ပထမဆုံးပွဲတွင် အနိုင်ရရှိခဲ့သော်လည်း ပြောင်းလဲစရာများရှိသည်ဟု ဆီးဒေါ့ဖ်ဆို

ဇန်န၀ါရီ ၂၀၊ ၂၀၁၄
M-Media

– မိမိကိုင်တွယ်သော ပထမဆုံးပွဲတွင် အနိုင်ရရှိခဲ့သော်လည်း အသင်းတွင် ပျော်ရွှင်မှုလိုအပ်နေပြီး အ၀တ်လဲခန်း အတွင်းတွင်လည်း ပြောင်းလဲမှုများ လိုအပ်နေသည်ဟု အေစီမီလန်အသင်း၏ နည်းပြသစ်ဖြစ်သူ ဆီးဒေါ့ဖ်က ပြောကြားခဲ့သည်။

အေစီမီလန် အသင်းတွင် အောင်မြင်သော ကစားသမားဘ၀ ရရှိခဲ့ပြီးနောက် နည်းပြအနေဖြင့် ပြန်လည်ရောက်ရှိလာသည့် ဆီးဒေါ့ဖ်မှာ ယမန်နေ့က ဆန်စီရိုတွင် ယမန်နေ့က ကစားခဲ့သည့် ဗီရိုနာအသင်းနှင့်ပွဲတွင် အေစီမီလန်အသင်း ၁-ဂိုး ဂိုးမရှိဖြင့် အနိုင်ရရှိအောင် လမ်းညွှန်ပေးနိုင်ခဲ့သည်။

“အ၀တ်လဲခန်းမှာ ကျွန်တော်တို့ အသိုက်အ၀န်းလေးတစ်ခု ဖန်တီးနိုင်ခဲ့ပြီး နိုင်သည်ဖြစ်စေ၊ ရှုံးသည်ဖြစ်စေ တစ်ပွဲပြီးတစ်ပွဲ အဲဒီလို လုပ်ရမယ် ဆိုတာလည်း ကျွန်တော်ပြောခဲ့ပါတယ်။ ဒါမှသာ ကျွန်တော်တို့ တစ်ယောက်ကိုတစ်ယောက် စောင့်ရှောက်နိုင်မှာပါ။ ရလဒ်တိုင်း အတွက် ကျွန်တော်တို့မှာ တာဝန်ရှိပါတယ်” ဟု Sky Spotr Italia သတင်းဌာနသို့ ဆီးဒေါ့ဖ်က ပြောကြားခဲ့သည်။

ထိုပွဲတွင် တစ်လုံးတည်းသော အနိုင်ဂိုးအား ပင်နယ်တီမှတစ်ဆင့် သွင်းယူပေးခဲ့သည့် ဘာလော့တယ်လီကလည်း ဂိုးသွင်း ပြီးနောက် ဆီးဒေါ့ဖ်အား ထောက်ခံသည့် အမူအရာဖြင့်အောင်ပွဲခံခဲ့ပြီး၊ ဆီးဒေါ့ဖ်ကလည်း ဘာလော့တယ်လီနှင့် အနီးကပ် အလုပ်လုပ်သွားမည်ဟု ထည့်သွင်း ပြောဆိုခဲ့သည်။

Ref : Goal