ကမ္ဘာ့ဖလားပြိုင်ပွဲဝင် ကစားသမားအားလုံး တားမြစ်ဆေး စစ်ဆေးမှု ခံရမည်

ဖေဖော်ဝါရီ ၁၇ ၊ ၂၀၁၄
M-Media

– ကမ္ဘာ့ဖလားဖွင့်ပွဲမတိုင်ခင် ပြိုင်ပွဲဝင်ကစားသမားအားလုံးအား ဆေးစစ်မှုများ ပြုလုပ်သွားမည်ဟု ကမ္ဘာ့ဘောလုံးအဖွဲ့ချုပ် ဖီဖာ၏ ဆေးအဖွဲ့မှ ဆရာဝန်ချုပ် ဂျီရီ ဒီမိုရက်က ကတိပြုပြောကြားခဲ့သည်။

ဖီဖာအနေဖြင့် တားမြစ်ဆေးစစ်ဆေးမှု ပြုလုပ်နိုင်ရန် ကမ္ဘာ့ဖလားပြိုင်ပွဲတွင် ပါဝင်ယှဉ်ပြိုင်ခွင့် ရထားသော အသင်း ၃၂ သင်းစလုံးမှာ ပြိုင်ပွဲ အတွင်းဆောင်ရွက်မည့် ၎င်းတို့၏ အစီအစဉ်များကို မတ်လ ၁ ရက်နေ့မှစ၍ ဖီဖာအား ပေးပို့ထားရမည်ဖြစ်သည်။

ဖီဖာ၏ ဆရာဝန်ချုပ် ဒီဗိုရက်ကမူ မည်သည့် အချိန်တွင် တားမြစ်ဆေးစစ်ဆေးမှုအဖွဲ့ဝင်များ လာရောက်မည်ကို အသင်းများနှင့် အသင်းသားများ သိရှိလိမ့်မည် မဟုတ်ဘဲ၊ ဇွန်လ ၁၂ ရက်နေ့ ဘရာဇီးနှင့် ခရိုအေးရှားတို့ ပထမဦးဆုံးပွဲ မတိုင်မီ ကစားသမား အားလုံးအား ဆေးစစ်မှုများ ပြုလုပ်သွားမည်ဟု ကတိပြုခဲ့သည်။

“ကျွန်တော်တို့ ဘယ်တော့ စ စစ်မလဲဆိုတာကို ကစားသမားတွေ မသိတဲ့အတွက် ကျွန်တော်ကျေနပ်ပါတယ်။ ဘာကြောင့်လဲဆိုတော့ ဆေးစစ်မှု အစီအစဉ်ကို ကျွန်တော်တို့ အပြင်ထုတ်သွားမှာ မဟုတ်လို့ပါ။ ကျွန်တော်တို့ ဘယ်အချိန်မဆို၊ ဘယ်နေရာမှာမဆိုရောက်နိုင်မှာပါ” ဟု ဒီဗိုရက်က ပြောကြားခဲ့သည်။
Ref: Goal