ပြည်တွင်းငြိမ်းချမ်းရေးကို တိုင်းရင်းသားများနှင့် အတူ လက်တွဲဆောင်ရွက်မည်ဟု UNC အတွင်းရေးမှူး ပြောကြား

ဇန်န၀ါရီလ ၂၄၊ ၂၀၁၄
M-Media
အမ်တူးအေ

ရန်ကုန် ။ ။ ပြည်ထောင်စု သမ္မတမြန်မာနိုင်ငံတော် အမျိုးသားညီညွတ်ရေးကွန်ဂရက် (UNC)၏ ပထမအကြိမ် ဗဟို ဦးစီး ညီလာခံကို ယနေ့ ဇန်န၀ါရီလ ၂၄-ရက်နေ့မှစတင်၍ ဇန်န၀ါရီ ၂၆-ရက်နေ့အထိ ရန်ကုန်မြို့ မင်္ဂလာဒုံမြို့နယ် ဗုခါရီရှားခန်းမဆောင်၌ ကျင်းပပြုလုပ်လျက် ရှိသည်။

အမျိုးသားညီညွတ်ရေးကွန်ဂရက် (UNC) ဦးစီးညီလာခံကို ၃-ရက်တာ ပြုလုပ်မည်ဖြစ်ပြီး ညီလာခံပိတ်သိမ်းပွဲ အခမ်းအနားကို ဇန်န၀ါရီ ၂၆-ရက်နေ့ နေ့လည် ၂-နာရီတွင် ရန်ကုန်မြို့ ဗဟန်းမြို့နယ်၊ ရွှေဂုံတိုင်ရှိ တော်ဝင်နှင်းဆီ ခန်းမ၌ ပြုလုပ်မည်ဖြစ်ပြီး မီဒီယာများမှ တက်ရောက်နိုင်ရန်လည်း ဖိတ်ကြားထားကြောင်း သိရသည်။

အဆိုပါ ဦးစီးညီလာခံသို့ ကချင်ပြည်နယ်၊ မွန်ပြည်နယ်၊ စစ်ကိုင်းတိုင်း၊ မန္တလေးတိုင်း၊ ပဲခူးတိုင်း၊ ရန်ကုန်တိုင်း၊ ဧရာဝတီတိုင်း တို့မှ ဗဟိုဦးစီးစုစုပေါင်း ၁၀၀-ခန့် တက်ရောက်ခဲ့ကြောင်းသိရသည်။

ညီလာခံနှင့်ပတ်သက်၍ UNC ၏ အတွင်းရေးမှူးအား မေးမြန်းခဲ့ပါသည်။

“အခုပြုလုပ်တဲ့ ညီလာခံက UNC ရဲ့ ပထမဆုံးအကြိမ် ညီလာခံပါ။ ကျွန်တော်တို့ ပါတီရှိနေတယ်ဆိုတာကိုလည်း သိစေချင်တယ်။ ကျွန်တော်တို့တွေ ဘာတွေလုပ်နေတယ်ဆိုတာကိုလည်း သိစေချင်တယ် ဒါကြောင့် ညီလာခံကို လုပ်တာပါ။ ညီလာခံကနေ ရှေ့ဆက်လုပ်မယ့် လုပ်ငန်းစဉ်တွေ ချမှတ်မယ်။ အခုက ဗဟို ဦးစီးညီလာခံပါ။ ကချင်ပြည်နယ်၊ မွန်ပြည်နယ်၊ စစ်ကိုင်းတိုင်း၊ မန္တလေးတိုင်း၊ ပဲခူးတိုင်း၊ ရန်ကုန်တိုင်း၊ ဧရာဝတီတိုင်းတို့က တက်ရောက်ပါတယ်။

ဟုတ်ကဲ့ ကျွန်တော်တို့ UNC အနေနဲ့ ပြည်တွင်းငြိမ်းချမ်းရေး အတွက် တိုင်းရင်းသား ပါတီတွေနဲ့ အတူ ပူးပေါင်းလက်တွဲ လုပ်ဆောင်နေပါမယ်။ အရင်ကလည်း လုပ်ဆောင်နေပါတယ်။ ဆက်ပြီးတော့လည်း လက်တွဲသွားမှာပါ။ ဒီလို လုပ်ဆောင်တဲ့အခါမှာလည်း ဒီမိုကရေစီ ကျင့်စဉ်တွေကို အကောင်အထည် ဖော်ဖို့ ပါတီအားလုံးနဲ့ လက်တွဲသွားမှာပါ။ အဓိက တိုင်းရင်းသား လူမျိုးစု ပါတီတွေနဲ့ ပူးပေါင်းသွားမှာပါ။

နောက်တစ်ခုက ပျောက်ကွယ်နေတဲ့ ပသီလူမျိုးစုကို ပြန်လည် ဖော်ထုတ်ဖို့၊ ပသီလူမျိုးအဖြစ် နိုင်ငံတော်က အသိအမှတ်ပြုပေးဖို့၊ ၂၀၁၄-သန်းခေါင်စာရင်းနဲ့ နောက်ဆက်တွဲမှာလည်း ပသီလူမျိုးတွေကို အသိအမှတ်ပြုလာဖို့ ကြိုးစားပါမယ်။ ဟုတ်ကဲ့ ညီလာခံပြီးသွားရင်တော့ လုပ်ငန်းစဉ်တွေကို ဆက်လက်လုပ်ဆောင်သွားမှာပါ။

ဟုတ်ကဲ့ပါ UNC က ၂၀၁၃-ခု ဖေဖော်ဝါရီ လနှောင်းပိုင်းမှာ ပါတီမှတ်ပုံတင်ခွင့် ရရှိခဲ့ပြီးတဲ့ တစ်နှစ်နီးပါး ကာလအတွင်း ကျွန်တော်တို့ လုပ်ဆောင်ခဲ့တာတွေက ပါတီရဲ့ လုပ်ငန်းစဉ်တွေဖြစ်တဲ့ တိုင်းရင်းသားတွေနဲ့ ချိတ်ဆက် လုပ်ဆောင်တာတွေ၊ ပါတီရဲ့ အာဘော်တွေဖြစ်တဲ့ စာစောင်ကို ထုတ်ဝေခဲ့တယ်။ ဆွေးနွေးပွဲတွေ၊ အစည်းအဝေးတွေကိုလည်း ဆက်တိုက် လုပ်ဆောင်နိုင်ခဲ့ပါတယ်။ နောက်ပြီးတော့ ရခိုင်အရေး ကိစ္စနဲ့ တခြားသော အရေးကိစ္စတွေမှာ သမ္မတကြီးထံ တိုက်ရိုက် တင်ပြမှုတွေ လုပ်ခဲ့ပါတယ်။ ပသီလူမျိုးစုကို ထည့်သွင်းပေးဖို့ ၀န်ကြီးဦးခင်ရီနဲ့တွေ့ဆုံ ပြောဆိုမှုတွေ လုပ်ခဲ့ပါတယ်။

UNC အနေနဲ့ ပသီ တိုင်းရင်းသားဖြစ်ရေး တစ်ခုတည်းကိုပဲ ဦးတည်ဆောင်ရွက်တာ မဟုတ်ပါဘူး။ ဒီမိုကရေစီကျင့်စဉ်နဲ့ အညီ တိုင်းရင်းသားပေါင်းစုံနဲ့ လက်တွဲပြီး ပြည်တွင်းငြိမ်းချမ်းရေးကို ဆက်လက် ဖော်ဆောင်သွားမှာဖြစ်ပါတယ်။”ဟု UNC  အမှုဆောင် အတွင်းရေးမှူးချုပ်ဖြစ်သူ ဦးညီညီလတ်မှ M-Media ၏ မေးမြန်းချက်ကို ဖြေကြားခဲ့ပါတယ်။