ရန်ကုန်၊မန္တလေးမှလွဲပြီး ကျန်နည်းပညာ တက္ကသိုလ်များ၌ BE ဘွဲ့မပေးရေး အဆို TU ကျောင်းသားများကန့်ကွက်

ဇန်နဝါရီ ၂၄၊ ၂၀၁၄
M-Media
သတင်း-သူရိန်

ရန်ကုန်၊မန္တလေးမှလွဲပြီး  ကျန် နည်းပညာတက္ကသိုလ်များတွင် တက်ရောက်နေသော ကျောင်းသားကျောင်းသူများကို BE ဘွဲ့မပေးတော့ သတင်း အပေါ် ကန့်ကွက်သွားမည်ဖြစ်ကြောင်း နည်းပညာတက္ကသိုလ် ကျောင်းသားများက ဆိုသည်။

ပြီးခဲ့သည့် ရက်ပိုင်းက ရန်ကုန်တက္ကသိုလ် စိန်ရတုခန်းမမှာ ကျင်းပခဲ့သော ပညာရေးပြုပြင်ပြောင်းလဲမှု ဆိုင်ရာ အလုပ်ရုံဆွေးနွေးပွဲတွင် Center of Excellence (COE) နှစ်ကျောင်းဖြစ်သည့် ရန်ကုန်နည်းပညာတက္ကသိုလ် နှင့် မန္တလေးနည်းပညာ တက္ကသိုလ်ကျောင်းများမှ နှစ်စဉ် BE ဘွဲ့ရ အင်ဂျင်နီယာ (၇၀၀) စီမွေးထုတ်ပေးမည်ဖြစ်ကြောင်း၊ ကျန်နည်းပညာ တက္ကသိုလ်များတွင် BE ဘွဲ့ချီးမြှင့်ခြင်းပြုမည် မဟုတ်သည့် အဆိုကို တင်သွင်းထားကြောင်း သိရသည်။

ယင်းအဆိုနှင့် စပ်လျဉ်း၍ နည်းပညာ တက္ကသိုလ် ကျောင်းသားကျောင်းသူများက ဆန့်ကျင် ကန့်ကွက်သွားမည်ဖြစ်ပြီး လက်ရှိတွင် ဆန့်ကျင်ကန့်ကွက်သည့် လက်မှတ်ပေါင်း ၄၀၀၀ ကျော်စုစည်းရရှိနေပြီဖြစ်ကြောင်း သိရသည်။

BEမပေးသည့်အဆုိုနှင့် ပတ်သက်ပြီး နည်းပညာ တက္ကသိုလ်(သန်လျင်)မှ မြို့ပြအင်ဂျင်နီယာ ဘာသာရပ်မှ ကျောင်းသားတစ်ဦးက ယခုလို မှတ်ချက်ပြုပါတယ်။ “ကျွန်တော်တို့ နည်းပညာ တက္ကသိုလ်ကျောင်းသားတွေကို ဘာလို့ BE ဘွဲ့ မပေးတာလဲ။ COE ကျောင်းတွေနဲ့ အဆင့်ချင်း မတူလို့လား။ ဒီလိုသာ ခွဲခြားပြီး လုပ်နေမယ်ဆိုရင် နောက်ပိုင်း လုပ်ငန်းခွင်ဝင်တဲ့အခါ အခက်အခဲတွေရှိလာလိမ့်မယ်။ ကျွန်တော်တို့ကျောင်းသားထု အားလုံးကတော့ ဒီအဆိုကို ကန့်ကွက်ပါတယ်။”

“လက်ရှိရေးဆွဲထားသော တယူသန် အတ္တဆွဲ လူတစ်စု ဟန်ပြ ပညာရေးထက် တန်းတူညီမျှ အမျိုးသားပညာရေး မူဝါဒသို့သာ ပြောင်းလဲ ကျင့်သုံးသင့်တယ်။ GTC နှင့် GTI များ အခြေခံလုပ်သားအတွက် လိုအပ်သည်ထင်ပါက ထပ်မံဖွင့်လှစ်သင့်သည်။ COE နှင့် TU ဟူ၍ ခွဲခြား မထားဘဲ အရည်အချင်း ပြည့်ဝသော အင်ဂျင်နီယာများ အမိနိုင်ငံတော်ကြီးအတွက် များစွာ မွေးထုတ်ပေးသင့်သည်။”ဟု နည်းပညာတက္ကသိုလ်(သန်လျင်) ကျောင်းသားသမဂ္ဂမှ ကိုကျော်ဇင်ထက်ကဆိုပါတယ်။

“TU ကျောင်းသား ကျောင်းသူများကို BE မပေးရေးကိစ္စနဲ့ ပတ်သက်ပြီးနည်းပညာ တက္ကသိုလ်(သန်လျင်) ကျောင်းသားများ သမဂ္ဂသည် ကန့်ကွက်ကြောင်း လက်မှတ်များ စုဆောင်းနေပြီး ဆွေးနွေးပွဲတွင် ကျောင်းသား ကျောင်းသူများလိုလားသည့် စနစ် တစ်ခုဖြစ်လာစေရန်ကိုသာ တင်ပြတောင်းဆိုရန် လုပ်ဆောင်နေကြောင်း”ဖြင့် နည်းပညာ တက္ကသိုလ်(သန်လျင်) ကျောင်းသား သမဂ္ဂ၏ ဖေစ့်ဘုတ် စာမျက်နှာတွင်ဖော်ပြထားသည်။

ဓါတ်ပုံအညွှန်း- TU များ၌ BE မပေးရေးအဆိုကန့်ကွက်ပြီး ဆက်လက်လုပ်ဆောင်မည့် လုပ်ငန်းစဉ်များနှင့် ပတ်သတ်၍ ဆွေးနွေးပွဲကို နည်းပညာတက္ကသိုလ် (သန်လျင်)တွင် ပြုလုပ်စဉ်
Photo Credit- နည်းပညာတက္ကသိုလ်(သန်လျင်) ကျောင်းသားများသမဂ္ဂ (TTUSU) FB

TU= Technological University