြစ် ဖလားသုံးလုံးရနိုင်သည်ဟု ဘိုင်ယန်မြူးနစ် အသင်းကွင်းလယ်လူ ဖရန့်ရီဘာရီက ပြောကြားခဲ့သည်။ ဘိုင်ယန်မြူးနစ်အသင်းမှာ ယမန်နှစ်က ဖလားသုံးလုံးရရှိခဲ့ပြီး ယခုနှစ်တွင်လည်း အကောင်းဆုံး ပုံစံရရှိနေသည်။ ထို့ပြင် ရီဘာရီက မော်ရိုကိုတွင်ကစားမည့် ကမ္ဘာ့ကလပ်ချန်ပီယံပြိုင်ပွဲတွင် ဗိုလ်စွဲရန်မှာလည်း အသင်း၏ နောက်ဆုံး ပစ်မှတ်ပင် ဖြစ်သည်ဟု ထည့်သွင်းပြောကြားခဲ့သည်။

………………………….
– အသင်းအနေဖြင့် စီးရီးအေဖလားတွင်ဗိုလ်စွဲရန်နှင့် မိမိအနေဖြင့် စီးရီးအေတွင် ဂိုးအများဆုံးသွင်းသူ ဖြစ်လာရန် ပစ်မှတ်ထားနေသည်ဟု ဂျူဗင်တပ်စ်အသင်း၏ တိုက်စစ်မှူး ကားလို့စ်တီဗက်ဇ်က ပြောကြားခဲ့သည်။ ပြီးခဲ့သည့်တစ်ပါတ်က ဂါလာတာစာရေးအား ရှုံးနိမ့်ကာ ချန်ပီယံလိဂ်မှ ထွက်ခွာခဲ့ရပြီးနောက် ဂျုဗင်တပ်စ်အသင်းမှာ ယမန်နေ့က ကစားခဲ့သော စာစူလိုအသင်းနှင့် စီးရီးအေ ပွဲစဉ်တွင် ၄ ဂိုး ဂိုးမရှိဖြင့် အနိုင်ရရှိခဲ့ပြီး ထိုပွဲတွင် တီဗက်ဇ်မှာ ဟက်ထရစ် သွင်းယူနိုင်ခဲ့သည်။
……………………….
– စာချုပ်သစ်အတွက် အသင်းနှင့်ဆွေးနွေးလျက်ရှိပြီး လာမည့် ဇန်န၀ါရီတွင် အသင်းမှထွက်ခွာတော့မည်ဆိုသည့် သတင်းများကိုလည်း မငြင်းလိုကြောင်း အာဆင်နယ်အသင်း၏ နောက်ခံလူ ဆဂ်နာက ပြောကြားခဲ့သည်။ ဆဂ်နာ၏ စာချုပ်မှာ ယခုနှစ်ရာသီအကုန်တွင် ကုန်ဆုံးတော့မည်ဖြစ်သော်လည်း စာချုပ်သစ်ချုပ်ဆိုရန် ယခုအချိန်အထိ ဆွေးနွေးနေဆဲဖြစ်ပြီး ပြင်သစ် ရုပ်သံ Club du Dimanche သို့ပြောကြားရာတွင် အသင်းမှ ထွက်ခွာနိုင်ကြောင်း ဆဂ်နာက ၀န်ခံခဲ့သည်။
…………………………
– ယမန်နေ့က လီဗာပူးလ်အသင်းအား အိမ်ကွင်းတွင် ၅ ဂိုးပြတ်ဖြင့် အရှက်တကွဲရှုံးနိမ့်မှုကို မိမိအနေဖြင့် တာဝန်ယူကြောင်း စါပးအသင်း၏ နည်းပြဖြစ်သူ ဗီလာဘိုအာ့စ်က ပြေကြားခဲ့သော်လည်း အသင်းမှ ထွက်ခွာမည်မဟုတ်ဟု ဖွင့်ဟခဲ့သည်။ ထိုကဲ့သို့ရှုံးနိမ့်ခဲ့မှုမှာ အသင်းရှိ လူတိုင်းအတွက် ခက်ခဲပြီး ပရိတ်သတ်များက မိမိတို့ထက် ပိုမို ခံစားရကြောင်း သို့သော်လည်း မိမိတို့တွင် အကောင်းဆုံး ကစားသမားများရှိနေပြီး ယခုအခြေအနေမှ ရုန်းထွက်နိုင်မည်ဟု ယုံကြည်ကြောင်း ပွဲအပြီးတွင် ဘိုအာ့စ်က ပြာကြားခဲ့သည်။ ပြီးခဲ့သည့်လအတွင်းကလည်း စပါးအသင်းမှာ မန်စီးတီးအား အဝေးကွင်းအား ၆ ဂိုး ပြတ်ဖြင့်ရှုံးနိမ့်ခဲ့သည်။
……………………………
– အသင်းဖော် တိုက်စစ်မှူးဆွာရက်ဇ်မှာ ကမ္ဘာ့အကောင်းဆုံးကစားသမားဖြစ်သည်ဟု လီဗာပူးလ်အသင်း ကွင်းလယ်လူဂျရတ်က ပြောကြားခဲ့ပြီး အသင်းအနေဖြင့် ချန်ပီယံလိဂ် ၀င်ခွင့်မရခဲ့ပါက ဆွာရက်ဇ်အား ဆုံးရှုံးရမည်ဖြစ်ကြောင်းလည်း သတိပေးပြောဆိုခဲ့သည်။  ဆွာရက်ဇ်မှာ ယမန်နေ့ကကစားခဲ့သော စပါးအသင်းနှင့်ပွဲစဉ်တွင် အသင်းအတွက် ၂ ဂိုး သွင်းယူပေးခဲ့ပြီး ၂ ဂိုးဖန်တီးပေးခဲ့ကာ၊ နောက်ဆုံး ၁၁ ပွဲတွင် အသင်းအတွက် ၁၇ ဂိုးအထိ သွင်းယူပေးနိုင်ခဲ့ခြင်းလည်းဖြစ်သည်။
……………………………..
– ဖီဖာမှချီးပေးအပ်မည့် ကမ္ဘာ့အကောင်းဆုံး ဘောလုံးသမားဆု Ballon D’Or ဆု ချီးမြှင့်ပွဲအခမ်းအနားသို့ တက်ရောက်ရန်အတွက် မဆုံးဖြတ်ရသေးဟု ရီးယဲလ်မက်ဒရစ်တိုက်စစ်မှူး ခရစ္စတီယာနို ရော်နယ်ဒိုက ၀န်ခံပြောကြားခဲ့သည်။ ရော်နယ်ဒိုမှာ ဇကာတွင်စာရင်းတွင် မက်ဆီ၊ ရီဘာရီတို့နှင့်အတူ ပါဝင်နေသော်လည်း ၎င်းနှင့်ပက်သက်၍ ဖီဖာဥက္ကဌ ဆပ်ဘလတ္တာ၏ ယခုနှစ်အစောပိုင်းက ပေးခဲ့သောမှတ်ချက်ကို မကျေနပ်သောကြောင့် လာမည့် ဇန်န၀ါရီ ၁၃ ရက်နေ့တွင် ပြုလုပ်မည့် ဆုပေးပွဲအခမ်းအနားသို့ တက်ရောက်ရန် စဉ်းစားနေခြင်းဖြစ်သည်။