သက်ကြီးရွယ်အိုများ အတွက် ဂေဟာသစ်များ ဖွင့်လှစ်ရန် နှင့် စောင့်ရှောက်ရေး ပေါ်လစီ ရေးဆွဲနေဟု ဦးခင်ရီပြော

ဖေဖော်ဝါရီ ၊ ၁၉၊ ၂၀၁၄
M-Media
ဘွားရိပ်သာမှာ မှီခိုနေရသော အဘွားအိုတစ်ဦး © Jessica Mudditt/ IRIN

– လာမည့် ၁၀ နှစ်အတွင်း မြန်မာနိုင်ငံရှိ သက်ကြီးရွယ်အိုအရေအတွက်မှာ တိုးပွားလာမည်ဟု ခန့်မှန်းရသောကြောင့် နိုင်ငံအတွင်း ဘိုးဘွားရိပ်သာအသစ်များ ဆောက်လုပ်ရန် လူဝင်မှုကြီးကြပ်ရေး ပြည်ထောင်စု ၀န်ကြီး ဦးခင်ရီက တိုက်တွန်းခဲ့သည်ဟု ပြည်တွင်း မီဒီယာများက ယနေ့တွင် ဖော်ပြခဲ့သည်။

ရန်ကုန်မြို့ရှိ မြို့နယ် ၂၀ တွင် အစမ်းပြုလုပ်ခဲ့သော သန်းခေါင်စာရင်း ကောက်ယူမှုများအရ အသက် ၅၇ နှစ်မှ ၅၉ နှစ်အတွင်းရှိ လူဦးရေမှာ ၁၉၇၃ ခုနှစ်၌ ၅ ရာခိုင်နှုန်းရှိခဲ့ရာမှ ၂၀၁၃ ခုနှစ်တွင် ၁၂.၂ ရာခိုင်နှုန်းရှိနေသည်ကို တွေ့ရကြောင်းဦးခင်ရီ၏ ပြောကြားမှုကို  ကိုးကား၍ Myanma Freedom Daily နေ့စဉ် သတင်းစာက ဖော်ပြခဲ့ခြင်းဖြစ်သည်။

ရန်ကုန်မြို့တွင် အိမ်ခြေမဲ့ဦးရေမှာ ၁ သောင်းကျော်ရှိပြီး ၎င်းတို့ထဲမှ ၈ ရာခိုင်နှုန်းမှာ သက်ကြီးရွယ်အိုများဖြစ်ကြသည်ဟု လူဦးရေဌာန၏ စစ်တမ်းကောက်ယူမှုအရ သိရသည်။

ကမ္ဘာတစ်ဝှမ်းရှိ သက်ကြီးရွယ်အိုများ စောင့်ရှောက်ရေး အဖွဲ့များနှင့် ချိတ်ဆက်ဆောင်ရွက်လျက်ရှိပြီး မြန်မာနိုင်ငံရှိ ပြည်သူ့ရေးရာ ကယ်ဆယ်ရေးနှင့် ပြန်လည်နေရာချထားရေး ၀န်ကြီးဌာနနှင့် ပူးပေါင်းဆောင်ရွက်လျက်ရှိသည့်  HelpAge International အဖွဲ့က မြန်မာနိုင်ငံတွင် ယခင်က မရှိခဲ့သည့် သက်ကြီးရွယ်အို စောင့်ရှောက်ရေးပေါ်လစီကို ရေးဆွဲလျက်ရှိနေသည်။

မြန်မာနိုင်ငံသားများ၏ ပျမ်းမျှ သက်တမ်းမှာ ၆၇ နှစ်ဖြစ်ပြီး၊ ဒေသတွင်းနိုင်ငံများ၏ ပျမ်းမျှ သက်တမ်းထက် နိမ့်ကျလျက်ရှိနေသည်။

နိုင်ငံ၏ ဖွံ့ဖြိုးတိုးတက်ရေးလုပ်ငန်းများကို သေချာစွာ ဆောင်ရွက်နိုင်ရန်တွက် ၂၀၁၄ ခုနှစ်တွင်ပြုလုပ်မည့် သန်းခေါင်စာရင်းကောက်ယူမှုတွင် မြန်မာနိုင်ငံသားများအနေဖြင့် မှန်ကန်စွာဖြေကြားသင့်သည်ဟု ဦးခင်ရီက ပြောကြားခဲ့သည်။

မြန်မာနိုင်ငံတွင် သန်းခေါင်စာရင်းကောက်ယူမှုကို နိုင်ငံတကာစံနှုန်းများ၊ လူ့အခွင့်အရေး စံချိန်များနှင့်အညီ မတ်လ ၃၀ ရက်နေ့မှ ဧပြီလ ၁၀ ရက်နေ့အထိ ပြုလုပ်သွားမည်ဖြစ်သည်။

ကိုးကား ဆင်ဟွာ