အာဏာသိမ်း စစ်တပ်အစိုးရကို မကျေနပ်၍ အီဂျစ်ကျောင်းသားများ ဆန္ဒပြ

ဒီဇင်ဘာ ၂၉၊ ၂၀၁၃
M-Media

– အီဂျစ်နိုင်ငံသမိုင်းတွင် ပထမဆုံးအကြိမ် ဒီမိုကရေစီနည်းကျ ရွေးကောက်တင်မြှောက်ထားသော သမ္မတ မိုဟာမက် မော်စီအစိုးရကို ဇူလိုင်လအတွင်းက ဖြုတ်ချခဲ့ပြီးနောက် အာဏာသိမ်းထားသော စစ်တပ်ဦးဆောင်သည့် အစိုးရအား မကျေနပ်သောကြောင့် မွတ်စလင်ညီအစ်ကိုများအဖွဲ့ကို ထောက်ခံသူ အီဂျစ် တက္ကသိုလ်ကျောင်းသားများက ဆန္ဒပြခဲ့ကြသည်ဟု သိရသည်။

Al-Azhar တက္ကသိုလ်ပရ၀ုဏ်အတွင်း ယမန်နေ့က ဖြစ်ပွားခဲ့သည့် ထိုဆန္ဒပြမှုအား ရဲတပ်ဖွဲ့က နှိမ်နှင်းမှုကြောင့် ကျောင်းသား ၂ ဦးသေဆုံးခဲ့ပြီး အခြားလေးဦးမှာ ဒဏ်ရာရရှိခဲ့ကာ ၁၀၀ ကျော် အဖမ်းခံခဲ့ရသည်။ ကျောင်းသားများကလည်း တက္ကသိုလ်အတွင်းရှိ အဆောက်အဦးနှစ်ခုအား မီးရှိုမ်ဖျက်ဆီးခဲ့ကြသည်။

စစ်တပ်က အာဏာသိမ်းမှုဖြစ်ပွားပြီးနောက် အီဂျစ်နိုင်ငံအတွင်း မငြိမ်းသက်မှုများဖြစ်ပွားနေခဲ့ပြီး၊ ပြီးခဲ့သည့် သီတင်းပတ်က မွတ်စလင်ညီနောင်များအဖွဲ့အား အကြမ်းဖက်အဖွဲ့အဖြစ် အာဏာသိမ်းအစိုးရက ကြေညာခဲ့ပြီးနောက် ထိုအဖွဲ့ကို ထောက်ခံသူများက ဆန္ဒပြမှုများကို တိုးမြှင့်ပြုလုပ်ခဲ့ကြသည်။