ဘာကာကို အိမ်ကွင်းမှာ ရှုံးတဲ့ မန်စီးတီးနှင့် အဝေးကွင်း ဂိုးပြတ်နိုင်တဲ့ PSG တို့ရဲ့ ချန်ပီယံလိဂ် ရှုံးထွက် ပထမအကျော့

ဖေဖော်ဝါရီ ၁၉၊ ၂၀၁၄
M-Media

ဒီမစ်ချယ်လီရဲ့ အနီကဒ်နဲ့အတူ အိမ်ကွင်းမှာ ဘာကာကို အရှုံးပေးခဲ့ရတဲ့ မန်စီးတီး၊ အဝေးကွင်းမှာ ဂိုးပြတ်ခဲ့တဲ့ ပီအက်စ်ဂျီတို့ရဲ့ ချန်ပီယံလိဂ် ရှုံးထွက် ပွဲစဉ်များ

– ဥရောပချန်ပီယံလိဂ် ရှုံးထွက်ပွဲစဉ်ရဲ့ ပထမအကျော့ ၂ ပွဲကို ယနေ့နံနက်မှာ ယှဉ်ပြိုင်ကစားခဲ့ပြီး ပယ်လီဂရီနီရဲ့ မန်စီးတီးအသင်းက ဘာစီလိုနာကို အိမ်ကွင်းမှာ အရှုံးပေးခဲ့ရပါတယ်။ ပီအက်စ်ဂျီအသင်းကတော့ အီဗရာဟီမိုဗစ်ရဲ့ ခြေစွမ်းပြမှုနဲ့ အတူ လေဗာကူဆင်ကို အဝေးကွင်းမှာ ဂိုးပြတ်နဲ့နိုင်ခဲ့ပါတယ်။

အီတီဟတ်မှာကစားခဲ့တဲ့ မန်စီးတီးနဲ့ ဘာကာတို့ပွဲမှာ စပိန်ထိပ်သီး ဘာစီလိုနာအသင်းက ဘောလုံးပိုင်ဆိုင်မှုအသာနဲ့ ကစားခဲ့ပြီး သက်တောင့်သက်သာ အနိုင်ရခဲ့တာပါ။ နှစ်သင်းစလုံး လူစုံထုတ်ကစားခဲ့ပြီး ချန်ပီယံလိဂ်အတွေ့အကြုံရှိတဲ့ ဘာကာကို မန်စီးတီးတို့ မယှဉ်နိုင်ခဲ့ပါဘူး။

ပထမပိုင်းမှာ ဘာစီလိုနာတို့ ဖိကစားနိုင်ခဲ့ပေမယ့် မန်စီးတီးဂိုးပေါက်ကို ထိထိရောက်ရောက်ခြိမ်းခြောက်နိုင်ခြင်းမရှိခဲ့ဘဲ ဒုတိယပိုင်း ၅၄ မိနစ်မှာတော့ အလှည့်အပြောင်းတစ်ခုဖြစ်ခဲ့ပါတယ်။ မန်စီးတီးရဲ့ အာဂျင်တိုင်းနောက်ခံလူ ဒီမစ်ချယ်လီက ဧရိယာအတွင်းမှာ တစ်နိုင်ငံတည်းသား မက်ဆီကို ပြစ်ဒဏ်ကျူးလွန်ခဲ့တဲ့အတွက် အထုတ်ခံခဲ့ရပြီး၊ ပင်နယ်တီပေးခဲ့ရပါတယ်။ ဒီပင်နယ်တီကို မက်ဆီကပဲ အမှားအယွင်းမရှိ ကန်သွင်းယူနိုင်ခဲ့ကာ ဘာစီလိုနာကို ဦးဆောင်စေခဲ့ပါတယ်။ ဒီဂိုးဟာ မက်ဆီရဲ့ ချန်ပီယံလိဂ် ၇ ဂိုးမြောက်လည်းဖြစ်ပါတယ်။

ပရီးမီးယားလိဂ်မှာ တိုက်စစ်အကောင်းအဆုံးအသင်းဖြစ်နေတဲ့ မန်စီးတီး ဒီပွဲမှာတော့ ဂိုးသွင်းခွင့် မယ်မယ်ရရ မရခဲ့ဘဲ ပထမပိုင်းမှာ ၂ ကြိမ်သာ ဘာကာဂိုးပေါက်ကို ခြိမ်းခြောက်နိုင်ခဲ့တာပါ။ ဒုတိယပိုင်း တစ်ယောက် ထုတ်ခံရပြီးတဲ့ နောက်မှာတော့ ဘာကာတို့  ထိန်းကစားခဲ့ပြီး ဒုတိယပိုင်းနောက်ဆုံး မိနစ်မှာ အဲလ်ဗက်စ်က ဒုတိယဂိုးကို ထပ်သွင်းခဲ့ပြီး ၂ ဂိုး ဂိုးမရှိနဲ့ ပွဲသိမ်းနိုင်ခဲ့ပါတယ်။

ဒီပွဲနိုင်ခဲ့တဲ့အတွက် နောက်တစ်ဆင့် တက်ရေးအတွက် ဘာကာတို့ အခွင့်အရေးကောင်းသွားပြီး မန်စီးတီးကတော့ ဒုတိယအကျော့မှာ ရုန်းကန်ရတော့မှာပါ။

ပီအက်စ်ဂျီကလည်း အဝေးကွင်းမှာ လေဗာကူဆင်ကို အီဗရာဟီမိုဗစ်ရဲ့ ခြေစွမ်းပြမှုနဲ့အတူ ၄ ဂိုးပြတ်နဲ့ အနိုင်ရခဲ့ပါတယ်။ ကစားကွက်ပိုင်း၊ ခြေစွမ်းပိုင်း အသာရခဲ့တဲ့ ပီအက်စ်ဂျီတို့ ပထမပိုင်းမှာတင် ၃ ဂိုးပြတ်ခဲ့တာပါ။ ဒုတိယပိုင်း ၅၉ မိနစ်မှာ လေဗာကူဆင်က အီမီစပါဟစ် တိုက်ရိုက် အနီကဒ်နဲ့ အထုတ်ခံခဲ့ရပါတယ်။ ၈၈ မိနစ်မှာ နယူးကာဆယ် ကပြောင်းလာတဲ့ ကာဘာယီ စတုတ္ထမြောက် ဂိုးသွင်းယူပေးခဲ့ပြီး ပီအက်စ်ဂျီအသင်းကို နောက်တစ်ဆင့်တက်ရေး အခြေအနေကောင်းစေခဲ့ပါတယ်။

မန်စီတီး ၀- ၂ ဘာစီလိုနာ
လေဗာကူဆင် ၀-၄ ပီအက်စ်ဂျီ