အာဖရိက အကောင်းဆုံး ဘောလုံး ကစားသမားဆုအား ယာယာတိုးယေး သုံးနှစ်ဆက်တိုက် ရရှိ

ဇန်နဝါရီ ၊ ၁၀၊ ၂၀၁၄
M-Media

– မန်ချက်စတာ စီးတီးအသင်း ၏ ကွင်းလယ်လူ ယာယာတိုးယေးမှာ ၂၀၁၃ ခုနှစ် အာဖရိက အကောင်းဆုံး ဘောလုံးသမားဆုအား ဆွတ်ခူးရရှိခဲ့သည်ဟု သိရသည်။

ထိုဆုအား အာဖရိက ဘောလုံးအဖွဲ့ချုပ် CAF က ပေးအပ်ချီးမြှင့်ခြင်းဖြစ်ပြီး၊ အာဖရိကတိုက်ရှိ ဘောလုံးသမားများနှင့် နည်းပြများက မဲပေးရွေးချယ်ခဲ့ခြင်း ဖြစ်ကာ၊ ဆုပေးပွဲအခမ်းအနားကို ယမန်နေ့က နိုက်ဂျီးရီးယားနိုင်ငံ လာဂို့စ်မြို့တွင် ကျင်းပပြုလုပ်ခဲ့သည်။ တိုးယေးမှာ ထိုဆုအား ချယ်ဆီး ကွင်းလယ်လူ မီခေးလ်နှင့် ဂါလာတာစာရေးတိုက်စစ်မှူး ဒရော့ဂ်ဘာတို့ကို ကျော်ဖြတ်ကာ ရရှိခဲ့ခြင်းဖြစ်ပြီး သုံးနှစ်ဆက်တိုက် ရရှိခဲ့ခြင်းလည်းဖြစ်သည်။

အသက် ၃၀ အရွယ်ရှိ တိုးယေးမှာ ၂၀၁၃ ခုနှစ်အတွင်း မန်စီးတီးအသင်းနှင့် ဆုဖလားများ မရရှိခဲ့သော်လည်း ကမ္ဘာ့ဖလား ၀င်ခွင့် သုံးကြိမ်ဆက်ရရှိခဲ့သည့် အိုက်ဗရီကို့စ် အသင်းတွင် အကောင်းဆုံးခြေစွမ်းပြနိုင်ခဲ့သူဖြစ်သည်။ အဆိုပါဆုအား သုံးကြိမ်ဆက်ရရှိခဲ့မှုကြောင့် တိုးယေးမှာ ကင်မရွန်း တိုက်စစ်မှူး အီတူးနှင့် စံချိန်တူညီသွားပြီဖြစ်သည်။