သယံဇာတနှင့် ပတ်သက်သည့် အလုပ်ရုံဆွေးနွေးပွဲ မွတ်စလင် အဖွဲ့အစည်းများမှ လူငယ်များပြုလုပ်

ဖေဖော်ဝါရီ ၄၊ ၂၀၁၄
M-Media
ချမ်းငြိမ်းအေး

ရန်ကုန်   ။      ။        သယံဇာတနှင့် သတ္တုတွင်း ဆိုင်ရာ အလုပ်ရုံဆွေးနွေးပွဲကို EITI မှ ဦးစီးကျင်းပပြီး အစ္စလာမ်ဘာသာဝင် လူငယ်များပါဝင်သည့် အလုပ်ရုံ ဆွေးနွေးပွဲတစ်ခုကို ယနေ့ ဖေဖော်ဝါရီလ ၄ ရက်နေ့တွင် Sumit Park View Hotel တွင် နံနက် ၉- နာရီမှ ညနေ ၄- နာရီ ထိ ကျင်းပပြုလုပ်ခဲ့ပါသည်။

၎င်းဆွေးနွေးပွဲတွင် လူငယ်များအနေနှင့် ယခုနိုင်ငံတော် အစိုးရအနေဖြင့် သယံဇာတနှင့် ပတ်သက်ပြီး လုပ်ဆောင်ချက်များ၊ သယံဇာတနှင့် ပတ်သက်ပြီး နိုင်ငံ၏ ၀င်ငွေ ထွက်ငွေများ၊ လုပ်ဆောင်ချက်များ၊ နည်းပညာ၊ ဗဟုသုတ များကို လူငယ်များ အနေနှင့် ဆက်လက်မျှဝေ လုပ်ဆောင် သွားရန် ရည်ရွယ်ပြီး ထိုအလုပ်ရုံဆွေးနွေးပွဲကို ကျင်းပရခြင်းဖြစ်ကြောင်း သိရှိ ရပါသည်။

“မြန်မာနိုင်ငံအစိုးရကနေ ယခုဆိုလျှင် သဘာဝ တွင်းထွက် သယံဇာတကနေ အခြေခံပြီး ပွင့်လင်းမြင်သာမှုတွေကို ဖော်ဆောင်တော့မယ်။ အဲတော့ ဘာသာပေါင်းစုံ၊ တိုင်းရင်းသားပေါင်းစုံကို EITI နဲ့ ပတ်သက်ပြီး အခုလို အလုပ်ရုံဆွေးနွေးပွဲတွေ ပြုလုပ်ပေးနေတာ ဖြစ်တယ်။ အစိုးရနဲ့ ဘာတွေ လုပ်ဆောင်နေလဲဆိုတာ ပြည်သူတွေကို ချပြတဲ့ သဘောပါပဲ။ EITI အနေနဲ့ နောက်ဘာတွေ ဆက်လုပ်သွားမယ်ဆိုတာကိုလည်း ဆွေးနွေးသွားမယ်။ အခုဆွေးနွေးပွဲက အစ္စလာမ် ဘာသာဝင်တွေချည်း သီးသန့်ပဲ။ အဲလိုပဲ တခြား ဘာသာဝင်တွေလည်း ပြုလုပ်ဖို့ရှိပါတယ်” ဟု ဒေါ်ညှိမာသန်းက ပြောကြား ခဲ့ပါသည်။

ဆက်လက်ပြီး ” အခုဆွေးနွေးသွားမှာက သတ္တုတွင်းလုပ်ငန်းနဲ့ အခု EITI ရှေ့ဆက်ရေးအကြောင်းကို အဓိကဆွေးနွေးသွားမှာ ဖြစ်ပါတယ်။ ဘေးထွက် ဆိုးကျိုးတွေနဲ့ ကုစားပုံကုစားနည်းတွေ ရေနံဥပဒေရဲ့ ပြဌာန်းချက်တွေနဲ့ လက်ရှိဆောင်ရွက်နေတာတွေကိုပါ ဆွေးနွေးသွားမှာပါ။အခုလို လူငယ်တွေ အနေနဲ့ တက်ရောက်လာတာအရမ်းကောင်းမွန်ပါတယ်။ နည်းပညာတွေပြန့်ပွားသွားတော့ လူငယ်တွေရဲ့ အနာဂတ်တွေ ကောင်းမွန်လာမှာပါ။ နိုင်ငံတော် အနေနဲ့လည်း သယံဇာတကို ဥပဒေနှင့် အညီ လုပ်ဆောင်သွားဖို့ လိုအပ်ပါတယ်။ သယံဇာတဆိုတာ တိုင်းရင်းသား အားလုံးက ပိုင်ဆိုင်တာပါ။ ဒါပေမဲ့ အခုလက်ရှိ ဥပဒေမှာတော့ နိုင်ငံတော် ပိုင်တာပဲ ရှိနေသေးတယ်၊ တိုင်းရင်းသားတွေ ပိုင်ဆိုင်တာကို သက်သေပြဖို့ လုပ်ဆောင်ရမယ်” ဟု ဦးဆောင်ဆွေးနွေးသူ ဦးစိန်မြင့်က ပြောကြားခဲ့ပါသည်။

ယခုလို အလုပ်ရုံဆွေးနွေးပွဲတွေကို ရှေ့လျောက် လုပ်ဆောင်သွားရန်ရှိပြီး လူငယ်များအနေဖြင့် သယံဇာတနှင့် ပတ်သက်ပြီး အသိပညာများ၊ ဗဟုသုတ များစွာကိုရရှိစေရန် ရည်ရွယ်ပြီး ပြုလုပ်ခြင်းဖြစ်ကြောင်း သိရှိရပါသည်။ ထိုဆွေးနွေးပွဲသို့ မွတ်စလင်အဖွဲ့အစည်းအသီးသီးမှ လူငယ်များ တက်ရောက် ဆွေးနွေးခဲ့ကြောင်းလည်း သိရှိရပါသည်။