မလေးရှား MAS နှင့် MAI လေကြောင်းလိုင်းတို့ အကျိုးတူ ပူးပေါင်းရေး စာချုပ်သစ် လက်မှတ်ရေးထိုး

ဇန်နဝါရီ ၂၅၊ ၂၀၁၄
M-Media

ကွာလာလမ်ပူ။    ။ မလေးရှားလေကြောင်း MAS – Malaysia Airlines နှင့် အပြည်ပြည်ဆိုင်ရာမြန်မာလေကြောင်း ပို့ဆောင်ရေး (MAI) တို့သည် လက်ရှိ ရန်ကုန်ခရီးစဉ် ၁၄ ကြောင်းမှသည် ၁၉ ကြောင်းအထိ တိုးမြှင့်နိုင်ရန် အကျိုးတူပူးပေါင်းရေး စာချုပ်သစ် တစ်ရပ်ကို ချုပ်ဆိုလိုက်သည်။ ၎င်းမှာ မြန်မာ့လေကြောင်းအတွက် MAS မှ သယ်ယူပေးမည့် ကွာလာလမ်ပူ-ရန်ကုန်-ကွာလာလမ်ပူ ခရီးစဉ်ဖြစ်သည်။ ဖေဖော်ဝါရီလ ၁၅ ရက်နေ့တွင် ယင်းသဘောတူအစီအစဉ် စတင်သက်ဝင်မည်ဖြစ်ပြီး ကြိုတင်လက်မှတ်များကို ဖေဖော်ဝါရီလ ၁၀ နေ့မှ စတင်မှာကြားနိုင်ကြောင်း သိရသည်။

သဘောတူညီချက်များ၌ MAS မှ စင်္ကာပူ၊ လန်ကာဝီ၊ ဘန်ကောက် နှင့် ပီနန်ခရီးစဉ်များကိုလည်း မြန်မာ့လေကြောင်းအတွက် ခွင့်ပြုပေးမည်ဟုလည်း ပါဝင်သည်။

“ ဒါဟာ ၂၀၁၄ မလေးရှားခရီးသွားနှစ်မှာ နိုင်ငံရပ်ခြားခရီးသည်များ တိုးပွားရရှိရေးဈေးကွက်ကို ဦးစားပေးတဲ့အနေနဲ့ လေကြောင်းခရီးစဉ်ဆိုင်ရာ စပျိုးခြေလှမ်းသစ်တွေထဲက တစ်ခုဖြစ်ပါတယ် ” ဟု MAS အမှုဆောင်အရာရှိချုပ် Ahmad Jauhari က ပြောကြားသည်။

ဤအကျိုးတူပူးပေါင်းဆောင်ရွက်မှု တိုးမြှင့်ဖော်ဆောင်နိုင်ရန် ရန်ကုန်သို့ အသွားအပြန်ခရီးစဉ်ကို ချွေတာရေး ခရီးစဉ် အတွက် RM 464 နှင့် စီးပွားရေးခရီးစဉ်အတွက် RM1401 နှုန်းထားဖြင့် စတင်ဆောင်ရွက်ပေးတော့မည်ဖြစ်သည်။

မလေးရှားလေကြောင်းလိုင်းတွင် လတ်တစ်လော၌ ကမ္ဘာတစ်ဝှမ်းတိုက်ရိုက်ပျံသန်းမှုခရီးစဉ် ၆၀ အထက်ရှိနေပြီး၊ မိမိ၏လုပ်ငန်းလက်တွဲဖော်များနှင့် နောက်ထပ်ခရီးစဉ် ၈၀၀ ကို နိုင်ငံပေါင်း ၁၅၀ ကျော်တွင် တိုးချဲ့ပျံသန်းနိုင်ရန် စီစဉ်လျက်ရှိသည်။

Ref: The Star