မက်ဆီ ဂိုးပြန်သွင်းတဲ့ ဘာစီလိုနာနဲ့၊ ရော်နယ်ဒို မပါပေမယ့် ဂိုးပြတ်ခဲ့တဲ့ ရီးယဲလ်တို့ရဲ့ လာလီဂါပွဲစဉ် ၂၃

ဖေဖော်ဝါရီ ၁၁၊ ၂၀၁၄
M-Media

– ဒီတစ်ပါတ်လာလီဂါ ပွဲစဉ် ၂၃ မှာတော့ ထိပ်ဆုံးက ၃ သင်းလုံး ပွဲကျပ်တွေ ကစားခဲ့ရပြီး ထိပ်ဆုံးနေရာလည်း အပြောင်းအလဲဖြစ်ခဲ့ပါတယ်။

ခုနောက်ပိုင်းပွဲတွေမှာ ခြေစွမ်းကျလာပြီး ပြီးခဲ့တဲ့ တစ်ပတ်ကလည်း ဗလင်စီယာကို အိမ်ကွင်းမှာ ရှုံးထားတဲ့ ဘာစီလိုနာကတော့ အဝေးကွင်းမှာ ဆီးဗီးလားကို ၄ ဂိုး ၁ ဂိုးနဲ့အနိုင်ယူနိုင်ခဲ့ပါတယ်။ ၁၅ မိနစ်မှာ အိမ်ရှင်တို့က ဦးဆောင်ဂိုးရခဲ့ပေမယ့် ကစားပုံ ပိုကောင်းတဲ့ ဘာကာတို့က နောက်ပိုင်းမှာ ချေပဂိုးနဲ့ အနိုင်ဂိုးတွေကို သွင်းယူခဲ့တာပါ။ ဒဏ်ရာကပြန်လာပြီး ခြေစွမ်း မပြနိုင်တဲ့အတွက် ဝေဖန်ခံနေရတဲ့ မက်ဆီလည်း ဒီပွဲမှာ ၂ ဂိုးသွင်းခဲ့ပါတယ်။

ပြီးခဲ့တဲ့တစ်ပတ်က ထိခဲ့တဲ့ အနီကဒ်ကြောင့် ရော်နယ်ဒို မပါဝင်နိုင်တဲ့ ရီးယဲကလည်း အိမ်ကွင်းမှာ ဘေးလ်၊ ဘင်ဇီမာတို့ရဲ့ ဂိုးတွေနဲ့အတူ အနိုင်ရခဲ့ပါတယ်။ ထိပ်ဆုံးက အက်သလက်တီကိုကတော့ ဇယားအောက်ခြေနားက အလ်မာရီယာကို အဝေးကွင်းမှာ နောက်ကျဂိုးတွေနဲ့ အရှုံးပေးခဲ့ရပါတယ်။ ဘောလုံးပိုင်ဆိုင်မှု အသာနဲ့ ကစားနိုင်ပေမယ့် လိုအပ်တဲ့ဂိုးတွေကိုတော့ အက်သလက်တီကိုတို့ မရခဲ့ပါဘူး။ ၈၅ မိနစ်မှာ ပင်နယ်တီဧရိယာ အတွင်းမှာ ပြစ်ဒဏ်ကျူးလွန်ခဲ့တဲ့ အတွက် အက်သလက်တီကို ဂိုးသမား တိုက်ရိုက် အနီကဒ်နဲ့ အထုတ်ခံခဲ့ရပါတယ်။

ဗလင်စီယာကလည်း အိမ်ကွင်းမှာ ဇယားအောက်ခြေက ဘက်တစ်ကို တိုက်စစ်မှူးတွေရဲ့ အစွမ်းပြမှုနဲ့အတူ ဂိုးပြတ်ခဲ့ပြီး၊ တန်းဆင်းဇုန်းက ဗယ်လက်ကာနိုကလည်း အိမ်ကွင်းမှာ မလာဂါကို ၄ ဂိုး ၁ ဂိုးနဲ့ အံ့ဖွယ် အနိုင်ယူနိုင်ခဲ့ပါတယ်။

ပြီခဲ့တဲ့တစ်ပတ်က သုံးမှတ်အသာနဲ့ ဇယားကို ဦးဆောင်နိုင်ခဲ့တဲ့ အက်သလက်တီကိုတို့ ဒီတစ်ပတ်မှာ ရှုံးနိမ့်ခဲ့ရတာကြောင့် ဘာစီလိုနာက အမှတ်တူ ဂိုးကွာခြားချက်အသာနဲ့ ထိပ်ဆုံးပြန်ရောက်လာပါတယ်။

လာလီဂါ ပွဲစဉ် ၂၃ ရဲ့ ရလဒ်များကတော့ အောက်ပါအတိုင်းဖြစ်ပါတယ်။

အက်စပန်ညို ၁-၀ ဂရာနာဒါ
ဗလင်စီယာ ၅-၀ ဘက်တစ်
ဗယ်လက်ကာနို ၄-၁ မာလာဂါ
ရီးယဲလ် ၄-၂ ဗီလာရီးယဲလ်
အလ်မာရီယာ ၂-၀ အက်သလက်တီကို
အိုဆာဆူနာ ၂-၀ ဂီတာဖေး
ဗယ်လာဒိုလစ် ၂-၂ အလ်ချီ
ရီးယဲလ်ဆိုဆီဒက် ၀-၀ လီဗန်တေး
ဆီးဗီးလား ၁-၄ ဘာစီလိုနာ