တိုင်းရင်း မွတ်စလင် ကလောင်ရှင်များ အသင်း (မြန်မာနိုင်ငံ) ဖြစ်မြောက်ရေး ကော်မတီဖြင့် ကြိုးစားမည်

ဒီဇင်ဘာ ၂၃၊ ၂၀၁၃
M-Media
အမ်တူးအေ

ရန်ကုန် ။       ။           စာပေရေးရာများကို ဆောင်ရွက်နေကြသည့် မြန်မာပြည်ဖွား မွတ်စလင်များ စုစည်း၍ စာပေရေးရာများကို ဆောင်ရွက်နိုင်ရန် တိုင်းရင်းမွတ်စလင် ကလောင်ရှင်များအသင်း (မြန်မာနိုင်ငံ) ဖြစ်မြောက်ရေး ကော်မတီ တစ်ရပ်ကို ယနေ့ မနက်ပိုင်းက ရန်ကုန်မြို့တွင် ဖွဲ့စည်းလိုက်သည်။

၎င်း တိုင်းရင်း မွတ်စလင် ကလောင်ရှင်များ အသင်း (မြန်မာနိုင်ငံ) ဖြစ်မြောက်ရေးကော်မတီ ဥက္ကဌ ဖြစ်သူ ပသီဦးကျော်ဦးအား အဖွဲ့နှင့် ပတ်သက်၍ မေးမြန်းခဲ့ပါသည်။

ကလောင်ရှင်များအသင်း (မြန်မာနိုင်ငံ) ဖြစ်မြောက်ရေးကော်မတီ ဖွဲ့စည်းရခြင်း ရည်ရွယ်ချက်ကို မေးမြန်းရာမှာ “ခုနက ဒေါက်တာအောင်ဇော် လည်း ပြောသွားပါတယ်။ အစ္စလာမ်ဘာသာဝင် စာရေးဆရာတွေရဲ့ စုစည်းမှုတွေ ရှိခဲ့တယ်။ အဲ့ဒီ စာရေးဆရာကြီးတွေ ပူးပေါင်းပြီး စာဆိုတော်နေ့တွေ၊ စာပေရေးရာတွေ လုပ်ခဲ့တယ်။ အဓိက ရည်ရွယ်ချက်ကတော့ ပြန့်ကြဲနေတဲ့ စာပေသမားတွေ တစ်နေရာတည်းမှာ တစ်စုတစ်စည်းထဲ ဖြစ်သွားဖို့ရယ် အများအတွက် လိုအပ်တဲ့ ကိစ္စရပ်တွေကို စာပေရှုထောင့်ကနေ လုပ်ဆောင်သွားဖို့ရယ်ဆိုတဲ့ ရိုးရိုးရှင်းရှင်း ရည်ရွယ်ချက်ကလေးနဲ့ စတင်လိုက်တာပါ။ ဖြစ်မြောက်ရေး ဖြစ်တဲ့အတွက် ရည်ရွယ်ချက်တွေကို သတ်သတ်မှတ်မှတ် မလုပ်ရသေးပါဘူး။ ဒါပေမယ့် ရည်ရွယ်ချက်တွေကတော့ အများကြီး ရှိထားပါတယ်။ အဲ့ဒါကို ရည်ရွယ်ချက်ဆိုတဲ့ စကားလုံးမသုံးပဲနဲ့ ကဗျာဆရာတွေ လည်းပါတော့ အိပ်မက်ဆိုတဲ့ စကားလုံးလေး သုံးလိုက်ကြတယ်။”လို့ ဥက္ကဋ္ဌဖြစ်သူ ပသီဦးကျော်ဦးက ဖြေကြားခဲ့ပါတယ်။

ယနေ့ဖွဲ့စည်းလိုက်ခြင်းဟာ ဖြစ်မြောက်ရေးကော်မတီ သက်သက် ဖြစ်ခြင်းလား၊ ကလောင်ရှင်များအသင်းဟု အတည်အဖြစ် သတ်မှတ်မည်လားဟု မေးမြန်းမှုအား ၎င်းကပင် “အဖွဲ့အစည်းတွေ ဖွဲ့တဲ့အခါမှာ တစ်ခါတည်းဖွဲ့လိုက်ရင် နေရာက စကားပြောပါတယ်။ နောက်မှ ၀င်လာတဲ့ သူတွေအတွက်လည်း ဖွင့်ထားပါတယ် ဆိုတာ ဖြစ်ချင်တယ်။ ကိုယ်တွေဘက်က မူသေယူထားပြီးမှ တကယ်အလုပ်လုပ်မယ့်သူ၊ ထိုက်တန်တဲ့သူတွေ ပါဝင်လာစေဖို့အတွက် ဖြစ်မြောက်ရေးကိုပဲ လုပ်တာပါ။ ဒီကော်မတီက တစ်ပြည်လုံးက ကလောင်ရှင်တွေ ပါဝင်စေဖို့ လုပ်ဆောင်သွားမှာပါ။ စာပေသမားတွေအနေနဲ့ အခွင့်အရေးရှိခဲ့ရင် စာပေညီလာခံ တစ်ခု လုပ်ဆောင်ပါမယ်။ စာပေညီလာခံပြီးတဲ့နောက်မှာတော့ ဒီဖြစ်မြောက်ရေး ကော်မတီက ပျက်ပြယ်သွားမှာပါ။ လောလောဆယ် အခုမှ စရတာဖြစ်တဲ့အတွက် ညီလာခံက ဘယ်တော့ ဖြစ်မလဲဆိုတာတော့ သေချာ မပြောနိုင်သေး ပါဘူး။ နောက်ပြီး ခေတ်ကာလ အရ တော်တော်စဉ်းစဉ်းစားစားလုပ်ရတဲ့အပိုင်းလည်း ရှိပါတယ်။ ဖြစ်နိုင်ရင်တော့ နယ်တွေအလိုက် ဖြစ်မြောက်ရေးကော်မတီလေးတွေနဲ့ လုပ်ဆောင်ချင်ပါတယ်။”ဟု ပြောကြားပါတယ်။

လတ်တလောအခြေအနေတွင် ဖြစ်မြောက်ရေးကော်မတီအနေဖြင့် စာပေညီလာခံတစ်ခု ဖြစ်မြောက်ရေးကို ရည်ရွယ်ထားသည်လား ဆိုသည့်မေးခွန်းအား “မြန်မာတစ်နိုင်ငံလုံးမှာရှိတဲ့ အစ္စလာမ်ဘာသာဝင် စာပေနဲ့ပတ်သက်တဲ့ ကလောင်ကိုင်ထားသူ အားလုံးရဲ့ ကိုယ်စားပြု အဖွဲ့အစည်းတစ်ခု ဖြစ်ဖို့ ရည်ရွယ်ပါတယ်။”လို့ ပသီဦးကျော်ဦးမှ ပင် ဖြေကြားခဲ့ပါတယ်။

ယခု ဖြစ်မြောက်ရေးကော်မတီလုပ်ဆောင်ရန် စတင်စဉ်းစားမိသည့် ရည်ရွယ်ချက်ကို ထပ်မံမေးမြန်းရာ –
“စာပေမြင့်မှ လူမျိုးမြင့်မည် ဆိုသည့် စကားက တော်တော်လေး ရိုးရှင်းပါတယ်။ ရိုးတယ်ဆိုသော်လည်း ဒီဆောင်ပုဒ်ကို သုံးနေကြတယ်ဆိုတော့ စာပေရဲ့ သြဇာ၊ စာပေရဲ့ အင်အား ဘယ်လောက်ကြီးတယ်ဆိုတာ သိတယ်။ စာပေဆိုတဲ့နေရာမှာ ကဏ္ဍတွေက တအားကြီးပါတယ်။ ကျွန်တော်တို့တွေရဲ့ ဘာသာတရားမှာကိုက စာပေက ပါထားပြီးသားဖြစ်လို့ ဒီအဖွဲ့အစည်းကို ဖွဲ့စည်းဖို့လုပ်ခဲ့တာပါ။ တစ်ဘက်ကလည်း ဘာသာရေးတစ်ခုတည်း သွားမယ်ဆိုရင် ခေတ်ကာလရဲ့ တောင်းဆိုချက်တွေကို မဖြည့်ဆည်းပေးနိုင်ဘူး။ တစ်ဘက်ကလည်း ဘာသာရပ် ဆိုင်ရာ ကျွမ်းကျင်မှုတွေနဲ့ တသီးပုဂ္ဂလ နေနေသူတွေရှိတယ်၊ နောက်တစ်ခါ အခု ပွင့်လင်းမှုနဲ့ပေါ်ထွက်လာတဲ့ မီဒီယာလောကက ဂျာနယ်လစ်တွေကိုလည်း စုစည်းမိစေချင်တယ်။ ဒီလို အားလုံးရဲ့ အင်အားကို ယူလိုက်တဲ့အခါ ဂျာနယ်လစ်ရယ်၊ ကဗျာဆရာရယ်လို့ မယူဆပဲ အားလုံးကို ကလောင်ရှင်လို့ ယူဆလိုက်တဲ့အတွက် ကလောင်ကိုင်ထားသူတွေ အားလုံးပါသွားမယ်။ အဲဒီအခါမှာ လိုချင်တဲ့ပန်းတိုင်ကို အင်နဲ့အားနဲ့ သွားနိုင်လိမ့်မယ်လို့ မျှော်လင့် ယုံကြည်လို့ လုပ်ဆောင်တာပါ။ စာပေဆိုတာ ဈေးကွက် ရှိရတယ်။ မြန်မာ မွတ်စလင်မှာက ဈေးကွက် ရှိထားတယ်။ ဒီဈေးကွက်အတွင်းမှာ ဘာအခက်အခဲရှိလဲဆိုတော့ စာက နည်းနည်း ပညာရပ်ဆန်တဲ့ စာလေးတွေကို ဒီအဖွဲ့က ထုတ်နိုင်အောင် ကြိုးစားမယ်။ ဒါက လူ့အဖွဲ့အစည်းတစ်ခုမှာ လိုအပ်တဲ့စာပေတွေ။ ဒါပေမယ့် စီးပွားဖြစ်ထုတ်ဖို့တော့ ခက်ခဲတယ်။ ဥပမာ အဘိဓါန်လိုမျိုး၊ စွယ်စုံကျမ်းလိုမျိုးတွေ ကျရင်တော့ ဒီအဖွဲ့က အင်အားရှိလာရင် လုပ်ဆောင်သွားမယ်။ သာမန်ကတော့ တစ်ဦးချင်း ကိုယ့်စာပေ ကိုယ်ရေးသားလို့ ရပါတယ်။”

တိုင်းရင်းမွတ်စလင် ကလောင်ရှင်များအသင်း အကယ်၍ ဖြစ်လာပြီးရင် မြန်မာနိုင်ငံမှာ အစ္စလာမ်ရေးရာနဲ့ပတ်သက်ပြီး သုံးနှုန်းနေတဲ့ အသုံးအနှုန်းအရေးအသား ကွဲပြားမှုများအား တစ်သတ်မှတ်တည်း ဖြစ်သွားအောင် လုပ်ဆောင်ဖို့ ရည်ရွယ်ချက်ရောရှိမလားဟု မေးမြန်းမှုအား “ဒီအကြောင်းက ကလောင်ရှင်များအသင်း စတင်တဲ့ ရည်ရွယ်ချက်မှာကိုပါပါတယ်။ သာမန်ကတော့ spelling လို့ ခေါ်ပါတယ်။ သတ်ပုံပေါ့။ အသံဖလှယ်တာကျတော့ transliteration လို့ခေါ်တယ်။ အဲ့ဒါ sentence တစ်ခုရှိရမယ်။ မြန်မာစာပေမှာ အစ္စလာမ့်စာပေရေးလာတာ နှစ်ပေါင်း ရာနဲ့ချီသွားပြီ။ အဲ့ဒါက အခုအချိန်မှာ အနည်ထိုင်သင့်ပြီ။ ဒီလို အနည်ထိုင်သင့်တဲ့အခါမှာ တစ်ဦးကောင်း တစ်ယောက်ကောင်းတဲ့ စာလုံးပေါင်း သတ်ပုံတွေကို လုပ်တာထက် စာပေသမားတွေ ပါဝင်တဲ့ အဖွဲ့အစည်းကနေ အစ္စလာမ့် စာပေရေးသားမှုတွေမှာ မြန်မာသတ်ပုံကို ၀ိုင်းဝန်းလုပ်ဆောင်ကြပြီး အများသဘောတူ သတ်ပုံတစ်ခု သတ်မှတ်လိုက်နိုင်တာ ပိုသင့်တော်ပါတယ်။ ။ ဖြစ်နိုင်ရင် စာပေတွေ မရေးခင်အောင် ဒီလို အသုံးအများဆုံး စကားလုံးတွေကို စာရင်းပြုစုပြီး သတ်ပုံအတူတူလေးဖြစ်စေချင်တာပါ။”

“ဟုတ်ကဲ့ ကျွန်တော်လည်း ကျေးဇူးတင်ပါတယ်။ ဘာများ ဖြည့်စွက်ပြောချင်ပါသလဲဆိုတော့ ကျွန်တော်တို့ အခု လုပ်ဆောင်တာက ကျွန်တော်တို့ လုပ်တတ်လို့လည်းမဟုတ်ဘူး။ အရည်အချင်းရှိလို့လည်း မဟုတ်ဘူး။ ၀ါသနာပါလို့လုပ်တာလို့ ပြောရင်လည်း လွဲတယ်။ ကျွန်တော်တို့ရဲ့ သမိုင်းတစ်ကွေ့မှာ ဒါဟာ တာဝန်တစ်ရပ် အဖြစ် ပေါ်လာတယ်။ တခြား လုပ်ဆောင်မယ့်သူမရှိသေးတဲ့အပေါ်မှာ ကြားဖြတ်ဝင်ရောက် ထမ်းဆောင်ပေးလိုက်ခြင်းဖြစ်တယ်။ ကျွန်တော်တို့အနေနဲ့ ဒီ ပလပ်ဖောင်းလေးတစ်ခု လမ်းလေးတစ်ခု ပီပီပြင်ပြင် ခိုင်ခိုင်မာမာလေးဖြစ်သွားအောင်က ဘေးကနေ စာပေအပေါ် သံယောဇဉ်ရှိသူတွေ၊ စာပေကို မြတ်နိုးသူတွေ အားလုံးရဲ့ အမြင်ကျယ်ကျယ် သဘောထားကြီးကြီးနဲ့ ပူးပေါင်းပါဝင်မှုအပေါ်မှာပဲ ကျွန်တော်တို့ရဲ့ ရှေ့ လုပ်ငန်းစဉ် အောင်မြင်မှုက ရှိနေပါတယ်။ ဒီလိုလည်း ပူးပေါင်းပါဝင်ပြီး တတ်နိုင်တဲ့ဘက်က ပါဝင်ကြဖို့ ကျွန်တော်အနေနဲ့ တိုက်တွန်းလိုပါတယ်။”ဟု ဆရာပသီဦးကျော်ဦးမှပင် ဖြေကြားပေးခဲ့ပါတယ်။

အဆိုပါ ဖြစ်မြောက်ရေးကော်မတီဖွဲ့စည်းရာတွင် စာရေးဆရာများဖြစ်သည့် ၀ါးခယ်မမောင်မင်းနိုင်၊ ဒေါက်တာ သန်းဝင်း(ရန်ကုန်တက္ကသိုလ်)၊ ဟာဖိဇ်ရဖီး၊ ပသီကျော်ဦး၊ ဒေါက်တာအောင်ဇော်၊ ကိုအင်းဝ၊ မောင်ရင်ဆု တို့အပါအ၀င် စာရေးသူ ၁၅-ဦးခန့် တက်ရောက် ခဲ့ကြပြီး ဖွဲ့စည်းရာတွင် မတက်ရောက်နိုင်သည့် စာပေနယ်မှ စာရေးသူများအပါအ၀င် စုစုပေါင်း ၂၂-ဦးပါဝင်သည့် ဖြစ်မြောက်ရေးကော်မတီတစ်ရပ်ကို ဖွဲ့စည်းခဲ့ကြပါသည်။