ရခိုင်မှ ပဋိပက္ခများ စုံစမ်းစစ်ဆေးမှုများဟာ ကျေနပ်စရာ ကောင်းအောင် မရှိဟု ကင်တားနားပြော

ဖေဖော်ဝါရီ ၂၁၊ ၂၀၁၄
M-Media
လင်းလင်း

ရန်ကုန်  ။     ။ မြန်မာနိုင်ငံမှာ လူ့အခွင့်အရေးချိုးဖောက်မှုတွေရှိနေသေးတယ်လို့ မြန်မာနိုင်ငံသို့ ၆ ရက်ကြာလာရောက်ခဲ့သော မြန်မာနိုင်ငံလုံးဆိုင်ရာ ကုလသမဂ္ဂလူ့အခွင့်အရေး အထူးကိုယ်စားလှယ် မစ္စတာ သောမတ်အိုဟေး ကင်တာနားက ဖေဖော်ဝါရီလ ၁၉ ရက်နေ့တွင် ရန်ကုန်လေဆိပ်၌ ပြုလုပ်သော သတင်းစာရှင်းလင်းပွဲတွင် ပြောကြားခဲ့သည်။

မကြာသေးမီအချိန်ကာလက ရခိုင်ပြည်နယ် ဒူချီးတန်းကျေးရွာတွင် ဖြစ်ပွားခဲ့သည့် အကြမ်းဖက်မှုများနှင့်ပတ်သက်၍ “စုံစမ်းစစ်ဆေးရေးအဖွဲ့က ဖြစ်ရပ်မှတ်တွေကို ဖော်ထုတ်ဖို့လိုပါတယ်။ အမှန်တကယ်အပြစ်ရှိသူတွေကို အရေးယူရမယ်။ နိုင်ငံတကာ နည်းပညာနဲ့ အစိုးရပူးပေါင်းပြီး အရေးယူ မှုများကို ပြုလုပ်ရန် ပြည်ထောင်စုဝန်ကြီးကိုလည်း တိုက်တွန်းခဲ့ပါတယ်။ ဖြစ်ပွားခဲ့တဲ့ ပဋိပက္ခတွေရဲ့ ဆုံးဖြတ်မှုတွေနဲ့လည်းပတ်သက်ပြီး စိုးရိမ်မိပါ တယ်” ဟု ကင်တာနားကပြောကြားခဲ့သည်။ ရခိုင်ပြည်နယ်အတွင်းဖြစ်ပျက်ခဲ့တာတွေနဲ့ပတ်သက်ပြီး အစိုးရစုံစမ်းရေးကော်မရှင်ရဲ့ စုံစမ်းမှုတွေဟာ ကျေနပ်စရာကောင်းလောက်အောင်မရှိကြောင်း ၎င်းကဆက်လက်ပြောကြားခဲ့ပါသည်။

ကချင်ပြည်နယ်တွင်းရှိ စစ်အခြေအနေများကိုလေ့လာပြီး တစ်နိုင်ငံလုံးအပစ်အခက်ရပ်စဲရေးတွင် လက်နက်ကိုင်တပ်ဖွဲ့နှင့် အစိုးရတို့မှ သဘောတူညီ ချက် များကိုဆောင်ရွက်ရာတွင် အားနည်းနေကြောင်း၊ ၎င်းတို့အနေနှင့် လူ့အခွင့်အရေးဥပဒေများကို လိုက်နာရန်လိုအပ်ကြောင်း ပြောကြားခဲ့ပါ သေး သည်။

မြန်မာအစိုးရအနေနှင့် ပြည်တွင်းငြိမ်းချမ်းရေး၊ လူမျိုးရေး နှင့် ဘာသာရေး ပဋိပက္ခများကို အဓိကထားလုပ်ဆောင်သွားရမည်ဖြစ်ကြောင်း၊ ဒီမိုကရေစီ အသွင်ကူးပြောင်းခြင်းသည်လည်း စိုးရိမ်နေရဆဲဖြစ်ကြောင်း၊ လက်ရှိအစိုးရအနေနှင့် ပြည်သူတွေအပေါ်မှာ တရားစီရင်ရာတွင် အားနည်းမှု ရှိနေ ကြောင်း ပြောခဲ့သည်။ မြန်မာနိုင်ငံ၏ အခြေခံဥပဒေပြင်ဆင်ရေး၊ တရားဥပဒေစိုးမိုးရေး၊ မီဒီယာလွတ်လပ်ခွင့်၊ နိုင်ငံရေးအကျဉ်းသားများလွတ်မြောက် မှု၊ မြန်မာနိုင်ငံဖွံ့ဖြိုးတိုးတက်ရေးများနှင့် ပတ်သက်၍ ပြောကြားခဲ့ပါသည်။

မစ္စတာ ကင်တားနားသည် မြန်မာနိုင်ငံတွင်းဖြစ်ရပ်များကို UNHRC သို့ မတ်လ ၁၄-ရက်နေ့တွင် အစီအရင်ခံစာတင်သွင်းသွားမည်ဖြစ်ပါသည်။ ၎င်းသည် မြန်မာနိုင်ငံတွင် လူ့အခွင့်အရေးအထူးကိုယ်စားလှယ်အဖြစ် ၆-နှစ်တာဝန်ထမ်းဆောင်ခဲ့ပြီး ၂၀၁၄ မတ်လတွင် တာဝန်ပြီးဆုံးမည်ဖြစ်သည်။