တောင်းဆိုမှု မရခဲ့ပါက ၀န်ကြီးချုပ်နှင့် ဝန်ကြီးများအား ဖမ်းဆီးမည်ဟု ထိုင်း အတိုက်အခံခေါင်းဆောင် ခြိမ်းခြောက်

ဇန်နဝါရီ ၁၄၊ ၂၀၁၄
M-Media

– အိမ်စောင့်အစိုးရ ၀န်ကြီးချုပ် ယင်းလပ်ရှင်နာဝပ်ထရာနှင့် ထိုင်းကတ်ဘိနတ် ၀န်ကြီးများအား ဖမ်းဆီးပြီး၊ ၎င်းတို့အနေဖြင့် ရာထူးမှ နှုတ်ထွက်ခြင်းမပြုပါက ထိန်းသိမ်းထားမည်ဟု အတိုက်အခံခေါင်းဆောင် ဆူသပ် သောင်ဆူဘန်က ယနေ့တွင် ခြိမ်းခြောက်ပြောဆိုလိုက်သည်။

ဘန်ကောက်မြို့ ဆန္ဒပြပွဲတစ်နေရာတွင် ဆန္ဒပြသူများအား ပြောကြားခဲ့ခြင်းဖြစ်ပြီး လာမည့် နှစ်ရက်၊ သုံးရက်အတွင်း အစိုးရအရာရှိများ၏ အိမ်များကို ၀ိုင်းထားရန်လည်း သောင်ဆူဘန်က ပြောကြားခဲ့သည်။ ထို့ပြင် ပြုပြင်ပြောင်းလဲရေး ပြည်သူ့ ဒီမိုကရေတစ် ကော်မတီ (PDRC) က အလိုရှိနေသည့် အိမ်စောင့်အစိုးရ နှုတ်ထွက်ရန် ကိစ္စအား ငြင်းဆန်ခဲ့ပါက PDRC အနေဖြင့် ယင်းလတ်နှင့် ကတ်ဘိနတ် ၀န်ကြီးများအား နေအိမ်များအား ပိတ်ဆို့ခြင်းဖြင့် ဆန္ဒပြမှုများကို အရှိန်မြှင့်သွားမည်ဖြစ်ပြီး၊ ထိုအချိန်တွင်လည်း လိုက်လျောမှုမရှိပါက ဆန္ဒပြသူများက ၎င်းတို့ကို ထိန်းသိမ်းသွားမည်ဟု ထပ်လောင်း ပြောကြားခဲ့သည်။

ယင်းလပ်အား နှုတ်ထွက်ရန် ဖိအားပေးသည့်အနေဖြင့် ဘန်ကောက်မြို့ပိတ်ဆို့ရေး အစီအစဉ်ကို သောင်ဆူဘန်ဦးဆောင်ကာ ယမန်နေ့ကစတင်ခဲ့ခြင်းဖြစ်သည်။ သို့သော်လည်း ယင်းလပ်ကမူ မနက်ဖြန်တွင်ပြုလုပ်မည့် ဖေဖော်ဝါရီရွေးကောက်ပွဲ ရွှေ့ဆိုင်းရေးကိစ္စဆွေးနွေးမှုတွင် ပါဝင်ရန် သောင်ဆူဘန်နှင့် အတိုက်အခံ ဒီမိုကရက်ပါတီအား တိုက်တွန်းထားသည်။