မြန်မာ့ဝါးတွေကို ထိန်းသိမ်းဖို့လိုအပ်ကြောင်း ၀ါးချစ်သူများအဖွဲ့မှ ပြောကြား

ဇန်န၀ါရီလ ၁၁-၂၀၁၄
M-Media
သီရိ

ရန်ကုန်။          ။ မြန်မာနိုင်ငံ အစိမ်းရောင်ကွန်ယက်မှ ကြီးမှူးကျင်းပသည့် ၀ါးချစ်သူများအသင်း အခမ်းအနားကို ရန်ကုန်မြို့ ORCHID HOTEL တွင် နေ့လည် ၁ နာရီမှ နေလည် ၃ နာရီ ထိ ကျင်းပခဲ့ပါသည်။

ထိုအခမ်းအနားတွင် ၀ါးကိုချစ်သောသူများ တက်ရောက်ခဲ့ပြီး ၀ါးအကြောင်းများကို ပြောဆိုဆွေးနွေးခဲ့ကြပါသည်။ အခမ်းအနားသို့ တက်ရောက်လာသော အောင်ပင်လယ် လူမှု ၀န်းကျင် မဂ္ဂဇင်းမှ အယ်ဒီတာချုပ်၊ မြန်မာအစိမ်းရောင် ကွန်ယက် တာဝန်ခံ ဒေါ်ဒေ၀ီသန့်ဇင်မှ “မြန်မာပြည်မှာ ၀ါးဟာ တကယ်ကို တန်ဖိုးရှိတဲ့ အဖိုးတန် ကုန်ကြမ်းဖြစ်တယ်၊ အခုခေတ်လူတွေက ၀ါးတန်ဖိုးကိုသိပ် မသိကြတော့ဘူး နှမြောဖို့ကောင်းတယ်၊ လူတွေက ၀ါးကို ခုတ်ဖို့ပဲသိကြတယ်၊ စိုက်ဖို့မသိကြဘူး၊ ၀ါးတွေကို ဒီတိုင်း ဆက်ရောင်းနေမယ်ဆိုရင်တော့ နောက်မျိုးဆက်သစ်တွေက ၀ါးအကြောင်းကို သမိုင်းတွေမှာပဲ သိရတော့မယ့် အခြေနေဖြစ်နေပြီ၊  ပြည်တွင်း သယံဇာတတွေကို မပျောက်ဆုံးစေချင်ဘူး၊ ၀ါးတွေကို ထိန်းသိမ်းဖို့လိုအပ်နေပါပီ” ဟု မိတ်ဆက်စကားပြောကြားခဲ့ပါသည်။

ဆက်လက်ပြီး သစ်တောတက္ကသိုလ် ပါမောက္ခ ဒေါက်တာ ဆန်းဝင်းမှ အရည်အသွေးကောင်းမွန်တဲ့ ၀ါးတွေမှာ ရှားပါးနေပြီ ဖြစ်ပြီး ၀ါးကို အထူးစိုက်ပျိုးဖို့ လိုအပ်ကြောင်း၊ ၀ါး၏ အထူး အသုံးဝင်ပုံနှင့် ၀ါးကိုတန်ဖိုးထားတတ်သင့်ကြောင်း၊ ၀ါးနှင့်ပြုလုပ်ထားသည့် ပစ္စည်းများသည် တကယ် အနုပညာ လက်ရာ မြောက်ကြောင်း စသည်ဖြင့် ၀ါးနှင့် ပတ်သက်သည့် အသုံးဝင်ပုံများကို ရှင်းလင်းပြောကြားခဲ့ပါသည်။ ထို့နောက် ၀ါးချစ်သူများဖြစ်ကြသော ဦးအောင်ဇော်မိုး၊ ဦးအောင်စိုး၊ ဦးမန်းကိုကိုကြီး တို့မှလည်း ၀ါးနှင့်  ပတ်သက်သည့် ဗဟုသုတ ရဖွယ်များနှင့် ပညာများကို ရှင်းလင်းပြောကြားခဲ့ပါသည်။

အခမ်းနားတွင် ၀ါးနှင့် ပတ်သက်သည့် အနုပညာလက်ရာမြောက်သော ပစ္စည်းများကို ခင်းကျင်းပြသထားပြီး ၀ါးချစ်သူအသင်းဝင်များကို ဖိတ်ခေါ်လျက်ရှိပြီး  သဘာဝပတ်ဝန်းကျင် လုပ်ငန်းများကိုပြုလုပ်သွားမည် ဖြစ်ကြောင်း သိရပါသည်။