မပြည့်စုံတဲ့ လူတွေကို ပံ့ပိုးပေးတာဟာ ကောင်းမွန်တဲ့ အလုပ်ဖြစ်ကြောင်း နွယ်အေး ဗလီ သာရေး/နာရေး (၃) နှစ်ပြည့် အခမ်းအနားတွင် ရန်ကုန်မြို့တော်ဝန် ပြောကြား

နွယ်အေးစွန္နီဂျာမေဗလီကြီး၏ သာရေးနာရေး (၃) နှစ်ပြည့်အခမ်းနားပြုလုပ်

ဇန်န၀ါရီ ၁၉၊ ၂၀၁၄
M-Media
သီရိ

ရန်ကုန်တိုင်းဒေသကြီး အစိုးရအဖွဲ့ စည်ပင်သာယာရေးဝန်ကြီး ရန်ကုန်မြို့တော်ဝန် ဦးလှမြင့်

ရန်ကုန်  ။     ။       ရန်ကုန်တိုင်းဒေသကြီး ဒေါပုံမြို့နယ် နွယ်အေး ရပ်ကွက်ရှိ ရွှေနှင်းဆီလမ်း နွယ်အေး စွန္နီ ဂျာမေဗလီကြီးတွင် သာရေးနာရေး ဆပ်ကော်မတီမှ ဦးစီးကျင်းပသော နွယ်အေး သာရေးနာရေး (၃)နှစ်ပြည့် အခမ်းအနားကို ယနေ့ ဇန်န၀ါရီလ ၁၉-ရက်နေ့  နံနက် ၉-နာရီ၌ နွယ်အေး စွန္နီဗလီတွင် ပြုလုပ်ခဲ့သည်။

အခမ်းအနားကို ကုရ်အာန်ကျမ်းမြတ် မုက္ခပတ်တော် ရွတ်ဖတ်၍ နွယ်အေးရှေ့ဆောင် ဆရာမှ ဖွင့်လှစ်ခဲ့သည်။

၎င်းနောက် အခမ်းအနားသို့ တက်ရောက်လာသည့် ရန်ကုန်တိုင်းဒေသကြီး အစိုးရအဖွဲ့ စည်ပင်သာယာရေး ၀န်ကြီး ရန်ကုန် မြို့တော်ဝန် ဦးလှမြင့် က နှုတ်ခွန်းဆက် စကားပြောကြားရာတွင် ကမ္ဘာပေါ်ရှိ လူသား အားလုံးသည် ဘာသာစကား၊ နေထိုင်ရာဒေသ၊ ယဉ်ကျေးမှု ကွဲလွဲမှုရှိကြသော်လည်း လူသားအချင်းချင်း မပြည့်စုံတဲ့ အတွက် အကူအညီပေးရန် အသင်းအဖွဲ့များ လိုကြောင်း၊ လူမှုရေးကိစ္စတွေကို ကူညီဆောင်ရွက်နေသည့် နွယ်အေးဗလီ သာရေးနာရေး အဖွဲ့အားလည်း ကျေးဇူးတင်ကြောင်း၊ ရှေ့ဆက်ပြီး လူသားအကျိုးပြုလုပ်ငန်းများ လုပ်ဆောင်နိုင်ပါစေကြောင်းတို့ကို ပြောကြားခဲ့သည်။

“ဘာသာစကား၊ နေထိုင်ရာဒေသ၊ ယဉ်ကျေးမှုတွေ ကွဲလွဲနေပေမဲ့ ကမ္ဘာပေါ်မှာရှိတဲ့ လူသားတွေအားလုံးဟာ လူတွေပါပဲ။ လူသားအချင်းချင်း မပြည့်စုံတဲ့ လူတွေအတွက် အကူညီပေးဖို့ လိုအပ်ပါတယ်။ လူမှုရေးအသင်း အဖွဲ့တွေလိုပါတယ်၊ ဒီနွယ်အေးဂျာမေ ဗလီကြီးမှ အခုလို လူမှုရေးကိစ္စတွေကို
ကူညီဆောင်ရွက်နေတဲ့ အတွက် အထူးကိုပင် ကျေးဇူးတင်ပါတယ်၊ မပြည့်စုံတဲ့လူတွေကို ပံ့ပိုးပေးတာဟာ အထူးကိုပင်ကောင်းမွန်ပါတယ်၊ အခုလို လူမျိုးဘာသာမရွေး ကူညီစောင့်ရှောက်ပေးနေတဲ့ အတွက်လည်း ကျေးဇူးတင်ပါတယ်၊ ရှေ့ဆက်လဲဆောင်ရွက်မှုကိုပြုလုပ်နိုင်ပါစေ ” ဟု ၎င်းက ပြောကြားခဲ့သည်။

ထို့နောက် ပြည်ထောင်စု သမ္မတမြန်မာနိုင်ငံတော် အစ္စလာမ် သာသနာရေးရာ ကောင်စီမှ ဌာနချုပ် ဥက္ကဌ အလ်ဟာဂ်ျ ဦးညွန့်မောင်ရှိန် မှလည်း (၃) နှစ်ပြည့် အခမ်းနားသို့ ချီးကျူးဂုဏ်ပြု အမှာစကားပြောကြား ခဲ့သည်။

နွယ်အေးစွန္နီဂျာမေ ဗလီကြီးတွင် တည်ရှိသော သာရေးနာရေး ဆပ်ကော်မတီသည် ဒေါပုံမြို့နယ်ရှိ လူမျိုး ဘာသာမရွေး သာရေးနာရေးတွင် လိုအပ်သော ကူညီမှုများကို အစဉ်မြဲ ကူညီဆောင်ရွက်လျက်ရှိပါသည်။ သာရေးနာရေး သာမက ဆင်းရဲနွမ်းပါးသည့် သက်ကြီး ရွယ်အိုများကိုလည်း ဆေးဝါး ကူညီ ဆောင်ရှောက်မှုများ၊  အာဟာရဝေငှမှုများကို ပြုလုပ်လျက်ရှိပါသည်။ ပညာသင်ရန် အခက်ခဲဖြစ်နေသည့် ကလေးငယ်များကိုလည်း လိုအပ်သော ထောက်ပံ့မှုများကို လည်း ပြုလုပ်ပေးလျှက်ရှိပါသည်။ လူမှုရေး၊ ကျန်းမာရေး၊ ပညာရေး စသည့် ကူညီမှုများကို လူမျိုးဘာသာမရွေး ဆောင်ရွက်လျက် ရှိနေကြောင်း သိရပါသည်။

ထို့နောက် တက္ကသိုလ်ဝင်တန်းတွင် ဂုဏ်ထူးဖြင့် ထူးချွန်စွာ အောင်မြင်ခဲ့ကြသူများ၊ အတန်းကျောင်းများတွင် ပထမဆုရရှိခဲ့သည့် ထူးချွန် ကျောင်းသူ/ကျောင်းသား များအား ဂုဏ်ပြုဆု ချီးမြှင့်ခဲ့ပြီး အခမ်းနားကို ဆုမွန်တောင်းပြီး ရုပ်သိမ်းခဲ့သည်။