ကမ္ဘာ့ဖလား ကျင်းပခြင်းအား ဆန့်ကျင်သည့် ဆန္ဒပြမှုများ ဘရာဇီးတွင် ရဲတပ်ဖွဲ့က ရာချီဖမ်းဆီးခဲ့

ဇန်န၀ါရီ ၂၇၊ ၂၀၁၄
M-Media

– ယခုနှစ်အတွင်း ကျင်းပမည့် ကမ္ဘာ့ဖလားဘောလုံးပြိုင်ပွဲအတွက် ကုန်ကျငွေ များပြားမှုကို မကျေနပ်သောကြောင့် နိုင်ငံတစ်ဝှမ်းဖြစ်ပေါ်လာသည့် ဆန္ဒပြမှုများအား ဘရားဇီးလ်ရဲတပ်ဖွဲ့က အင်အားသုံး နှိမ်နင်းခဲ့သည်ဟုသိရသည်။

စနေနေ့က စတင်ကာ ဆော်ပေါ်လိုမြို့တွင် ထောင်ပေါင်းများစွာသော ပြည်သူများက ဆန္ဒပြခဲ့ကြခြင်း ဖြစ်ပြီး ယမန်နေ့တွင် ရဲတပ်ဖွဲ့က လူ ၁၀၀ ကျော် ဖမ်းဆီးခဲ့သည်။ ရဲတပ်ဖွဲ့၏ အင်အားသုံး လူစုခွဲမှုကြောင့် အချို့မှာ နီးစပ်ရာ ဟိုတယ်အတွင်းသို့ ၀င်ရောက် ပုန်းအောင်းခဲ့ သော်လည်း နောက်ပိုင်းတွင် ရဲကားများ ရောက်လာကာ ၎င်းတို့အား ဖမ်းဆီးခေါ်ဆောင်သွားခဲ့ကြသည်။

ကမ္ဘာ့ဖလား ကျင်းပရေးအတွက် ငွေအမြောက်အများ သုံးစွဲမှုကို မကျေနပ်သောကြောင့် ဆန္ဒပြမှုများမှာ ပြီးခဲ့သည့် နှစ်ကတည်းက စတင် ဖြစ်ပွားခဲ့ခြင်း ဖြစ်ပြီး ထိုဆန္ဒပြမှုအား Anonymous Rio အဖွဲ့က ဆိုရှယ်မီဒီယာများကို သုံးကာ စီစဉ်ကျင်းပခြင်းဖြစ်သည်။ Black Block ဟုခေါ်သည့် အဆိုပါ ဆန္ဒပြမှုများ အတွင်း ရဲကားများ၊ ကားအငယ်စားများအား မီးရှို့ဖျက်ဆီးခြင်း၊ ဘဏ်များ၏ မှန်များကို ရိုက်ခွဲခြင်းများပြုလုပ်ခဲ့ကြပြီး၊ ရဲတပ်ဖွဲ့ ကလည်း မျက်ရည်ယို ဗုံးများ၊ ရာဘာကျည်ဆံများ အသုံးပြုကာ နှိမ်နင်းခဲ့ကြသည်။

မိမိတို့မှာ ဘောလုံးအားကစားအား ရူးသွပ်ကြသူများဖြစ်သော်လည်း တိုင်းပြည်အတွင်း လိုအပ်နေသည့် ပညာရေး၊ ကျန်းမာရေး၊ အိုးအိမ်နှင့် လမ်းပန်း ဆက်သွယ်ရေး လုပ်ငန်းများအား လစ်လျူရှုကာ ကမ္ဘာ့ဖလားပြိုင်ပွဲအတွက် ငွေသန်းပေါင်းများစွာ သုံးစွဲသော အစိုးရအား မကျေနပ်၍ ဆန္ဒပြခြင်းဖြစ်သည်ဟု ပြည်သူတစ်ဦးက ပြောကြားခဲ့သည်။

Ref : Aljazeera