ပါလက်စတိုင်းပိုင် အနောက်ဘက်ကမ်း ဂျော်ဒန်တောင်ကြားရှိ ရွာတစ်ရွာအား အစ္စရေး ဖျက်ဆီးပြန်

ဇန်နဝါရီ ၊ ၁၀၊ ၂၀၁၄
M-Media

– အစ္စရေးက ပိတ်ဆို့ထားသည့် ပါလက်စတိုင်းပိုင် အနောက်ဘက်ကမ်း ဂျော်ဒန်တောင်ကြားရှိ ဗဒူအင်လူမျိုးများနေထိုင်သည့် ရွာတစ်ရွာကို အစ္စရေးစစ်တပ်က ဦးဆောင်ကာ ယမန်နေ့တွင် ဖြိုဖျက်ခဲ့သည်ဟု သိရသည်။

Ein Karzaliyah ခေါ်သည့် အဆိုပါရွာအား အစ္စရေးစစ်သားများက ဘူဒိုဇာများဖြင့် ၀င်ရောက်ခဲ့ပြီး တစ်ရွာလုံးအား ဖျက်ဆီးခဲ့သောကြောင့် ထိုရွာတွင်နေထိုင်သူ ၂၅ ဦးခန့် အိုးမဲ့အိမ်မဲ့ဖြစ်ခဲ့ရသည်။ ထို့ပြင် ထိုရွာသို့ သွယ်တန်းထားသည့် ရေပိုက်ကိုလည်း အစ္စရေးက ဖျက်ဆီးပစ်ခဲ့ပြီး၊ လူ့အခွင့်အရေးအဖွဲ့များ၊ မီဒီယာများကိုလည်း ထိုရွာအတွင်းသို့ ၀င်ရောက်ခွင့်မပေးခဲ့ပေ။

“ရွာသားတွေကတော့ အခုအချိန်မှာ တောင်ပေါ်တွေမှာ နေနေရပြီး အဲဒီနေရာကို အစ္စရေးက ပန်းခြံလုပ်မယ်လို့ ကြေညာခဲ့ပါတယ်။ ဒီဒေသကို ဗဒူအင်လူမျိုးမိသားစု တစ်ခုရဲ့ အမည် Karzaliyah ကိုအစွဲပြုပြီး Ein Karzaliyah လို့ မှည့်ခေါ်ခဲ့ကြတာပါ။ အခုတော့ အဲဒီမိသားစုရဲ့ ဘ၀တွေ ရိုက်ချိုး ဖျက်ဆီးခံလိုက်ရပါပြီ” ဟု လူ့အခွင့်အရေး အဖွဲ့ B’Tselem မှ အီယဒ် ဟက်ဒဒ်က ပြောကြားခဲ့သည်။

ကလေးငယ်အများအပြားပါဝင်သည့် အဆိုပါရွာသားများမှာ ယခုအချိန်တွင် မည်သည့်နေရာကိုမှ သွားစရာမရှိဘဲ သောက်သုံးရေနှင့် အကူအညီများပေးအပ်ခွင့်ကိုလည်း အစ္စရေးစစ်တပ်က တားမြစ်ထားသည်။ ဂျော်ဒန်တောင်ကြား၏ ၉၀ ရာခိုင်နှုန်းအား အစ္စရေးက ထိန်းချုပ်ထားပြီး၊ ထိုတောင်ကြားရှိ ရွာများအား ဖျက်စီးမှုမှာ ပါလက်စတိုင်း နယ်မြေများအတွင်း အစ္စရေး၏ တရားမ၀င် အိမ်ရာဆောက်လုပ်မှုအား ပိုမိုချဲ့ထွင်ရန် ဆောင်ရွက်ခြင်းလည်းဖြစ်သည်။

Ref: Press TV