အခြေခံနိုင်ငံရေးသိပ္ပံစာအုပ်မိတ်ဆက်ပွဲ နှင့် လက်ပံတောင်းဒေသခရီးစဉ်အကြောင်း စာနယ်ဇင်းရှင်းလင်း

ဒီဇင်ဘာ ၁၈-၂၀၁၃
M-Media
သီရိ

ရန်ကုန်  ။       ။       နိုင်ငံရေးအကျဉ်းသားဟောင်းများအင်အားစုမှ ရန်ပုံငွေ အဖြစ် ထုတ်ဝေခဲ့သော အခြေခံနိုင်ငံရေးသိပ္ပံ စာအုပ်မိတ်ဆက်ပွဲနှင့် လက်ပံတောင်း ဒေသသို့ သွားရောက်ခဲ့သည့် ခရီးစဉ်အကြောင်း စာနယ်ဇင်းရှင်းလင်းပွဲကို ဒီဇင်ဘာလ ၁၈-ရက် နေ့တွင် မြန်မာဂျာနယ်လစ်ကွန်ရက်ရုံးတွင် ပြုလုပ်ခဲ့သည်။

သတင်းစာရှင်းလင်းပွဲတွင် နိုင်ငံရေးအကျဉ်းသားဟောင်းများ အင်အားစုမှ အမှုဆောင်တစ်ဦးဖြစ်သူ ကိုရဲထွဋ်ခေါင်မှ “အခြေခံ နိုင်ငံရေးသိပ္ပံ စာအုပ်ထုတ်ရခြင်းရဲ့ ရည်ရွယ်ချက်ကတောုံ့တစ်နိုင်ငံလုံးမှာပြန့်ကြဲနေတဲ့ နိုင်ငံရေးအကျဉ်းသားဟောင်းတွေကို ခရီးစဉ်တိုင်းမှာပြန်လည်စုစည်းနိုင်ရန် အတွက် ဖြစ်ပါတယ်။ နိုင်ငံရေးအကျဉ်းသားဟောင်းတွေနဲ့ပတ်သက်လာရင် ကျန်းမာရေး၊ ပညာရေး နိမ့်ကျနေတဲ့ စိတ်ပိုင်းဆိုင်ရာ ကျဆင်းမှုတွေကို မြှင့်တင်ပေးဖို့ရည်ရွယ်ချက်နဲ့ ဒီစာအုပ်ကိုထုတ်ဝေတာဖြစ်ပါတယ်။ ထိုစာအုပ်ကို စာရေးဆရာဦးမောင်မောင်လေးမှရေးသားခဲ့ပြီး ဦးမောင်မောင်လေးကွယ်လွန်သွားတဲ့အခါ သူရဲ့မိသားစုကို ခွင့်တောင်းခဲ့ပြီး စာအုပ်ထုတ်ဝေခဲ့ပါတယ်။ အခု အုပ်ရေ ၁၀၀၀ စတင်ထုတ်ဝေခဲ့ပြီး ယနေ့စတင်ထုတ်ဝေမှာ ဖြစ်ပါတယ်။ ကျွန်တော်တို့က ဒီစာအုပ်ကိုထုတ်ဝေပြီး ရန်ပုံငွေရှာမယ် ပြီးရင် နိုင်ငံရေးအကျဉ်းသားဟောင်းတွေရဲ့ကျန်းမာရေးနှင့်ပတ်သက်တဲ့ ဆေးဝါးကုသမှု၊ ဘ၀အခက်အခဲများကို ကူညီဖြေရှင်းပေးပါမယ်။ လွန်ခဲ့တဲ့ရက်က နိုင်ငံတော်သမ္မတကို စာတင်ထားပါတယ်။ လွှတ်တော်မှာ နိုင်ငံရေးအကျဉ်းသားဟောင်းတွေကို ကော်မတီတစ်ရပ်ဖွဲ့ပေးဖို့ပေါ့။ အဲဒီကော်မတီကမှ တစ်ဆင့် နိုင်ငံရေးအကျဉ်းသားတွေရဲ့ စိတ်ပိုင်းဆိုင်ရာ ရုပ်ပိုင်းဆိုင်ရာတွေကိုမြှင့်တင်ပေးဖို့ ကျွန်တော်တို့တင်ထားပါတယ်။ အနယ်နယ်မှ ပညာဆက်လက် သင်ကြားခွင့် မရှိတဲ့လူတွေ၊ ကျန်းမာရေး၊ လူမှုရေး အဖက်ဖက်မှနိမ့်ကျနေတဲ့လူတွေကို စာအုပ်ရောင်းရတဲ့ငွေနဲ့ တတ်နိုင်သလောက်ကူညီပေးသွား မှာပါ”ဟု ရှင်းလင်းပြောကြားခဲ့ပါတယ်။

ထို့နောက် လက်ပံတောင်း ခရီးစဉ်နဲ့ ပက်သက်ပြီး “နိုင်ငံရေးအကျဉ်းသားဟောင်းများအဖွဲ့မှ လက်ပံတောင်းသို့ချီတက်ခဲ့ကြပါတယ်။ ကျွန်တော်တို့ သွားရတဲ့ ရည်ရွယ်ချက်ကတော့ ဒေသခံပြည်သူတွေနဲ့ အနီးကပ်ထိတွေ့ပြီး သူတို့ဖြစ်နေတာတွေကို မျက်မြင်လေ့လာဖို့ဖြစ်ပါတယ်။ နိုင်ငံရေးအကျဉ်းသားပေါင်း ၅၆ ယောက် နဲ့ ခရီးစဉ်ကိုသွားခဲ့ကြပါတယ်။ ကျွန်တော်တို့ အင်းကြင်းတောင်သပိတ်စခန်းကို သွားခဲ့ကြတယ် အဲဒီမှာ နိုင်ငံရေးအကျဉ်းသားဟောင်းဖြစ်သူ ဆရာတော်ကြီးများကဦးစီးဆောင်ရွက်နေပါတယ်။” ဟု ၎င်းက ဆက်လက်ပြောကြားခဲ့သည်။

ဒေသအခြအနေနှင့် ပက်သက်၍ စေ့စပ်ညှိနှိုင်းမှုမရှိဘဲ ကြမ်းဖက်ဖြိုခွင်းကြောင်း၊ ထိုဒေသတစ်ဝိုက်တွင်း ကင်းလှည့်လျှင်လည်း လက်နက်များကို ကိုင်ဆောင် ကင်းလှည့်ကြောင်း၊ ဒေသခံများအတွက် ဆောက်ပေးထားသည့် အိမ်များမှာလည်း ကျွန်း၊ ပျဉ်းကတိုး စသည့်သစ်များဖြင့်မဆောက်ပေးဘဲ ရိုးရိုးသစ်များဖြင့် ဆောက်လုပ်ပေးခြင်းကြောင့် ပူပြင်းသည့် ထိုဒေသနှင့် ကိုက်ညီမှုမရှိကြောင်း၊ ဒေသခံများက ပြောကြားခဲ့ပြီး၊ ဒေါ်အောင်ဆန်းစုကြည်၏ လက်ပံတောင်း အစီရင် ခံစာမှာလည်း လုံးဝ မှားယွင်းနေပြီး ဒေသခံများကလည်း ဒေါ်အောင်ဆန်းစုကြည်အား အယုံအကြည်မဲ့နေကြောင်းတို့ကို ထည့်သွင်းပြောကြားသွားခဲ့ပြီး၊ ထိုစီမံကိန်းအား လုပ်ခွင့်ရသည့် ၀မ်ပေါင်ကုမ္ပဏီကလည်း ဒေသခံများအား မောက်မာစွာ ဆက်ဆံကြောင်း စသဖြင့် လက်ပံတောင်းဒေသသို့ သွားရောက်ရာမှ ကြုံတွေ့ခဲ့ရသည့် အခြေအနေများကိုလည်း ပြောကြားခဲ့သည်။

ထို့နောက် မီဒီယာမှမေးမြန်းသည်များကိုဖြေကြားခဲ့ပြီး အခမ်းအနားကို နေ့လည် ၂-နာရီတွင် ရုပ်သိမ်းခဲ့ပါသည်။