မန္တလေး ဧရာဝတီမြစ်ကမ်း ချော်ဆိပ်၌ သင်္ဘောတစ်စီးပေါက်ကွဲမှုဖြစ်

ဒီဇင်ဘာ ၂၇၊ ၂၀၁၃
M-Media
သုတ

မန္တလေး ။        ။   မန္တလေးမြို့၊ မဟာအောင်မြေမြို့နယ် ဧရာဝတီမြစ်ကမ်း ချော်ဆိပ်တွင် ရပ်ထားသော သင်္ဘောတစ်စီးမှ ယနေ့ နံနက် ၉း၁၅-နာရီ ၀န်းကျင်ခန့်က ပေါက်ကွဲမှုတစ်ခု ဖြစ်ပွားခဲ့ကြောင်း သတင်းရရှိသည်။

၎င်းပေါက်ကွဲမှုအရှိန်ကြောင့် သင်္ဘောကိုယ်ထည်နောက်ပိုင်း အမိုးနှင့် လွင့်စင်လာပြီး သင်္ဘောပေါ်မှ အပျက်အစီးအပိုင်းအစများလည်း ကမ်းပေါ် အထိ လွင့်စင်လာကြောင်း သိရသည်။

“အသံအကျယ်ကြီးကြားလိုက်ရပြီး ကျွန်မတို့ အိမ်တွေတောင် တုန်သွားတယ်။ ဘာဖြစ်မှန်း မသိလိုက်ကြတော့ လန့်သွားတယ်။ နောက် ကမ်းနားဘက် ကနေ အပိုင်းအစတွေ ကမ်းပေါ်ကို လွင့်စင်လာတာ။ သင်္ဘောရဲ့ နောက်ပိုင်း အမိုးကြီးတောင် လွင့်လာတယ်။ လူတွေလည်း သေမယ်ထင်တယ်။ လူနာတင်ကားတွေ တော်တော်များများ ရောက်လာတယ်။ ကမ်းပေါ် လွင့်စင်လာတဲ့အထဲမှာ အသားအပိုင်းစတွေရော၊ ဖိနပ်တွေရော တွေ့တယ်။
လူအသေအပျောက်တော့ ရှိလိမ့်မယ်။”ဟု ပေါက်ကွဲမှုအား မျက်မြင်တွေ့လိုက်ရသူ ချော်ဆိပ်အနီးနေထိုင်သည့် အမျိုးသမီးတစ်ဦးမှ ပြောပြပါတယ်။

“နေရာက ဧရာဝတီမြစ်ကမ်း၊ ချော်ဆိပ်ပါ။ နေပူရွာနဲ့ တည့်တည့်မှာပါ။ သင်္ဘောက ရေသေမှာလည်းသွားတဲ့ ဗိုက်ပြား သင်္ဘောပါ။ သင်္ဘောက မြောက်ဘက်ကို ဦးတည်ထားတယ်ဆိုတော့ အထက်ဆန်တက်မယ့် သင်္ဘောလို့ ယူဆရတယ်။ အထက်ပိုင်းကို အုတ်ထုံးသဲကျောက်ပို့တဲ့ သင်္ဘောပါ။ သင်္ဘောခါးကျိုးသွားတော့ အုတ်ထုံးသဲကျောက်တွေလည်း ရေထဲ မြှုပ်ကုန်ပြီ။ တင်ထားတဲ့ ကျောက်တုံးတွေလည်း ပေါက်ကွဲတဲ့အရှိန်ကြောင့် ကမ်းပေါ်ထိ လွင့်ပျံလာလို့ လူတချို့ထိတယ်လို့ သိရတယ်။ အခုထိတော့ လူ၃-ယောက် ပျောက်နေတယ်ပြောတယ်။ မီးသတ်ကားတွေ၊ လူနာတင် ကားတွေရော ရဲတွေရော ရောက်နေတယ်။ ဘာကြောင့် ပေါက်ကွဲမှုဖြစ်တယ်လို့တော့ မသိသေးပါဘူး”လို့ မန္တလေးမြို့ခံတစ်ဦးမှလည်း M-Media ကို ဆက်သွယ်ပြောပြလာပါတယ်။

အဆိုပါသဘောမှာ ကျောက်တုံးများ တင်ဆောင်လာပြီး ကမ်းနားတွင် ရပ်နားထားချိန် gas အိုး သို့မဟုတ် လေအိုးပေါက်ကွဲမှုကြောင့် ဖြစ်နိုင်သည်ဟု ခန့်မှန်းပြောဆိုမှုများ ရှိပြီး မည်သည်ကြောင့် ပေါက်ကွဲသည်ကို အတိအကျ မသိရှိရသေးပါ။

သင်္ဘောပေါက်ကွဲမှု ဓါတ်ပုံများ