မန်ယူမှာ ချန်ပီယံပြေးလမ်းကြောင်းတွင် ရှိနေသည်ဟု နည်းပြဟောင်း ဖာဂူဆန် အံ့အားသင့်ဖွယ်ပြောဆို

ဇန်န၀ါရီ ၂၅၊ ၂၀၁၄
M-Media

–  ၁၉၈၉ နောက်ပိုင်း ဆိုးရွားသော ရလဒ်များကို တွေ့ကြုံနေရသော်လည်း အသင်းအနေဖြင့် ယခုနှစ်တွင် ပရီးမီးယားလိဂ် ချန်ပီယံဘွဲ့အား ကာကွယ်နိုင်သေးသည်ဟု မန်ယူအသင်း၏ ဂန္ထ၀င်နည်းပြ ဖာဂူဆန်က ပြောကြားလိုက်သည်။

ဖာဂူဆန်မှာ အသင်းအတွက် အကြိမ် ၂၀ မြောက် ပရီးမီးယားလိဂ်ဖလားအား ရယူပေးခဲ့ပြီးနောက် ၂၀၁၂-၁၃ ဘောလုံးရာသီ အကုန်တွင် အနားယူ သွားခဲ့သူဖြစ်ပြီး လက်ရှိနည်းပြ ဒေးဗစ်မိုယက်စ်ကိုလည်း ၎င်းကိုယ်တိုင်ပင် လွှဲပေးခဲ့ခြင်းဖြစ်သည်။

“ယူနိုက်တက်(မန်ယူ)ဟာ ဘာမဆို လုပ်နိုင်တယ်လို့ ကျွန်တော်ယုံကြည်ပါတယ်။ သူတို့မှာ ကောင်းမွန်တဲ့ အတွေးအမြင်တွေ၊ သမိုင်းကြောင်းတွေ ရှိပါတယ်။ သူတို့ အမြဲတမ်းကောင်းကောင်း လုပ်နိုင်ပါတယ်” ဟု ဖာဂူဆန်က Sky Sport သို့ ပြောကြားခဲ့သည်။

ထို့ပြင် မန်ယူ၏ မြို့ခံပြိုင်ဘက် မန်စီးတီးအသင်းမှာ ကောင်းမွန်သော အနေအထားတွင် ရှိနေကြောင်း၊ အာဆင်နယ်အသင်းမှာလည်း အခွင့်အရေး ကောင်းများရှိနေကြောင်း ပြောကြားခဲ့ပြီး ပရီးမီးယားလိဂ်ဖလားအတွက် ပြိုင်ဆိုင်မှု ပြင်းထန်လာခြင်းကိုလည်း ချီးကျူးပြောဆိုခဲ့သည်။

Ref : Goal