ရန်ကုန်တက္ကသိုလ် ကျောင်းသားသမဂ္ဂ (တ.က.သ) ဖွဲ့စည်းခြင်း ၈၃-နှစ်မြောက် နှစ်ပတ်လည်နေ့

ဇန်နဝါရီလ ၉၊ ၂၀၁၄
ရေးသူ- စည်သူမောင်

၉.၁.၂၀၁၄ ရက်နေ့သည် တ.က.သ ဟုခေါ်သော ရန်ကုန် တက္ကသိုလ် ကျောင်းသား သမဂ္ဂ (တ.က.သ) စတင်ဖွဲ့စည်းခဲ့သည့် ၈၃-နှစ်မြောက်နှစ်ပတ်လည်နေ့ပဲဖြစ်ပါတယ်။ မြန်မာနိုင်ငံလွတ်လပ်ရေး မရခင်ကိုလိုနီခေတ်က အင်္ဂလိပ်အစိုးရသည် ရန်ကုန်တက္ကသိုလ် တည်ထောင်စကပင် ကျောင်းသားများနှင့် သက်ဆိုင်သည့် အသင်းအဖွဲ့တစ်ခုရှိ သင့်ကြောင်း ရည်ရွယ်ခဲ့ကြပြီး တ.က.သ အဆောက်အအုံဆောက်လုပ်ရန် အတွက် မြန်မာပြည်ဘုရင်ခံ ဆာဟာကုတ်ဘတ္တလာမှ ၁၉၂၆-ခုနှစ်တွင် သူဌေးဦးညိုဆီမှ ငွေသား ၁၇၀၀၀၀ (တစ်သိန်းခုနှစ်သောင်းကျပ်) အလှူခံပြီး ၁၉၂၇-ခုနှစ်တွင် ဘုရင်ခံကိုယ်တိုင် အုတ်မြစ်ချ၍ စတင်ဆောက်လုပ်ခဲ့ပါတယ်။

၁၉၃၀-ခုနှစ်မှာ တ.က.သ အဆောက်အအုံကြီးဟာ ပြီးစီးသွားပေမယ့် ကျောင်းသား သမဂ္ဂ မဖွဲ့ရသေးတဲ့အတွက် ရန်ကုန်တက္ကသိုလ်ကျောင်းသား ကိုကျော်ခင်၊ ကိုတင့်ဆွေ နဲ့ ကိုဘဂျမ်း စတဲ့ ကျောင်းသားများဟာ ရန်ကုန်တက္ကသိုလ် ကျောင်းသားသမဂ္ဂ ဖွဲ့စည်းနိုင်ရေးအတွက် တက္ကသိုလ် ဒုတိယ အဓိပတိ တရားသူကြီး ဦးဘနဲ့တွေ့ဆုံပြီး ရန်ကုန်တက္ကသိုလ်ကျောင်းသားသမဂ္ဂ စည်းမျည်းရေးဆွဲရေးကော်မတီ တစ်ရပ်ဖွဲ့စည်းနိုင်ရေးကိစ္စ ညှိနှိုင်းကာ သဘောတူညီမှု ရယူခဲ့ပါတယ်။

ထိုကော်မတီကပင် ၁၉၃၀ စက်တင်ဘာလ ၂၀-ရက်နေ့မှာ ရန်ကုန်တက္ကသိုလ်အားကစားရုံ အတွင်းမှာ ပြုလုပ်တဲ့ ကျောင်းသားထု အစည်းအဝေး တစ်ရပ်ကို ကျောင်းဆောင်နေ ကျောင်းသားကျောင်းသူများ နဲ့ ပြင်ပကျောင်းသားများ အားလုံးပါဝင်တဲ့ (ကျောင်းသားထု အစည်းအဝေးကြီး) တစ်ရပ် ပြုလုပ်ပြီး တ.က.သ စည်းမျဉ်းရေးဆွဲရေးကော်မတီ တစ်ရပ်ကို အဖွဲ့ဝင် ၁၂-ဦးနဲ့ ဖွဲ့စည်းခဲ့ပြီး တ.က.သ စည်းမျဉ်းရေးဆွဲရေး လမ်းညွန်အဖြစ် အခြေခံရမယ့် ရည်ရွယ်ချက် (၃) ရပ်ကို ကျောင်းသားထုမှ ဆုံးဖြတ်အတည်ပြု ပေးခဲ့ရာမှာ (၁) ကျောင်းသားများ အကြား တက်ကြွညီညွတ်သော ပူးပေါင်းဆောင်ရွက်မှု ရှိလာစေရေး၊ (၂) ပေါင်းသင်းဆက်ဆံရေးဘ၀ အခြေအနေများဖန်တီးရေး၊ (၃) လွတ်လပ်ရေးစိတ်ဓာတ်နှင့် တာဝန်သိစိတ်များ ဖန်တီးပေးရေး ဟူ၍ ဆွေးနွေးဆုံးဖြတ်ခဲ့ကြပါတယ်။

တ.က.သ စည်းမျဉ်းရေးဆွဲရေး ကော်မတီမှာ ပါဝင်ခဲ့ကြသူတွေ ကတော့ ကော်မတီဥက္ကဌ အဖြစ် ကိုကျော်ခင်၊ အတွင်းရေးမှုးအဖြစ် ကိုဘဂျမ်း၊ ကိုကျော်သိန်း၊ ကိုရာရှစ်၊ ကိုစံဖော်အောင် အပါအ၀င် စူစူပေါင်း ၁၂-ဦးနဲ့ ရေးဆွဲခဲ့ကြပါတယ် ။ တ.က.သ စည်းမျဉ်းရေးဆွဲရေး ကော်မတီဟာ ရေးဆွဲချိန်မှ စတင်ပြီး ကျောင်းသားထုဆီမှ အကြံပြုချက်များ သဘောထားများ တောင်းခံပြီး ဥပဒေပညာရှင်များနှင့် တိုင်ပင်ကာ ရန်ကုန်တက္ကသိုလ် ကျောင်းသားသမဂ္ဂ ရဲ့ ဖွဲ့စည်းပုံစည်းမျဉ်းကို အင်္ဂလန်ပြည်ရှိ အောက်စဖို့ဒ် တက္ကသိုလ် ကျောင်းသားသမဂ္ဂ၊ ကင်းဗရစ်ခ်ျ တက္ကသိုလ်ကျောင်းသားသမဂ္ဂမှ ဖွဲ့စည်းပုံ စည်းမျဉ်းများကို မှီငြမ်းပြီး ၁၉၃၁-ခုနှစ် ဇန်န၀ါရီလ (၉) ရက်နေ့ (စတင်ဖွဲစည်းသည့်နေ့) တွင် ကျောင်းသားထု အစည်းအဝေးကြီး ကျင်းပပြီး စည်းမျဉ်းကို အတည်ပြုခဲ့ပါတယ်။

၁၉၃၀-၃၁ တ.က.သ ရဲ့ယာယီ အလုပ်အမှုဆောင်အဖြစ် ဥက္ကဌ ကိုကျော်ခင် နဲ့ အတွင်းရေးမှုး ကိုရာရှစ်တို့က ဦးဆောင်ပြီး ရွေးကောက်ပွဲ ကျင်းပနိုင်ရေးအတွက် ဆက်လက်ပြင်ဆင်ခဲ့ပြီး ၁၉၃၁-၃၂ သက်တမ်း ရန်ကုန်တက္ကသိုလ် ကျောင်းသားသမဂ္ဂ (တ.က.သ) ရဲ့ပထမဆုံး ကျောင်းသား သမဂ္ဂ ရွေးကောက်ပွဲနဲ့ ရွေးချယ် တင်မြောက်ခံရသူအဖြစ် ဥက္ကဌ ကိုထွန်းစိန် ဖြစ်လာခဲ့ပါတယ်။ ထို့ကြောင့် ရန်ကုန်တက္ကသိုလ်ကျောင်းသားသမဂ္ဂ စတင်ဖွဲ့စည်းခဲ့ပြီး ဖွဲ့စည်းပုံ စည်းမျဉ်းကို ကျောင်းသားထုက လက်ခံအတည်ပြုပေးခဲ့တဲ့ ဇန်န၀ါရီလ (၉)ရက်နေ့ဟာ နယ်ချဲ့ဆန့်ကျင်ရေး အမျိုးသား လွတ်မြောက်ရေး လွတ်လပ်ရေးကြိုးပမ်းမှု သမိုင်းမှာ ထင်ရှားခဲ့တဲ့ တ.က.သ ရဲ့ ၈၃-နှစ်မြောက် နှစ်ပတ်လည်နေ့အား ဂုဏ်ပြုတဲ့အနေနဲ့ ကျနော်ဖတ်မှတ်ခဲ့ဖူးတဲ့ တ.က.သ သမိုင်းစာအုပ်များအား ကိုးကားပြီး ဂုဏ်ပြုရေးသားလိုက်ပါတယ်။

ကျောင်းသားရှိလျှင် ကျောင်းသားသမဂ္ဂ များရှိရမည်…..။

ကျောင်းသားသမဂ္ဂ ရှိလျှင် ကျောင်းသားသမဂ္ဂ အဆောက်အဦးများ ရှိရမည်။

၉.၁.၂၀၁၄
စည်သူမောင် (ရန်ကုန်စီးပွားရေးတက္ကသိုလ်ကျောင်းသားသမဂ္ဂ-တ.က.သ)